|
|
 ( حجوة سودانية ) .. أحمد وقع مات
|
لحظة ..
لديَّ (حجوة ) .. فتأملوا !!!
..............
قالت الزلال بت ود حامد .. ( حبوبتي )
قالت :
حجيتكم ما بجيتكم خيراً جانا وجاكم أكل عشاكم وراح خلاكم ، قالوا .. والله يكفينا شر قلنا وقالوا .. قالوا كان في كُدُندارة إسمها ( حَمْرَه قَرقَدانه ) ، أها .. حمره قرقدانه دي راجلا كان إسمو ( أحمد ) .. يمرق أحمد من صباحات الله يلقط في رزقو .. وما يرجع إلا والشمش غاربه ، حمره تقعد في بطن بيتا تخدم خدمتها و تسوي ليهو غداهو داك وتقعد تنتظرو لامن يجي .
.............
يداخلني الشتاء حينها .. في ( الحوش الجوه ) .. ملتصقا بها ويداها حولي زنار ( يدفع عني شر الوحشة ) .. يداخلني شتاء في ليلة صيفية .. تحت سماء الديم .. ونجوم وبدر كبير ( لا يشبهه بدر ) .. و كلابٌ نابحاتٌ في البعيد ، والدوي المكتوم لطائرة في المطار القريب ( أصابني برهاب السفر إلى يومي هذا ) ، وبرد لذيذ ..لاسع .. لا يدفأه إلا رائحتها ( أمي الزلال ) : رائحة هي خليط بين رائحة الطفل الرضيع .. وعبق الضريح الكبير طرف البلد .. كما حكى الطيب صالح .
..............
قالت ( أمي الزلال ) :
أها .. يوم من الأيام ( حمره قرقدانه ) إتدخنت ، وسوت غداها وقالت تمرق كدي علي الجيران داب ما ( أحمد ) يرجع من شغلو ، قامت علقت غدا ( أحمد ) في المشلعيب المعلق فوق حفرة الدخان .. ومرقت .
يومو داك .. ( أحمد ) لشقاوتو يرجع البيت بدري قبال مواعيدو .. و جيعااااااااان ، مد أيدو على المشلعيب وما ختّ بالو من حفرة الدخان الموقده تحتو .. أها المسيكين من طولو داك يقع في الحفرة .. زول جاب خبرو مافي لامن رجعت ( حمره ) من الجيران ، لقت أحمد ميت جوه الحفره ، وقالت كدي تكورك وتسكّل وتعزي ، أها في الوكت داك جَنْ طويرات زرازير .. ركّن فوق الراكوبه .. شافنها تبكي ، قالن لها :
:- مالك يا ( حمره قرقدانه ) ؟ .
قالت لهن : شِن ( حمره قرقدانه ) أم طمبرة مَلانه .. عقيرب سِلي سلي .. ( أحمد ) وقع مات .
قامن الطويرات ديك من بكانن داك زعلانات علي ( أحمد ) إتنفضن و حتن ريشن عدمنو الريشه .. قعدن جلد ساكت ، وفرررررر طارن بي دمعتن .......
...........
: عماد ؟
: آآآ ..
: نمت ؟
: لأ ..
: سمح .
...........
أها .. الطويرات ديك منتفات نتيفن داك طارن مشن ركن فوق الشدرات آخر الحلة ، الشدرات إستغربن .. قالن للطويرات
: - مالكن يا شنقيرش بلا ريش ؟
قالن لو : شن شنقيرش بلا ريش .. حمره قرقدانه .. أم طمبرةً ملانه ... عقيرب سلي سلي .. أحمد وقع مات .
قالن كدي الشدرات من الزعل علي ( أحمد ) حتن صفقن داك وقفن عود بس .. يابساااات . أها بعد داك جن غنيمات يرعن تحت الشدرات ديك ، شافن الشدر واقف حطب ..
- قالن لو .. : مالك يا شدرنا حيتتون ؟
- قال لهن : شن شدركن حيتتون .. شنقيرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . في بكانن داك .. الغنيمات مسكن لك قريناتن ديك ووقعن فيهن كع كع كع .. كسرنهن ما ما فضلن قرن فيهن من الزعل علي ( أحمد ) , و مشن البحر يشربن .. أها البحر شافن مكسرات قريناتن قال لهن :
- مالكن يا بنات عِسِّي بلا قرون ؟
قالن لو : - شن بنات عسي بلا قرون .. شدرنا حيتتون .. شنقيرش بلا ريش .. حمره قرقدانه أم طمبرةً ملانه .. عقيرب سلي سلي .. أحمد وقع مات . البحر من الزعل علي ( أحمد ) قام شرد بقي بس جديول صغيرووون في النُص هنااااك .. جات البنيه شايله برمتها واردة البحر فيشان تشيل المويه .. لقت البحر مشى هناك غادي .. قالت لو :
- مالك يا بحرنا شيردون ؟
قال لها : شن بحركم شيردون بنات عسي بلا قرون .. شدرنا حيتتون .. شنقيرش بلا ريش .. حمره قرقدانه أم طمبرةً ملانه .. عقيرب سلي سلي .. أحمد وقع مات . تشيل البنيه برمتها ديك و من الزعل علي ( أحمد ) كششششش تكسرها .......
...................
: - عماد ؟
: - آآي يمه
: - نمت ؟
: -لا لأ ..
: - نان مالك قاطع الحركة ؟
: - ساكت بس ( .. والدفء الشتوي يدغدغني .. يا روعما نشوة ) ..
: سمح .
..................
قالت ( أمي الزلال ) :
أها .. البنيه رجعت للبيت لقاها أبوها في الدرب .. :
:- مالك يا بنيتنا كبيرون ؟
قالت لو : - شن بنيتكم كبيرون .. برمتنا كيسرون .. بحرنا شيردون .. بنات عسي بلا قرون .. شدرنا حيتتون .. شنقيرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . تقوم يا الراجل تشيلك حجر و تقع في سنيناتك ديك كج كج كج .. كسرن بقاهن نامه ، وقال كدي دخل علي مرتو ، المره شافت الراجل عدمان السنينه قالت لو :
: - مالك يا راجلنا فليجون ؟
قال لها : - شن راجلكم فليجون بنيتنا كبيرون .. برمتنا كيسرون .. بحرنا شيردون .. بنات عسي بلا قرون .. شدرنا حيتتون .. شنقيرش بلا ريش .. حمره قرقدانه .. أم طمبرةً ملانه .. عقيرب سلي سلي .. أحمد وقع مات . أها المره كانت قاعده تفرك في ملاح أخدر .. شالت مفراكتا ديك و ............
...............
: عماد ؟.. عماد ؟؟؟
: ( دفء الشتاء و .. حزن ما .. يصمتانني )
: نام المسيكين .. ( ثم ضامةً راحتي يدها متجهةً إلى السماء ) : رقدنا في أمانك وفي ضمانك وركنين من أركانك .. آية الكرسي كُرُبْ فينا للصباح .
.................
الزلال .. يا بت ودحامد ..
يُمه ..
لا أعرف الطريق إلى قبرك الآن .. سامحيني ..
..............
و .. أكلت ( حفرة الدخان ) أحمد.. و الطير .. و الخضرة .. البهائم .. و النيل .. الرجال .. والنساء .. والأطفال ..
و .. البلد
و مازالت تلك ( الحفرة ) .. تقتاتنا منذ يونيو 1989 م ....
|
|
 
|
|
|
|
|
| العنوان |
الكاتب |
Date |
| ( حجوة سودانية ) .. أحمد وقع مات | Emad Abdulla | 11-20-05, 05:31 AM |
| Re: ( حجوة سودانية ) .. أحمد وقع مات | عبدالرحمن عبدالله أبوشيبة | 11-20-05, 05:39 AM |
| Re: ( حجوة سودانية ) .. أحمد وقع مات | ثابت محمد | 11-20-05, 06:05 AM |
| Re: ( حجوة سودانية ) .. أحمد وقع مات | ابو جهينة | 11-20-05, 06:10 AM |
| Re: ( حجوة سودانية ) .. أحمد وقع مات | Emad Abdulla | 11-20-05, 01:48 PM |
| Re: ( حجوة سودانية ) .. أحمد وقع مات | عصام عبد الحفيظ | 11-20-05, 02:12 PM |
| Re: ( حجوة سودانية ) .. أحمد وقع مات | Emad Abdulla | 11-20-05, 02:25 PM |
| Re: ( حجوة سودانية ) .. أحمد وقع مات | Emad Abdulla | 11-21-05, 03:21 AM |
| Re: ( حجوة سودانية ) .. أحمد وقع مات | توما | 11-21-05, 02:32 PM |
| Re: ( حجوة سودانية ) .. أحمد وقع مات | Emad Abdulla | 11-22-05, 08:00 AM |
| Re: ( حجوة سودانية ) .. أحمد وقع مات | Emad Abdulla | 11-24-05, 03:23 AM |
|
| |
Emad Abdulla
فيس بوك
تويتر
انستقرام
يوتيوب
بنتيريست