|
الحب فى مملكة الشواطين
|
فى كافتريا اللهب المتعالى التقى شيطون بمحبوبته شيطونه , كان شيطون قد غاب طويلا" مهاجرا" فى بلاد مملكة الانس بحثا" عن الرزق الحلال وليكون نفسه ماديا" ويصير مؤهلا" للتقدم لخطبة شيطونة . التقى الحبيبان بعد غيبة وراح شيطون يبث اهاته واشجانه لشيطونه وكان قد تعلم مسبقا" من شباب مملكة الانس لغتهم السوقية .... تعرفى يا شيطونه الشوق جواى تلجة بس , تخجل شيطونه وتغطى وشها بلفحة لهب من طرحتها النارية . يواصل شيطون سرد اشجانه ...انا لمن مشيت مملكة الانس كنت فاكر انو امورى حتمشى زى ما انا عاوز ,,, لكن للاسف لقيت ليك فى ناس بقو اشطن من الشواطين زاتم , ديل ما خلوا لينا حاجة نعملا , اى حاجة سيئة فى اعلى مستوياتها , اى مجال كنا بنشتغل فيه زمان هسع خلاص ... اتئنسن وما كان غير انو اجى راجع لى مملكتى بالرغم احتراق كل شئ حوالينا ....شوفى جمال الجمرة دى كيف ؟ وشوفى كمان حر السموم دى جميل كيف ؟ فاكرة زمان لمن قلت ليك احسن ما اهاجر واقعد فى مملكتى ونبنى مع بعضنا نارنا شرارة شرارة ؟؟ كان بتقولى لى : الشواطين كلهم غيروا نارهم لنار الغاز والميكرويف انت دايرنا نبدا حياتنا بنار منقد !!! تستعر بينهما لحظات صمت حارقة , يطرق فيها شيطون براسه ويسرح بنظراته بعيدا" مع مارج نار ازرق , يطول استغراقه وتفكيره ... تلكزه شيطونه ..يلا نمشى .. كب ..بسم الله ... تختفى شيطونه ...يختفى شيطون ... تختفى القصة باكملها
الشرغوف
|
|
|
|
|
|