|
|
 Re: الحيطة والحجر (Re: درديري كباشي)
|
الحيطة والحجر
7
قضي حاج حجر بصحبة شباب الحي خالد وأصحابه طيلة نهار اليوم وحتى قرابة المغرب يعملون بجد ونشاط وملبيين أوامر معجزتهم حاج حجر .. غير مخفيين إعجابهم بعبقريته .. فهو تجسيد عملي للمثل الشعبي الذي يقول ( يصنع من الفسيخ شربات) ..وهو كذلك أصبح يتعامل معهم بكل اريحية يناديهم باساميهم كأنهم أبنائه أو تلاميذه بصورة أدق ..( تعال يا حسام أقطع الخشبة دي من هنا . يا خالد أرفع معاي .. وهكذا ) معقولة أبواب حمامات قديمة وشبابيك غرف استطاع أن يبني بها هذه التحفة الرائعة . ولم يكتفي حجر بالبيت فقط أذ أن باقي الاخشاب حولها لاثاث . صنع منها دولاب قصير بقفل أشبه بدواليب المطبخ كذلك صنع سريرا مثبت بمفصلات على الجدار بحيث يمكن طيه وتعليقه في الحائط وكذلك صنع مقعدا عاليا اشبه بالذي يستخدم في المعامل ( ستاند ) وكذلك فرش ارضية الغرفة بمشمع أخضر تكامل مع اللوحات الجدارية .. الشباب تعبيرا عن اعجابهم أخذوا الصور التذكارية معه من داخل الكوخ وبجواره و من كل الزوايا . أصبحت المشاعر متباينة تجاه حاج حجر من أهل الحي حسب الفئات السنية . شباب الحي يقابلونه بالاعجاب والانبهار بل كاد أن يصبح ملهمهم وزارع الأمل في نفوسهم .. الاطفال الصغار لا زالوا يخافونه بعد مغامرتهم الشريرة .. بل كانوا يتفادون الأقتراب منه عساه قد شاهدهم وحفظ أشكالهم . وقد زاد رعبهم بعد أن شاهدوا هذه الغرفة الخشبية التي نبتت كأجمل ما يكون في ناصية الحارة وفي غضون ساعات قليلة .. هذه لن يفعلها الا من كان في معاونته جن أو شياطين ..والعياذ بالله .. نظرة الأطفال لا تختلف كثيرا عن نظرة أمهاتهم النساء أذ أن شبح الدجل والشعوذة دائما أقرب لهن من الرجال لذا تمدد في نفوسهن وبدأ بعضهن يضيف قصص وهمية تحلي قعدة القهوة . من نوع ( شوف عيني يومداك شايفاه راجع من الجامع بالليل وفي نور ماشي جمبه وكان بيتحدث معاه بس شافني طوالي سكت .)
أما فئة الرجال أي الآباء أهل الحي نبدأها بهذا المشهد من منزل الاستاذ أسماعيل استاذ اللغة الانجليزية ذو الميول الاشتراكية التي تقربه من الالحاد .. وقد كان رافضا فكرة وجود حجر في الحي من اساسها ظانا انه دجال مشعوذ ارسلته فئة ضالة لتزيد أهل الحي ضلالا على ضلالهم أو كما زعم .
هيثم ولد اسماعيل جا قال يا امي ( والله يومداك شفت حاج حجر بيقرا في جريدة انجليزية ويضحك ) .. هي يا ولدي بسم الله دا راجل درويش ساي من أهل الله عرفه شنو بالقراية كمان ؟ تلاقيه بيقلد الناس زي ما حمودي اخوك بيحاكيكم يشيل كتبكم ويعمل فيها بيقرا هاهاهاها . قاطعها اسماعيل أهل الله ؟؟ ومال نحن أهل منو؟؟ .. انتو أصلا ما في شي مضيعكم غير جهلكم وتخلفكم دا ؟)
يا راجل هسع أنت مالك شابي لينا في حلقنا هسع انا قلت شنو زعلك .أنت قلت الراجل الدرويش دا ما يدخل بيتك .أها نحن من دون ناس الحلة لا جا نضف لينا ولا كسر لينا الحطب .. حتى الكلام دا عاوز تحرمنا منه .
أوفف خلاص قمتي لنقتك اها انا طالع مخلي ليك البيت دا ماشي أقعد في دكان عبد الله مع الناس . خرج اسماعيل وهو ليس لديه ادنى فكرة عن بيت حجر الجديد .
تحرك أستاذ اسماعيل ناحية دكان عبد الله حيث الجلسة العصرية المعتادة قبيل المغرب . كما ذكرنا كان عنده فكرة رافضة تماما للالقاب والصفات التي أطلقها أهل الحارة على حاج حجر من صلاح وكرامات وغيرها .. وبخلفيته التي هي أقرب للالحاد ورفض الدين كان ينتقدهم . يقول لهم هو لو زول مجنون محله مصحة الأمراض العقلية ما وسط الناس ويدخل بيوتهم كمان .. ولو زول عاقل مفروض يشتغل زي باقي الناس يعمل بيت وأسرة .. لكن كلكم تنكبوا دعم في الرجل ليس لانكم رثيتوا لحاله فقط انما ترجون منه الصلاح وأن ينفعكم وهو ما قادر ينفع نفسه .. كان أهل الحي يقفون لاستاذ اسماعيل بالمرصاد دفاعا عن الغلبان حاج حجر .. بل كان ذلك الحديث يزيد حماسهم ودعمهم لحاج حجر .. وبدل ما كان يتصدقون عليه بفضلات طعامهم ..أصبحوا يطبخون له طبخات خاصة .. عادي تسمع (حاجة تتباهى مع قريناتها بأنها ذبحت زوج حمام وقدمته مع الشوربة لشيخ حجر .. وأخرى تقول الليلة أنا شديت فول في البيت عجبني أديت منه طبق لحجر )..
دخل أسماعيل والقى تحية كاملة الدسم على رجال الحي . لكن شعر بأنهم غير مكترثين بمقدمه وانما هم مشغولون بأمر ما . أذ كانوا يراقبون في حجر مع الشباب وهم يضعون اللمسات الاخيرة على بيته بتنظيف نشارة الخشب والأوساخ من حول الكوخ . تفاجأ اسماعيل ولم يصمت ( دا شنو دا كمان زولكم عملتوا ليه ضريح من هسع ؟؟) .. أنفجر بعض الرجال ضحكا .. لانه اسماعيل عبر عن حيرة وغيظ كان ينتابهم كتموه خوفا واعتبارا لحاج عبد الله . الذي نظر الى اسماعيل بإستياء واضح . ورد له .
- القال ليك منه نحن عملناه ليه دا بناه براه بضراعة .
- شنو معقولة الزول الدرويش دا هو بنا التحفة دي ؟ وين لقى المواد دي ..اوعى تقولوا لي أحضرها له عفريت من الجن ؟
وأنفجر الحضور ضاحكين مرة أخرى
عبد الله كذلك رد مدافعا : يا اخوي المواد الشايفها قدامك دي لو شفتها قبل ساعات ما تدفع فيها جنيه واحد .. دي ابواب حمامات وشبابيك قديمة بتاعة حاج الطاهر ولوح الزنك والمراين ديل انا كنت عارش بيهم الدكان زمان قبل ما يجو الحرامية ويقدو السقف . اها غيرتو وكنت راميه في المخزن .
جلس اسماعيل متحيرا مع المتحيرين وقال بصوت اشبه بالهمس : خلي بالكم الزول دا ما هين .. وراه سر كبير .. برضه تاني دخلوه بيوتكم . قال زول الله قال .
.
عبد الله : ما له هسع تم في الحلة دي اكثر من ثلاثة شهور حصل أذى ليه واحد فيكم ..
أسماعيل : ما مهم يأذى زول لكن يمكن يكون جاسوس اسرائيلي في حالة خمول تام .
عبد الله : جاسوس اسرائيلي يجي حلتنا لشنو كمان ؟ فيها مفاعل نووي ولا مصفى بترول كمان ؟.
يقطع حديثهم دخول الشاب خالد ابن عبد الله : أبوي عازين سكر وشاي ؟
- عايزنهم في البيت ؟
- لا عم حجر عنده براد كهربا وكبابي اشتراهم معاه وقال حا يعمل لينا شاي .
- دا الكلام .. خلي بالك دا مستهدف فئة الشباب .
- شنو مستهدف والكلام الكبار الجايي ترمينا بيه من جيت .
- يا خ كلامي ما لو عاجبكم طيب السلام عليكم .
ذهب استاذ اسماعيل لكنه خلف أثرا كبيرا في نفوس الحضور عكسه الطاهر صاحب المساعدة الاكبر ..
- عبد الله عايزين لنا شوال فحم ..
- خلاص بخلي حجر بعد ما يخلص يجيبو ليكم في البيت .
- لا لا لا يا اخوي حجر بتاع شنو يمين حجر بتاعك دا لو جا حايم بعند بيتي ساي علا اجيب له الشرطة .
- لا الجد شنو حجر دا ما كان نص النهار في بيتكم يكسر الحطب وينضف .
- ما دي المصيبة هنا المرة وبناتها حايمات جمبه بفساتينهن قايلاتنو درويش ساي .
- الطيب الاتغير شنو ما هو نفسه حجر .
- نفس حجر ؟ علي باليمين الاوضة البناها دي انا ما دخلت فيها وانا عريس جديد تقول لي هو حجر نفسه .
- ياخ الاوضة ما بنفس خشب حمامك الوسخان هو نظفه .
- ما دا المجنني ذاتو يا عبد الله ياخ . .خلاص بختصار كدا انا بجيب العربية وارفع الفحم براي بس حجر بتاعك دا اختانا منه عليك الله .
يتبع
|
|
 
|
|
|
|
|
| العنوان |
الكاتب |
Date |
| الحيطة والحجر | درديري كباشي | 01-25-16, 08:51 AM |
| Re: الحيطة والحجر | درديري كباشي | 01-25-16, 10:56 AM |
| Re: الحيطة والحجر | درديري كباشي | 01-26-16, 09:12 AM |
| Re: الحيطة والحجر | درديري كباشي | 01-26-16, 09:13 AM |
| Re: الحيطة والحجر | رانيه محمد الشيخ | 01-26-16, 10:16 AM |
| Re: الحيطة والحجر | ابو جهينة | 01-26-16, 10:46 AM |
 Re: الحيطة والحجر | درديري كباشي | 01-26-16, 03:01 PM |
| Re: الحيطة والحجر | درديري كباشي | 01-26-16, 02:59 PM |
| Re: الحيطة والحجر | درديري كباشي | 01-27-16, 09:57 AM |
| Re: الحيطة والحجر | درديري كباشي | 01-27-16, 01:58 PM |
| Re: الحيطة والحجر | درديري كباشي | 01-28-16, 09:48 AM |
| Re: الحيطة والحجر | درديري كباشي | 01-28-16, 04:27 PM |
| Re: الحيطة والحجر | درديري كباشي | 01-28-16, 04:29 PM |
| Re: الحيطة والحجر | درديري كباشي | 01-29-16, 04:56 AM |
| Re: الحيطة والحجر | درديري كباشي | 01-30-16, 09:04 AM |
| Re: الحيطة والحجر | درديري كباشي | 01-30-16, 10:29 PM |
| Re: الحيطة والحجر | محمد حمزة الحسين | 02-03-16, 03:07 PM |
| Re: الحيطة والحجر | درديري كباشي | 02-03-16, 04:29 PM |
| Re: الحيطة والحجر | درديري كباشي | 02-03-16, 04:30 PM |
| Re: الحيطة والحجر | عمر دهب | 02-03-16, 04:49 PM |
| Re: الحيطة والحجر | درديري كباشي | 02-04-16, 09:01 AM |
| Re: الحيطة والحجر | درديري كباشي | 02-04-16, 09:56 AM |
| Re: الحيطة والحجر | رانيه محمد الشيخ | 02-04-16, 11:32 AM |
| Re: الحيطة والحجر | درديري كباشي | 02-04-16, 03:01 PM |
| Re: الحيطة والحجر | رانيه محمد الشيخ | 02-07-16, 09:35 AM |
| Re: الحيطة والحجر | درديري كباشي | 02-07-16, 12:54 PM |
| Re: الحيطة والحجر | درديري كباشي | 02-08-16, 03:31 PM |
| Re: الحيطة والحجر | احمد الشيخ | 02-08-16, 05:10 PM |
|
| |
فيس بوك
تويتر
انستقرام
يوتيوب
بنتيريست