لحظه من فضلك..3

Quote: اى شوفتو وكتير كمان لانى مولود ومتربى فى نفس البيئة اللى بتتكلمى عنها, انتى عشان زولة بندر وفى البندر كمان البندر الكبير الحكاية عندك غريبة شوية, لكن نحن ناس قرى ساكت وحضرت زمن الناس كانت بتاكل اللحمة مرة او مرتين فى الاسبوع وبالمناسبة فى بعض الاسواق مرتين فى الاسبوع , وانا اقرب سوق لقريتى فى المنطقة سوق كرمة ( اكبر سوق فى المديرية الشمالية) سوق كان بيربط الناس من وادى حلفا شمالا الى المناصير جنوبا ويا والا فى ناس بيقولوا لغاية حجر العسل جنوبا , هذا السوق كل يوم احد من كل اسبوع وكان بتلقى فيه لبن الطير , لكن منذ مجئ الانقاذ سيئ الذكر على قول واحد من اخواننا انتهى هذا السوق كاكبر سوق فى الشمالية كما انتهى اى جميل فى عهدهم !! وبالنسبة لدكاكين الاحياء , كان بيتم فتح الدكان حسب الطلب , يعنى متى ما جاء زبون وعايز يشترى مثلا صابونة , ظهرة , زيت , بسكويت والخ يقوم صاحب الدكان بفتح الدكان بموجب طلب الزبون ودائما كنا بنصل صاحب الدكان فى بيتو و البيع للزبائن ما كان مكلف بيه شخص معين فى الاسرة , بل كل الاسرة كانوا يتعاملون مع الزبائن كل حسب ظروفه وتواجده بالمنزل عند حضور الزبون والكلام ده فى اثناء النهار , لكن بالامسيات الدكان بيكون مفتوح لفترة اقصاها 5 ساعات او 6 ساعات من 5مساء الى العاشرة مساء.