|
|
 ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!!
|
مشاهد من
"عِمَم" عربية
جابو لِى الخبر العربي عقد القمة
قايل بالكلام عُمق الجُرح بتلَمّا
يالعربى الغشيم أسباب أساك والحمى
بوش وشارون أخوه يوم لبّسوك "العِمّة"
* * * *
القمة المشولا ضياع وكت في الفاضي
زمان قال المثل الفاضي يعمل قاضى
بغداد البتنزف وغزة بلد أبو شادى
بتلعن أبو العريبى تقولو تُر لى غادي
* * * *
طبعا قمة فاشلة هزيلة زي العادة
مشاهد للكوميديا الضاحكة عايزة إعادة
أمير عربي ورئيس وزُمْرَة من القادة
لا نصفوا الشعوب لاحققو لها سعادة
* * * *
القذافي قام شتم الأمير عبد الله
قال ليهو (القواعد) مالية عندك حِلّة
قام فتح الأمير عليهو نار ماخلاّ
حرق قلب العقيد وسكت لسانو اتشلّ
* * * *
حالكم يا العرب والله يبكّى عديل
الحرب البعيدة تزيدوا فيها عويل
كل واحد بشوف التاني إنو عميل
قممكم مسخرة وعار فوق جبين الجيل
* * * *
موقفكم يخجل في القمم عاديةّ
وبعد شرم المشايخ قمّة إسلامية
في الدوحة العقالها صناعتو أمريكية
اتلموا العرب لإدانة العملية!!
* * * *
خلاص اللحظة حانت لى قرع الطبول
ودمشق الحبيبة حا يأكلها بكرة غول
جا شان يكتل رجالها ويغتصب البتول
كل الكون تداعى وفشل يلقى الحلول
* * * *
قليل حظ العريبى وفي القمم منحوس
لا بحصّل فرنسا ولا بجاري الروس
قايلين بالكلام راح نهزم الهكسوس
وخيل الأمريكان في تراب عراقنا تدوس
* * * *
عربية البلاد الواحدة رأس وجسد
والبيدور شتاتها بكون مصيرو مسد
أمريكا المريضة ملآنة شر وحسد
لو اجتمعوا العرب ما كان بتبقى أسد
* * * *
يا شعب العراق منو الرماك فى ضيقة ؟
منو القادك لحتفك وولّع فيك حريقة ؟
كِتّيلَك وشنقك بى مليون طريقة
تأكل النار صغارك وان كانت صديقة
* * * *
أنهضوا يا عرب خيرة الأمم والناس
رأس أمة محمد هل يجوز ينداس ؟
أمريكا اللعينة عديمة الإحساس
أقطعوا رأس أبوها وكسروه بالفاس
* * * *
الحرب اللعينة الفي العراق مشتعلة
أهل الكون جميعا بالحرب منشغلة
جات أمريكا تركب فوق كتافنا وتعلا
وفى الموت والخراب تمسك زمام الشعلة
* * * *
أصوات القنابل شيّبت أطفال
بقت بغداد مدافن ومقبرة أجيال
أمريكا الغرورة قبيحة الأفعال
عشان بترول عراقي تضحى بالأنجال
* * * *
بوش خنزير حقيقي وود بلير دلدول
أفعالهم قبيحة اتعدت المعقول
صدق القال عليهم وشبّهم بمغول
سفلة يبيعوا ناسهم والتمن بترول
* * * *
أطفال غزة آه أنا وآشريرى عليكم
شظايا من القذائف جات تقطّع فيكم
العربي الشقيق ما مدّ إيدو إليكم
ياريت يا الحبايب كنت قادرة أجيكم
* * * *
أطفال العراق أنا حيلتى إيه غير دمعي ؟
أصوات المدافع جوّة بيتى وسمعى
كل ما أشوف كفنكم أبكى وأحرق شمعي
وأصرخ في العرب يا أمة يلاَّ اجتمعي
* * * *
العربى المغفل يأخي (انعل أبوك )
جبت الأمريكان بالقاذفات يحموك
عشان تهنأ وتعيش تكتل عراقي أخوك
وتخلى الخواجة يهينو والصعلوك
* * * *
يا رب أهزم أمريكا وردها خايبة منكسرة
وأمة لا إله يارب تكون فى عراقنا منتصرة
جات الخاينة تسرقنا وتسلب مننا البصرة
يمين نهزم مخطط بوش ونمشى عديل بعد عثرة
* * * *
اعتدنا نسمع كذبهم وانحطاطهم والسخافة
نسمع كلام توني الجبان مرسومة فيه صور الهيافة
وهولاكو ود بوش الكبير أمريكا ما أسمن خرافها
زاد جنون الأمريكان وكتلوا أعلام الصحافة
* * * *
قرارات القمم فوق الورق بهتانة
شن بيجدى الكلام ساعة القلوب حزنانة؟
يالعرب (الكرور ) سيبو القمم تختانا
وأرجعوا للبيوت القمة لي نسوانا
|
|
 
|
|
|
|
|
| العنوان |
الكاتب |
Date |
| ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | نادية عثمان | 03-26-05, 11:44 AM |
| Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | نادية عثمان | 03-26-05, 11:52 AM |
| Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | نادية عثمان | 03-26-05, 04:20 PM |
| Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | ابو جهينة | 03-26-05, 10:56 PM |
| Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | نادية عثمان | 03-27-05, 06:15 PM |
| Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | أحمد الشايقي | 03-26-05, 10:57 PM |
| Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | نادية عثمان | 03-29-05, 04:49 PM |
| Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | لؤى | 03-26-05, 11:52 PM |
| Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | نادية عثمان | 03-31-05, 03:57 PM |
| Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | saadeldin abdelrahman | 03-27-05, 00:13 AM |
 Re: ياعرب القمة الفاتت..والقمة دى ..والقمة الجاية..أرجعوا للبيوت القمة لى نسوانا !!!! | bint_alahfad | 03-27-05, 02:42 AM |
|
| |
فيس بوك
تويتر
انستقرام
يوتيوب
بنتيريست