|
|
 Re: كيف تعرف انك اتحملت؟ (Re: عمر التاج)
|
عمر
في بلادي الكائنه الناس صنفين يا محمول يا لاب توب معذرة يا حرامي ، والمحمول صنفين يا بدفع التمن ويا كمان بعاين بي عيونو والبعاين بي عيونو غير معني بالأمر لأنه يجسد المثل القائل العين بصيرة ، والمحمول البدفع التمن برضو نوعين يا نقاق وشكاي وبكاي ويا كمان بسردب ويشيل فوق الدبر ما بميل وياكلها في حنان حنانو.
أها دي وجهة ظري في القضية
نجي للعلامات الفارقة
أي تفتيش يزيد عن 5 دقائق ده بدخل صاحبو في حته الزهايمر بدرجاته المتفاوته فكلما طالت المدة أضحت الحالة المرضية متأخرة جدا ، أها بي كده كثير من الناس المحمولة والحرامية بتفتش ربما وما تلقى البتفتش ليهو.
تقول لولدك جيب موية يا محمد ، فيقول لك أنا ما محمد يا ابوي، أنا أمجد .عادي برضو خرف مبكر مهما كان عمرك فكل ما كان عدد العيال في الأسرة كبير كل ما طال إنتظار المنادى لأنه ممكن يرص ليك خمسه أسماء قبل أن يقول إسمك.
التالته دي تدخل في حيص التكنلوجي وبيصه فلا علم لنا
تحفظ عشرة أجزاء من أناشيد طيور الجنة. (Pass)
5/ تغير جلابيتك تلاتة مرات في اليوم .ههههها تلات مرات يا مفتري هي جلابيتين واحده لابسه وواحده زرارتا مقطوعه يعني بتوديك لغاية الدكان بالكثير.
تدس سفنجتك جوة غرفة النوم. "إنت شكل عايش في زمن جاي وزمن لسه. يا أخي أوضتنا دي مدفوسه لي السقف وكمان الضيوف ما يدوك الدرب وكثيراً ما تجبر على ممارسة (أحسنوا النية أحسن الله إليكم) نوم الديك في الحبل.
تضاير اللابتوب في أعلى درج في الدولاب وتقفله بالمفتاح. (No comments)
تجد نفسك احيانا لابس شرابات مع السفنجة في الشارع. (دي ما فيها حاجه وممكن تكون فاشيون)
تتعمد دخول البيت بعد المغرب، ولا تدخل الا وأنت متسللا .(مطلوبة إستفاضه عشاان أعرف أجاوب)
تشاهد مباريات كرة القدم المهمة مع أصحابك وفي بيتك كرت بين اسبورت. ديل بإعتبار الذين عندهم كروت نحن الريسيفر زاتو بطل يستقبل عدا عن تعدد خيارات المشاهدة في البيت فكل ما غادرت وشفت الكوره بره يكون أحسن بالنسبة لبقية أفراد الأسرة فالكثيرين بيكرهو الكورة وخاصة السودانية بما فيها من جماليات وإخراج ووعثاء وكآبة وسوء وهلم.
تتواجد في سودانيز اونلاين اكتر من تواجدك في الببيت. (هها وينو النت)
قلت ثم ماذا؟ في الأخيرة دي أقول ليك وإن عدتم عدنا
|
|
  
|
|
|
|
|
| |
almulaomar
فيس بوك
تويتر
انستقرام
يوتيوب
بنتيريست