|
الحلب في السودان من اين جاءوا .. ومتى ، وهل تعرضوا للاضطهاد العرقي ؟
|
ترى من اين جاء الحلب الى السودان ومتى ؟ وما قصة دخولهم واماكن تواجدهم وهل لهم علاقة بحلب سوريا ام الغجر وما هي المهن التي احترفوها على مر التاريخ ، وهل مارسوا الترحال مثلهم مثل الامبرروا ، ام اصبح الاستقرار من سماتهم، وما هي اشهر الاسر الحلبية في السودان . وهل تعرضوا للاضطهاد العرقي من قبائل السودان المختلفة . وهل هنالك مراجع محددة يمكن الرجوع اليها لمعرفة تاريخ هذه الجماعة التي اصبح السودان موطناً لها . اسئلة متواترة من وحي هذه القصيدة المؤثرة التي عبر بها الصديق الشاعر محمد الحسن سالم حميد عن معاناة أحد هؤلاء واسمه ـ حمتو ـ عاش ومات وحيداً ومضطهداً في شمال السودان كما يتضح من النص ، وهل لهذا الاسم ـ اقصد اسم حمتو ـ دلالة محددة ام هكذا اطلق . ولكم الشكر خالد
حمتو
الزمان : الساعة سايرة المكان : فوق أرض دائرة حمتو قاعد .. والحدادي الفيها قاعد من جهنم طايرة بالحديد الواطة فايرة راسو مقطوع حيرتو حايرة فكرو واقف بين يطرِّق وبين يشيل جالون يشرِّق يمسك المنجل يطرِّق ينبر الشاكوش يطربِق دقّو والمنجل ينقنق حمتو دقّك دق مقلق في حشاي يوقد يحرِّق حمتو شرِّق حمتو شرِّق حمتو شرِّق شان تفرِّق وحمتو مشلول بين يطرِّق وبين يشيل جالون يشرِّق داخُل الوسواس يوسوِس "حمتو منّو وليك تقرِّش تاني منُّو وليك تفلِّس" حمتو لا ولدوك مفتش حمتو لا خلقوك مفتش لي ثواني الحال بنعوش وتاني حالاً زين يمغِّس فيكَ بوم الهم معشعش ليك سنين في الفوق تحنِّس تأبى تتغاباك تطرطِش وهسّه قبّال ما تفلِّس ولي جريد البؤس تنقرِش ولامتين للرأس تنكِّس لامتين ياحمتو شرِّق عدِّي فرِّق .. ندِّي ونِّس حمتو شرِّق حمتو شرِّق وحمتو مصلوب بين يطرِّق وبين يشيل جالون يشرِّق فكرو مشتت مسرِّح بالو يتذكر بعيد ساعتو لامن كان شويفع كان بيلعب بالحديد كان بيفرح لمّا أبوهو يدِّي ردمة من الحديد بينه يسرح كلُّو يرتع لاهي مبسوطاً سعيد ما يهمُّو قميص مرقَّع ولاَّ برطوشاً جديد ياما قام زير دمّو نقَّع وجسمو نبَّق بالحديد وبرضو يرجع كلُّو يرتع لاهي مبسوطاً سعيد من ضواحي اللاوجود حمتو جا العالم طريد ماشي بين الناس وحيد تمرة حايمي بلا جريد ما حصل مدّت لو إيد شان تبارك ليهو عيد ومين يبارك لي بعيد كل يوم في قيد جديد هام وقضَّى صباهو صائع لا صويحب لا نديد وحمتو مرَّة سأل أبوهو لمّا شفَّع كاتلوهو وجعوهو وحندكوهو يابا وين طينَّا وأرضنا ؟؟ قام أبوهو إنضارى غادي ورشَّ بي دمعو الحدادي وحمتو صاقع وين أرضنا ؟ وين دواليبنا وأوضنا وين أهلنا ووين بلدنا وليش بعضنا يدوس بعضنا ؟؟؟؟ تاني أبوهو إنضارى غادي ورشَّ بي دمُّو الحدادي إنت مالك يابا ساكـِ .. يي مالك الدقّاك مِنو قام أبوهو إستغفر الله وشالُّو ملِّين قالُّو يلاَّ إشتريبه حلاوة يلاَّ حمتو راح باع الحلاوة وفي الدرب حاشوهو شفَّع ومن قَبُل يصل الحدادي نوحو كان سبّاق وأسرع خِبر أبوهو سبب بكاهو من عقاب صوتاً مقطَّع قام رجالة عشان يحصِّل لاحظ الخطوات بترجع لي طويقات غلبو قفَّل وكفلت القلب الموجع حائط الأيام تكسَّر حمتو شبَّا وكلما يكبر كلما يصغر والهموم أكوامة تكتَّر فوق رويحتو وكلما يودر هم قَبُل ما حمتو ينسر يلقى تاني التحتو بنقَّر ثار .. وسلّم لي قسمتو وبرضو ما سابو المقدر جاء الخريف في ليلة هذّر لي كرارق حمتو كسَّر للعفيش والعدِّي شتت والحديد الراجي صقَّر في جنينة سيدي صنقر تحتو كوم أطفال مقمبر وأم بترفع في الأيادي وفي الفراغ الصوت تكسَّر صمتو سبَّا .. وأهَّا زفَّر فكرو طلوح فات وبحَّر في متاهات ماب تُقدَّر والمطر بيناتو مطَّر لي كرارِق ذاتو كسَّر وحمتو حد ما يوم يعاين للبيوت روق الجنائن زي لويمبة وسط رتاين حمتو بس يسكُت يعاين بس يعاين بس يعاين لمّا تسألو يوم عن إسمو حمتو لي إسمين يملِّي حمتو ماب يعرف قراية وحمتو ماب يخبر يصلَّي إلاَّ بس يعرف يغنِّي ولي شراب الروح يدلِّي يطرا لامن ماتت أمُّو ما اتلقوا أخواته اليحمُّو ما لقى الإيد التريِّح لا إتلقوا الناس اليجمو ما اتلقى الزول اليصيِّح لا اتلقوا الفقراء اليصلُّو رغم إنُّو وإنُّو إنُّو ؟؟ ما مقصِّر كلُّو كلُّو بينو عوعا وبينو صيَّح دمعو حمَّا ودمعو ريَّح قلبو صلَّى وقلبو سبَّح وبينو حلَّ وبينو ينزح ينزح ينزح ينزح ومرت الأيام درايش وحمتو محتار كيف هو عايش ؟؟ جاري في الأرزاق يحاوِش رُبْ وقع بيناته دايش حمتو مات بين المعايش حمتو مات مع إنُّو عايش وما بكت غير الحدادي مات وماطقَّالو صايح لا خبيرو طقش رادي مات وما نعتو الجرائد لا بقتلو قبير بلادي مات وسبَّلتو الحدادي ونعشو شيعتو الأنادي مات وكت قوق الحمائم نتَّفو الصقر الرمادي والجرب صاد البهائم قاطع الغيث البوادي لامن النيل بينَّا صقَّر في الحفائر مويتو صادي وماشي صدَّا حرِد بلدنا طاش يلوص .. كايسلو وادي مات وكت ماتت مثلنا واقعي لاحيله وتنادي ولمّا صوت الرب تكسَّر والقيم باتت قلادي مات مع الإنسان وسطنا ويوم صِبِح عالمنا مادِّي ولامن الصلاَّي تبول في قفا الجامع عبادي عاش وما عاش إعتيادي مات وما مات إعتيادي وحمتو في الآخرة ويعاين للبيوت روق الجنائن وحمتو حد ما يوم يعاين للبيوت روق الجنائن زي لويمبة وسط رتاين حمتو بس يسكُت يعاين بس يعاين بس يعاين بس يعاين .
|
|
|
|
|
|
|
العنوان |
الكاتب |
Date |
الحلب في السودان من اين جاءوا .. ومتى ، وهل تعرضوا للاضطهاد العرقي ؟ | خالد العبيد | 04-20-04, 03:29 PM |
Re: الحلب في السودان من اين جاءوا .. ومتى ، وهل تعرضوا للاضطهاد العرقي ؟ | بلدى يا حبوب | 04-20-04, 03:47 PM |
Re: الحلب في السودان من اين جاءوا .. ومتى ، وهل تعرضوا للاضطهاد العرقي ؟ | خالد العبيد | 04-21-04, 05:26 PM |
Re: الحلب في السودان من اين جاءوا .. ومتى ، وهل تعرضوا للاضطهاد العرقي ؟ | ودقاسم | 04-21-04, 08:25 PM |
Re: الحلب في السودان من اين جاءوا .. ومتى ، وهل تعرضوا للاضطهاد العرقي ؟ | خالد العبيد | 04-22-04, 03:33 PM |
Re: الحلب في السودان من اين جاءوا .. ومتى ، وهل تعرضوا للاضطهاد العرقي ؟ | ABU QUSAI | 04-24-04, 10:34 AM |
Re: الحلب في السودان من اين جاءوا .. ومتى ، وهل تعرضوا للاضطهاد العرقي ؟ | ودقاسم | 04-24-04, 12:59 PM |
Re: الحلب في السودان من اين جاءوا .. ومتى ، وهل تعرضوا للاضطهاد العرقي ؟ | Ibrahim Algrefwi | 04-28-04, 02:04 PM |
Re: الحلب في السودان من اين جاءوا .. ومتى ، وهل تعرضوا للاضطهاد العرقي ؟ | Abo Amna | 04-28-04, 03:33 PM |
Re: الحلب في السودان من اين جاءوا .. ومتى ، وهل تعرضوا للاضطهاد العرقي ؟ | Tanash | 04-28-04, 03:55 PM |
|
|
|