ده شنو يا ول ابا ابكر الطويل؟..ياخي انا لمن قت (الذ حاجة تجيب قون في ابكر الطويل) كنت قاعد اهظر..تقوم تقع يمين والكورة تمشي شمال (عشان انا يساري وكده..!!)..
من هنا ندعو ول ابا الملك يجي يصرف ليك تلاتة (كيشة) من النوع ابو كديس..اما حيدر حسن ميرغني ..لو لقى فيك فرقة يديك شوال ذاتو..!!
انا بكتب ليك..وكل امنيتي انو هاشم الحسن يكون نايم ولا صائم من مطالعة المنبر..لأنو افتقد روح الجنون السمحة ديك..!!
لمن رمضان زايد يا ابكر الطويل ، غنى لأهلي مدني بمناسبة انتصارو على بانقي (عاصمة افريقيا الوسطى)..كان لا بس افركانو ملون..يعني شنو..قبال الجماعة ما تكتشف فكرة (سودان جديد وييييييييييييييي) وتقوم تملانا فقر في صمة خشمنا..! ويقول كده يجي فتاح السقيد..يقوم يلبس بنفس الطريقة ويغني كمان..!!!!!!
انتا يا قريبي استنارتك دي ما ادوها دروس (تجميع) ولا شنو؟..
لمن تعرض لي فتاح السقيد لابس بدلة وفي استديو..ده نظام افندية (مستلبين ساكت) من خراج ذوق امبراطورية انجلترا التي زعم اهلها ان الشمس لا تغيب عنها..!!
وانا (فظي وظي) يا قريبي..ولا دي ما قروكم ليها؟..
طيب..في شان خاطر بت ابا رحاب خليفة..نديك شوية نضم في (الفظي وظي)..!
شغل عمك كبلنق كلو تصنيفو كالآتي:
The Barrack-Room Ballads are a series of songs and poems by Rudyard Kipling, dealing with the late-Victorian British Army and mostly written in a vernacular dialect.
المصدر:خالتي ويكبيديا..
خلي بالك من حكاية (باراك رووم)..وده ياهو البركس الواحد داك يا ابكر..انت سكنت فيهو ..والملك سكن فيهو ..وكبر سكن فيهو..والله صحي..!!
شفت كيف عيال (الفظي وظي) اتجدعوا؟..
حصل قابلتك الملاحظة دي من قبل يا ول ابا؟..ده السياق الغايب عن ول ابا محسن خالد..وبت ابا آمنة مختار..في نقاشهم لقصيدة كبلنق..!!
ولكن..!!
ناس اليوم يا ابوبكر..من حقهم يسألوا: كيف تبدو ارض المعركة الدارت وطلعت عين الشاعر الإنجليزي كبلنق..ولا الأرض دي اختفت؟..
اخونا المخرج الشاب سيف الدين حسن ، انجز عمل كبير اسمو (ارض السمر) سلسلة تعرض ثقافات ، مناخات ، اراضي ، شعوب ، جمهورية امسودان..ومن ضمن الحلقات..كانت الحلقة رقم سطاشر واسمها اركويت..!!
اها يا كيشة..بدل تجيب صور الفظي وظي الصامتة ، ياهم ديل قدامكم في صور متحركة..!!!
يعني ، خلينا نقرب للأجيال الحديثة المسافات ، بدل نقعد نقدها ثقافة صوالين ونقة ووصف محتاج خيال واسع عشان يستوعب الحاصل..!
كبر
ـــــــــــــــــــــــــــــــــ
*لغير الناطقين او الدارسين بها: البركس هو مجمع ثكنات الجيش الإنجليزي..وشكلو واحد في الهند والسودان ونيجيريا..في السودان ، بعض من تلك الثكنات ، التي كان يتغنى بها الشاعر الإنجليزي كبلنق ، في الخرطوم العاصمة السودانية ، وتحولت الى داخليات طلاب جامعة الخرطوم (من ضمن سكانها: ، محمد احمد القرشي ، محمد على طه الملك ، ابوبكر عباس ، محمد النور كبر..الخ)..الآن ، مجمع البركس اصبح داخلية البنات بجامعة الخرطوم ، ويسمى مجمع (الزهراء)..يعني ناس الفظي وظي (السودانيين قاطبة) وصل بيهم الإنتقام ، وبعقلية ذكورية فظة ، ان تسكن بناتهم في البركس ، كيتا في عم كبلنق أو أي كان اسمو..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة