|
|
 Re: ديك العزابة (Re: أبوشيبة)
|
أخي أبو شيبة
لا إختلاف البتة على روعة السرد وسعة الإدراك وخصوبة التربة – عفواً – الخيال لكين الخلاف يا اللخو في حكاية الديك لأنو العزابة ديل كان كانو بيطريين عن بكرة أبيهم ما حا يربو ديك وأسأل مجرب.
يقال أن أحد أهل قريتنا – وهو شقيقي لزم – قد أحضر ديكاً من الديوك البلدية الأصيلة سته شنكل التي تنام مع غروب الشمس وتصحو قبل آذان الفجر إلى العاصمة القومية بقصد تربيته في بيتنا الذي يعج بنا وبحيواناتنا الأليفة أها يا زول الديك دخل البقعة بالليل يعني ماشاف شئ زي مساجين غوانتاناموا أها من الصباح ديك الجن صحى ولقي ليك المنظر غير حيطة طوب بدل جالوص شجرة نيم بدل شجرة سنط عربية بدل حمارة شارع زلط بدل نهر النيل وقوم يا الديك إتجنن وطير في بيوت الحلة من رأس بيت لي رأس بيت وأخوى يجري وبصره إلى السماء عشان يعرف محطة الديك الأخيرة أها لي سؤ حظ الديك وحظ أخي ينزل الديك في بيت ناس أحمد وهو من الجماعة الذين يأكلون ناقة الله وسقياها وكانت الواقعة صباح الجمعة يعني أحمد مدمر والمفروض بحسب ساعته البيولوجيه المختلة بفعل أم الكبائر في الويك إند يصحى على أقل تقدير الساعة تلاته لكين أخوي طيرها ليهو من راسو وكان الحوار التالي بعد أن طرق أخي الباب وفتح أحمد بنصف عين مغمضة ونصف مفتوحة:
داير شنو
الديك حقنا طار عندكم
إنت ود منو (وهو سؤال إستنكاري لأنه يعرف أخي أكثر من معرفته بنفسه)
أنا أبو الملا
ساكن وين (وبرضو سؤال إستنكاري آخر)
فأشار أخي إلى حيث نسكن
فخرج أحمد إى منتصف الطريق وكان عدد البيوت بين بيتنا وبيتهم 5 منازل فقل الباب وهو يقول لأخي فرتق يا أخ ده ديك ولا هيلكوبتر. وكان مصير الديك الإعدام على مائدة الغدا وكنت أحد الذين شاركوا في تلكل المأدبة بالرغم من معرفتي التامة بالضحية.
|
|
 
|
|
|
|
|
| العنوان |
الكاتب |
Date |
| ديك العزابة | أبوشيبة | 12-28-05, 02:39 AM |
| Re: ديك العزابة | عبدالرحمن عبدالله أبوشيبة | 12-28-05, 06:10 AM |
| Re: ديك العزابة | أبوشيبة | 12-28-05, 10:09 AM |
| Re: ديك العزابة | مصدق مصطفى حسين | 12-28-05, 06:22 AM |
| Re: ديك العزابة | أبوشيبة | 12-28-05, 12:20 PM |
| Re: ديك العزابة | بنفسج | 12-28-05, 06:35 AM |
| Re: ديك العزابة | أبوشيبة | 12-28-05, 12:32 PM |
| Re: ديك العزابة | almulaomar | 12-28-05, 09:34 AM |
| Re: ديك العزابة | أبوشيبة | 12-28-05, 01:04 PM |
| Re: ديك العزابة | عبدالرحمن عبدالله أبوشيبة | 12-28-05, 01:40 PM |
| Re: ديك العزابة | أبوشيبة | 12-29-05, 03:00 AM |
| Re: ديك العزابة | عبد الله عقيد | 12-28-05, 01:41 PM |
| Re: ديك العزابة | almulaomar | 03-25-06, 12:14 PM |
| Re: ديك العزابة | sumah | 03-25-06, 12:49 PM |
|
| |
almulaomar
فيس بوك
تويتر
انستقرام
يوتيوب
بنتيريست