المسكوت عنه فى شئون البيت السودانى...

Quote: Date: Sat, 29 Jul 2006 01:49:17 +0400 الحبيبة نور ملايين السنين الضوئية عدييل كدي ..عاد ما طمنتيني .. انحنا من يومنا الصبر في تلتلة غايتو ..اهو سايرين في الدرب للجايين.. اما احنا بعد الشتات دة الله يكون بعونا ساكت!!1 وهاك من صميم اوجاعنا المرا كان بقت فاس ما بتكسر الراس المرا ماعون ولادي ان ما بلعتي ريق على ريق ما بتمسك رفيق الما بلقى شبهو المولى قبحو و.......و.......و كثير من الامثال التي تعكس مبادئ تعلمنا امهاتنا بها قيمة الارتباط بالرجل ..والذي هو حياتنا التي بدونها لا نكون!!!1 ونخرج للمجتمع والحياة لنصنع ما نصنع ..ولا شئ يحسب لنا نجاح غير الزوج والبيت والاولاد. .اما اي شئ آخر فلا يسوى اكثر من :والله كويس البت اتخرجت من الجامعة ..واللله كويس البت جابت الدكتوراة واتوظفت بشركة او مؤسسة كبيرة..وبقت رئيسة ولا مديرة ولا حتى وزيرة ...اها وبعدين تتساءل النسوة :ما سوت شي ..وهو سؤال ليس له سوى معنى واحد..اي كانت اهتماماتك بالحياة..يعني لو كنتي(بزنس ومن)ما بكون السؤال ليهو علاقة باعمالك ومشاريعك، ولو كنتي بمجال دراسة ما بعني لاي مستوى وصلتي او ما هي آخر ابحاثك وشهاداتك لكن( سوت شي) دي ..ليها معنى واحد ..وهو انها صار ليها وجود وكيان بالمجتمع..اي تزوجت وبقى عندها بيت واولاد..وتجيك النسوان بقى متسابقات ومهنئات باليوم الابيض..وتغني ليك البنات ..درس ايه وجامعة ايه الليلة يوم عرسي..وتعالي شوفي الاحترامات والتقادير ، انتي عاد بعد دة ما بقيتي مرا براجلا ما بت ساكت اما بدونه ما عندك عمار ولا ليك فايدة ..ويسوو بيك شنو زاتو حتى لو اكتشفتي الذرة!!!1 هذه النظرة الدونية للبنات غير المتزوجات، تنطوي على شئ خفي من اتهام..خاصة لمن تجاوزت الثلاثين، سيان الامر جميلة ولا شينة ..متعلمة ولا قاعدة في البيت ساكت ..عصرية ولا تقليدية. تترجم همسا ونميمة بالسؤال:هي يختي ما عرسوها مالا؟!1 و(مالا) دي هي مربط الفرس والبتخلي كل واحدة مما تقرب من الثلاثين تتخوف او تتعقد او على الاقل تتحسس من كل كلمة ..اذ انها كلمة تنم عن الميل والانحراف عن الشئ ، وبالتالي لبس الغلط_ وهو هنا_ بدون غلط ثم تتحامق البت وتتبالد.. فتتزوج من اول طارق او من ما تيسر اتقاء تلك النظرة القاسية المجحفة..والتي يصل حد رعبها ان تصمت الفتاة عن اي تعليق ، اذ انها لو تجرأت وطرحت وجهة نظر مخالفة فتكون عندئذ (مسكينة البورة حارقاها..والعنوسة خلتا تهضرب) فتضطر ان تسكت وترضى بقسمتا بدل الكلام الجاب ليها(شيل الحال )..وتبلع العبرات.. وتخضع.. وتخنع ..وتتدرب على بلع الريق عشان تمسك الرفيق وهي دايما تعامل على اساس ناقصة وكان بقت فاس ما بتكسر الراسالى ان يكملا راجل ..اما البتبقى فاس ،فهي بالطبع مسترجلة ومستقوية ومفترية .اذ ان اهم صفات الانوثة المفضلة ومصممة جاهزة ..بل ومفروضة بحد سيف الارث والعرف الاجتماعي هي الضعف والذي تمتدح به، وتنصحنا امهاتنا باظهاره _ خاصة عندما يعلمن انه ليس بنا_ حتى نحوز ابن الحلال ..اي نتمسكن الى ان نتمكن ونحقق ما نريد..وما نريد هو ما يريدون ..وما يريدون لنا سوى بيت الحلال والرفقة والجنا شوفتو السوقة كيف؟ البعدها يجي السؤال : ولا ما بتدوري بيت الحلال ؟مابية سنة الرسول مالك؟برضو مالك تاني !!!!ويعاينو ليك عشرة عشرة ما المشكلة في فكرة الزواج..المشكلة في سيطرتا كسبيل وحيد للحياة والكينونة مؤخرا بدينا نسمع بعنوسة الرجال ،لكن اظنها من باب التهريج مقارنة بما يسمى بعنوسة المرأة ..والتي هي عقد وخزعبلات مجتمعات باسرها ،تعمل منذ دهور جاهدة على صبها براس من تجاوزت متوسط الزواج لديها