الفاتح ميرغني ..مابين ..المشارق وعصاري كردفان

Quote: الأخوة الكرام باسط ، بحيراوي ، المقابل ، كبر ، شيقوق ، إسماعيل حسن ، والمحتفى به الأديب الفاتح ما أجمل التداعي وما أجمل كردفان الملهمة والله يا الفاتح أخوي ده كلام عجيب ....... حلاوة القرطاس والفي الخشيم تنماس كان ما كلام الناس برحل معاك خماس .......... حلاوة القرطاس دي طبعا عيالنا ما بعرفوها، وعشان نقرب ليهم المعنى بنقول ليهم زمان لما أبهاتنا وأمهاتنا تمشي لمول كبير للتسوق في قرية خماس الدونكي أو سلاسل البيع بالقطاعي في مراكز التسوق الكبرى المنتشرة على نطاق كردفان في أم عردة أو أم دم حاج أحمد أو أم جاك أو ضيلم أو الميرم أو عريجة (عديلة حاليا) او المزروب، بجيبوا لينا حاجتين هما قمة ما نتمنى من تنزهات الحياة؛ الحلاوة والبلح. وكانت الحلاوة أنواع ؛ دربس ونعناع ولكوم وحلاوة مقرطسة يعني ملفوفة ؛ وهي حلاوة القرطاس. أول ما تدخلها في خشمك ب تنماس يعني (تذوب). الأشياء تغيرت وأصبح طعم الحلاوة غير الحلاوة وأصبح الإحساس بالأغنية للجيل الحالي غير ، ونخشى أن يأتي علينا زمان نحتاج فيه لشرح كل شيء . وده معناه عليكم دور كبير لشرح التراث ليس فقط في كردفان وإنما في عموم أهل السودان، لأن الجيل متشابه. وشدو حيلكم كبر في أقصى الشمال والفاتح في أقصى الشرق وود شيقوق والمقابل وباسط وإسماعيل حسن عشان تخيطوا الباقي. مع تحياتي لكم جميعا أخوكم فضل الله خاطر