معليش أنا ما بتكلم من موقع ناقد، أنا بتكلم من موقع مشارك في الأحداث وشاهد عليها في أعلى مستوياتها. عشان كدا لمن أقول ليك كسل ما قلتها من فراغ، وهبوط ناعم وسفارات وكلام زي دا أخير عدمو.
السفارة الأمريكية البتتكلم عنها وبرنامج هبوطها الناعم دا لا من الليلة لا من أمس. عشان كدا بقول ليك شهود عيان.
أنا حاضر إجتماع هيئة القيادة للتجمع الوطني الديمقراطي، تجمع الداخل جاب خطة متكاملة للعمل وسط الجماهير والتحضير للإنتفاضة وحاتك ووحات نهار رمضان اترمت في الزبالة زي الماحصل شيء الخلاف كله والنقاش كان حول المبلغ المطلوب. ما حول البرنامج نفسه ههههههه أها بعدها بسنوات جاءت أمريكا وصرفت ليهم كل عضو هيئة قيادة تلاتة الف دولار ومكتب تنفيذي ١٥٠٠ دولار دي شهادتنا على التجمع الوطني ودا حديث مبذول في الأسافير.
العمل العسكري وحاتك كوادر الأحزاب آخر من جاء للميدان، الحزب الشيوعي كل الرفاق الوصلوا الميدان ما فايتين المية حزب الأمة والاتحادي وقوات التحالف كانوا بيجندوا في الجنقجورو عشان يحاربوا نيابة عن النخب الفضلت البقاء في القاهرة في انتظار اعادة التوطين دا خيارك الأفضل مقارعة النظام بالسلاح. من مئات وعشرات الأطباء واساتذة الجامعة والمهندسين الفصلهم النظام للصالح العام ما فيهم واحد جا الميدان وقعد مع المقاتلين وللحقيقة استثني دكتورة مريم الصادق ودكتورة اميرة زاهر ودكتور نجم الدين وخصوصاً دكتور نجم الدين دا وسأحكي قصته يوماً ما.
المهم ما أطول عليك، وممكن اخليك عايش في عالم الأوهام بتاعة انه ممكن تحصل انتفاضة وعصيان مدني وتشيل الانقاذ. السيناريو دا ذاته ما حصل وجاب انقاذ الجن دي نفسها.
شوف شغل انتخابات أو مقاطعتها لو بقى حدو سودانيزاونلاين دي يبقى أهو كلامات مخدرات وسطلي ساكت
يومين تلالتة والهيجة والبوستات وما بتحصل حاجة ونجي راجعين نسك في قريمان اكل قروش الزول، ولا هل معروف ابو الحسن هو المعادل الموضوع لحاتم ابراهيم.
كسل وكسل والكسل نفسه ما تفعل فيه المعارضة.
آخر تحرك للمعارضة دي مشت المسيرة الدعا ليها الحزب الشيوعي، مش مشى طلع تصديق ليها من سلطة الإنقاذ دي؟ طيب ما دام هي سلطة شرعية لدرجة المعارضة بتطلع تصاديق منها؟ خايفة ليه من استحقاق انتخابي بتيح ليها فرصة تصل للجماهير دي وتقنعها بإنها تنتخبها كبديل لحكومة الإنقاذ (دا في حالة المشاركة) أو تقنعها بالمقاطعة وتقود حملتها من هسع وتوثق ليها لحدي ناس الحكومة ما يلقوا زول يصوت من أساسه.
أها دا الكسل البقول عليه؟ الشيء التاني استحقاقات انتفاضة شعبية او ثورة جياع؟ اوعى حتكون بتقوم من سودانيزاونلاين دي وحتقوم كيف، وسبتمبر قدامك وين كان دعمها وشبابها الراحوا هدر. ومنو الحيخت الجرس في رقبة الكديس (جيشنا جيش الهنا يا رب)
خيار السلاح يا هونداك قاعد وما كضب بيان بالعمل، التنسيق مع عبد العزيز الحلو وكل القوة الخرطوم جوة أها كيف كدا، هسع بقى منكور.
تنظيمات معارضة قاعدة جوة الخرطوم وفاتحة دورها بإذن من الحكومة الحالية، وما رافضة الإنتخابات زي ما ماكانت رافضة ( الحوار الوطني)
مؤتمر الحوار الشالوا بيهو حال تراجي وقريمان كل الأحزاب المعارضة القاعدة جوة دي وافقت مبدئياً عليه
قالوا بنشارك لو الحكومة عملت اجراءات تهيئة المناخ؟ يعني لو البشير شال لستتم دي واعلن بمنشور جمهوري إنه تنفذ فوراً ودخلوا الحوار تفتكر بالكسل دا كانوا حيغيروا؟
يا خي لحدي هسع الغالبية من شعب السودان ما عارفة الاحزاب دي رفضت الحوار ليه وما في زول مش وصّل ليها الرفض دا.
هسع في حالة اصعب من الحالة الفاتت دي؟ صفوف بنزين غلاء وقود ما في بضائع مافي السلطة بتتصارع مع بعضها، معظم الناس قاعدين في الواتساب وتويتر والفيس وينا الحملة القامت عشان تعمل ليها مظاهرة، الناس في مدني ظاهروا ما لقى البيدعهم.
وزمان ناس لقاوة قادوا واحد من أنجح الاعتصامات وأرقاها ما لقى أي دعم أنا رسلت عشرات الايميلات لي ناس عشان يدعموا بالتضامن الصوتي خليك من القروش؟
هنا في سودانيزاونلاين دي البوست ما مشى كتير
كتر خيرها آمونة بت مختار وقفت وساندت ويمكن كبر ما متذكر لكن لو استدعى الموضوع بننكت البوست.
الكسسسسسسسسسسسسسسسسسسسل، وعدم المبادرة والاستكانة للساهل.
الانتخابات حتكون مزورة ما حنشارك؟ يا خي ما تشارك لكن لمن تقاطع امشي للناخبين ديل قدم ليهم البديل
ناس بشاشا ديل لو في امريكا او في أمقرناً جاك اصلهم شوف مطالبهم شنو؟ مش ممكن الشعب لا يريد اسقاط النظام ذاتو؟ وممكن تكون كل طلباتهم (بوسطة ومدرسة وسطى) وبس
يا زول الكلام بيطول لكن بالصراحة عجبوني اولاد المؤتمر السوداني ناقشوا الموضوع علني بغض النظر لو كانوا دافعين ليهم أو كانوا عملاء وخونة في النهاية احترموا الناخب وناقشوا الموضوع قداموا وبالواضح
أنا حأنزل المناظرة وحتلاحظ أنو كلام الأمين العام بتاع الحزب خالد يوسف أنا بتفق مع جزء كبير منه ممكن تشوفو من الدقيقة ١٤ لو ما داير تشوف المناظرة كلها.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الصادق اسماعيل
فيس بوك
تويتر
انستقرام
يوتيوب
بنتيريست