الأخوة خالد ونزار وتروتسكي .. أشكر كم مرافقتي في هذا البوست ونتمنى ان نكون إخوة ..
نعود مرة أخرى لمواصلة حكايات ومغامرات المناسبات ...
ففي إحدى الأيام إتصل بي أحد عازفي الأورغن ممن لا تربطني به أي علاقة وثيقة في المجال الفني ولم حدث ان تعامل معي إلا مرة واحدة فقط أو مرتين وبمحض الصدفة من واقع مجاملاتي الكثيرة في مناسبات الأصدقاء والمعارف .. أقول أن هذا العازف إتصل بي في إحدى الايام وسألني إن كنت مرتبطا كي يربط لي حفلا اقيمه معه.. ولما سألته عن اليوم وكان يوم أربعاء وجدت نفسي غير مرتبط في ذلك اليوم ومن ثم فوضته في موضوع التعاقد مع اصحاب المناسبة وليتصل بي مرة اخرى ليخبرني بالتفاصيل ولم أستشعر رائحة اي نوع من الكوارث حينها ..
المهم انه إتصل بي في ذات يوم الأربعاء نهارا واخبرني أن الحفل قائم في المساء وأنه عليٌ ان اكون مستعدا مساء لأن هنالك عربة ستأتي لتقلني من المنزل ، كما ذكر أيضا أسماء ثلاثة عازفين اخرين أعرفهم بالأسم سيكونون معنا في الحفل .. الذي سيقام بمنطقة العمارات.. وفي المواعيد المحددة حضرت عربة حافلة ووقفت امام المنزل وكنت جاهزا تماما وحين صعدت للحافلة وجدتها خالية إلا من ساوند سيستم بعامليه وبعاميه.. وصاحبي عازف الاورغ ذاك !! ولما سألته عن بقية العازفين الذين ذكرهم .. قال لي أنه صاحب المناسبة طلب فقط أورغ وعازف وفنان نسبة لضيق المساحة بمنزلهم !! فلم أسأله بعدها عن أي تفاصيل كما لم اخوض معه في قيمة المبلغ أو العربون الذي إستلمه من أصحاب المناسبة إذ أنني عادة اتحدث في تلك الامور بعد نهاية الحفل خاصة إذا كان الوسيط احد زملاءنا العازفين ....
ولدهشتي الشديدة تخطت الحافلة في سيرها منطقة العمارات بأسرها فسألت عازفي ذاك عن السبب فقال لي ان المناسبة قد تم تحويلها إلى الصحافة شرق !! فتعجبت وسألته لم لم يخبرني بذلك ؟ فقال لي أن صاحب الحفل اخبره متاخرا بالمكان الجديد !! .. لم اكترث كثيرا ولم يكن الأمر يمثل فارقا بالنسبة لي .. ومن ثم وصلنا إلى مكان الحفل ووجدنا كل شئ معد وتم إستقبالنا كأفضل ما يكون وإكتشفت هنالك ان بعض أصحاب الحفل هم من معارفي وزملائي قديما في الدراسة .. فبدأ الحفل وإنتهى كأروع ما يكون ولم يعكر صفو الجو أي شئ وتم وداعنا وإنطلقنا غافلين .. وفي الطريق أعطاني عازف الاورغ نصيبي من مبلغ الحفـل وكان شبه مضاعف عن العداد المتعارف به في تلك المناسبات، ففسر لي عازف الاورغ ان ذلك بسبب إلغاء بقية العازفين في اللحظة الاخيرة ..
المهم انني إستلمت المبلغ واوصلتني العربة إلى المنزل ومن ثم خلدت غلى النوم ..
وفي اليوم التالي حوالي الساعة الثانية ظهرا دق باب المنزل ولما فتحته وجدت شخصا غريبا لا أعرفه وسألني إن كنت الفنان ناذر خليفة فأجبته بالإيجاب ومن ثم أبرز لي امر قبض صادر من قسم شرطة العمارات وطلب مني الذهاب معه !!
أصبت بالدهشة واخبرته عن التفاصيل إلا انه ذكر لي أنه ليس مخولا بذكر أي شئ وان علي فقط الذهاب معه للقسم فلم املك غير الإذعان وذهبت معه وفي ظني أن الامر متعلق بمسألة تخص العمل والتجارة في الشركة التي أعمل بها ..
وعندما وصلنا للقسم لم يكن المتحري موجودا ولكني وجدت شخصا اخر لا اعرفه وكان هائجا ومائجا وعندما راني إنفجر في وجهي (يعني شنو يعني !! عاملين فيها حرامية وصعاليك ؟ البلد دي ما فيها قانون ولا شنو؟ ) لم افهم طبعا سبب ثورة الرجل لأنني لا اعرفه وقبل ان الم باي تفاصيل ونسبة لغياب المتحري تم إدخالي للحراسة رأسا وانا في شدة ذهولي من هذا الموقف الغريب !! ولكن تفجر ذهولي أكثر عندما وجدت في الداخل عازف الاورغ إياه !!! وحاولت ربط الامر في ذهني ولم أستطع وقبل حتى ان اسلم على أي شخص من الموجودين بالداخل صحت في عازف الاورغ (تعال يا زول !! في شنو والحاصل شنو؟!) .. فحاول عازف الاورغ مداراة الموقف بالقول (لا لا سوء فهم بسيط إنتا بس خليك طبيعي وكل شي حا يمشي تمام التمام).. فصحت فيه بحدة (إنتا عبيط ولا شنو ؟؟.!! شايفني قاعد في بيتنا ؟ أنا قاعد جو حراسة وتقول لي خليك طبيعي ؟ الحاصل شنو؟) .. وقبل أن يخوض في التفاصيل جاء أحد العساكر ونده إسمي وخرجت لمقابلة المتحري وهناك عرفت أن الموضوع اساساً يتعلق بشكوى مرفوعة ضدي من أحد الأشخاص بدعوى أنني إتفقت على إحياء حفل له ولم أحضر للحفل .. وإندهشت لذلك فأخبرت المتحري أنني لم اتعاقد مع أي شخص بالأمس لإحياء حفل له غير الحفل الذي كان في الصحافة شرق وإلتزمت به مع عازف الاورغ الذي بالداخل !! وطلبت مقابلة الشاكي فأحضروا لي الشخص الذي كان غاضبا ولا يزال فسأله المتحري إن كنت انا من تعاقدت معه .. فأجاب الشاكي بالإيجاب فإندهشت وسألته (يا زول أنا متين شفتك لما إتفق معاك وإنتا متين حصل قابلتني !!) فقال (مش إنتا ناذر خليفة ؟) قلت ليهو (ياخي أأي أنا زفت خليفة زاتو إنتا متين إتفقت معاي ؟؟!!) فصاح غاضبا (عازفك بتاع الأورغن المحبوس دا هو القال إنتا فوضتو عشان الإتفاق ) سألته (إنتا ساكن وين يا ابو الشباب وحفلتك دي كان المفروض تكون وين!!) قال لي (في العمارات) ..
وهنا أدركت الأمر برمته وهو ان عازف الأورغ ذاك هو الذي حول مكان الحفل لغرض في نفسه من العمارات للصحافة شرق دون إخباري فأقسمت للمتحري ولصاحب المناسبة انه لا علم لي بكل ذلك وان عازف الاورغ هو الذي تعاقد من تلقاء نفسه ولكنه لم يخبرني عن أصحاب الحفل .. فقال لي المتحري أن الشاكي الان يطالب بتعويض 2 مليون جنيه عن الأضرار التي تكلفها من جراء التحضير للحفل من صيوان وكراسي وعشاء وإضاءة ودعوات للضيوف وأن الحفل قد فشل بسبي وأن علي دفع التعويض !!!!!
فأخبرت المتحري بأن الأمر لا علاقة لي به وان الموضوع برمته قام به عازف الاورغ دون علم مني وطلبت شهادة فني الساوند سيستم والذي يعلم ذلك .. فوجد المتحري أن هنالك تناقضا في اقوالي واقوال عازف الاورغ مع ظهور إضطراب لدى الشاكي والذي لم يعد يعرف اين الحقيقة !! فطلبت من الشاكي ان يعطيني فقط موبايله كي أتصل بفني الساوند وفعلا إتصلت بفني الساوند وشرحت له الموقف ووعد بالحضور فما كان من المتحري إلا إرسالي للحراسة مرة اخرى لحين حضور فني الساوند للإدلاء بشهادته ....
وكنت في تلك اللحظة اغلي من شدة الغضب ولم أتحمل منظر أن أسير أمام العسكري في طريقي للحراسة أمام خلق الله هؤلاء وكنت اقرأ في وجوههم أسئلة من شاكلة (هسي يا اخوانا ود الناس دا يكون مالو ؟؟) و (الزول دا بيكون لاهط ليهو قروش شركة كبيرة) و (ياربي بيكون هو الكاتل الزول داك الجابوهو في جريدة الدار؟؟!) وكدت أصيح في وجوههم (يا بشرية هوي أنا فنان فناااااااااااان يعني مطرب وكدة ، والقصة ما زي ما إنتو متصورين كلها موضوع زوغة بي عداد حفلة ، وهسي الموضوع حا يتحل لمن يجي بتاع الساوند) .. وعندما أدخلت الحراسة مرة أخرى وجدت بتاع الاورغ ذاك في وجهي مباشرة وسألني بتعاطف مفتعل (أها إنشالله عرفو إنك ما عندك علاقة بالموضوع؟؟!!) فصرخت في وجهه (ما عندي علاقة يا إبن الـ ....) وطوالي دخلت في الزول بلنجات وشلاليت وكفوف (لا حظتو !!انا هنا ذاتي فقدت المنطق وبقيت أكتب بالدارجي ) ..
ودورت ليك في الزول خبت وناس الحراسة حاولوا يفكونا وحصلت دربكة .. (تعملا فيني يا إبن الـ ..) (عشان الواحد ساكت ليكم والله لمن نطلع من هنا إلا ما تقابلني ) .. والجماعة في الحراسة شابكيني ليك (يا شباب عيب ..إنتو ناس كبار .. دا شنو القاعدين تعملوا فيهو دا .. هسي الناس يقولوا عليكم شنو ؟!) .. والغريبة إنو مافي ناس زاتو شايفننا إلا هم وهم أقل واحد فيهم يكون كاتل ليهو شافع صغير كدة .. طبعا حراسات السودان بدخلو كتال الكتلة مع حرامي غنم الحلة .. والسكران مع معتاد الكسر والمجنون مع الزايغين بالعداد الزينا كدة ...
طبعا جا العسكري داخل جوة الحراسة وأعاد النظام ... وكويس أنو العسكري كنت بعرفو وهو عارف القصة قام طلعني من الحراسة وختاني في الفرندة القداما وديك حتة أنضف شوية من الجوة .. وبقيت أأشر لي بتاع الأورغ وانا من محلي داك وبخت صباعي في رقبتي علامة الضبح بما معناهو (الليلة بضبحك انا) ... طبعا أخوكم من اليوم داك وبقى معتاد ضبح ذي ما شايفين في البوستات التانية ..
ومما زاد من توتري إنو بتاع الساوند إتاخر وقعدت في الحراسة لحدي ما جاء قريب المغرب وقابل المتحري وحكى ليهو القصة وبرا ساحتي من الموضوع بحكم إنو كان معانا وإنو هو زاتو اتفاجا بإنو الحفلة إتحولت من العمارات لي الصحافة شرق وبهذه الشهادة أستطعت الخروج من الحراسة بالضمانة الشخصية العادية أما بتاع الاورغ فقد ظل بالحراسة قرابة الثلاثة أيام لان اليوم الثاني تصادف يوم جمعة وهو إجازة ومن ثم أصدر وكيل النيابة قرارا بالإفراج عنه مقابل كفالة مالية توازي المبلغ الذي طالب به الشاكي ....
طبعا دي كانت (أول مرة ولحدي هسي اخر مرة) أدخل فيها حراسة أقسام الشرطة .. والغريبة أن قصتي تلك إنتشرت بين المغنيين الهواة وصرت مضرب مثل إذا ما جاء ذكر موقف مشابه إذ يقولون (ماتدقس دقسة ود الخليفة) ... وفي هذا معهم حق إذ ان في تلك الليلة فعلا ود الخليفة دقس ...
05-18-2005, 04:02 PM
نزار باشري ابراهيم
نزار باشري ابراهيم
تاريخ التسجيل: 04-03-2005
مجموع المشاركات: 588
أهلا ناذر رائع يا صديقي ومعليش وإن شاء الله زىما قلت تكون آخر مرة بس هناك سؤال ألست معي في أن القانون قاصر بعض الشي في مسالة الإنابة عن التصرفات الناتجه من الغير والمنسوبه الينا برغم عدم حصولهم علي تفويض أو توكيل قانوني بذلك ومع ذلك يصر القانون علي مسألتنا
05-18-2005, 06:53 PM
Khalid Osman Jaafar
Khalid Osman Jaafar
تاريخ التسجيل: 01-18-2005
مجموع المشاركات: 1031
اسمع انتظرى اجى ببقى ليك وكيل ومتعهد لى حفلاتك ياما حتشوف بلاوى وكان على اليوم الواحد وهين ده حتشوف ليالى ملاح.. طبعا اكيد سعيد وحاعوض ليلة التخشيبه دى باليالى كُثر (طبعا واكيد سعيده)
Quote: ماتدقس دقسة ود الخليفة
ناذر مادقست
05-19-2005, 01:05 AM
بلدى يا حبوب
بلدى يا حبوب
تاريخ التسجيل: 05-29-2003
مجموع المشاركات: 9833
اما عن الجلد بالسياط وانتشاره بين قبيلة الدناقلة يمكن القول ان استخدام السوط لم يكن محصورا على الجعلين وقد لاحظت تفشى هذه الظاهرة فى اكثر من قبيلة وهى )(الشكرية-والحسناية-وبعض بيوت القبائل الوافده الى شمال السودان من منطقة كردفان ) عليه يمكن القول ان الدناقلة يتمتعون بهذه العادة وخاصة فى القرى الموجوده بين المدن تحياتى
05-19-2005, 08:48 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
معك حق في ذلك ولكنني حقيقة لا ألوم القانون لأن القانون في حالة تخلف الفنان في الحفلات هذه يقف مع المتضرر الأساسي والذي هو صاحب الحفل مع أن ذلك ليس بمنطق ، ولكن لا يستطيع القانون أن يطلب من صاحب الحفل وثيقة أو عقد معين كي يثبت انه تعاقد مع الفنان فلان أو المطرب علان .. وإذا لا حظت معي فإن المطربين الكبار لا يتعاقدون مع أصحاب الحفل مباشرة وإنما يكون ذلك عن طريق وسيط ولا يرى المطرب صاحب الحفل إلا في ميعاد المناسبة .. ورغم كل ذلك فإذا لم يحضر صاحب الحفل في المواعيد لأي ظرف فإن الشاكي لا يشكو الوسيط بل يشكو الفنان مباشرة وربما يمكن الفنان الإنكار في هذه الحالة .. أما الهواة وانصاف المشهورين فإن حوادثهم وحكايات تخلفهم عن المواعيد كثيرة وموثقة لذلك فالقانون هنا يكثر من الإشتباه بهم ويشدد عليهم وذلك أمر يختلف بالقياس إلى فنان مشهور قد يساء وضعه إذا أدخل الحراسة .. أصدقك القول انه مهما حدث فأنا أقف مع صاحب المناسبة والذي غايته هو زرع الفرح في أوساط مدعويه فيفاجأ بفشل الليلة التي تعب في الإستعداد لها ..
الأخ خالد ...
والله هي فعلا دقسة لكن شوف ... الواحد فينا ما بيهتم بالتفاصيل دي مع إنها مهمة لإنو في مرات كتيرة بيتصل بي واحد من المعارف ويقول لي تركب هسي دي وتجي في الحتة الفلانية عشان تغني في مناسبة .. وفي الحالة دي الواحد ما بيهتم بالتفاصيل زي العريس منو وأهلو من وين أو المناسبة شنو .. وبالرغم من دا الواحد كتير بيدقس وأخطرها دقستي الفوق دي ود الجيران تروتسكي ..
أول حاجة من هذا المنبر انا داير أشكر راس القايدة أبو الريش على إيجاده لنا هذا المصطلح اللذيذ وأنا سأتعامل به مستقبلا .. بعدين يا تروتسكي أنا سبق وقلت ليك إنو موضوع الحفلات دا بقيت ما شغال بيهو كتير لإنو داير تفرغ تام وأنا بقيت أقلل من غناء الحفلات إلا في إطار ضيق جدا وبعد تحانيس ومعارف .. لكن أنا هسي قفلت نفسي فقط في الغناء في المنتديات الثقافية وجلسات الأصدقاء بمصاحبة ألة العود والتي تذيدني شجنا وتطريبا بعكس تهريج ألألات المصاحبة في الحفلات والتي غالبا ما يتم تجميع عازفيها على عجل مما ينتج عنه عدم التناغم وإنعدام الأحاسيس .. أما لو داير تكون متعهد لي جلسات الإستماع بتاعتي أنا ما عندي مانع
العزيز بلدي يا حبوب ...
شكرا للمعلومة المفيدة وإبق معنا ..
05-22-2005, 06:40 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
في إحدى هيجات جعفر نميري أمر بالقبض على الفنان وردي وإدخاله السجن .. وقد توقع زملاءه الفنانين الا يمكث وردي في السجن طويلا وان نميري قد يأمر بالإفراج عنه في أقرب فرصة ولكن خاب أملهم بطول المدة فإجتمعوا لتدارس ما يفعلونه بشأن إقناع نميري بالإفراج عن وردي فكان أن إتفقوا بأن يقوموا بدعوة نميري في دارهم بإتحاد الفنانين وكلفوا المرحوم الظريف أبو داؤؤد بأن يقوم بتسلية نميري بإلقاء النكات نسبة لأن نميري كان يستلطف أبو داؤؤد كثيرا وعندما يصفو نميري يطلب منه أبو داؤود أن يفرج عن وردي وتوقعوا أن يستجيب نميري للطلب ..
وفي الموعد المعين حضر نميري للدار وكما أتفق تماما فقد جلس أبو داؤود جواره وأخذ يلقي عليه عددا من النكات والمواقف الطريفة ونميري يضحك بكل إنشراح مع إسترسال أبو داؤود في حكاياته الجميلة ..
عندها أشار زملاء أبو داؤود له بمعنى أن اللحظة المناسبة قد أتت ، فألقى أبو داؤود نكتة أخيرة (جوكر) في أذن نميري إرتج لها نميري من الضحك وهنا تحديدا طلب أبو داؤود من نميري الإفراج عن وردي ... ولكن حدث مالم بكن في الحسبان إذ تجهم وجه نميري فجأة وإحمرت عيونه وإلتفت بحدة لأبو داوؤد وصاح فيه بغضب : وردي مالو قلتا !!!
فخاف أبو داؤود خوفا شديدا مع تغير مزاج وردي لكنه أجاب بسرعة بديهة يحسد عليها .. (وردي يا ريس تعبنا بي شيل أعمدة الأكل .. عليك الله حولوا لينا بورسودان)
وهنا تغير مزاج نميري مرة أخرى وإرتج من شدة الضحك ومن رد أبو داؤود المفاجئ وأمر فورا بالإفراج عن وردي .. ولم ينقض هذا المساء حتى كان وردي في منزله ..
05-23-2005, 08:21 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
العزيز ناذر تحياتى والله المواقف المبكية والمضحكة كثيرة طبعا انا ما بعام انا سيد الشئ زي ما بقول ترباس وقد جمعنا موقف ما عارف اقول عليهو شنو كدى اكمل الضحك واجيـك
05-25-2005, 08:31 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
على ذكر الجلد بالسياط والزوقة بالعداد والمبيت فى الحراسات كان مرة عندنا عرس فى البيت ونسابتنا كانوا ناس المهدى . والحفلة بى ترباس صاحبك طبعا شليق محل ما يكونوا الفنانين بكون قريب منهم , المهم يا ابو الشباب كان عندنا خالا لينا لسانو فالت حبتين (ممكن تقول فالت خالص) وكرهان المهدى والحكومة ولا عاجبو العجب لا الصيام فى رجب .(الله يرحمه) مدور ليك فى الشربه من الصباح عشان يجي يردح ,اصلا طريقتو كده . اها قامو بعض الناس من الاسرة من دون علمنا قالو ما طريقة يرتاحوا منو عشان الحفلة تستمر الا اتحفظوا عليهو , واكراما للضيوف جابوا ليهم عساكر كمان عشان يحفظوا النظام . المهم الخال دا عندو شلة صعبة خلاص ديلك كمان لا بوليس لا الحكومة ولا السما الاحمر دا شغالين بيهو. قاموا حلفوا ما فى حفلة بتقوم والزول دا مافى المهم فكروا فى طريقة عشان ينفذوا المخطط الجهنمى بتاعم والناس فى اضان طرش . والفكرة بسيطة هى انو يجلدوا الفنان . طبعا اخوك الشليق واقف وراء المسرح متكل على العمود بتاع الخيمة على يمين المسرح واقف لى فى كرسى ,قدامى بشير عباس الموسيقار (خالى طبعا) وجبناترباس شمالى وبعدو على الشمال بمسافة شوية كدة الكورس بتاعوا. المهم الشباب ديل فكوا الرباط بتاع الخيمة وراى مباشرة وادونى ليك ام دلدوم على حين قرة هههههه جيت واقع ليك فى بشير فى اللحظة دى ترباس بدا يادوب امى الله يسلمك قبال ما يتمها شحطواهو واحد بسطونه فى ظهروا ههههههه قام قال (وحات امى تانى ما بغنى) والحفلة جاطت طبعا دا كان المشهد الاول من الحفلة الباقى كان انو قفلوا الحوش ولموا فى العساكر والــــــــله يا ناذر البوليس ديل بيجدعوا فى الكراسى الكانت بتطاير فى الحفلة ديك ههههه ووين شفته بالحيطه الواحد فيهم بيمسكو اتنين من رجلينوا ويدينوا وهيلا هوب بالحيطة يا مان وبعدها يلحقوهو البندقية والكسكته هههههههههه طبعا القصة لا بتعرف المهدى من الما مهدى منو ههههههههههه اختلط الحابل بالنابل غايتو لو حريف بتخبى بى تحت الكراسى عشان ما تجيك رصاصة طايرة دا كان طلعتا من البونية ولا العكاز طبعا البواليس ودهم كلهك المستشفى , ونحن ودنا كلنا الحراسة . اها دى ما جمعت كل العنوان.
05-25-2005, 04:21 PM
نزار باشري ابراهيم
نزار باشري ابراهيم
تاريخ التسجيل: 04-03-2005
مجموع المشاركات: 588
فنانين سبحوا مع التيار مصطفى مضوى حين غنى للدفاع الشعبى وارتدى بزته اجيز صوته مع حنان بلوبلو فى يوم واحد من صيف العام ثلاثه وتسعين من القرن الماضى حين سلكت هذه الاخيره ذات الطريق المضوى واكملت ذلك بارتداء الثوب السودانى ود اليمنى كان رائعا فى فتره الاحزاب يجيد السباحه ضد التيار فى تلك الفتره من الزمن وكلنا لاننسى رائعته والقاعه لسه بتصفق لكن سرعان ما فترت همته واثر ان يسبح مع التيار وكان ذلك حين شدا بلمسه وفاء محمد بخيت والنار ولعت كان له فضل اشعالها لكنه اختفى حين كان مطلوبا منه اطفاؤها صلاح مصطفى كان يسبح وسط الجميع احبه العشاق حين غنى مضت ايامى فى حبك وانت بعيد وما دارى زيد نيرانى فى صدك وزيد فى عذابه احساسى ومالك انت بس ناسى احبه الجميع حين غنى جددناك يا اكتوبر فى ابريل بعزم اكيد وعهد جديد تلاحم جيش وشعب اصيل لكنه مؤخرا امتطى السفينه بكلياته وحمل معه كل وسائل النجاه فرفور لم يسبح مع هؤلاء او اولئك لكنه وفيصل القاسم وجهان لعمله واحده فالاخير راح يبحث عن نفسه هنا وهناك تاره صحفى فاشل واخرى ممثل ضل طريقه الى التمثيل واخيرا وجد نفسه فى الاتجاه المعاكس اما فرفور فلم يجد نفسه لا فى مهنه القانون الذى نال اجازته ولا فى كرة القدم بعد ان اتضح انه لايجيد الفرفره هناك ختاما وجد نفسه فى الغناء
05-25-2005, 05:46 PM
صديق الموج
صديق الموج
تاريخ التسجيل: 03-17-2004
مجموع المشاركات: 19433
العزيز جدا الفنان الطاهر .. شرفت البوست والله إنتا كنتا وين من زمان
Quote: وجبناترباس شمالى وبعدو على الشمال بمسافة شوية كدة الكورس بتاعوا. المهم الشباب ديل فكوا الرباط بتاع الخيمة وراى مباشرة وادونى ليك ام دلدوم على حين قرة هههههه جيت واقع ليك فى بشير فى اللحظة دى ترباس بدا يادوب امى الله يسلمك قبال ما يتمها شحطواهو واحد بسطونه فى ظهروا ههههههه قام قال (وحات امى تانى ما بغنى)
والله يا الطاهر لكن مابتستاهل الأم دلدوم دي إتخيلت منظرك والله وإنت واقع جوة عود خالك بشير عباس لكن ترباس دا مابالغ عديل حالتا بسطونة هسي لوخرطوش عب واطة يقول شنو
Quote: دا كان المشهد الاول من الحفلة الباقى كان انو قفلوا الحوش ولموا فى العساكر والــــــــله يا ناذر البوليس ديل بيجدعوا فى الكراسى الكانت بتطاير فى الحفلة ديك ههههه ووين شفته بالحيطه الواحد فيهم بيمسكو اتنين من رجلينوا ويدينوا وهيلا هوب بالحيطة يا مان وبعدها يلحقوهو البندقية والكسكته هههههههههه
يا إما ناسكم ديل شفوت زيادة عن اللزوم أوديلك ما بواليس جد جد إنتو البواليس ديل جبتوهم من القسم ولا دار الكشافة البحرية بهدلوهم كدا
Quote: طبعا البواليس ودهم كلهك المستشفى , ونحن ودنا كلنا الحراسة . اها دى ما جمعت كل العنوان.
لا والله جمعتو تب أنا هسي بفكر أقفل البوست دا علي كدة ما تزوغ بعيد يال طاهر خليك قريب ..
العزيز نزار باشري والله بوستك الفوق دا في الصميم وبه الكثير من المعلومات المفيدة .. أنا طبعا الغرض من بوستي دا ما بس المواقف لكن برضو المعلومات الزي دي .. طبعا أنا ذكرت في أول هذا البوست الفنان قيقم والذي سبح مع التيار أيضا وأضيف هنا الفنان إسماعيل حسب الدائم والفنان ترباس أيضا في بدايات عهد الإنقاذ ..
ود الموج .. إنتا داير تحنكنا ولا شنو وكت ما عندك حاجة تكتبا إنشالله قول إحم وأطلع القصة دي أنا قلتها في الجزء الأول من هذا البوست لكن شايفك إنتا بس عدلتا فيها شوية إنتا مش قلتا إنك صاحب الفنانين !! يلا قول لينا كم قصة كدى مع الجو الظريف دا بالمناسبة أنا كنت أول أمبارح في حفل تكريم العملاق غثمان حسين بالمسرح القومي .. والله سيف الجامعة غنى شجن بطريقة !!!!! عثمان حسين زاتو إتمحن
Quote: ...ولنا عودة ناذر،،،
راجيك بس ما تتطول زي المرة الفاتت ..
05-28-2005, 01:57 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
تعرف ياناذر المداخله ده خلاف الاخريات كلها حزن وشجن.. طبعا شاهدت بعض من حفلة تكريم الفنان عثمان حسين وبعض التفاصيل ولكن اكثر ما اتوقفنى غناء سيف الجامعه شجن ..وسيف كهدى به لم يقصر... ذهبت بى بعيدا وعميقا .. ذكريات فى الجامعه وامبده شمال.. (شجن وهند ومحمد) بالرغم من ان موقف الاغنيه الذى جمع هؤلاء مضحك لكن لامجال للضحك الان مع هذاالشجن الجارف الان وقت لاحق عزيزى..
خلاف لذلك فجاء تساقط دمعاتى وسيف يحتضن عثمان حسين ..(ذكريات كتيره ترائت امامى فى حضرت هؤلاء) انا اوصف لك ولكن وباعتبارك حاضر ربما تكون اصدق منى فى الوصف لكن احساسى يبدو اعمق من كل من كان شخص حضور.. ياااااااااااااه..
05-29-2005, 12:55 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
تروتسكي يا رائع .. شنو يا مان داير تقلفبا لينا بكا ولا شنو ؟؟!! قربت تبكيني والله !! إنتا نسيت إنو نحنا في ذكريات حفلات ؟؟!! أصبر لي شوية بوست البكيات قرب يجهز بس خلينا نخلص من دا
05-29-2005, 01:18 PM
معتز تروتسكى
معتز تروتسكى
تاريخ التسجيل: 01-14-2004
مجموع المشاركات: 9839
أهلا إخوتي الكرام ناذر ومعتز قبل ان تفأجئنا بوستات الحزن دعونا نغنتم هذه السوانح من الفرح لنفرغ مافي جعبتنا من مواقف مفرحة وبعضا مما نحفظ من طرائف قبيلة الفنانين في المرة القادمة ٍسأعود وأنا أحمل معي كما لا بأس به من مواقف الفنان الراحل علية رحمة الله أحمد عمر الرباطابي
Quote: المتواجدون الان بالمنبر العام 336 شخص » (19 )عضو و (317) زائرا
»Adrob wad Elkhatib »Asskouri »Dr Mahdi Mohammed Kheir »kamalabas »magdi hassan »Nada Amin »nour tawir »saadeldin abdelrahman »أيمن جبارة الله الخضر »بشري الطيب »خدر »خضر عطا المنان »عبدالعزيز حسن على »عبداللطيف خليل محمد على »عبير خيرى »فضيلي جماع ]»معتز تروتسكى ]»ناذر محمد الخليفة »هاشم نوريت هذه الصفحة يعاد تحديثها كل 120 ثانية.
سجمك جنبك نوريت معناها ياهو الماشى السجن ماشى السجن.وبعدو الخلا... انا جنبى الشاعر الكبير جماع..وبعدو عبير..
06-01-2005, 01:24 PM
معتز تروتسكى
معتز تروتسكى
تاريخ التسجيل: 01-14-2004
مجموع المشاركات: 9839
العزيز جدا هشام مدني يا خي والله تعبتني جنس تعب حتين لقيت مداخلتك يعني كان في داعي تشنقا فوق كدة زي السفة يعني هسي لو كان في واحد جا قبالي ماكنتا حا ألقاها ولا حاجة .. بعدين بوست الكلاب داك إنتا بطنك طمت منو ولا شتو في موقف ختيتو ليك هناك إنتا ولنا مهدي أها من ديك وتاني ما شفتكم غايتو إتمنى حضورك الدائم بجمبع البوستات التي تخصني .. عشان لمن أعمل حاجة تقول لي (أخخ) وأقوم أهرش مع إنو الشاعر قال (من قومة الجهل ما بيخوفوك بي أخ)
تروتسكي العزيز ..
ياخي هشام نوريت دا انا ما بخاف منو لإنو زول صحبي .. لو جاني هنا بكتل ليهو قلبو بي نكتتين تلاتة يقوم يرخي بعدين كفاية إنك قاعد فوق لي ومغتيني زي الشمسية .. كدة أنا مطمن كويس
بالمناسية دي هاكم الموقف الغريب الحصل لي دا ... هو موقف محرج بشكل ما عادي ..
واحد من أصحابي البعامين ديلك ربط لي حفلة في منطقة اركويت .. وبما إنو بعام مشهور جدا قلت أعمل حسابي وما أوافق ليهو إلا يديني العربون بتاع الحفلة كامل .. المهم ولدهشتي الشديدة البعامي دة جاب لي مش العربون بس !! جاب لي قروش الحفلة كاملة (خمسمائة ألف جنيه بالتمام والكمال) .. المهم يوم العرس البعام داك مرازيني من الساعة أربعة عصر (تقول تمرين كورة ما حفلة) .. لمن جات المواعيد جا بتاع الحافلة الكنت رابطو في البيت وطلعنا جمعنا بقية العازفين والبعامين .. فرقة موسيقية مصغرة عبارة عن أورغن وساكس وبتاع إيقاع ودنب .. المهم مشينا بإرشاد البعام داك لبيت العرس وما كان في أي سب وجيه يخلي الواحد يتشكك في أي نوع من المقالب خاصة وإنو العداد في جيبي بالكامل ..
أها لمن وصلنا بيت العرس وبدوا الجماعة يركبوا في العدة جا ليك واحد طاير من أهل العرس وقعد يكورك (ديل شنو ديل !! دي فرقة منو !!) الجماعة إتحيروا قالوا للراجل دي فرقة ناذر خليفة ..الراجل إندهش وقام كورك (ناذر منو يا زول !! أنا ربطت الأمين عبد الغفار وهو جاي يغني في الحفلة دي .. يلا لمو العدة دي بسرعة) !!!!
طبعا أنا إندهشت من الموقف .. قمت ناديت البعام داك وقلت ليهو (يا زول الراجل دا منو ؟! وإنتا قروش الحفلة الأداك ليها منو؟؟!) الغريبة إنو البعام طلع هو زاتو ما بيعرف الزول وقال إنو إستلم المبلغ من أخو العروس شخصيا !!! طيب أخو العروس دا وينو !!
البعام لفة وجا جاب أخو العروس الكان متحرج من الموقف (لاحظوا دا كلو والعازفين ديل فوق المسرح قدام خلق الله الكانوا متابعين النظرية) .. أخو العروس قال لينا (والله يا جماعة أنا أسف لكن الزول دا خالي وهو مصر إنو يجيب الأمين عبد الغفار يغني لإنو ما بيعترف بي زول غيرو.. وأنا لمن ربطتكم هو كان ربط الامين في نفس اليوم وما كلمني وانا ماكلمتو) ..
في اللحظة دي قمت أنا سألت الراجل (طيب لمن عرفتا ماكان تتصل بالتلفون تورينا الحاصل بدل ما نتبهدل كدة) !! الراجل قعد يتعذر والقصة شكلها جاطت ..
قام بعد شوية جانا الراجل المتشنج داك يكورك (إنتو لسة قاعدين !! ما تفضوا لينا المسرح دا يا شباب .. الأستاذ الأمين عبد الغفار قرب يصل !!) ..
طبعا في الحتة دي كبست ليك ألف وجيت غلى الراجل قلت ليهو (يا ابن العم مالك بتكورك كدة !! يا خي الناس ديل ما جوكم هنا فرضوا نفسهم عليكم .. أنحنا جايين بي إرتياط رسمي .. وبما انو في سوء تفاهم بيتحلا هسي .. لكن مافي داعي لي إسلوبك دا !! أنحنا ناس محترمين وجايين محترمين وأحسن نرجع محترمين برضو والفنان الكان حايغني دا ما جاي متضهب ساكت .. عندو وزنو وعلاقاتو وإرتباطاتو برضو) ...
عمنا داك حمر لي كدة (يمين انا شفتا عينو حمراااااااااا زي الجواها حنبوكة) قال لي هو وينو فنانكم دا كدي النشوفو بي عيني دي .. في اللحظة دي خفت أقول ليهو (أهندا انا ذاااتي) يقوم يسل ليهو سكين من ضراعو ويغرزا في بطني .. أخدت لي لفيتة كدة لقيت البعام داك واقف بيسمع في الكلام بكل براءة وفوق راسو في ملاكين صغيرين بيدوروا فوقوا (علامة البراءة البنشوفا في أفلام الكرتون ديك) قلت ليهو (يا هو دا الأستاذ ناذر خليفة) .. البعام إنخلع وقبل ما يتكلم الراجل فتح فيهو (هسي عليك الله دي خلقة فنان ولا خلقة سباك !! يازول ماترحم نفسك !! بلا ناذر بلا بطيخ !! أمش لم جماعتك ديل قبل ما نجدع ليكم العدة برة) ..
طبعا بعد داك أنا طلعت برا والجماعة لموا العدة في الحافلة ووريت أخو العروس بإنو القروش كلها وزعتها على العازفين وتاني مافي طريقة ترجع ..
طبعا صاحبنا البعامي داك زعلان مني في الحافلة والطريق كلو يطنطن .. كييييييف أنا أقول للراجل داك إنو هو ناذر خليفة !!! طبعا الجماعة ماخدين الموقف ضحك وأنا كنت عامل نفسي جادي مع إنو بي جوة يقرب أبكي من الضحك قلتا ليهو (أمال إتبهدل ليك أنا وإنت السبب في الإحراج دا كنت عايزني أعمل شنو يعني ) ... قال لي (طيب القروش وينا ؟؟) قلت ليهو ( شالا الراجل المتشنج داك دايرني أقول ليهو ما بديك ليها!!) ثم خطبت في ناس الحافلة (يا شباب أنا والله أسف للمنظر دا .. لكن عشان كدة أنا الليلة عازمكم عشى كارب في البوادي رأيكم شنو!! ) الجماعة ما صدقوا إنو في تعويض للمسألة وطوالي الحافلة دورت لي نمرة إتنين ونزلنا البوادي وأنا عامل فيها عازم فيهم ونزلت ليهم كمية من الجداد تكفي ليها قطيع بتاع ثعالب ودفعت الفاتورة قريب المية ألف جنيه .. وبعد داك كل واحد أديتو بيبسي موبايل في يدو وقلت ليهم (أها يا شباب كدة كيف !!! ) قالوا كلهم بصوت واحد (تماااااااااام يا أبو النيز) ... قلت ليهم خلاص يلا وصلوني بيتنا وبعد داك أفوتكم بعافية ..
طبعا وصلوني البيت وتاني يوم طوالي مشيت برج البركة غيرت موبايلي وإشتريت لي شريحة شحن أبو خمسين ألف وقميصين وفتيل ريحة BLUE وجيت راجع البيت
يعني الواحد يتبهدل ويتحرج بدون تمن ولا شنو
06-02-2005, 07:31 AM
Osman M Salih
Osman M Salih
تاريخ التسجيل: 02-18-2004
مجموع المشاركات: 13081
عثمان محمد صالح ... ياخي والله إنتا راجل مسلي خلاص جد يعني التنوع في البوستات مفيد وكويس إنك هنا بتسلي لي في زوار البوست عشان ما يملوا وزاتو الواحد كدة يقزقز بيك شوية
مع إنو مكانك ماهنا .. مكانك في بوستي التاني داك بتاع اللحوم
06-02-2005, 09:51 AM
محمد الامين احمد
محمد الامين احمد
تاريخ التسجيل: 08-28-2004
مجموع المشاركات: 5124
أول حاجة شرفت البوست .. وأرجو أن تكون قررت تمديد اقامتك هنا زي ما بيقول الموهوم داك
والله هم الجماعة عارفين النظرية ..الوسط الفني دا ما في شي بيخفى عليهو .. بعدين بيني وبينك كلهم خلسوها مني أكتر من الدبل يعني بكل بساطة أي واحد فيهم اتصل بي بعد داك وقال عايزني لي حفل مجاملة وأنا مشيت ليهو ومطمن جدا إنو في عداد إنقبض لكن الواحد بيعمل نايم .. صدقني برغم مقالب الوط الفني دا إلا إنو حايفضل ألذ وسط من ناحية المعاملة ...
والله تقول شنو قدر ما اجي البوست ده أكب الزوقة لكن شكلها كده بتتفك وبجي وبنداح بس قبلي مانجي طلع لينا الجنس الناعم خليهن يقيفوا بعيد شوية من البوست وما يتفرجوا ذاتو ..
Quote: والله تقول شنو قدر ما اجي البوست ده أكب الزوقة لكن شكلها كده بتتفك وبجي وبنداح بس قبلي مانجي طلع لينا الجنس الناعم خليهن يقيفوا بعيد شوية من البوست وما يتفرجوا ذاتو ..
يا راجل إنتا بوستي دا بيعضي ولا شنو !! دي المرة التانية تقول الكلام دا !!!!!
دا بوست كان المفروض أسميهو (إعترافات مطرب فاشل) نسبة للفضائح الفيهو ما تقعد تحوم حول البوست كدة أنا متأكد عندك الكتير لتضيفو ... ما تخاف مكانتك محفوظة والعوجة ما بتجيك تب
ود الجيران تروتسكي :
أنا متابع لذلك اللنك منذ البداية وبإستمتاع شديد جدا ... ثق انني سأتتدخل وأشارك في الوقت المناسب ..
06-07-2005, 09:24 AM
معتز تروتسكى
معتز تروتسكى
تاريخ التسجيل: 01-14-2004
مجموع المشاركات: 9839
لا والله ما نويت الانتحار بس معجب بي إسلوب الحوار الذي يدور هناك ...
كدي هاك الموقف دا ...
الفنان حسين شندي ذهب إلى إحدى المناسيات لإحياء حفل عرس .. وطبعا بين الفاصلين بيتجمع الفنانين والعازفين في إحدى غرف الدار للعشاء والراحة إستعدادا للفاصل الثاني ....
ذهب حسين وبقية العازفين لإحدى الغرف ولكن طال انتظارهم لحضور العشاء مع إستعجال صاحب المناسبة لهم لمواصلة الفاصل .. والجماعى كانوا جعانين و(قارصة معاهم) ...
في النهاية لمن إتأكدوا إنوا موضوع العشاء مطرشق .. جاء صاحب المناسبة وقال للجماعة (يا اخوانا خير الحاصل شنوا ؟!! مالكم ما طلعتو المسرح لحدي هسي ؟!) ....
قام حسين إتغاظ من الراجل لإنهم في الوكت داك قزازة حاجة باردة ساكت ما شربوها : قام قال للراجل (لو سمحت يا عم في دكان قريب بي هنا ؟؟!!) الراجل إستغرب وقال ليهو أأي في لكن داير منو شنو ؟! حسين شندي رد عليهو بي زعل ( لأنو انا أكل الحفلات دا ما بينفع معاي عشان عندي مرارة وقرحة وماشي اجيب لي طحنية إتعشى بيها)
06-09-2005, 08:30 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
من أطرف ما مررت به من مواقف أنني في إحدى الأيامات كنت متفقا مع احد اصدقائي على إحياء جلسة إستماع بالعود (جلسة في شكل قعدة) ولما ذهبت لمكان الجلسة حاملا العود خاصتي وجدت الجميع قد اكملوا تجهيزاتهم للجلسة .... وفي أثناء محاولتي دوزنة اوتار العود ... سمع الجميع صوتا مدويا وكان هذا الصوت في أذني مباشرة وعندما خرجت من ذهولي وخلعتي وجدت ان الكوبري الذي تربط عليه اوتار العود قد قفز من مكانه فجاة مما تسبب في إصدار هذا الصوت ....
وهنا اعتذرت للجميع عن أنني لن اتمكن من الغناء لهم هذه الليلة لأن العود قد تعطل تماما .. ولما لم يكن هنالك عود بديل فقد جاء بعضهم يإقتراحات من شاكلة (يا أستاذ ما مشكلة أنا أجر ليك الخشبة المربوطة فيها الأوتار بي هنا وإنت اعزف وغني بي هناك!!) قلت ليهم (كيف يعني !! العود دا ما داير ليهو شدة ووزنة معينة وما ممكن تجي بالطريقة دي!!) واحد نطة قال لي (خلاص ما مشكلة نحن نثبت خشية الأوتار دي في كراع السرير وانتا حاول حافظ على الشدة بي هناك وأعزف!!) (طبعا الجماعة كانوا معزورين وفي عالم تاني الوكت داك ) قلت ليهم (يا بشرية هوي ... عليكم الله ما تنظروا عندكم عود تاني جيبوهو ولو ما عندكم خلوني أمشي والمرة الجاية بعوضكم) ...
طبعا الجماعة إتحيروا لإنهم تعبوا جدا في ترتيبات الجلسة وقاموا اصروا انوا لازم اغني ساي بدون عود ... قلت ليهم والله ما بقدر إلا بمصاحبة الة موسيقبة ..
واحد منهم نطة وقال إنو عندو الة موسيقية وقام طلع برة عشان يجيبا .. أنا إتحيرت قلت الراجل دا ماشي يجيب بيانو ولا جيتار ولا ياتو مصيبة داير يحرجني بيها !!!! بعد شوية الزول جا داخل شايل معاهو دلوكة (بتاعت سد المال ديك المرسوم فيها مبخر ويد محننة) .. صاحبنا طوالي ختا ألتو الموسيقية دي في يديني وقال لي (حرم ما تقول حاجة .. أرح ابدأ الغناء!!!) ... قلت ليهو يا زول هسي دي ياها التك الموسيقية ؟؟!!) ..
الجماعة طوالي شيكوني ليك أها ما عندك تاني طريقة ارح البدا غني ... طبعا (أسقط في يدي) زي ما بيقولو المثقفاتية وفي النهاية وسط التحانيس إضطريت أغني بالدلوكة والجماعة اخر إنبساط وانا جد متحير من الوضع !!!!!
الظريفة انو الشغلة بعد شويتين سبكت معاي وقلت يا أبو النيز كدي إتأقلم مع جو الدلوكة دا .. وقلبت ليك مية كم وستين درجة وقلتا يالغنا الهابط جاك بلا ... وفي اليوم داك مافي غنية لي حنان بلوبلو أو عشة اركويت او علوية تيكو أو فايزة بمبر ما غنيتا والجماعة منداحين مع جلسة الإستماع الإتقلبت (تعليمة دي ) ....
ويا ريت الموضوع لو إنتها على كدة بالنسبة لي فنان محترم زيي المصيبة إنو في ناس من الحاضرين نسوا نفسهم وين وبقوا يجوا يبشروا ويلصقوا فيني (النقطة) وغايتو داك كان يوم بهدلة إصلوا ما انساهو وما إتخارجتا الا بعد تعب وتحانيس ..
بالمناسبة ,وإتساقا مع جو المنبر هذه الايام أقول انني في ذاك اليوم غنيت (قالوا القليب حرق .. حرقوهو بالنار حرق .. يا ناس ود الغرب)
عشان تعرف الشغلة كانت فارغة كيف فعلا جلسة الإستماع كانت بالدلوكة .. تخبل زول بيغني أغاني مصطفى سيد أحمد وسيف الجامعة بي دلوكة داك غايتو كلن يوم غريب خلاص وأنا زاتي حمدت الله إنهم ماطلبوا مني حاجة تانية
طبعا الحاجة الماذكرتها في القصة الفوق &إنو في نهاية (رقيص العروس داك) إكتشفت إنو في واحد من الخبثاء إستغل الجو العام بتاع الجلسة وقام سجل بالكاسيت كم أغنية كدة من النوع الهابط هبوط إضطراري طبعا أنا صصلجت ليهو عصلجة شديدة خلاص وقربت إتضارب معاهو وفي النهاية قلعت منو الشريط وكسرتو
الراجل كان داير يضيع مستقبلي الفني والإجتماعي
الإيميل أصبر لي شوية من جبيل مدور زي الدربكين ولحدي هسي ما لقى العنوان .. لمن يلقاهو برد ليك طوالي ..
تسلم يا تروتسكي يا راقي ..
بالمناسبة نزار باشري وعدنا إنو يجي ومعاهو مواقف المرحوم أحمد عمر الرباطابي !!!!
ماقال بجي مالو ما جا !!
06-16-2005, 01:53 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
قبل عقد من الزمان وتحديدا فى منتصف التسعينات تغنت الفنانة جواهر يا مغرور ما دى الحقيقة رغم انك ما بتطيقة وقد لاقى شريطها رواجا كبيرا وقبولا حسنا فى نفوس الكثيرين آنذاك ومع ذلك فلم يرضى غرورها هذا الشى اذ ان الساحة اعتمرت بالاصوات النسائية واصبحت المنافسة قوية جدا ولم تصبر طويلا ربما للقيود التى وضعها النظام على الفن فى تلك الفترة وربما انها سعت لاتساع دائرة الشهرة اكثر ولقد نصحها البعض بالرحيل صوب الجارة مصر فشدت الرحال شان الكثيرين من الفنانين العرب امثال مجد القاسم ولطيفة العرفاوى والراحلة ذكرى محمد وسميرة سعيد وو والقائمة تطول ولم يمضى زمانا طويلا على وجودها هناك حتى تسنى لها ان تمتطى موجة الغناء الهابط اذ ان مسيرة الفن تتدنى يوم عن اخر فى مصر بشهاده كبار النقاد الفنيين وان الاصوات الاصيلة قد اختفت عن الساحة تماما وافسح المجال لكل من هب ود وحمل لقب مطرب حتى وان كان يجيد الرقص دون الغناء لان الناظر للساحة اليوم يرى ان معظم المنتجين يهتمون بالرقص واشكالة اكثر من فحوى الاغنية ومضامينها رحبت مصر بجواهر كثيرا ان لم تكن تلقفتها بين زراعيها حتى غدت فى غضون اشهر قليلة من نجوم الفن والطرب فى مصر بل فى الوطن العربى وهى تشدو بالاغانى الهابطة يوما تلو اخر اغانى الساندوتشات ذات الايقاع السريع والتى تفتغر للاصالة وتتمركز حول الحركات الانفعالية الهيستيرية تسودها الموسيقى الصاخبة وتصاحبها كلمات سطحية لا ترتقى لمستوى الذوق العام ومع ذلك اشتهرت جواهر كثيرا وبدات اشمئز من سماعها وهى تشدو انا بحب حماده ومش عارف اية ربما لانها امور تبدو علينا غريبة ولم نعتادها فى بلادنا ومع ذلك تواصلت مسيرة جواهر اسوة بمن سبقوها فى هذا النوع من الغناء امثال حكيم وشعبان عبد الرحيم والقائمة تطول ايضا هذة المرة وعادت لنا ذات يوم فى رحاب الخرطوم لتمضية عطلة العيد بين اسرتها واهلها وسعى التلفزيون القومى جادا لاستضافتها لكنة اشترط عليها ارتداء الثوب ففعلت لا اكذبكم اذ اذداد اشمئزازى اكثر الى ان لعبت الصدفة دورها حيث التقت بمصطفى كامل الشاب الرائع والذى اشتهر بكلماتة الجميلة والحانة الرائعة حيث اعجب بصوتها كثيرا وكتب لها مجموعه من الاغانى اسهمت كثيرا فى اخراجها من تلك الدائرة التى حصرت نفسها فيها طيلة الاعوام الماضية وتغنت برائعة مصطفى كامل يا امى , لا اعرف لكن بعد سماعى لهذة الاغنية مصادفة وجدت نفسى اغفر لجواهر ولا اكذبكم القول اذ حملتنى اقدامى لاحصل على كاسيتها واستمع لهة الاغنية والتى تثير الشجون بصورة غريبة ختاما لا اجد شيئا اقوله غير ان اهديكم هذة الاغنية آملا ان تستمعوا لها فهى قمة فى الروعة يا أمى الله على دعوتك يمة ادعى لى عمال اشد واقول حمل السنين المر وصابرة على ويلى قابلت ناس بياعة وقابلت ناس خداعة فرحت يوم واتنين وبكيت عيونى سنين ودمعى روى ليلى ودعوتك يمة بتهون جراحى ودعوتك يا امى بت
06-20-2005, 02:30 PM
نزار باشري ابراهيم
نزار باشري ابراهيم
تاريخ التسجيل: 04-03-2005
مجموع المشاركات: 588
قبل عقد من الزمان وتحديدا فى منتصف التسعينات تغنت الفنانة جواهر يا مغرور ما دى الحقيقة رغم انك ما بتطيقة وقد لاقى شريطها رواجا كبيرا وقبولا حسنا فى نفوس الكثيرين آنذاك ومع ذلك فلم يرضى غرورها هذا الشى اذ ان الساحة اعتمرت بالاصوات النسائية واصبحت المنافسة قوية جدا ولم تصبر طويلا ربما للقيود التى وضعها النظام على الفن فى تلك الفترة وربما انها سعت لاتساع دائرة الشهرة اكثر ولقد نصحها البعض بالرحيل صوب الجارة مصر فشدت الرحال شان الكثيرين من الفنانين العرب امثال مجد القاسم ولطيفة العرفاوى والراحلة ذكرى محمد وسميرة سعيد وو والقائمة تطول ولم يمضى زمانا طويلا على وجودها هناك حتى تسنى لها ان تمتطى موجة الغناء الهابط اذ ان مسيرة الفن تتدنى يوم عن اخر فى مصر بشهاده كبار النقاد الفنيين وان الاصوات الاصيلة قد اختفت عن الساحة تماما وافسح المجال لكل من هب ود وحمل لقب مطرب حتى وان كان يجيد الرقص دون الغناء لان الناظر للساحة اليوم يرى ان معظم المنتجين يهتمون بالرقص واشكالة اكثر من فحوى الاغنية ومضامينها رحبت مصر بجواهر كثيرا ان لم تكن تلقفتها بين زراعيها حتى غدت فى غضون اشهر قليلة من نجوم الفن والطرب فى مصر بل فى الوطن العربى وهى تشدو بالاغانى الهابطة يوما تلو اخر اغانى الساندوتشات ذات الايقاع السريع والتى تفتغر للاصالة وتتمركز حول الحركات الانفعالية الهيستيرية تسودها الموسيقى الصاخبة وتصاحبها كلمات سطحية لا ترتقى لمستوى الذوق العام ومع ذلك اشتهرت جواهر كثيرا وبدات اشمئز من سماعها وهى تشدو انا بحب حماده ومش عارف اية ربما لانها امور تبدو علينا غريبة ولم نعتادها فى بلادنا ومع ذلك تواصلت مسيرة جواهر اسوة بمن سبقوها فى هذا النوع من الغناء امثال حكيم وشعبان عبد الرحيم والقائمة تطول ايضا هذة المرة وعادت لنا ذات يوم فى رحاب الخرطوم لتمضية عطلة العيد بين اسرتها واهلها وسعى التلفزيون القومى جادا لاستضافتها لكنة اشترط عليها ارتداء الثوب ففعلت لا اكذبكم اذ اذداد اشمئزازى اكثر الى ان لعبت الصدفة دورها حيث التقت بمصطفى كامل الشاب الرائع والذى اشتهر بكلماتة الجميلة والحانة الرائعة حيث اعجب بصوتها كثيرا وكتب لها مجموعه من الاغانى اسهمت كثيرا فى اخراجها من تلك الدائرة التى حصرت نفسها فيها طيلة الاعوام الماضية وتغنت برائعة مصطفى كامل يا امى , لا اعرف لكن بعد سماعى لهذة الاغنية مصادفة وجدت نفسى اغفر لجواهر ولا اكذبكم القول اذ حملتنى اقدامى لاحصل على كاسيتها واستمع لهة الاغنية والتى تثير الشجون بصورة غريبة ختاما لا اجد شيئا اقوله غير ان اهديكم هذة الاغنية آملا ان تستمعوا لها فهى قمة فى الروعة يا أمى الله على دعوتك يمة ادعى لى عمال اشد واقول حمل السنين المر وصابرة على ويلى قابلت ناس بياعة وقابلت ناس خداعة فرحت يوم واتنين وبكيت عيونى سنين ودمعى روى ليلى ودعوتك يمة بتهون جراحى ودعوتك يا امى بتنور صباحى يا كل الصحاب واللمة يا اعز الحبايب يمة ادعى لى ارضى ربنا ودينى تملى ضميرى يرضينى اربى الحق فى اولادى وافوض امرى للهادى واحن تملى ليلادى للحوارى والبيوت وشجر البلح والتوت الله على دعوتك يمة ادعى لى انا والحنين بنشد وجرح السنين بيهد فى املى واحلامى طرح العذاب على قيدو والقلب شاب على ايدو يومين يا عين افراح وسنين الام وجراح وصابرة على ايامى بدعوتك يمة الدنيا وما فيها انا عايشة عليها يا كل الصحاب واللمة يا اعز الحبايب يمة الم الجرح واتعافى وتفضل نفسى شفافة لا عمرى يا امى اتلون ولما الامى تتكون اقول يا ربى يا مهون قوى ايمانى بالصلاة ب لا الة الا الله ب محمد رسول الله
06-21-2005, 07:02 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
الغالي جدا ناذر الخليفه مساء الخير ليس في وسعي إنزال هذه الاغنية الان ولكنى ساحاول لاحقا بالنسبه لمواقف الراحل المقيم أحمد عمر الرباطابي ما زلت عندي وعدي وسأتيكم بها قريبا مع العلم بأنى أوثق له مستشهدا ببعض أغنياته الشجيه في بوست آخر تلبية لرغبه صديق عزيز لك تحياتي واحترامى
06-22-2005, 08:02 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
جئت لأحكي لكم قصة هذه الصورة الغريبة والتي حدثت في الهند ...
حدثت هذه القصة عندما كنت في الهند وكنت رئيسا لإتحاد الطلبة السودانيين هناك .. وفي إحدى السنوات جاءت مناسبة ذكرى الإحتفال بأعياد الإستقلال .. وكان هنالك احد الطلاب الفنانين وهو الصديق أكرم عمر والذي إشتهر بغناءه لحمد الريح .. وقد تعود الطلاب ان يغني أكرم ذاك في المناسبات الوطنية أغنية الساقية الشهيرة ...
ولكن لسوء الحظ فقد تصادفت تلك المناسبة مع غياب عازف الاورغ الوحيد بالمدينة وهنا إضطررنا لأن نعمل بروفات للأغنية فقط بألة العود والإيقاع لأن الجميع كان مصرا على هذه الأغنية ...
وقبل الحفل بيوم واحد وقعت مع أكرم بروفة الساقية كاملة (خلاص يا عثمان النو ) وتفارقنا كل لمنزله حوالي الثانية صباحا .. ..
ولكن حدث ما لا تحمد عقباه إذ أن أكرم ومن معه إشتبكوا في الطريق مع بعضا من الهنود وحدث شجار عنيف كان من نتائجه أن تحطم العود تماما وصار لا يصلح (ولا حتى لعواسة الحلو مر ) ... مع العلم انه كان في تلك اللحظة هو العود الوحيد في المدينة..
وقد فوجئت بذلك صباحا مع ميعاد الحفل وتحيرنا في العمل !!!!..
وهنا لم يكن هناك بد من أن أتحول من عازف عود لعازف دنب .. مع تعويض صوت الموسيقى المعقد لأغنية الساقية من صوتا موسيقيا بألة لصوت بشري .. فكان أن إستلمت الدنب ووضعت مايك جوار فمي (كما تلاحظون في الصورة ) وبدات فورا في محاكاة موسيقى الساقية بفمي فقط مع تواصل عزفي على الدنب في نفس الوقت .. وكانت تلك عملية في غاية الصعوبة لأن السلم الموسيقي الذي يغني عليه اكرم عمر هو مي بيمول ميجر وهو سلم حاد إضطررت في تلك الليلة لإصداره بحنجرتي على مدى دقائق الأغنية الطويلة والتي تكاد تبلغ الساعة إلا ربعا ..
طبعا أصبت بألم شديد في الحنجرة في اليوم التالي من جراء ذلك إستمر معي عدة ايام إلا انني كنت سعيدا لان الإداء خرج جميلا مع أنه لم يكن بالصورة المطلوبة ..
06-26-2005, 12:27 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
كنت أتحادث مع بعض الاصدقاء في الماسينجر امس وجاء ذكر لفنانة إسمها مريم عضلات !!! (أي والله) إشتهرت في أوساط الطبقات الوسيطة هنا بأدائها لأغنيات الصبحيات وحنة العروس وسد المال مع تعليم العروس الرقص قبل ميعاد الزفاف ..
مريم عضلات فنانة ذات صوت غريب إختلف الناس حوله من ناحية الجودة والرداءة ولكن ما يحبب الناس إليها انها ظريفة جدا ولا تتمسك كثيرا باجرها الذي تتفق عليه إذ انها مستعدة للتنازل حتى عن نصفه مقابل أن تحظى بونسة وجبنة مع أصحاب المناسبة ..
أهم ما يميز مريم عضلات انها جميلة جدا وبها دلال واضح وتلبس أفخر الثياب وتتحلى لالكثير من الذهب في جيدها ونحرها .. وربما جمالها هذا هو ما يدفع بعض الشباب (وربما بعض أعمامنا الشباب روحا) إلى التودد إليها ومغازلتها احيانا لبعض شئ في نفوسهم ..
طبعا هنالك ظاهرة جديدة في أوساط المغنيات هذه الايام إذ نجد أنهن جميعا قد إتخذن لهن حراسا شخصيين (BODY GARDS) لحمايتهن من معاكسات ىالشباب خلال إدائهن للوصلات الغنائية وغالبا ما يكون هؤلاء الحراس إثنين ومن إحدى مراكز الشباب التي تشتهر برفع الأثقال والحقيقة ان لهن كل الحق في ذلك إذ ان المعاكسة للفنانات أصبحت صفة ملازمة لهن أثناء الوصلات ..
مريم عضلات لم تكن من هذا النوع من الفنانات كانت تذهب للمناسبات لوحدها وتخرج منها وفي اثنائها دون ان تكترث للشباب الصائع الذي يغازلها او (رجال النسوان) الذين يتوددون إليها ..
ويبدو ان بعض الشباب ممن يتابعون مريم عضلات تلك قد إستهونوها جدا وأرادوا إستغلال طيبتها الزائدة وإستغلال عدم وجود أحد الدنجوانات مرافقا لها ... فكان في احدى المناسبات أن تعرض لها هؤلاء الشباب بالمشاغلات والالفاظ البذسئة في أثناء إدائها لوصلتها الغنائية وهي لا تلتفت لهم ولكنها اضمرت في نفسها شيئا !!!!
بعد ان انتهت الوصلة تظاهرت مريم بالوقوف لإصلاح ثوبها وإستعدال ذهبها الذي يثقلها .. ولكنها في الواقع كانت تتجرد من كل ذلك دون ان يلاحظ الحاضرون ذلك ..
وفجاة قفذت من مكانها بكل رشاقة رغم جسمها الممتلئ نسبيا ووصلت لمكان هؤلاء الشباب في لحظة وإستطاعت الغمساك بأربعة منهم دفعة واحدة وجذبتهم عنوة لوسط الساحة وسط صراخ الحاضرين وذهول الشباب .. وبدات في ضرب الشباب بكل انواع الضربات المعروفة (لكمات + شلاليت + صفعات+ معيط شعر +كربون + ضرب في مناطق تحت الحزام) .. كل ذلك والحاضرين يحاولون تخليص الشباب الاربعة منها دون جدوى .. تنتهي من هذا لتمسك ذاك تصفع هذا لتدلدم ذاك (تدلدم كناية لي أب دلدوم) .. وإستمرت هذه المعركة من طرف واحد لفترة وإنتهت على ان تناثر الاربعة في الحلبة ولم تتركهم إلا بعد قالت لهم (قولو الروب) فقالوا لها (الروب) وبعدها تركتهم في ذلتهم ولبست توبها ودهبها وإستعدلت من مكياجها وواصلت في وصلتها وكان شيئا لم يكن ...
ومنذ تلك الحادثة التي ذاع صيتها لدي معجبي ومعجبات مريم إشتهرت بذلك اللقب (عضلات) وصار الجميع يخشوها ويتجنبونها .. وهي حتى اليوم تصر على عدم اتخاذ أي حراس لها رغم انها احيانا تغني في المناطق الطرفية النائية والمشهورة بإنفلاتاتها الامنية ولكن حتى الان لم نسمع ان احد إستطاع النيل منها بأي شئ مما في باله ...
كانت هذه سادتي الفنانة مريم عضلات !!
07-01-2005, 07:37 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
سأعود لأحكي قصة أول حفل غنييت فيه بعد غيابي الطويل عن السودان عندما صاح الجمهور قبل نهاية موعد الحفل بقليل (القرد .... القرد) !! وانا اتلفت في حيرة أبحث عن هذا القرد ولا اجده ..!!!!!
07-04-2005, 06:24 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
يا زول زمان كان عندنا دلاليك مكربة جدا بقيادة عدد من الفنانات ناس كلتوم و خادم الله و حواية و حاليا بتول و مريم ( الاسماء هنا للتوثيق طبعا )
اها يوم في دلوكة كاربة جدا بي ( كلتومة ) و هو اسم الدلع لكلتوم رحمها الله ، غنا و وصف لي الطيش و الاغاني بتاعة " يا ود جوده بلالي سفرية عودة بلالي " و " او بتان توكن بلمي قاشو كجي كرو اركي بلمي " ، و دي اكتر الاغاني المثيرة للحماس و المستفزة لقلع السوط - بالمناسبة دي ياها القعد تسمعوها في بواري باصات دنقلا زاتا - و ما كضبو الشباب بدوا ليك طوالي في قلع السوط ، معط جد طاج صراج ، خبت لما تفهم حاجة ، طبعا الخبت دا كلو معروف عشان خاطر عيون الكواكب و الزغاريد و كدا .
يا زول صادف الدلوكة دي حاضرا واحد من اولاد الخرطوم ، قاشر قشره صاح بنطلون و قميص و ريحة و حمام ، بس ما جاهو عكاز زي عمر الفاروق ،،،، العكس الزول خاشي الدايرة ومارق علي راحتو مرة يعرض و مرة يبشر ، و الجكس كلو مركز ليك معاهو ، عمار نزل ، عمار عرض ، عمار بشّر ، همسات الجكس كلها في الاتجاه دا .
و صحبانك ديك لسع الخبت واقع فيهم و لا حياه للجكس مافي اي تجاوب مع بتاعين السوط لما كلهم طلعو من الصف واحد ورا التاني ، اها فضل اخر واحد فيهم لمن تعب من كترة الجلد قام لملم جراحو زي ما قالو و اتجهة ناحية كوم الجكس بي دمو و سروالو الكلو موية دميرة داك ( بنيييييييي ) و دنقر شال ليهو كوم تراب ماكن و كشحو ليك في وش الكواكب : ( انتو ما شايفين الخبت الواقع فينا دا من الصباح لمن ضهرنا انسلخ ينعل ...... ) صاحبك فقد المنطق زاتو و انفعل في الجكس انفعال وا طبيعي .
طبعا الحفلة او الدلوكة ما كان محتاجة لي اكتر من كدا عشان تتفرتك ، و بعداك الخبت الجد وقع بالعكاكيز ، و عينك ما تشوف النور ، لانو الدولكة اساسا كانت بالرتاين .
07-05-2005, 06:52 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
تسلم على المرور والمشاركة بذلك الموقف .... يا خي أنا والله كل ما اسمع شي عن جلد السيطان دا ضهري كلو يقعد ينتح انا ما عارف الناس دي بتستحمل الجلد الخيالي دى كيف ؟؟؟!! بعدين الشي الملاحظ غنو اي حفلة فيها جلد سيطان بتنتهي بي مشكلة وفرتيك ليها !! تعرف انا إتخايلي الناس البينجلدو ديل بيكونوا مغبيين في اثناء الجلد .. يعني زيعم وزي السكارى واحد ودا الشي البيرفع من حساسيتهم تجاه اي مشاغلة أو حقارة وأعتقد انو دا السبب الاساسي البيخلي الجلد ينتهي بي خبيت عكاكيز بعدين ياخي في ناس كدة يجلدوهم بالسوط وهم ثابتين وبيبشروا ..!!! لكن مجرد ما يدوا الواحد عكاز فوق راسو يقعد يتجرس ويدوخ دي بتذكرني بي نكتة الفكي أبكر لمن جا حرامي في الحلة في عز السقط وقام لبس ليهو كمية من الحجبات ضد الخبت والرصاص والسكين .. ولمن جا محل الحرامي ..الحرامي كشحو ليك بي موية باردة وقام جاري .. وابكر وقع يفرفر في ا##########
والله ابكر دا قالوا ماقدر يتنفس لمن جابو ليهو بخاخة بتاعت أزمة قالوا ليهو : يا ابكر الحجبات الشايلا دي كلها والحرامي يزوغ منك ؟؟!!
قال ليهم : الله واهد نسيت هجاب بتاا موية باردة أها يا حمد أهلك ديل السوط ما بيمشي فيهم والعكاز بيمشي .. يكزنوا ما جابو هجاب بتاا أوكاز !!:
07-06-2005, 04:21 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
جئت للسودان بعد غياب طويل .. وبعد أن قضيت يومين أو ثلاثة فقط في الخرطوم أتاني أخي الأكبر وطلب مني أن أغني في حفل زواج أحد أصدقائه فأخبرته أنني لست مهيئا ولم أجس بعد الساحة الفنية والأغاني الدائرة ونوعيتها والأغاني التي يتقبلها الناس في الحفلات .. إلا أنه لم يترك لي أي فرصة للرفض فذكر لي أن هنالك عازف أورغ جيد سيكون بمصاحبتي وعلي ألا أقلق من هذا الجانب .. فطلبت مقابلته للبروفة إلا أن أخي أخبرني أن ذلك متعذرا نسبة لإرتباطات العازف الكثيرة !!!!!
المهم توكلت على الحي الذي لا يموت وسط إصرار أخي وذهبت معه للحفل في الموعد المحدد وهناك قابلت عازف الأورغ ذاك وهو شاب صغير جدا .. فتشككت في إمكانية ان أتجانس معه من أول وهلة .. وفعلا لم يخيب حدسي إذ كنت أسأله هل تعرف الأغنية الفلانية ؟؟ فيجيب بالنفي وسألته أكثر من خمسة او ستة أغنيات من الأغاني المخضرمة والخالدة لعظماء فنانينا وهو ينظر إلي مندهشا !! وكأني أطلب منه أن يعزف لي موسيقا صينية !! وعندما مللت منه سألته : يا خينا كدي إنتا قول لي بتعزف شنو ولي منو ..!!
فطفق يسألني : حافظ حنانة ؟! فأجبت بالنفي .. قال لي : طيب الجلابية كيف .. قلت ليهو ياتا دي وبتاعت منو ؟؟!! فنظر غلي نظرة مشفقة وسألني : طيب البنسلين حافظ منها حاجة ..؟؟!!
فنظرت إليه مندهشا وكأنه يطلب مني أن أغني له أغاني هندية .. وسألته .. إنتا يا أبو الشباب دي ياها الأغاني الحايمة في السوق هنا ؟؟!! قال لي :: أيي إنتا وين يا زول !!
غايتو بعد تعب كدة لقيتو بيعرف يعزف ليهو كم غنية كدة بتاعت حقيبة .. عزفها معي وهو غير راض وأظنه ينقرط في جهره ويقول .. دا شنو الموهوم الجايينا دا !!
المهم قريب نهاية الحفلة سامع بتاعين الساوند والبعامين المعاهو بيكوركو لي .. القرد يا أستاذ .. الحكومة حا تكبس بعد شوية !!
قايلم بيشاغلو ساكت .. لكن بعد شوية الجماهير ذاتا قعدت تكورك يا أستاذ القرد !!
إتلفت جاي وجاي وأنا متحير !! ما شايف أي قرد وما عارف الناس ديل قاصدين شنو !! بعد شوية لمن تنشنت قبلت على بتاع الساوند وسألتو .. القرد دا وين ؟؟!! بتاع الساوند قرب يموت من الضحك وقبل على بتاع الأورغن وقال ليهو وري الأستاذ دا القرد ؟؟!!
بعد شوية حصلت ليك جوطة والأورغن بقى عامل زي المسجل البايظ . كوراك وأصوات بتاعت كراتية وناس جواهو بتتكلم بالإنقليزي والرقيص بتاع الجماهير ذاتو إتغير .. وبعد شوية بتاع الأورغن ما لقيتو (أظنو مشى يشرب ليهو سجارة ويجي) !!
المهم أنا مخلوع والأورغن شغال براهو والناس دخلت في هستيريا رقيص ما عادية ولقيت نفسي أنا فنان الحفلة زول شغال بي الشغلة ما في !!!!
غايتو بعد شوية ختيت المايك وإنسحبت براحة دورت عربيتي وإتخارجتا وأطن لحدي ما وصلتا بيتنا الناس دي ما عارفة الفنان إتخارج وما أظن كانو شغالين بي موضوعو كتير !! طلعت الشغلة كلها على الأورغن ويا ريت لو العازف معاهو لكن الأورغن أهم منو !!!!
عشان بيشتغل براهو .. وبيطلع حاجة إسمها القرد !!!!
07-07-2005, 09:02 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
يـــا روعـــــة كلمات: عبد العظيم أكول ألحان وأداء: عصام محمد نور
ياروعة لو عز اللقاء فرقنا يا حلوة القدر دي الروعة قاسم مشترك ما بين وجيهك والقمر يـــا روعـــــة بيناتنا مشوار من أفق مطبوعة للقلب الشفيف أنا شلتو ريدك يا مناي داريتو في قلبي الرهيف فردت أشرعة الخيال لي دنيا ما طلاها زيف ومشيت على شط الهوا وصابر على المد العنيف يـــا روعــــــة أنت الملاذ لو غبت يوم أشواقي عنك بسألو ما نحن والشوق والزمن جور الحبيب ما بنحملو عشان نعيد خيط الأمل لازم جفاك نستحملوا لازم قساك نستحملو ونرجع الماضي البعيد مشوار هوانا نكملوا يـــا روعـــة ...
07-11-2005, 11:20 AM
معتز تروتسكى
معتز تروتسكى
تاريخ التسجيل: 01-14-2004
مجموع المشاركات: 9839
تسلم يا مان ودى القصد من البوست دا !!! أنا طبعا أيام زمان دي ما عشتها لإني لسة في أيام هسي إنتو عشان ناس كبار بتتمتعوا بالبوست دا عشان بيعيد الذكريات وكدة .. وغايتو راجيك تكتب لي عن أيام زمان ديك وضهبكم في الحفلات
07-25-2005, 04:20 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
* هربت من المكان لأن ثمة حفلاً يحييه فنان اسمه (... بت) في مناسبة والحمد لله عدت الى المكان بعد انتهاء الحفل فلم استمع له، بكرة نسمع بالفنانة «هديل ولد» و«فتحية راجل». * انصبت أسئلتي للذين حضروا الحفل في أسئلة ساذجة مثل: هل يقبل هو بهذه التسمية فقالوا: لا يريد أن يُخاطب بغيرها.. * وعرفت انه ليس الوحيد فهناك اكثر من (... بت).. وتذكرت انك زمان حين تقول لولد (انت «بِت») يغضب وقد يفتح بلاغاً.. وكانت عبارة (محمد ولد) مشينة للبنت جداً. * والامر قد لا يدعو إلى الإلتفات باعتباره ظاهرة عارضة.. لكن الامر يعني انقلاباً في بنية المجتمع ـ في تفكيره ـ في طرائقه.. واذا كنا نتندر على الاوروبيين لأنهم يبيحون الشذوذ ولديهم اندية للـ (Gays) فاننا بهذه الطريقة نتحرى دربهم وسنسير عليه.. واصلوا الحكاية بتبدأ كده!! * عندما بدأت الانقاذ كنت المعد الاساسي لبرنامج الاذاعة الصباحي اليومي (صباح الخير يا وطني) وكانت المياه تجيء عبر المواسير عكرة.. وكنت قد كتبت فقرة مؤداها: ان ناس الموية حولوا المثل الما عاجبو يمشي يشرب من البحر.. فجابوا لينا البحر عديل في المواسير.. * وقامت الدنيا ولم تقعد.. وأوقفوني لمدة سنة تقريباً ولو لم ينبهن صديق الى أن ايقافي ليس شرعياً اذ قالوا لي ان الطيب ابراهيم محمد خير هو الذي أوقفني وعرف صديقي ان ذلك لم يحدث. * ولما سألت السيد المدير.. أجابني بكلام طريف جداً.. فقال لي أنا شخصياً افتقدتك واستغرب لماذا أوقفت نشاطك.. فأحضرت له المسؤول الأقل درجة والذي أوضح لي ان المدير أوقفني.. وقال له: من الذي أوقف هذا الرجل؟ ونبهه بطريقة حاسمة الى تمكيني من العمل.. ولما خرجنا من مكتب المدير، قال لي: علىَّ الطلاق الزول ده وقفك.. اذن كنت موقوفاً بسبب غضبة السيد الوزير.. فقد نما الى علمي انه جاء الى الاذاعة وانتقد الفكرة.. ولم يوقف احداً.. بل قال إن الثورة في بدايتها ولا نريد ان نعطي فرصة للثورة المضادة.. واقترح معالجة للأمر كانت موضوعية. واذكر ايضاً ان اغاني الفنان محمد وردي كانت موقوفة ونسب الايقاف أيضا إلى الدكتور الطيب ابراهيم الى أن استضافه الاعلامي الكبير عبد المطلب الفحل في برنامج اذاعي ولما اعطاه الفرصة ـ طلب أغنية (بعد إيه) لمحمد وردي.. فأطلق سراح أغنيات وردي آنذاك. * وحكى لي الراحل المقيم ابراهيم احمد عبد الكريم ـ انهم قالوا له في التلفزيون ان اغنية سيدة وجمالها فريد.. خلقوها زي ما تريد، موقوفة بأمر من الطيب مصطفى مدير التلفزيون آنذاك فذهب الرجل اليه وشرح له ان خلقوها زي ماتريد لا تعني الفعل (تريد) انما (ماتريد) هي امرأة اجنبية شبهت المحبوبة بها.. فقال له لا اعتراض لدي عليها حتى بالمعنى الأول.. هكذا كانت الامور تسير.. هذا للتوثيق فقط.. لا للادعاء فليس ثمة بطولة في الامر. * كدي النشوف آخرتا..
07-29-2005, 02:48 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
كنت في معهد الموسيقى وكان هنالك أحد الطلاب من دارسي الموسيقى يقوم بمصاحبة أخرين بعمل بروفة لأغنية ما وطلب ذلك الموسيقي من العازف ان أن يعزف له إيقاع عشرة بلدي المعروف ويبدو ان صاحب الإيقاع قد أخطا في هذا الإيقاع ولكن الموسيقي ذاك لم ينتبه .
فجأء أحد الطلاب الذين يدرسون دراما ومعروف بسخريته الشديدة فلاحظ إختلاف الإيقاع .. فقال للموسيقي
(أنا والله ما بقرا موسيقى لكن الإيقاع دا ما اظنو عشرة بلدي) .. فإستنكر طالب الموسيقى أن يأتي طالب دراما لتصحيحه فرد عليه (يا اخوي إنتا العرفك شنو بالموسيقى !!! دي شغلة ما شغلتك ما تتدخل فيها .. دا عشرة بلدي يعني عشرة بلدي)..
فتغالط الإثنان في الإيقاع طالب الدراما يجذم ان الإيقاع ليس عشرة بلدي وطالب الموسيقى يصر ان الإيقاع عشرة بلدي .. وفي تلك الأثناء جاء أحد الاساتذة فإحتكموا إليه وفعلا طلع ألإيقاع ما عشرة بلدي كما ذكر طالب الدراما ..
وبعد إنصراف الأستاذ إلتفت طالب الدراما لطالب الموسيقي :
(إنتا بتقرا في سنة كم يا أخونا) ؟؟؟!!
فرد عليه ذاك:
(بقرة في سنة خامسة بتسأل مالك ؟؟!)
فرد طالب الدراما ...
(هسي عليك الله لو كنت من سنة أولى عملت كل سنة 2 بلدي ... 2 بلدي هسي ماكانو تمو عشرة)
07-31-2005, 10:05 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: ياود عكر .. والله ضحكتني جنس ضحك إتزكرتا لي موقف حصل لمن كنت في الهند جيت طالب جديد وفي شباب سودانيين إتسلطوا علي ساقوني معاهم حفلة بتاعت أصحابم كينيين .. مشيت معاهم شفت لي مناظر ما قاعد اشوفا إلا في أفلام الكرتون المهم الناس أخر بهرجة وطرب مع الديسكو الشغال وأنا مخلوع (ما طالب جديد لسة) بعد شوية الشباب عرفوني بي واحدة كدة كينية (يمين انا مما شفتها إتذكرتا طوالي العتالة بتاعين سوق السجانة) حاجة غلييدة وقصيييرة وعلي العليها عاملة فيها حلوة وماليا وشها الحاجات البتلمع وترقش ديك
إتوكلت وقعدت أرقص معاها رقيص النطيط البنشوفو في حفلات الديم هنا وهي عاملة فيها ممتعضة ومادا شلوفتا (والشلوفة تعاين ليها عاملة ذي الضفارة لمن تتكلم) المهم الدي جي قلب الشغلة سلو وأنا ما متعود على نوع الرقيص دا (ما ادونا ليهو في حفلات الحلة الجديدة) المهم البت لقتا فرصة توقف الشي البفنجط قداما دا .. قامت هب كدا عصرتني عليها عشان ستايل الرقيص
أنا ما قادر إتنفس من عضلاتا وداير أقول ليها فكيني الكلمة راحت لي بالإنقليذي المهم حاولت إندمج مع الرقيص دا وهي طاباني وانا طابيها بالطريقة دي (ومنظري والله يصعب على الكافر) المهم في أثناء الرقيص والحركة قمت عفصتها في كراعا وقمنا الإتنين دردلب في ا########## قدام الناس كلها
أنا يا دوب قدرت أتنفس وهي قامت زعلانة تكورك أو ماي قود و شيت و كمان معاهم الكلمة الكعبة ديك البتبدا بي حرف الإف شفتا أها من ديك يا ود عكر وانا مكجن حاجة إسمها سلو دانص ولمن يجيبوهو في التلفزيون في فلم ولا كدة بغير القناة طوالي
07-31-2005, 11:43 AM
Yassir7anna
Yassir7anna
تاريخ التسجيل: 09-08-2002
مجموع المشاركات: 2634
طبعا بداياتي كانت زي اي فنان بديتها بكورة الشراب، اذكر في الزمن داك ونحن منتقلين من الابتدائي للثانوي العام كان الفنانين النور الجيلاني ومجذوب انسة طالعين في الكفر فانا بديت اقلد مجذوب وانسة واذكر صاحبي عبد الرازق كان بقلد النور الجيلاني والاتنين في مدرستين مختلفتين
عبد الرازق ده مع انه صاحبي شديد من الابتدائي لكن لي يوم الليلة ما عارفو كان بقلد النور الجيلاني ليه لكن انا سبب تقليدي لمجذوب انسة حفظي لغانية اذكر في الاجازة قبل ندخل الثانوي العام كان جيرانا عندهم عرس وفي وحدة قريبتهم جاية من بره الخرتوم يازول انا واولاد اصحابي في الحلة بنرقص في نص الدارة على انغام وصوت مجذوب انسة اشوف الجكس جا ليك توش وبدا يرقص معانا جريت صاحبي العلى اليمين حرن كلو كلو جريت صاحبي على الشمال وحاتك اتنفض من ايدي وزاغ يازول الاتنين كبو الزوغة وخلوني ليك في الواجهة لمن لقيت المسالة كده اتوكلت على الحي الذي لا يموت واصلت قلت يازول سجن سجن غرامة غرامة، وكان اول جكس غي حياتي الفنية
المهم من بعد داك نزلنا المدرسة ولما لقيت ليك المدرسة ما فيها اي تمساح بقيت اقدل ساكت كل فسحة ينادوني ليك بالمكرفون امشي اغني ليهم اغاني مجذوب انسة وعندي صاحبي بعزف بنقز امشي يجيب ليه علبة فاضية ونقعد نغني الفسحة كلها، ومن ديك وعيك وبقيت مستلم الاذاعة المدرسية من طابور الصباح ومرات قبل طابور الصباح، ما مافي تماسيح، لي نهاية اليوم الى ان اعتزلت الغناء ودي قصة طويلة جدا
08-04-2005, 05:41 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
وينك يا راجل طولت ما ظهرت بي هنا !!! حمد الله على السلامة .. ياخي معقول حياتك الفنية كلها من كورة الشراب لحدي ما اعتزلتا كابيها كلها في التسعة سطور الفوق ديل
كدي أخد نفسك شوية كدة وورينا مواقف وطرائف مرت بيك في الرحلة دي ..
Quote: وكان اول جكس غي حياتي الفنية
ياخي والله دي بالغتا فيها عديل كدة وما في زول سبقك عليها هسي لو جبت ليك أي فنان من فنانينا الكبار ديل ما حا يتذكر أول جكس في مسيرتو الفنية بالطريقة المتذكرا بيها انتا
بالله ما تغيب كتير زي المرة الفاتت دي ....
08-04-2005, 07:14 AM
Yassir7anna
Yassir7anna
تاريخ التسجيل: 09-08-2002
مجموع المشاركات: 2634
ما الحاصل في البلد ده والله يا ناذر بخليك تنسى اسمك زاتو وخصوصا الواحد لما يكون وبعيد وانت عارف القربة بضخم ليك الحاجات في راسك لما تقرب تتلحس، ان شاء الله بس تكون الامور هدءت وعادت لي نصابها
تعرف يا ناذر مسيرتي الغنائية زاتها ما طولت كتير
زي ما قلت ليك استلمت ليك المدرسة واجدعت ليك جديع بطال جدا، لما جات الطامة الكبرى، وانا معرفتها انها ديك الطامة الكبرى الا قريب ده( شفت انا بريء كيف )
اها مره عندنا كان تخريج بتاع الكشافة وبما اني كنت خريج وفنان المدرسة الأوحد يا زول استلمت الحفلة، وكان من ضمن الحضور الوالد، الله يديه الصحة، والفنان عبد الكريم الكابلي ونقيب المحامين في ذلك الوقت الاستاذ عبدالله الحسن كان رئيس مجلس الاباء وجمع غفير من الآباء. اها لي شلقاتي قلت اغني بين جناين الشاطئ وفوق قصور الروم(شفت اللخبطة دي كيف )، وانا تعرف لي هسع عندي مشكلة مع الاغاني، بحفظها بي طريقتي، يعني بنرمد ليك الكلمات فوق تحت، يعني مثلا غنية عبد المجيد عبدالله لغاية وقت قريب انا انا كنت بغنيها " اكبر غلط ينبض بحبك فؤادي" لغاية ما عرفت انها ما اكبر غلاك
واذكر لما كنت صغير عندنا خالنا شامي ليك نميري شمة بطالة خلاص، بس كل مرة ينادني ليك ويطلعني ليك في الطربيزة فوق ويقول لي يلا غني لي نميري، اوقوم اغني ليه بالملاليم قلناها نعم قلناها نعم، والشعب قسم يقولها نعم ليك يا لاقائد المبهم وحاجات زي دي كتيرة لغاية ما حبوبتي الله يرحمة تهيج ليك ياولد انزل عايز تجيب لينا الكفوة مالك،
وايام انقلاب هاشم العطا يناديني ليك عشان اقرا البيانات الكانو بذيعوها في الايام ديك، اقوم اقول ليه الرائد ماعارف فلان الفلاني الطرد من الخدمة والتطهير من الركبة
اها دي حالتي مع الاغاني، اليوما ديك طبعا ما قصرت عست ليك الاغتية عواسها بي مزاج زي: خلي جات متبوعة حايمة كالدينار وفي الطريق ان مرت الناس عليها تقوم، ووحاجات تانية حامياني لو قلتها هنا بكرة بلحق امات طه في البورد
فجأة كده شفت ليك الناس في الصف الامامي كانما صبت فيهم مطرة والاستاذ المسئول عننا عرق وبقى يبلع في ريقه، اها اول ما نزلنا جاني ليك طاير انت الغنية دي جبتها من وين والحفظك ليها منو قلت ليه بكل براءة سمعتها في الرادي وما في اي زول حفظني ليها، قال كدي قولها تاني وفعلا قلت زي حصل في المسرح، بدأ يسالني من بعض الجمل دي عارف معناتها شنو وانا ارد ليه بكل براءة وانا فعلا ما كنت قاصد اي حاجة ولغاية اللحظة ديك انا ما عارف الحصل شنووما عرفت معن الكلام ده الا بعد حين ، وبعدين ونحن راجعين في السكة مع الوالد آ عامل لي فيها فنان، عايز تطلع فنان، هسع الطلعوا فنانين عملوا شنو...يا ولد احسن ليك شوف قرايتك
يازول انا بعد الاستجواب داك والهرشه بتاعت الحاج من ديك اعتزلت الغنا نهائي وتاني ما فكرت أغني الا وانا في جامعة ودي كمان ليها قصة طويلة
لك مني خالص الود
08-04-2005, 11:53 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
صاحبنا داك قبل يمين وشمال ايام هوجة الأورغنات ديك .. طبعا كانت القصة في غاية الفوضى وكانت الاورغنات داخلة البلد اشكال والوان والعازفين كل يوم زايدين والفنانين ممكن تقسمهم بنسبة 2 فنان لكل حلة في حلتنا كان في فنان مشهور جدا (مشهور في الحلة بس يعني لو قطعت الزلط بي غادي ما بتلقى في زول بيعرفو) .. فنان الحلة داك كان جنو يغني غنية (كل ما سألت عليك يقولو مشغولة) وقابض بيها الجو شديد ...
الفنان التاني داك زعلان وكان بيشوف نفسو غناي احسن من فنان حلتنا المعروف يوم كدة كان في مناسبة بتاعت حنة واحد صاحبنا وقام الفنان الحاسد دا قال إلا يغني عشان يوري الناس مواهبو المدفونة .. غايتو فرض نفسو على الناس والناس إتمحنت وقالت ليهو خلاص غني وريحنا ..
صاحبنا مشى على بتاع الاورغن بكل ثقة وقال ليهو أعزف لي كل ما سألت عليك يقولو مشغولة ... العازف قال ليهو سلمك شنو ؟ المتفنن دا قال ليهو سلم عادي .. المهم لمن بدا العزف المتفنن بدا يغني في الغنية بلحن كل ما سألت عليك صدوني حراسك
كل ما سألت عليك يقولو مشغولة إيه شاغلك عني قولي لي يا زولة
هو اللحن لفق مع الغنية والزول ما شترا خالص بس الناس ضحكت للتركيبة العجيبة دي
بقى ان اذكر أن ذلك هو أول واخر حفل يغنيه صاحبنا المتفلهم داك .. لإنو بقوا بتاعين الأورغنات يزوغو منو .. وهسي هو رضى بي نصيبو وإتحول لي مساعد ياي لفني الساوند لحمل وترحيل الساوند لكن بتاع الساوند زاتو بقى ما يخليهو يقول (ألو تست ون) بتاعت إختبار الصوت ديك .. ومحذروا قال ليهو (المايك دا لمن نوصلو انتا بس إتخارج منها وما تجي إلا بعد ما نفصلوا عشان توديهو الحافلة)
08-06-2005, 04:00 AM
Yassir7anna
Yassir7anna
تاريخ التسجيل: 09-08-2002
مجموع المشاركات: 2634
Quote: (المايك دا لمن نوصلو انتا بس إتخارج منها وما تجي إلا بعد ما نفصلوا عشان توديهو الحافلة)
لا لا لا ده بالغ عديل كده ، ده نظام من كل بستان زهرة بس انتو ما قدرته تفهموه ساكت
تعرف يا ناذر نحن عشان الفضايح دي الموضوع كتلتو في المدرسة قبله، يعني ما وصل الحلة، لأنه لو وصل الحلة كان بقيت زي صاحبك ده فضحيتي بي جلاجل
وبعدين ادخلت عوامل تانية بايولوجية، طبعاً في الوقت داك كان اخوك ماري بمرحلة انتقالية، بعد شوية الصوت اتغير نهائي وبقى يحشرك ومرات يقطع نهائي بعدين انا قلت مالي ومال دقوه شالو قروشه، والساعد اكتر الاستاذ الكان مسئول من النشاط الفني في المدرسة نقلوه لي مدرسة تانية والنشاط الفني وقف نهائي يعني المسالة جاطت جوطة شديدة
لكن تعرف بعد داك قلت احسن امسك مجال الشعر، واقوم اعمل قصائد، خصوصا كان عندي احساس اني ممكن ابقى شاعر وكده، فمرة قاموا عملوا رحلة في المدرسة وانا ما مشيت، اذكر كان عندي اشقدي في رجلي، قامت امي الله يديها العافية جابت لي برتقان وكده، نظام الود عيان، وانا راقد في السرير ما قادر اتحرك، مع انه الاشققدي في الرجل لكن ايدي زاتها ما قادر احركها عشان اقطعه اها بعد ما اكلت كده ورقدت قلت: يا يوم بكره ما تسرع تخفف لي الاشقدي والله اذكر امي دي ضحكت ضحك لم شرقت بقت تحكيها لي زول زول، وانا مبسوط لاني قايل امي بتنشر فيها عشان توري انه ولدها خطير في حفظ الاغاني رغم حداثة سنه
اها يازول بعد ما نزلت كنت كتبت ليك قصيدة امكن خمسة صفحات بوصف فيها في الرحلة واتخيل الممكن يكون حصل شنو، وكانت عاجباني ليك عجب شديد خلاص، ومشيت وريتها لصاحبي بلال الله يرحمه، قال والله انا ما عارف لكن كدي وريها لأستاذ العربي، فعلا شلت القصيدة ومشيت ليه وقلت الليلة ح يشيد بي اشادة ما حصلت ده كان ما قام علقها في الجريدة الحائطية
اها الاستاذ قراها كده وعاين لي وما قال اي حاجة، لكن الحاجة الوحيدة الفهمتها من نظرته ديك "أحترم نفسك احسن ليك" فرجعت حابس ادمعي ومن ديك قررت هجر الشعر فكانت اول وآخر قصيدة
08-06-2005, 05:20 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
والله يا ناذر في واحد قاعد جمبي وببحلق كل دقيقتين في الشاشة بتاعتي ،حب الأستطلاع بتاع الكديسة داك..-وفاتح البوست واقرأ واتفرج على ناس الصبحية الصينية والكوارث القاعد (تسرد)فيها دي اسفيريا.صاحبك عاين لى صورتك شدييييد وقال لى:"أنت دا موقع ابوداؤد ولأشنو!!!". وطبعا يا ابو النيز عارفني ما برضى فيك..أفو،قلت ليهو :"ليه العود الماسكو دا (عود) كبريت؟".
بالغت والله يا عادل أسي ناذر ده ذعلان وقال الشباب قصروا معاهو شرط عينا أسي ناذر ده يرضو كيف تاني ؟ ومعتز مشى عمل نايم وبرضو ذعلان مالك معاهم الثنائي ديل
08-08-2005, 08:43 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: والله يا ناذر في واحد قاعد جمبي وببحلق كل دقيقتين في الشاشة بتاعتي ،حب الأستطلاع بتاع الكديسة داك..-وفاتح البوست واقرأ واتفرج على ناس الصبحية الصينية والكوارث القاعد (تسرد)فيها دي اسفيريا.صاحبك عاين لى صورتك شدييييد وقال لى:"أنت دا موقع ابوداؤد ولأشنو!!!". وطبعا يا ابو النيز عارفني ما برضى فيك..أفو،قلت ليهو :"ليه العود الماسكو دا (عود) كبريت؟".
أصحابك ديلك كلهم بعرفم بس خليني النجي عشان اوريهم المكشن بلا بصل الحاجة التانية إنتا وين الايامات دي ؟؟ بالله حاول إتصل بي ضروري لأني جبيل إتصلت عليك ولقيت الموبايل ما معاك ..
أستاذ عثمان ...
أخيرا بقيت تخش تكتب في البوست وبطلتا المتاوقة
بمناسبة الشباب .. كنا قبل يومين في عرس شقيقة لقمان حسن همام أنا وحسين ملاسي وناجي الملك وتروتسكي بنادي الضباط .. الوجيه لقمان أصر علي إنو أغني لي فاصل وتروتسكي الحاقد قال لي بلله ما تجعر فينا وحسين ملاسي كان داير يسمع صوتي عشان أعمل ليهو موضوع بوست المهم في النهاية رضخت لي رغبات الجماهير المتعطشة وضربت لي فاصل مداري من 3 أغاني ... والجماهير طالبتني بي رغم موبايلي وغايتو إتخارجت منهم بالرجالة
الفرق والمجموعات الموسيقية قصيرة العمر في غالب التجارب!ليه؟ ابتعاد السوداني عن موسيقى الجاز والأيقاع الأفريقي!وبعض الأنماط الأخرى هل هو ثراء في الموسيقي السودانية بأيقاعاتها المتنوعة الضاربة في التاريخ أم قصور في جانب معين يؤثر على تفاعل الموسيقى السودانية مع غيرها؟ والسؤال السابق يشكل مدخل لسؤال آخر شكل الأزمة في الموسيقى السودانية كجزء من حالة الأزمة الكبرى التى نعيشها بعيونك بأعتبارك موسيقي(اكاديمى)قادر على التنظير واجتراح حلول.. ***** بمناسبة صورتى الجديدة هاك دي والله قلت الخالق الناطق الكاشف أخوي
طبعا مداخلتك أعلاه قيمة جدا لسبب وجيه .. وهو انني كنت منذ بداية هذا البوست أريد التحدث عن المشاكل التي تلازم الفرق الجماعية وأسبابها والحلول لها ..
وكما ذكرت في مكان غير هذا فأنه قد كان لي شرف قيادة عشرات من الفرق الجماعية المنهارة والتي لم تعمر طويلا كان اطولها فرقة المرافي للموسيقى والمسرح والتي أسستها في الخرطوم وعندما بدات في التصدع والتفكفك ذهبت إلى الهند وأسست واحدوة اخرى هنالك بنفس الإسم والاهداف وحتى اللوائح التنظيمية التي تحكم عملها ولكن كان مصيرها أيضا الإنهيار قبل مجيئى راجعا للسودان .. واكاد اجزم أنني أصبحت خبيرا في مجال أسباب بقاء وإنهيار الفرق الموسيقية الجماعية وأظنني سأتحدث عن تجربتي تلك إذا ما وجدت الدافع المناسب ...
وشكرا لك إذ أثرت هذه الجذئية المهمة ..
08-10-2005, 07:05 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: لكن تعرف بعد داك قلت احسن امسك مجال الشعر، واقوم اعمل قصائد، خصوصا كان عندي احساس اني ممكن ابقى شاعر وكده، فمرة قاموا عملوا رحلة في المدرسة وانا ما مشيت، اذكر كان عندي اشقدي في رجلي، قامت امي الله يديها العافية جابت لي برتقان وكده، نظام الود عيان، وانا راقد في السرير ما قادر اتحرك، مع انه الاشققدي في الرجل لكن ايدي زاتها ما قادر احركها عشان اقطعه اها بعد ما اكلت كده ورقدت قلت: يا يوم بكره ما تسرع تخفف لي الاشقدي والله اذكر امي دي ضحكت ضحك لم شرقت بقت تحكيها لي زول زول، وانا مبسوط لاني قايل امي بتنشر فيها عشان توري انه ولدها خطير في حفظ الاغاني رغم حداثة سنه
يا ود يا أبو اللمين إنتا
Quote: اها يازول بعد ما نزلت كنت كتبت ليك قصيدة امكن خمسة صفحات بوصف فيها في الرحلة واتخيل الممكن يكون حصل شنو، وكانت عاجباني ليك عجب شديد خلاص، ومشيت وريتها لصاحبي بلال الله يرحمه، قال والله انا ما عارف لكن كدي وريها لأستاذ العربي، فعلا شلت القصيدة ومشيت ليه وقلت الليلة ح يشيد بي اشادة ما حصلت ده كان ما قام علقها في الجريدة الحائطية
اها الاستاذ قراها كده وعاين لي وما قال اي حاجة، لكن الحاجة الوحيدة الفهمتها من نظرته ديك "أحترم نفسك احسن ليك" فرجعت حابس ادمعي ومن ديك قررت هجر الشعر فكانت اول وآخر قصيدة
تعرف يا ياسر بعد كدة احسن ليك تجرب حاجتين غنتا ما جربتهم في المجال دا يا تكون فني ساوند أو كمان بعام فنانين لإنو الشعراء ما هندهم بعامين زي أيام زمان أنا جيت امبارح ونزلت لي قصيدة أوتومسفيرية واهديتا للأستاذ خالد كودي لكن الظاهر ما عجبتو رغم إني كنت حريص على وزنة كلماتا والظاهر حا ابطل اكتب شعر تاني
آسف تعرف الأيام الفاتتت دي ما كان عندي كومبيوتر، فبقيت بعام كومبيوترات كل ما القى لي كومبيوتر مطرف انط فيه
لكن تعرف قصيدك الاسفيرية لخالد كودي قريتها وحقيقة اعجبت بها ايما اعجاب وردت فيني الأمل انه ممكن ابقى شاعر تاني، وبديت افتش في قصيدي لكن المشكلةما عارف اصنفها كيف لأنه الزمن داك كان عصر ما قبل الاسفيريات فقلت انزلها تحت عنوان قصيدي البري-اسفيريك
Quote: أو كمان بعام فنانين لإنو الشعراء ما هندهم بعامين زي أيام زمان
وانت قايلني ما جربتها، لكن والله العظيم صدفة بس، تعرف صاحبي عبدالرازق الحكيت ليك عنه قبل كده، كان عنده حافلة، اها الحافلة دي بالليل باجرها للفنانين واكتر شئ كان ناس عقد الجلاد وود الأمين، وانا بمشي معاه طبعا مساعد صاحب الحافلة
ولما اغتربت اول اصدقائي الاتعرفت بيهم وعشنا مع بعض سنين طويلة طلع من اولاد الهند وفنان كمان اسمه أحمد ملغب fd أحمد الشلالي وكان بقلد زيدان ابراهيم، اضافة الى ذلك بعزف بنقز، وقدر ما حاولنا نقنعه يخلي عزف البنقز ده ما قدرنا، والاحسن انه ما خله لأنه اضافة للحفلات الكنت بحضرها معاه كصاحب فنان كنت بحضر معاهو البروفات الكان بيعملوها مع بعض الفنانين الكبار البزورو السلطنة، صاحب العازف طبعا
والأخطر لما مشيت صلاله، سبحان الله اول واحد لاقيته وامتدد صداقتنا حتى الآن طلع فنان برضو من اولاد عطبرة اسمه خالد، وعلى حس كده طبعا في اي حفلة في اول كرسي يا تمشي تبشر ليه يا تمشي توسوس ليه في اضانه بس سبب وبدون سبب، صاحب الفنان طبعا، يعني بعام لكن بحقه
تعرف اجمل طرفة اذكرها مع الفنانين ديل، مره جيت صلاة المغرب ولقيت اخونا خالد ده بره الباب وبضحك لمن ما قادر يقيف، اها يازول مالك؟ خير ان شاء الله، قال تعرف انا واقف بره هنا مع الامام جاء واحد من هناك سلم علينا وقال لي الأمام: عليك الله صلي بينا بي مريم، يقصد سورة مريم. قال لي طوالي اذكرت الحفلات
لك مني خالص التحايا
08-17-2005, 03:26 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة