|
Re: خيــيمة الحــردلو - العمارات (Re: Ahlalawad)
|
الله عليك يا نزار .. و الله كلامك طيب خلاس .. يمرق الفلايت ... غايتو الهمباتي ده لازم نجرو بيجاي .. لكين كبوش قال ولوف و ما بقدر افارق الخيمة القديمة
مش السودان ملك آبوي؟ نعل عافية؟
| |
|
|
|
|
|
|
Re: خيــيمة الحــردلو - العمارات (Re: Shinteer)
|
شيخ العرب
كيف حالك يا اخوي
والله ماشي السودان اجازه بس ما في عوجة تب
ماشي اشم لي هوايا نضيف واشبع كسره وارجع
باقي مطولين من الاهل بلحيل وبيني وبينك ماشي اشوف الطرطشة البقولو فيها الناس في البوردات دي
بجيبلك خبرها تب
والقط لي غنايا كتير
المره دي شاقي البطانة من تالا الابيار والدوانكي وشايلا لا القضارف بي الخلا ساكت
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
حبيبنا نزار وهدناك العديلة قدامك ووراك إن شاالله نشوفك وانت طيب بعد عودتك وأن تلقى الأهل كلهم تامين ولامين أها - أنا كنت داير أقول ليك أنا أفضل زيارة السودان للناس اللي زيك بين شهر اكتوبر وفبراير الدنيا بتكون رايقة ومافي شيتن يضايقك لا زحمة مغتربين ولا قرارات جديدة تتبختر في المليون ميل دي عليييي كيفك والجو زاتو ظريف والأرايل ولوفة
لاكين .. بي عافيتك كان نويت
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
تسلم يا اهل العوض
طبعا في السودان جهاتنا ديك ما اظنو الكمبيوترات ديل وصلنها واكان وصلنها الا يكونو بشغلوهن بالبطارية غايتو ده وكت خليتم هسع ما بعرفم البقي عليهم شنو
لكن المتاكد منها بجيكم راجع بي نضما كتير بلحيل
ها زول الناس ناجعة في الخليات دي بي كترة نضم ما لاقي تدوين كاغلب حاجاتنا السمحة في السودان
ابقو عشره علي شيخنا شيخ العرب ود شنتير واصلوه الزول ده فيه فايده عظيمة خلاس ما تخلوه للوحده وجري في الليل
والهمباتي ده جروه لي الخيمة دي بعد يكمل عسلو
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
اهل العوض!!!!! شايفكم ما اشتغلتو خالس خالس باقي الشغله ..اعجمي فافتح له..ولا خيمتكم خاصه!!!؟ مافي مشكله انا بكره بعزم ..البجاوي ..ودقنه..وباكاش..نفتح لينا ..قطيه بي غادي..وبكلم باقي الرطانه ..كل واحد يفتح خيمه..لي اهلو...رطانه ساااااااااااااااااااي اصلها الشغله ماشه علي كدي.. كل قرد يطلع جبلو..زي ما قال المرحوم صلاح مرحب بيك ..ساي مافي!!!!!!!!؟؟؟؟؟؟؟؟؟
بهظر يا اخوانا والله بهظر
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
مرحب بيك يا دافي نيابة عن الجميع إتفضل يا زول و نهديك كلام جميل من الشاعر المبدع حسن سالم عشان تروق و تنجم
قال لي السويجع الغرام ألزمني حملاً لا أطيقو من التقل زممني بي سيم العاشقين السابقين أوسمني لا خلاني عشت و لا كتلني عدمني
الأخ الفاضل شنتير…… و الله نحن نتشرف بي معرفتك و كلامك يدل على كرمك و أخلاقك السودانيه الأصيله…… و جايينك بي درب أب نقيب السموهو الإيميل يا شيخ العرب
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
أولاً بالتبادي .. يا عزيزنا الدافي .. إن شاء الله طيب
ترحيب مغربل و صافي من الخيمة لي اخونا المسمّى الدافي دي دارك ملك في شنو الزعل يا كافي أياك سيدها ماك زولاً بدور عوافي
الشكر موصول للأخ العزيز اهل العوض الذي لبعني بايميل ظريف و معاه هدية تفتح النفس .. شكراً عقب يا اهل العوض
ود محجوب .. ماك طيب آعيسي .. يعني بتبشرني بالايميل و تنقرع؟ ما ترسل مالك .. يعني بتاكل لك في بيتزا .. ايديك الاتنين مشغولات؟
نزار .. و الله انا برضي طولت من السودان . و كل ما اتذكره بديها جكة لا غادي .. غايتو كان مشيت جيهة السباغ اقع الخلا .. في ناس بيغادي علي الطلاق كان لاقيتهن اياك الماك راجع تاني
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
مرحب حباب دافي أب كلاماً دافي أب ضميرا صافي يازول انت سيد بيت تب سلامك سلامنا وكلامك كلامنا
أبقى لي جوة .. واخلف رجل فوق رجل وورينا بضاعتك
الحبيب شنتير
من يوم نشرت عنوانك وانا مشرك ليك في المسنجر في دار الهوت ميل .. صحيح ما قدمت ليك طلب إضافة .. كنت بدور أجيك غاير واشوفك بتعرفني أم لا تاني شيء الخيمة دي غالية بالحيل وعفريتك دي ما عاجباني .. تاني كان حبيت تعفرت الخيمة ما تكتب عفريتة أو ابقي لا فوق .. لكن شوف لينا حاجة كدي من بيت الكلاوي وارسلها كان منك ولا من عمك الفرجوني وبالمناسبة عمك انا رسلت ليهو رسالة عبر المنسجر ادعوهو لتشريفنا في الخمية .. عليك الله مجهودك معانا .. الخيمة دي كلنا أخوان فيها لكن بندورلنا كبير .. يبقى شيخنا ويمسكنا الدرب
تحياتي
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
يا سنجاوي .. و الله انا ياخي مرات بجي بلقى الخيمة حتلت في اخر البورد و بقول اديها دفرة .. لكين وصيتك سمحة .. تاني بسندها بي شعباً غلاد
و بعدين لي شنو ما بتلمني على ناسك الفي المسنجر ده؟ و الله انا كتبت عنواني الالكتروني ده هنا عشانكم .. و لا هسع ما جاتني رسالة الا من اهل العوض .. اها إن شاء يوم نتلاقى في سرج المسنجر
العم الفرجوني قال الكمبيوتر بتاعه لكزو ولدو بوظ فيه حاجة .. و اللاخ بكري ابوبكر حيصلحو ليه قريب ان شاء الله و بعد داك ببقالنا راس قايدة
الاخ الظريف الدافي .. و الله بارك الله فيك ياخي على كلامك السمح ده .. كتر منه
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
متلوم كتير يا دافي باطن وظاهر ما مقصودة يا الصنديد وأدبك ظاهر دهج الدنيا والردحي الدوام متظاهر دا السلب الصبر مني وبقيت ما ظاهر
الاستاذ ياسر محجوب .. أولا حمدلة على السلامة ونرجو أن تسمح لنا فقد قطعنا فيك أنا وأخوي شنتير .. وطبعا نطمع في كرمك والمزيد من الأدب الرفيع الذي تتحفنا به وهو شرف لهذه الخيمة وروادها .
ود شنتير .. شكيت محنك على الله .. برد عليك في الايميل .. طبعا نحن ما عندنا خدمة يوم الخميس والجمعة .. لكن برضو كتبت ليك الايميل يوم الخميس . شنو ليك . طبعا في البيت الجماعة ما بدونا طريقة نطربق بي راحتنا .
سنجاوي أب نضما يداوي .. حبابك آ بوي .. وأثني على اقتراحك ونطالب شيخ العرب باستجلاب أوتاد جديدة . (أنا باخد المقاولة) من هسع
نحن في شوق شديد لسماع الاستاذ الفرجوني .. ولو في طريق نتشرك لو كمبيوتر انا من عندي خمسطاشر قرش في الحزة دي .
كنا قد طرحنا بيت الشعر المشهور لجميل الذي يقول فيه
صغيران نرعى البهم يا ليت أننا إلي اليوم لم نكبر ولم يكبر البهم
وطلبنا من الشباب مجاراته بالقطع اللخدر .. فتجاوب مشكورين الاستاذ ياسر محجوب والاستاذ سنجاوب .. الرجل الذي زعل .
نعيد طرحه الآن كطلب شيخي وشيخ العرب شنتير
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
يا أهل العوض وشيوخ العرب والرطانة سلام
يا هلا بخيمة الحادلو في ديار البكرييين طبعا أنا في الغالب في الخيم دي بكون زي الأطرش في الزفة بس حبيت برضو أقوي قلبي وأشارك معاكم بكلام من كراس غيري ..قال ايه...قال الشايقية زمن المهدية كانو بقولوا كده وأنا طبعا زي سطحت في بعض الكلام
الليل أب سدر ابكنه يا اخواته ولدا في قدير مابشوف ذاته ود محمود حليل نقل القديم فاته سيد سرج الدهب والفضه قهواته يا حليله اب سدر قمر العشا الموهلال للضيفان يكفي والبواطي اشكال درفون خالك انت الما معاك مثال عمه اب راي صبير وجده الملك كمبال جنيات الكنابلة البردو في ام دعكاب بتدخلو الصفوف اليوم قمركم غاب
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
أهلا بالاستاذة رمانة .. هذا تشريف عظيم ، نشكرك على المشاركة ، ورغم إنك لم تحددي الحتة اللي زي مسطحة فيها ، فأنا أقول (وبالله التوفيق) أغلب الظن أنها مناحة قالتها قريبة لهذا البطل ود محمود . نفل طبعا معروفة وهي تفيد الزيادة ، والدرفون هو الطفل اليافع وهي كلمة اختصت بها جهة معينة في السودان الغربي ، ويقول المثل هناك (ماتاخد ام الدرفون لو كان مدفون) . البواطي لا أعرفها لعها آنية ، والله أعلم لذلك أجدني أقرأها كما يلي مع الاعتذار مقدما :
الليلة(بدل الليل) أب سدر ابكنه يا اخواته ولدا في قدير مابشوف ذاته ود محمود حليل نفل (بدل نقل) القديم فاته سيد سرج الدهب والفضه قهواته يا حليله اب سدر قمر العشا الموهلال للضيفان يكفي والبواطي اشكال درفون خالك انت الما معاك مثال عمه اب راي صبير وجده الملك كمبال جنيات الكنابلة البردو في ام دعكاب بتدخلو الصفوف اليوم قمركم غاب
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاخت الزينة رمانة .. كلامك جميل و الله و يبدو أنك تختزنين الكثير من مثله
عزيزي اهل العوض .. البواطي جمع باطية .. و هي إناء .. اما شكله فممكن أن يخبرك به اخونا سنجاوي .. أما أنا فساعطيك بيان بالشعر المحفوظ
أديتو العيش بالباطية كان تقوى جريدتو العاتية على الما نضمت خاتية بتجدع متل الفاتية
تاني الاخ أهل العوض .. نرجع لي بيتك الضيق ده و دايرنا نحشر فيه اربعة بيوت من الشعر الدرشي
صغيران نرعى البهم يا ليت أننا إلي اليوم لم نكبر ولم يكبر البهم
بسم الله يا مهون القواسي
جهالاً كنا أنا و تومتي و سغار في عمرنا سارحين بي بهمنا و ما في من حاجرنا نلعب مانا قايلين الزمن بغدرنا اريت يا تومتي لا كبر البهم لا كبرنا
شنو ليك .. لاكين وحاتك إت تعبني تعب .. تعب عدوك
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاخ شنتير شكيتك على النجرك ات سايب بتجيب النضم الحلو دا من ياتو دلو والله فعلا حالي وطعمو حادق وبالنسبة للوسم فالجنس رفاعة والعمودية مسلمية ونتلاقى في ضهورن كان الله هون ومرواحنا قرب وبعدين الباطية دي أنا غتست مني وين في الساعة ديك؟
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
الله .. رفاعة جيهة المناقل؟ الوداكن هناك شنو؟ .. و الله انا كت قايل رفاعة كلهن ضاربين الدنادر .. و الخريف بنشغوا مصبحين .. خسوساً ناس ود أب جن و عرب الليم و الحمدة و عرباناً جيهة الطلحة المشرمة
بالمناسبة دي في مسدار أب قلب ناجرو الفرجوني فوق اهلك رفاعة و ترحالهم الى اعماق البطانة في زمان ما .. والمسدار ده أنا عندي من زمااان حفضتو و نسيتو لكين كان نحت مخي و بحت في كوم الشرطان المباريني محل ما امش ده .. بلقاه ليك تب
هسع بتظكرو طشاش طشاش لكين في واحدات كدي النرمتيهن ليك
سدر الديش قلع جدعن جمالو الباع و ناس اب شترة قطرانهن سرف نباع حور الليم عقيدتن ختّ فوق نجاع و دوّر مرنع البلد اب سحاباً ماع
جرس العطفة ببكي بطبّق النقرات و ايدي الفايقة بتنسّف سيورها شتات منّاك للطبق يا رفاعة ضعنك فات و الجاب الخبر نازيلن ابو دميعات
غايتو كان قعدت ليه بتظكرو و الله اعلم
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
تصحيح يا اهل العوض في الغنوة التانية .. في غلطة مطبعية
جرس العطفة ببكي بطبّق النقرات و ايدي الفايقة بتنسّف سيورها شتات منّاك للطبق يا رفاعة ضعنك فات و الجاب الخبر نازلين ابو دميعات
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
الحبان عموم... و الخيمه دي تاني غتست...أها ختيت فوقك هام مرده أب شراياً كوم.. نرفعه بي قول سيدها زاتو الحار
يا سخلة عشيب الأرض قِمح قناصك و يا ثمرة حدايق يانْ شِرِق مصّاصِك محيّاك جّزع الكبِد و الفؤاد رصاصك بليتي بغيّْ جديد يا نفسِ كيفَ خلاصِك
يا شيخ العرب ود شنتير و الله غلبتنا تب في بيت أهل العوض... و كمان إنتا و أهل العوض أديتونا من علمكم ماشاء الله بحركم واسع صعيد و سافل.. و كمان نرحب بالضيفه رمانه و كلامه السمح..
يا نزار.... دحين آ خوي كلامك الختيتو هول التجاني ده ما بنقدر و لا بنهابش فوقو.... غايتو زي ده إلا يدقو شيخ العرب شنتير ولا يجيبلنا سيد القول و الفراسه الفرجوني
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاستاذ ياسر مجحوب .. سعداء بمشاركاتك المتفردة شيخ العرب ود شنتير وعد بتبديل أوتاد الخيمة ونحن في رجاه هذه من قديم الهمباتة: الليل أمسى والنعسان جرايدو يدحن كبس الهم علي السلّط قلوبن وحن كضم الجرة سحار الغروب اتمحن نعود سلمانة يا عمر الظروف إن صحن
الأخ نزار في آخر مشاركة قال إنه مسافر إجازة . نتمنى له سفرا سعيدا وعودا حميدا . ولك التحية
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
العزيزة الغالية رمانة
حبابك عشرة بزيارتك بيتنا نور ما تنقطعي
أهل الدار بشوف خيمتنا غطست وبتدورلها عفريتة
هاكم العفريتة السنجاوية دي
الليلة الحـروف لاوتنـي هـدت حيلي عاصية عديل أبت ترسم تعاستي وويلي قالـت ما بتـروح للحسنو جنن جيـلي شان جافي وبخيل في دربو ضـلّ دليلي
الليلة القصيد فـي صدري عالي هديرو شن صحاهو غيـر جدياً شديـد نفيرو بعد ظنيت نسيت جرحي الغريق عويرو غافلني ونـزف سيلاً يـدوي شخيـرو
بعد ظنيـت نسيت الليلة شـن ذكرني وشن طراني لي جرحي الزمان عورني كل ما أقـول شفيت من السنين كدرني ينـزف من جديـد لا طبت لا ودرنـي
| |
|
|
|
|
|
|
Re: خيــيمة الحــردلو - العمارات (Re: singawi)
|
ما شفت الجروح زادت على يا أسامة طرانى الشليخ فى خدو باقى علامة تمشى على مهل وكل العسل فى كلامه شايلة البرتكان وبالعين تصيب بسهاما كتلتنى الشويفعونة والروح بقت تتسامى فى حب المكبرتة واللون تقول شمامه
looooooooooooooooooool
| |
|
|
|
|
|
|
Re: خيــيمة الحــردلو - العمارات (Re: singawi)
|
يا الفي الجحر الصلوتية جاتك
يا ودشنتير وسنجاوي والهمباتي واهل العوض وودمحجوب
يا ناس الحاصل عليكم شنو ضربكم الصقط والزيف ارفعو بطاطينكم دي وامرقو لا برة
تعاليلو عديل يا امدرعة ليش راراية وما بقدر احاحيك واسيلي جناية
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
الحبيب نزار لك الود الحبان مهملين الخيمة في طلب المعاش أها بعد ما يجونا صادين سالمين غانمين بندور منهم الفيها النصيب وهاك بليلة مباشر
الليلة الغـرام حكـم علي سلطانـو ذكرني الحبيـب وشواني بـي نيرانو وين الشال قليبي وساقني في حيرانو واشوقي الشديد لي ضمتو وهمسانو مجبور المعاش حتـم علي هجرانـو
الليل الطويـل زاد الفـراق تعذيـبـو وجمـر الشوق يحرق في حشاي ليهبو وين الشال قليبي وخلى عنـدي قليبو ما بنسى ان نسيـت ليلة فراقنا نحيبو معليش يا ام أخوك الحر بيرضى نصيبو
| |
|
|
|
|
|
|
Re: خيــيمة الحــردلو - العمارات (Re: singawi)
|
يا سنجاوي
خليه الغرام ساكن قليبي وباني وراكز شعبتو في كبتي داير يهراني قدر ما اقول ازورو طبيبي شان يحجاني القي مسافتي بيني وبينو بعدت تاني
انا في الغرام غاتس يمين بي هدومي افج الموية واتنفس اخاف من يومي
واكاتل الموجة دافرة وقابضة في حلقومي دحين سنجاوي باقيلك بفز بي عومي؟؟؟؟
كبدتي كتبت هكذا لداعي الوزن وهي تنطق بالعامية هكذا طبعا الشرح ده ما ليك يا سنجاوي ولا لشيخ العرب ولا لاهل العوض
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
الاخوة الكرام في الخيمة :
الاستاذ ياسر محجوب ، سنجاوي ، نزار الجعلي ، يازول يازول ، دباش والغائب ودشنتير المو تاجر حمير . تحياتي وشكرا على الأوتاد التي تثبتون بها الخيمة كل ما صفى فوقها موج . كنت بعيدا عن الكمبيوتر في الأيام الماضية . لكم التحية وهاكم من سيد الخيمة (الحردلو) زاتو كما قال الاستاذ ياسر محجوب ، دا يا سنجاوي لعجزنا عن مجاراة نظمك النضيد:
في يوم الجمع بالحيل رطببها عوالي ماخدة النورة فوق الصفصفو الغربالي إن ثبتت سيادتك للشباب إجمالي تحكيبهاالدول لاعن سراية الوالي
ود شنتير لديه بعض الظروف حكاها لي تبعده عن المشاركة في هذه الأيام نتمنى أن تزول تلك الظروف سريعا ويعود لإمتاعنا بالدرر التي يختزنها وينثرها بعفوية ، دون تكلف
إن تلق يوما على علاته هرم تلقى السماحة والندى خلقا
وسلامتكم
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
أنا المجنون وسـر جني البجنن شوقو أنا الكاتلني شـوق ليماً معسل ضوقو كل منـاي أشوفو وأطفي ناري بريقو حلالـو يعيقني يامولاي يـوم ماتعيقو
سافر شال منامي وشـن بلاهو منامي وكان صادتني غفوة بشوفو في أحلامي قربو سبب سعادتي وبعدو سر آلامـي يا مولاي سألتـك زيـدو مـن أيامي
سألتك ربـي تجمع كل حبيب بي حبيبو وتحفظ عُشو من عين الحسود ما تصيبو وترحـم قلبو من شوقاً يـدوي لهيبـو وتجمـع شملي بالشايـل قليبي تجيـبو
| |
|
|
|
|
|
|
Re: خيــيمة الحــردلو - العمارات (Re: alsara)
|
سيد الخيمة اهل العوض
وين الباقين ودالمحجوب وسنجاوي وودالحافظ والهمباتي ودافي انشاء الله قلعة الخيمة تجيبهم لينا راجعين سالمين وغانمين بركة سيدي الحسن جد المرغنية
اما شيخ العرب برمي ليها غنية من زمن الخيمة القديمة
يا شيخ العرب نمك عقولنا فتحها للصوت والنحاس ليلة الخلوق تتنحي
راكزين في جزيرة والبطان فد صفحة
وعينا علي العبيليجة البترمي طرحها
نزار
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
نزار الفنان : كتر خيرك وحمدلة على السلامة .. وهاك على لسان شيخ العرب
أدرع َنفّـر الغنم المـراحهـن ليلة عقب أب دوم والوادي الزَرَاعتو قليلة علي السمحة الغلب توصيف سماحّا خليلا درويشا سمع نوبات وشال تهليلة
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
اهل العوض حبابك
طالما قلت علي لسان شيخ العرب اها انا كمان بديك واحدة سمعتها منو وانت عارف انا كل يوم بلاقيه في الماسنجر لاكن الزول ما برمش تب اليوم كلو موجود بس ما بيرد,
عين الفرقة دمعك وشلي واسخيلو حاكي الوابل اللاقا النهار بي ليلو بعد رحل العشاري وقلبي حاربو دليلو سهرك لازمك نايح السقد آنسيلو
الزول بيكون غاتسلو في سحابتن زرقها زي ناقة الكنانه ام ريش تقرجن وتبكي ويبكو عليها ناس العيش طعنها البرد وقالت ها العذاب فوق ايش رمت مقدافهاقلست
وترعت واحمتو المرقة
ده الظانو في بالي
نزار
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
اهل العوض والجنادرية حبابكم آلاف
ات ماك خابر البتور ضرس شيخ العرب ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يا ابعرج القبايل كلهن زهدنك وما بياخدك بشر في المولي كبر ظنك بي نقع البطانة مفنك ===== يبقي الليلة نايرات الخدود طرينك
ود ارباب عليوك نيلو زرقن اقلب الشد علي الدوماتو عرقن جناك الزاع مفاقر وطش شرقا براهو ينوح علي الميع المترقن
وبرضو غيرت الكلمة الاولي في البيت الاخير كان شيخ العرب يجي ناطي ويقول شي
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
سميناها رضينا ، وبرضو حمدلة على السلامة
بعيدة بلودك آ المتل المزرقن فمك وأحلى من الروايح ومن عبيرهن شمك قت لي قلبي ها المجروح بمتر دمك وابشر بي نظرة الشوفتو بتفرج همك
أحمد عبدالله البنا
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
صغى لي قولي سمّاعو الرقيق اتحرًك نفى شنشولو وانفقل المعز ومعرّك قال لي ونفّ جنحيو الرقد واتعرك كفي صميم وعندي هميم فعالاً يسرك
تصحيح .. من وحيح صوت المديح .. الله حي دايم نصيح
انصقل المعز و معرك جنحيو الربد
انتهى
شوف داك السباغ العدّو زاكي شرابو ما بنغشاهو يا اب سرجاً نبح كرابو رد السنة لي اب صرة و عزاز نورابو اهل المرجلة البتزابوا فوق اغرابو
| |
|
|
|
|
|
|
Re: خيــيمة الحــردلو - العمارات (Re: Shinteer)
|
شيخ العرب ودشنتير واهل العوض
جيبونا كم شخلوب علي الوسم ده الاتنين ما بتتصاقعو تب
شيخ العرب الناس امس ضايرتهم ليك من فراشهم لا مديرهم وحرم لامن سوولي لجنة عشان يعرفو الشغل دا راح وين وهسع جابو لي خبر قالو اصلن
دوبو دوبو آ عرب واملو كدوسكم بالدوبيت الكلام ده حرم يتور شعرة الجلد
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
وووووو نزار .. ها زول الناس ضايرتهن؟ كابسهن يكابسهن شريف اهلو في الريف .. انا و الله فقري وقعت من الخرمة
عقب الدندر الغيبة و منوّي شروق و ركز العقبو حر فوق جد ابو البرقوق خليت الوراك ساف الوطا و محروق كب آخر ايدك آآلحوري الجلب مشروق
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
يا اهل العوض و الرحمابي .. اوعى تقولوا لي انتو شايفين مشاركة الملا عمر؟ و الله العظيم انا لسع بزازي ليها و مالاقيها. وين ياخواننا كلام الملا عمر ده؟ انا عيني طششن وللا شنو؟
فرشوت غبّر السبعات و طلق الفوف و جاب لي قلبي وحّاحة و زلازل خوف عيني يا العوض حرمني من الشوف و انقطع الوداد من القناها أب روف
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
شنتير والجندرية مشاركة الملا في الصفحة التانية يعني يكون ملا كيف
وهنا لابد من الاذن
ريد الردتو يا حسن الفكي وجافاني فيه هلاكي وأسباب الدوا العافاني ما دام زولي بالطبع السمح صافاني مالي تاني في الواددني والجافاني
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
الحمد لله يا الجندرية انك ما قادرة تلقى مشاركة الملا عمر .. عشان ما اكون انا بس الما شايفها. انتي عارفة انو الملا عمر ده يكون اصلاً غير موجود .. يكون في تورا بورا ياربي؟ الناس دي طفشت وين؟ يا اهل العوض و نزار .. و الجندرية لميتوا فيني جريتوني جر .. و انا انفتحت كل مسامات راسي .. و مطاميره العتيقة .. فاين انتم؟ الله
البارح و اول البارح في المنام تخربنا واقفين ديدبان جناً كبيــــــر راكبنا لا في من قريب لا من بجي يطايبنا اصبع ضوّة في عين الفكي البحجبنا
اصبع ضوة ده شنو يا سيدي الحسن؟
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
يا سلام يا اهل العوض .. والله انت الكلام الكبار ده بتجيبو من مين ماني عارف .. ياخي و الله اريت اكان الزول ما عرفك زاتو .. زي ما قال شاعرنا المتهرب محمد سعيد العباسي
الوادي الغزير شقلو و غديرو مسرّف يا ريت كان قبيل بيهو الزمان ما عرّف الضيب الـ على راس القلوع بتكرّف
البيت الرابع بجيبوا ليكم بعد ما اشوف حلة العدس دي ما تكون حرقت
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
يا قلع الهماييب ليك الف سلامنا حليل وكتاً قبيل ايام سكون ناس آمنة زمان توتال فريقا و نزلتا المتيامنة كان بتضل لي ضاقت حلّقت اقدامنا
و الشغلانة الفووووق دييك ريد الردتو يا حسن الفكي و كافاني
يا اهل العوض .. و ليس جافاني
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
أها اللله يبارك فيك .. بس تم أجرك وجيب المربع الباقي ،
يا قلع المهاييب البدت متيامنة كم غنالها كان شيخ العرب قدامنا
أنا غايتو ، التقول أنشق
وبيتين طرفة : هوم ويرك
كأن حدوج المالكية غدوة ** خلايا سفين بالنواصف من دد عدولية أو من سفين ابن يامن ** يجور بها الملاح طورا ويهتدي يشق حباب الماء حيزومها بها ** كما قسم الترب المفايل باليد
خل البيتين الأولين دا للشرح بس ، أنجر لينا في التالت .. الله يخدر ضراعك
| |
|
|
|
|
|
|
Re: خيــيمة الحــردلو - العمارات (Re: Shinteer)
|
شيخ العرب ودشنتير
الناس عليك امان الله ضايرتهم مضاير حجازي ابليس بس والطرد بيصلك قريب ما ضاع تب ورقمو تراهو ده 4329 شرحو لي شرح طويل فيه اجازة وماركة ووزن وجمارك وفحص وكتبوني ورق مالو حد
المهم في الموضوع عندي الورق البككهم بيه اكان اتلخلخو وما جابو ليك في بطن بابك
اهل العوض ما تقيف من الدوبيت لامن افضي بالي ده شوية واجيكم
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
الورق البككهم بيه اكان اتلخلخو وما جابو ليك في بطن بابك
هاهاهاااااا و الله يا نزار المفردات الاوردتها دي قدر ما حاولت اقاوم الضحك بعد قراءتها .. عجزت عجزت .. و مازلت اضحك .. ياخي و الله الطرد ده انا اتمنى ما يصل زاتو عشان يخليك تهترش كدي
ياخي و الله اديك واحدة من عمي عبدالله ود أرباب .. قالها عن سنة ستين التي كسدت فيها المواسم و ساد الجفاف كل مراتع الاهل في البطانة العزاها الله .. اها قال في وصف تلك السنة القوية
ستين مثلت ستة الزمان بحكوبا ستين شالت العيش و الغباش و اللوبا ستين جاتنا عريانة و نست مركوبا ستين حر سمومها يحرّق الراكوبة
و في واحدة تانية و الله اسمح من دي .. بس عاجبني جزء منها بقول
ستين رافعة ايدها و راكبة ليها حصان
رحم الله ود ارباب و الحقني به
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
آناس أنا ما سعيد عديييل كدي ..نزار .. لا حول .. طردك دا في لبا الرقطا وللا شنو .
شنتير .. جننت ستين جن ..
ونحن بنغلط وات عليك التصليح :
ها المتقدر الفي الضرعة زايد مدّك في النفارة خالك وفيها عمك وجدك قول لي قلبنا المتهلك ألزم حدك أرماحو بتصيبك وسيف عيونو بحدك
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
يا زول انت مريض يا اهل العوض .. شوف ليك حكيم ياخي!! الله .. انت شغال شنو؟ نسعل الله السلامة
اديك واحدة من اب قدم الله يرحمه .. شيخ الهواوير .. ياخي الناس السمحة كلها ماتت .. و انا طاش
أكان حنيتي ما بتنلامي ضايقة النشغي في النعم البقوم قدامي القش الربيعك فيه صيد و نعامي ما قام اصلو .. بخلن بو المحول آم شامي
و المعني واضح وضوح الشخلوب فوق الشدق
| |
|
|
|
|
|
|
Re: خيــيمة الحــردلو - العمارات (Re: Shinteer)
|
أنا غايتو و لا زعلانة ..البزعلني شنو؟؟ ياها الرماضة السيحت ودكي و لا أبو الفرار الشق راسي وقفت في الباب لامن نشفت قولة يا السارة أتناولي ليك موية من القربة ديك مافي ؟؟
و و الله ما زعلانة... طنشوتي و تاني جيت ما ميتة قلب و الله .. الا عاجبني نضميكم
تسلموا كلكم من كل شر علقوا ليكم بخور تيمان في باب خيمتكم لا يطقوكم عين
مسئولين من الخير ..وين الزول النضام ود محجوب سنجاوي أب كلاما يداوي ترا عرفنا قصته البركة في شيخ العرب قت لي معتكف؟؟
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
بسم الله وشيلو معاي صــــــلا وتسليم علي اللوصافو في القرآن رؤوف ورحيم وامابعـــدو ـ مني سـلام دعاش ونسيم على الفي الخيمة جملتهم رجال وحريم
ود محجوب وناس شنتير وزول يازول وناس ود عازه والزول زاتو سمح القول وديك الجن وطه العاقل المعقول وسنجاوي الرصين دوبيتو دوم معدول
وود الجيلي ما اتحكر على لاب توبو والخواض اذا الماوس لعب في عبو ناس قرشو ودباش ونزار ويات مين هبو والملا وحبيب الكل وكل من حبو وحت هل العوض سلامي يردو مصبو
وناس الجندرية ـ السـارة والرمانة رجحن في الفهم ـ زادنو زوق ورزانة ضــون خيمة الحاردلو لى فرســانه في شنو القعدة غيرهن والخيم شن شانه؟
| |
|
|
|
|
|
|
Re: خيــيمة الحــردلو - العمارات (Re: Ahlalawad)
|
يسأل منكم خيـر الزمـان وسرورو ويغفل عنكم غـدرو ومكامـن جورو سائل المولى يبسط في طريقكم نورو ويعتق عبده من سجناً غشوم مأمورو
سجناً خالي من شبك الحديد شباكو من السور المعلى مكهربات أسلاكو تحتو الدابي فاير سمو حارس أملاكو لزومو الخنقة والبهرب بلاقي هلاكو
تحياتـي
| |
|
|
|
|
|
|
|