أسمع جعيراً .. ولا أري طعناً!

Quote: كل يوم تطلع فيه الشمس يذهب المواطن الي مقر عمله وأكل عيشه المواطن الغلبان ده راضي ب سعيه وراء لقمة العيس.. احترمك جدا ايها السودانى المصادم واحترم فكرتك الثورية لو كنت بتناضل من مدينة الفتح وللا كرري وللا امبدات وللا الحاج (يوسفات) وللا جبل أوليا والكلاكلات وللا أي مدينة من مدن السودان. ياااخ انت قابع في مدنك الهلامية اللي ما عارفين وصلتها بالسمبك وللا مشيت علي رأس وفد مفاوض باسم الغلابة والكادحين. احترم جدا فكرتك الثورية لو فعلا ال بتغذيه ب فكرة الثورة هو ابنك أو ابن اختك أو ود اخوك أو أحد خاصتك وانت بتصرف عليه. شتان بين زول بمرق من صباح الرحمن عشان يوفر لقمة العيش لاولاده المنتظرين جيتو بفارغ الشوق وبينك انت اللي قاعد في بلد كشطت من فضائياتها اسم السودان إلا من خلال شاشة هاتفك عبر الاسافير أو محمولك المهبب. يا من جاد عليك من منحوك حق الاقامة كيف نسمع كلامك وانت ليك عشرومية سنة من اهلك؟ كيف تنظر وانت بتستلهم افكارك الثورية من ثقافتك السماعية المثقوبة من خلال صناع الفوتو شوب؟ و تنطلي عليك جعجعة الثورة قامت في مدنى.. الثورة انطلقت في بحري.. ناس الخرطوم اتحركوا علي اخوانكم في امدرمان.. امدرمان بتاع قلبك؟؟؟ ياخ الناس راضية بما هي فيه.. انتو كان قايلين نحن بنطلع ليكم ونثور عشان نعيش بنفس مستواكم الهلامى ده تبقوا وآهمين!!تعالوا كلكم البلد اشختوا للحكومة من هنا من مدينتك من حيك الشردت وخليتو واجرت بيتك فيهو.. اسنثماراتكم شغالة.. ترسلوا في القروش تبنوا في الفلل والمحلات التجارية ودايرين المواطن الغلبان يجيب ليكم حقكم؟ ده كلام فاضي.. ما يراه المواطن الآن في المنطقتين الاقليمية والدولية خلي المواطن السودانى عاقل جدا.. داير تناضل وتغير الحكم تعال غير براك.. ما تشبكونا تنظير وكلام كبار كبار.. نحن متصالحين جدا مناضلي وشرفاء الداخل..اتصالحوا انتو مع ذاتكم وخلو المواطن المسكين الذي لا حول له ولا قوة بمجاهداتكم ونفختكم الجعجاعة يعيش في امان. زول عايش في دول العالم الاول وعايش علي الضمان الاجتماعي ما يخش في البوست ده!! زول يتفشي داخله عضال العنصرية ما يهوب ناحية البوست ده !! نسخة للبركب المواصلات ويرجع يقابل اولاده بالاحضان نسخه للبشيل صينتو ويطلع علي عزاء جاره. نسخه للولد البشيل بياض نيتو و بقول وطنى ولا ملي بطنى.