طه سليمان..لماذا لا ترتدي طاقيتك !!

Quote: الاخوة الاعزاء/ جمعة سعيدة عليكم انشاء الله سعدت بالتواصل معكم.. * الاخ عيسي ...حاشا لله ان يكون في نيتى اصلا ان اخرج كلامك كله (كلام متناقض وأردب ويكة ما يلايقو) فانا ما تعودت ابدا اقصاءا للراي والراي الاخر تحت لافتة ان رائي هو الراي المقدس..لك احترامي يا رجل ولمداخلتك واتمنى ان نتواصل. * قبل ان اعلق علي بقية المداخلات استميح الاخ حيدر حسن ميرغنى عذرا في ارسال التحايا اولا لموسيقارنا العظيم يوسف الموصلي فلهذا الرجل عندي مساحات رحيبة من الحب والتقدير والاحترام وهو اكثرنا قدرة وتاهيلا علي قراءة تجربة طه وابداء الراي حولها (فالكار كاره) وان كنت ساعود لبعض الاستفهامات التى تشغل بالي عن جوانب معينة في الكليب لاحصل منه علي التفسير المناسب لها. * الاخ حيدر..لمست بالضبط جوهر الحقيقة وهو ان طه في حاجة ماسة جدا للاستفادة من جملة الاراء المطروحة حول التجربة وما دام ان طه يبذل المال وبسخاء من اجل الدفع بتجربته فلا باس اذا ان سخر طه جزءا من هذه المال لتكوين فريق عمل متكامل من مختصين علي مستوي الموسيقي والسيناريو والاخراج في حال ما اذا اراد المضي قدما في انتاج اغنيات الفيديو كليب..لك ودي اخ حيدر وتحياتى. * الاخ عبدالرحيم حسب الرسول ..تحياتى لك..يا زول والله مافي زول شايلو فاس وداير يقطع بيهو نص طه سليمان..كل ما اذكره يوما ان لدينا بمنزلنا شجرة جميلة نمت وترعرعت وكبرت حتى كادت ان تمنحنا الظل والهمبريب فاذا بمهندس عابر يزورنا يوما بمنزلنا ليكتشف (شقا) خفيا في حائط منزلنا يخبرنا بضرورة اجتثاث هذه الشجرة الجميلة من عروقها لانها لم تنمو في المكان الصحيح هذا والا فان الحائط باكمله سيتهد علي رؤوسنا!! ابينا كلامه يا عبدالرحيم..عارف الحصل شنو؟ انهدت الحيطة وخلتنا قاعدين في (السهلة)!! والحمد لله.لك تقديري علي المداخلة * الاخ عمر الحاج ..( الغناء زمان كان فى الانادي)..دي معلومة صحيحة جدا جدا بس كمان الان بقي في (النوادي) و(الصالات) و(التلفزيونات) و(فيديو كليب كمان) صحيح؟ اذا في حركة بتاعت تطور حصلت وده البخلينا نقول راينا ده لطه في تجربته عشان ما يمشي بيها لقدام.. انت قلت (طلال مدثر هرب من الاجابة عن سؤال طرحه الشاب طه سليمان بصورة غير مباشرة من خلال ما قدمه من اعمال لماذا الذهاب الي الخارج (مصر وسوريا وغيره) لانتاج الاعمال السودانية)..انا لم اهرب من هذا السؤال بدليل اننى قلت وبالحرف (لماذا اذا سافر طه للقاهرة للتصوير؟ هل سافر لاجل توفر (كاميرات) التصوير الحديثة والغير متوفرة بالسودان؟ وبماذا سيفيد وجود هذه الكاميرات (بالقاهرة) ما دام ان الثقافة التى تود ان تعرضها وتصورها من خلالها موجودة (بالسودان)؟؟ هل كان من الاجدي للمنتج الدكتور (الجبالي) اخذ طه الي القاهرة وبالتالي فصله عن ثقافة وارث بلده ! أم كان من الافيد احضار (كاميرات التصوير) الحديثة الي هنا عبر اي طائرة شحن (كارقو) نقالة والاستعانة يسناريست سوداني ليعينه علي شرح ابعاد العمل الغنائي ومن ثم مساعدته علي ايجاد الاماكن المناسبة للتصوير ووقتها لن نكون قط في حوجة لامكنته (المعلبة) من علي شاكلة (ملهاه الليلي) الذي بدأ به العمل او فتيات فرقته الفرعونية بعد ان نستعيض عنهن باي من فتيات فرق بلادي من الفرق النوبية برداءهن ولباسهن النوبي (الساتر) اولا والمميز ثانيا! الم يكن كل ذلك ممكنا؟؟ * ثم اضفت بقولك (فطلال ادخل راسه فى الرمل عن (عدم صلاحية البئية بالداخل) وهو ايضا ما لم يحدث اذ اننى اقترحت ووفقا لوجهة نظري المتواضعة جدا اماكن و(بيئة عمل) محددة للتصوير مثل (البجراوية) و(كرمة) و(ودبانقا) و(جزيرة صاي)..انا بصراحة يا عمر ضد حكاية اننا نخلي الشغلانه برمتها للمصريين عشان ما هم يجوا ويكرسوا لينا لفكرة ثقافتهم وحضارتهم الفرعونية دي حتى علي حساب اغنيتنا نحنا السودانية وقلتا انه حضارتنا في النوبة هي السابقه للحضارة الفرعونية في مصر فليه (الجبالي) طوالي ساق كاميرته علي مشهد الفراعنه والملكه الشايلنها ديك وبقي طه (ولدنا) هو الساكيها سك الحرامي في زقاق ضيق!! في ذمتك الجبالي ده كده ما دخلنا كلنا معاه في الزقاق ده؟ يعنى وببساطه وعلي حسب كلام عيسي اللي هو عين الحقيقة بقينا نحنا شعب كااااامل سايقو (تاجر)!! اها دي بتجي في ذمتك * انت تتحدث عن عدم وجود البيئة..طيب شنو هي البيئة الما عندنا هنا والاستخدمها المخرج بشكل جاذب في الكليب؟ هل هي الصحراء والخيام وقبائل البدو؟ ما هو المشهد كلو مصنوع يعنى يمكن وببساطه تجسدو هنا بالسودان، ما هو السودان ده كلو سهله ساكت وصحاري وكان للخيم راقدااات الايام دي عند ناس اللجنة العليا لدرء اثار الامطار! الناس دي ياعمر جنس البنات الاستخدمن الجبالي في الكليب ديل شايفنهم ومالين عينهم بيهم يبقي وجودهم في حد ذاته ضمن كوادر العمل ما مدهش بالنسبة للعين (الما سودانية) البتشوف العمل ده لكن اتخيل لو جبنا ليهو بنات حضارتنا النوبية ديل ..بلبسهن وعبايتهن اللي هي جزء من حضارتهم وثقافتهم (مش عباية فهم تانى) وقدمن الجبالي في الكليب مش كان بيبقي شئ مدهش وجديد بالنسبة للعيون الاتعودت دااايما علي البنيات (ديلك)!! والبيئة دي مش هي هنا في؟ طيب؟ والصحراء؟ وغيرها..كلو في، الشئ الوحيد الما عندنا بشكل حديث هو (كاميرات تصوير الجبالي) عشان كده انا قلتا ليه طيب ما يقوم الجبالي يجيب كاميراته وكوادره دي ويجي يصور لينا لطه هنا ما دام كل الحاجات الاستخدمها بره دي هنا في!! مش كان ممكن بكده يقلل لطه نفسه من تكلفة الانتاج! مش كان بامكانه انه يغير من زاوية المشاهدة والقرايه للكليب نفسه في اذهان المتلقي المستهدف الما سوداني ده؟ دي هي وجهة نظري ليس الا..وقد تكون صحيحة عندي وقابلة لانها تكون خطأ عن الاخرين وعشان كده نحنا هنا لنتتاقش وعشان كده انا حريص كنت علي التداخل واكتساب قيمه معرفيه جديده من خلال الحوار ده..شكرا ليك وتسلم يا زول. * الاخت روزمين..لك التحايا..كلنا نريد لتجربة الشاب واي شاب سواه ايضا ان تمضي للامام لكن التقويم هو ما تحتاجه هذه التجارب لان اي تجربة معرضة لتجاوزات او اخفاقات ولم نصل بعد الي درجة (التجربة الكاملة) في اعمالنا كسودانيين حيث ينقصنا الكثير لذلك معا لنتم الناقصة كان في كليب طه او غيره...لك التحايا مجددا. * عبدالعزيز خطاب...محاولاتك الجادة لدعم تجربة طه تجد منى كثير تقدير واحترام..لطالما وجدتك تقف مع طه..تسوق لانتاجه..وتحث الناس علي منحه فرصة السماع له كفنان.. واجمل ما في دعمك هذا انك تحرص علي ان يسمع طه( الكلام الببكيهو اكتر من الكلام البضحكو) وهذه في تقديري اكبر محمدة لك..لطه فهم مغلوط بان الصحافة ضده وان ما تكتبه لا يعنيه..هذا خطأ في رائي لان مجرد تناول الصحافة لاعمال طه يعنى ضمنيا بان لطه مساحات رحبه عندها غض النظر ان كانت سلبية ام ايجابية ..بالمقارنه مع سن نضج طه كفنان تبقي ردة الفعل هذه طبيعية وقابله للتغيير بتواتر سنوات التجربة لكن لن يبقي من الجيد التمترس فقط خلف شعارات ان ما تكتبه الصحافة لا يعنينى..لياخذ الجيد منه وليتجاوز ما يحسه زبد وليجعله يمضي جفاءا ليبقي من تجربته ما ينفع يوما الناس..لك الشكر عزيز. * الاخ عبدالرحمن حمد النيل..سمعت كثيرا من الاقويل عن لحن العمل الاول كليب (عايز اعيش) وعن ان الجبالي اخذ اللحن باكمله من عمل اخر..ارجو مزيد من التوضيح حول هذه النقطة وترانا اتفقنا تماما في ان طه يتوجب عليه مغادرة محطة الجبالي هذه ويكفيه تعاونه معه لمرتين علي التوالي...صدقنى يا عبدالرحمن (شئ ما يقلقنى في الدكتور (احمد الجبالي) هذا!شئ ما !شكرا عبدالرحمن * (من وجهة نظرى بعتبرو فنان شمولى ومتنوع وسوف يحتل مركزا عربيا بعد ان احتل المركز الاول سودانيا) الاقتباس ماخوذ من مداخلة الاخ وليد الطيب قسم السيد...تحياتى له ولكن اود فقط ان اساله...وليد اخوي وفق اي استبيان او بحث او دراسة احتل المطرب طه سليمان المركز الاول سودانيا! اراك هكذا تقلل من قيمة وجود وعطاء فنانين كثر سودانيين..هل في ظل وجود وردي وكابلي ومحمد الامين وابوعركي ومحمد ميرغنى واخرين طه هو الاول!! لنقل ان التتويج ياتى قياسا علي مستوي اداء الجيل الحالي من الفنانين الشباب...هل طه الاول علي محمود عبدالعزيز او جمال فرفور او عصام محمد نور!! لنحصر الدائرة اكثر هل هو الاول علي شكر الله عزالدين او احمدالصادق !! طه فنان له جمهوره وعطاؤه ومحبيه ونحن ايضا من خلفه اذا ما سار في الدرب الصحيح شريطة ان يكون هذا الدرب غير مفخخا او مليئا بالقنابل!! لك الود الاخ وليد. * الاخ قاسم مهداوي..شنو يعنى السلام (حصري) لناذر براهو ولا شنو؟ اها نحنا ذاااتنا جايين مع ناذر بهناك في طريقة نجى ولا البص بص سيرة ننزل منو؟...شارك معانا كدي برايك وتحليلك..ورمضان كريم عليك وكل سنة وانت طيب. * لكم التحية وخالص اعتذاراتى (كان بريتكم) ومجددا نلتقي بمداخلتى لبقية الاراء وبعض استفهاماتى الحائرة للموسيقار الكبير يوسف الموصلي متعه الله بموفور الصحة والعافية.