شكرا الحبيب اسامة الامام..لا شك انك زولا سمح بالحيل .. وذكرتني بناس زينين وسمحين..

Quote: العزيز الفاضل الدكتور اسامة الامام ..انا شايفة الحبيبة نعمات بتلقبك بدكتور..ويعني حتى ما عرفتنا بانك دكتور..!!وانا ما قاصدة طبعا اننا نقيم الناس بوظائفهم والحقيقة اننا نقيم الشخص بانسانيته وحبه الخير للاخرين وادميته وعطفه..وانت تمتاز بكل هذه الصفات الطيبة الايجابية.ولكن الحق يجب ان يقال ..فاننا لا يمكن ان ننكر عليك ونتجاهل كل هذا التعب الذي تعبته والجهد الذي بذلته ليل نهار على مقاعد الدراسة والسهر الذي سهرته للنجاح والتقدم للامام حتى نلت الشهادة الدراسية التي يتمناها كل مجتهد ولكل مجتهد نصيب...وهذا التواضع الجم الذي تمتاز به يا دكتوراسامة رفع منزلتك ومكانتك عند الكل...وانت ما سمعت قصيدتي المفضلة لود بادي البقول فيها:"~ قعاد الكرسي كان شفتيهو ورم ساقي زي سيد الزلالي.. اقلب في الدفاتر من صباحا بدري لامن تمسي ما بنسى انشغالي ده كله عشان اجيب نمرا انافس بيها واستر بيها حالي سلاطين العلم يا يمه كان شفتيهم ينسو العشرة في فت يوم ويدفروك بره زي سبد الطبالي.. ولقد تذكرت في هذه اللحظة قصة حكيتها مرة في بوست الاميرة اميرة عن الناس السمحين ..وهي انه في يوم من الايام ونحن متجمعات في حوش الجامعة(حوش دي ظريفة..) راينا سودانيا يلبس عراقي ولباس طويلوسديرية (زي البيلبسها ود البوش) وتهامسنا وقلنا:"بالله شوفوالراجل ده مبهدل نفسه كيفن وجلي بعراقي ولباس طويلوجاي يشحد في الجامعة عشان يفضحنا نحن السودانيات..ولم يطل الوقت...وسرعان ما توجه نحونا الرجل ..وقال لناوهو يخاطبنا:٠الاخوات سودانيات ..مش كده؟..وقلنا ليه ..وكيف عرفتنا سودانيات ..ما ممكن نكون صوماليات او حبشيات او يوغنديات او مصريات(عشان الاميرة لونها زي المصريات)..فرد قائلا: السودانيةدمها ظاهر وانا بفرزها من خمسين جنسية...وعرفنا بنفسه....وخجلنامن انفسنا ولمنا انفسنا عشان قطعنا فيه وقايلنه شحاد...فقد كان الرجلي حمل شهادة دكتوراة وجاء ليلقي محاضرة بدعوة من ادارة الجامعةعن الثقافات السودانية وجاء وهو يلبس لبس سوداني صميم...ووجدناه شخصية متواضعة جدا جدا .. ..ودمت بالف خير وصحة وعافية..