|
|
 قصائد من ديار الغربة...أشعار حسن عبدالرازق النقر
|
08:02 AM Jul, 25 2015
سودانيز اون لاين
الطيب عبدالرازق النقر-السودان
مكتبتى فى سودانيزاونلاين
أحترت في وصفك
شعر حسن عبد الرازق النقر- ماليزيا
إحتِرت فى وصفك
وبِقَت كلماتى تتعتّر
زى طِفلا صغير
يادوبو......
يتعلّم مشى
وبحثَتَ فى كل المعاجم ...
والقواميس
عن صفات حُسنِك وروحِك
يالجمالِك ألجم ...
جميع الالسِنه
وَنَدَهَتَ " إسماعين"
البي حنين كلماتو
سَطر قصائد خالدة
فى حُب الوطن
فى حِلواتو ....
فى ناسُو العُزاز
وَمَشَيتَ " للحردلو"
استنطق
عباراتو العفيفة
وجمال الصورة... والقلب الرقيق
وقالو ليَّ :
قول ليها يا أُخت المها
إنتِ القمر ...
يسقي ديارنا بالفضة ..
بالخير العميم
وأنت نِيلنا العظيم
"سليل الفراديس"
البيسقي الكل ..
شمال وجنوب
عريس تُربتنا البتول
اللّما يغشاها
بيعِم خيرو
وأنتِ النخيل
شامخ طويل
جذورو الضاربة فى رِحم التراب
تحكى عِزّة زمنّا
الكان وكان ...
إنتِ ريحة حقولنا
الذى رحيق أنفاسك الحلوة
وأنت يا بنت الأُصُول
طنبور النّعام ...
أنغامو التشق الليل
تسكلب بالشجى المحزون
كلمات طالعة مِن "قلبو الجريح"
تلهلِب فى قُلوب العاشقين ...
نار الشوق والرّيدة
قول ليها :
إنت الطيور السابحة فى كبد السما
تغرد بالأمل
تحمل الخير والجمال
مابتعرف الكيد والإحَن
وأنت يا الحلوة البتول
حادى البُطانة البجر النّم
يكب الريد فى السمحات
شجن نظمو البيسرق
موية المحاجر ...
وقول ليها ياأم خصراً نحيل
أنت نسيم الصعيد
زى الحرير
يغشي الوجوه
وقت الهجير
يجلب البسمة
لِي وجه الغلابة
الطال نِهارم
وقالو ليَّ
وقالو ليَّ
وقالو ليَّ
:::::::::::::::::::::::::::::::::::::::::::::::::::::::::::::::::::::::::::::::::::::::
((2))
رسالة من ديار الغربة
اكتب اليك ياعيشة من بلدى البعيد
الفيهوعايش .. لَي زمن .. عايش وحيد
سنتين مَضِت ماشفتَكِن ..
سنتين طُوال ‘ وحيات قليبي العنَدكَم
سَنتين مَضت والشوق معاي .. شوقاً كتير فى غُربتى
والشوق لهيب يوقد يعذب وحدتي
لو شُفتى يا عيشة الحنين
الفيهو عايش لِي سنين
يمَلا البحر .. لامِن يدفق بالألم
ولمّان يقوم يعزف نغم
نَغَمَنَ حَزين فى مُهجتي
وتلقينى سارح فى البيوت .. فى حلّتي
أشوف عويناتك وضفيراتك هناك تمشي وتجي
وتتوارى لى تحت السطور فى دفتري
سنتين مَضَتَ ماشفتك
سنتين طُوال وحياة قليبي العندكُن
واشوقى ليك ياعيشة يالمتل الوريدة مُفرهدة
واشوقى لي كُل الأهل ...
واشوقى لي وقت المقيل
جنب البيوت وتحت النخيل
وتلقينا فى سمراً جميل
نَجلس هناك لامِن يعود احمد اخوك
فى " سدرتو"
يعود ونسمع ضحكتو...
ياحليلو عاد ولدن كلس ...
مِتل الغزال فى خِفّتو
وتقوم تفوح فوق البيوت ريحة الخدار
ريحة القناديل التطقطق فوق الجمر...
ونكون كمان فى إنتظار ... ماأجملو...
وناخُد شرابن صافي من لبن البقر
من إيدك السمحة يا عيشة ياأم لحظاً ظريف
ويقوم يزيد ويحلو السمر...
لامن يجينا الليل ويمُر...
وفوق الافق نلمح قمر ...
ولمّان نزيد من المرح .. نلمح دموع أُمّك تسيل ...
وتملأ الشلوخ ... لامن تدفق بالفرح ...
يا عيشة يا أم لحظاً ظريف
يا عيشة يا أم قلباً خريف
سنتين مضت ماشفتكن
سنتين طوال وحياة قليبي العندكم
لمتين أعود لمتينأعود
والمح دميعاتن حٌنان دمعات فرح تنزل تكُب
فوق الخدود النايرة زى زهر الربيع
زهر الربيع الكابي فى بلد الصقيع
وكُت داير ازيد ... بس قُت بلاش
شايف حروف رسالتى هناك بعيد ... تمشي وتجي
وتتوارى ليّا طشاش طشاش ...
يا عيشة ياأم لحظا ظريف
يا عيشة يا أم قلباً خريف
سنتين مضت ما شفتَكُن
سنتين طوال وحياة قليبي العندكن
سنتين مضت والشوق معاي ... شوقا كتير فى غُربتي
والشوق لهيب يوقد يعزب وحدتي
:::::::::::::::::::::::::::::::::::::::::::::::::::::::::::::::::::::::::
((3))
موت أمل
قَلبَكْ ...
ينبوع فَرَح
غَابَة زُهور...
واحة للعُشّاق
مَهْجَر
للفراشات والطيور...
****
قلبك
تبلديّة
فى صيف كُردفان الحارّة ...
مورد للحلوات
بَنات بقّارة...
****
ونفسك صافية
زى مطَر الصعيد
الخيرو بيعُمّ
حَتّى البعيد...
أَسفي الماشاف جمالك
ود جبريل...
عَشيق توتيل...
أَسفي
الماوَصَف
قَدّك الرَّيان
ود كرم الله والدابي
ولافسَّر
سحر عيونك الحالمة ...
مكتول المسالمة ...
***
أسفي
الما غَنّا فيك
ود الَّلحو
عبر النّسيم ...
صوتو الّرخيم
مع وَتريّة مِن
ود دفع الله
***
أَسفي
المانَمَّ فيك
ود الفرَّاش...
ولا شافَتَك تاجوج
رَضيعة القاش...
ولا ضفرن
جدائل فرعَك السابلات
بنات حلتنا
أسفي
اسفي
الماتَمَّ ليَّ مناي
وليلي طويل
طويل ليلي
أَشيلو براي...
وحيد
سلواىَ فى الدوباي...
وفى لحَنَنْ
حَزين بَكّاي...
أَسفي
أسفي عليَك يا أملي
مودتي واحترامي للجميع
الطيب
|
|
 
|
|
|
|
|
| العنوان |
الكاتب |
Date |
| قصائد من ديار الغربة...أشعار حسن عبدالرازق النقر | الطيب عبدالرازق النقر | 07-25-15, 08:02 AM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 07-27-15, 04:07 AM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 07-27-15, 02:17 PM |
| Re: قصائد من ديار الغربة...أشعار حسن عبدالرازق | الشامي الحبر عبدالوهاب | 07-27-15, 02:30 PM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 07-27-15, 02:32 PM |
| Re: قصائد من ديار الغربة...أشعار حسن عبدالرازق | Deng | 07-27-15, 04:03 PM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 07-28-15, 04:34 PM |
 Re: قصائد من ديار الغربة...أشعار حسن عبدالرازق | الطيب عبدالرازق النقر | 08-07-15, 09:46 AM |
| Re: قصائد من ديار الغربة...أشعار حسن عبدالرازق | Deng | 08-08-15, 12:20 PM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 08-08-15, 12:38 PM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 08-09-15, 03:47 AM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 08-10-15, 11:24 AM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 08-17-15, 01:43 AM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 08-23-15, 02:32 PM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 08-26-15, 07:43 PM |
| Re: قصائد من ديار الغربة...أشعار حسن عبدالرازق | الطيب عبدالرازق النقر | 09-02-15, 11:58 AM |
|
| |
الطيب عبدالرازق النقر
فيس بوك
تويتر
انستقرام
يوتيوب
بنتيريست