|
|
 Re: زيارتي لمِستر جوّن ديّفز في نيويورك عام 309 (Re: معاوية المدير)
|
وصلت يُونين إستيشن منتصف النهار وأجرّت لي بتاع كارو من الـ42،
ؤُ قبل يتحرّك سعلتو، يا زول بتعرف بيت ناس مِستر جون ديفز اللكان
سنيتور في الكونجرس ؟.
قال لي، بالحيّل، الزول دا ساكن في منهاتِن، ؤُ جاراً لي ناس دِينزِل وآشنطون
الحيطة بالحيّطة .
قتلو، اكان كدي إتوكّل تب .
ياآآآآآآآ الله حتي اتخارجنا من الـ42 لأنو الجماعة إتحاوطونا من كل الجهات،
الدآير يبيعلنا إسكِراتش، والدآير يبيعلنا مساويك، والدآير يبيعلنا جُكاكة شربات،
والدآير يبيعلنا تِشوّز، والدآير يبيعلنا لآلوّب، وهكذا .
بجاي بجاي الراجل وصلني البيت، واديتو الفي النصيب . قال لي يا ابن العم
زِيّس إز نوط إنيف، ؤُ علي بالطلآق ما بتخارج معاي .
قُتلو، أها كِدا كيف ؟.
قال لي، قوّض بِلِس يوو، ما قصرّت تب .
دقيت الباب، ردّ علي مِستر ديفز بصوت جهوري، مرحب حبابك، ادخل
دوور إز اوّبن .
بعد شويّة فتح الباب . تأملت في الرجل فوجدته فارع الطول كث الأشناب
أصلع مع شعر طويل بجنبات الراس، سفتو دُقار لوري، كافي العراقي بين
ضراعو ؤُ سكين الضراع، لآحظت حِجبات في ضراعو اليمين .
، إتفضّل، إتفضّل، نو دآوُت إتز لآيك يوّر هاوُس .
تنقلت ببصري في الحوش، علي يميني مزيرة فيها زيرين تِحِتِن جدآدة رآكضة،
ؤُ مُصلآية معلقة في الحيّطة، ؤُ بِرِش مشرور فوقو عيش متلمين فوقو كميّة من
ناس ود ابرك ؤُ عشوش أقلق مِستر ديفز نقدهن للعيش بدرآبة خلتِن إتشتتن جزء
فوق راس البيت ؤُ جزء فوق حبل الغسيل، حبل الغسيل فوقو تيبآن ؤُ سراويّل
ؤُ عراريق ؤُ ترينق سُوّت، البيت اوضتين خلف خلآف . مِستر ديفز صفّق
إيدينو وانا دخلت ورآهو .
، حبابك إتفضّل، إتفضّل، يا باربرا، افقعيلك جنا جدادآت للضيف دا، ؤُ سويّلك
موية ليمون .
، اوكِي هنِي، من مآي آييز .
أهلاً حبابك، إتفضّل اشرب الشربات . ما عرفتك انا .
قتلو، انا جاي من طرف بروف عوض ابراهيم عوض .
يا سلآلآلآلآلآم، جاي من طرف العوض !. ؤُ قام تاني سلّم علي بلأحضان .
العوض اماني ماهو راجلاً عديّل، إللي عندو شوية طنقعة، ما خلآها ؟.
قُتلو، ما خلآها .
قال لي، ايّ، القِرد العوّد ما بتعلّم الرقيص، عِلآ العوض دا فضلو علينا كبير بالحيل،
كان ما هو ما كُنا نحن هسّع في الحالة دي . واشار بيده لرجل قد تجاوز التسعين من
عمره، مِتربّع في قلب العنقريب ؤُ يهِش في الضُبان من حوله بضنب توّر، ؤُ يبزّغ
والجداد يشيّل ؤُ ينقّد في البُزآغ، إتذكرت الجنا جدآت الدايرين يفقعوهن لي . هسّع
ابوي دا كان ما العوض كان يكون في الفوكس هوم، هو وابوهو الفي بطن اللوضة
ديّك .
بعد شوية سمعت ليك صوت من بطن اللوضة، شط اوول ويندوز آي دو نوط نِيّد
زِسيّس هبوب تُو كم إن، آند بُوت زآ دونكيس اون زآ تيبُل .
مِستر ديفز قال لي، اها هسّع دا لآمِن خرّف قاعد معنا، تقولِي شِنو ؟.
لآحظت مِستر ديفز عندو بعض لكنة شايقية، وتتخلل كلآمه بعض الكلمات الإنجليزية
عكس الجيل الجديد الذي يتحدث عاميتنا بطلآقة، أما العجايز اللِتنين فزي عاجز
الدناقلة والمحس عندنا يرطنو إنقليزي ساااااكت، يا الله تفرز لك منهم كلمتين .
مِستر ديفز قال لي، عارف، العوض دا انا زمااااان اديتو سِر، قُتلو اللوتري دا
نحن سويناهو مخسوس عشانكم نعمننا بندور نتعلم منكم خسايلكم ؤُ عاداتكم، قال لِي
انا بمشي احدث أهلي . قُتلو عآد اكان حدستهم انا بنكرك حطب، المطموص مشى
حدسُن عِلِي حديسو نفعنا بالحيل . العوض راجلاً مُو هيّن .
بعد شوية اسمعلك باربرا شابة فوق الحيطة ؤُ تكورك، سِتي نوّر، سِتي نوّر .
يا باربرا تبربِري في تُرعة ابو العاص، بتكوركِيلِي نُصّت نهار دايرِي شِنو ؟.
الرسول فوقك بدورلِي طايوقِي جانا ضيف من السفر .
مِستر ديفز قال لي، جارتنا دي من القرير، أمانة ماها مرةً عديلة، وكِت تنزل
البلد تجيبلنا معاها البركاوي والنبق، والحرجل، ؤُ لي عِن قراصة التمر دي
تجي شايلآها . العوض دا إن شاء الله يتبارك، كان ماهو هسّع كان كوووولنا
حصلنا تقريط شديد في الميّن بِريّن ؤُ بقينا أجسام البغال وأحلآم العصافير .
قُتلو يا مِستر ديفز انا بعد دا ادوني خاتركم، وراي مشاوير كتيرة .
يا زول حرّم تتغدا معانا، كلآمك دا ما بيبقى .
قُتلو كتّر خيّرك، انا معاي وصايا اللت ناس ؤُ ماشي كليفورنيا ؤُ سياتل، بجيكم
مرّة تانية .
سمح سلّم علي الوِليدآت، يا باربرا شلسي مشت ويّن ؟
مشت ناس كلينتون عندهم عليّم عروس، ساندرا بنتهُن داروها ؤُ عرسا الشهر الجاي.
سمِح الجنوّن مشو وين ؟.
مشو مديسون إسكوير، في مبارأة اللت سكج مكج .
معليش يا مِستر ديفز اسمح لي امشي، بجي اسلّم عليهُن مرّة تانية .
يا بربرا تعالي سلمي علي الضيف دا جاي من العوض .
باربرا جات مِتبلِمة بالتوب، ؤُ قالت كدي رمت التوب فوق إيدا مدتا لي بالسلآم
ؤُ هي مدنقرة سألتي، العوض ؤُ وِليداتو نعلهم طيبين ؟.
قتلها بخيّر ؤُ يسلمو عليكم كتيّر ؤُ منتظرين زيارتكم . أها، يا جماعة انا اللمشي .
باربرا قالت لي، يا دا ما تقعد تتغدا معانا .
قتلها كتّر خيركم مرّة تانية .
باربرا، عليك الله سلّم علي العوض ؤُ وليداتو كتيّر، الوِليدات اكان في كانو في كانو
بيوصلوك المحطة .
كتّر خيّرك يا حاجة .
مِستر ديفز طلع مقدمني للباب .
مِستر ديفز، اكان بضرب لي جون كلينتون يجي يوصلك برقشتو لكن زي الساعة دي
بيكون ماخد قيلولة في الهآي بآرك .
كتّر خيرك يا حاج، أها ودعتك الله .
قِبلنا وِداعت الله، لا تنسى تسلم علي العوض ؤُ وِليداتو، ؤُ قولو مِستر ديفز راجيك .
إن شاء الله . أها، مع السلآمة .
الله يسلمك يا ولدي، إن شاء الله ربنا يغتي عليك ...
|
|
 
|
|
|
|
|
| العنوان |
الكاتب |
Date |
| زيارتي لمِستر جوّن ديّفز في نيويورك عام 3099، ووصيّة عوض ابراهيم عوض ... | معاوية المدير | 07-19-15, 11:54 PM |
| Re: زيارتي لمِستر جوّن ديّفز في نيويورك عام 309 | معاوية المدير | 07-19-15, 11:55 PM |
 Re: زيارتي لمِستر جوّن ديّفز في نيويورك عام 309 | هاشم احمد ادم | 07-20-15, 02:57 AM |
| Re: زيارتي لمِستر جوّن ديّفز في نيويورك عام 309 | سيف النصر محي الدين | 07-20-15, 03:29 AM |
| Re: زيارتي لمِستر جوّن ديّفز في نيويورك عام 309 | معاوية الزبير | 07-20-15, 07:45 AM |
 Re: زيارتي لمِستر جوّن ديّفز في نيويورك عام 309 | معاوية المدير | 07-20-15, 11:36 PM |
| Re: زيارتي لمِستر جوّن ديّفز في نيويورك عام 309 | سيف اليزل سعد عمر | 07-21-15, 07:21 AM |
| Re: زيارتي لمِستر جوّن ديّفز في نيويورك عام 309 | ALWALEED ALSHEIKH | 07-21-15, 08:00 AM |
| Re: زيارتي لمِستر جوّن ديّفز في نيويورك عام 309 | معاوية المدير | 07-22-15, 05:02 AM |
| Re: زيارتي لمِستر جوّن ديّفز في نيويورك عام 309 | هاشم احمد ادم | 07-22-15, 09:55 AM |
| Re: زيارتي لمِستر جوّن ديّفز في نيويورك عام 309 | معاوية المدير | 07-25-15, 04:50 PM |
| Re: زيارتي لمِستر جوّن ديّفز في نيويورك عام 309 | عبد المنعم سيد احمد | 07-25-15, 06:00 PM |
 Re: زيارتي لمِستر جوّن ديّفز في نيويورك عام 309 | معاوية المدير | 07-26-15, 10:53 AM |
| Re: زيارتي لمِستر جوّن ديّفز في نيويورك عام 309 | Yasir Elsharif | 07-26-15, 11:32 AM |
| Re: زيارتي لمِستر جوّن ديّفز في نيويورك عام 309 | معاوية المدير | 07-28-15, 06:21 AM |
| Re: زيارتي لمِستر جوّن ديّفز في نيويورك عام 309 | عبدالحفيظ ابوسن | 07-28-15, 07:32 AM |
 Re: زيارتي لمِستر جوّن ديّفز في نيويورك عام 309 | معاوية المدير | 07-29-15, 06:57 AM |
| Re: زيارتي لمِستر جوّن ديّفز في نيويورك عام 309 | معاوية المدير | 07-29-15, 07:08 AM |
| Re: زيارتي لمِستر جوّن ديّفز في نيويورك عام 309 | معاوية المدير | 08-09-15, 09:29 AM |
 Re: زيارتي لمِستر جوّن ديّفز في نيويورك عام 309 | علي الكرار هاشم | 08-09-15, 11:03 AM |
| Re: زيارتي لمِستر جوّن ديّفز في نيويورك عام 309 | معاوية المدير | 08-09-15, 08:45 PM |
| Re: زيارتي لمِستر جوّن ديّفز في نيويورك عام 309 | معاوية المدير | 08-13-15, 00:37 AM |
| Re: زيارتي لمِستر جوّن ديّفز في نيويورك عام 309 | خالد عبد الله محمود | 08-13-15, 05:33 PM |
| Re: زيارتي لمِستر جوّن ديّفز في نيويورك عام 309 | بشير حسـن بشـير | 08-13-15, 06:11 PM |
| Re: زيارتي لمِستر جوّن ديّفز في نيويورك عام 309 | محمد على طه الملك | 08-13-15, 06:12 PM |
 Re: زيارتي لمِستر جوّن ديّفز في نيويورك عام 309 | معاوية المدير | 08-15-15, 08:28 AM |
| Re: زيارتي لمِستر جوّن ديّفز في نيويورك عام 309 | معاوية المدير | 08-16-15, 11:56 PM |
| Re: زيارتي لمِستر جوّن ديّفز في نيويورك عام 309 | محمد عمر الفكي | 08-17-15, 10:42 AM |
| Re: زيارتي لمِستر جوّن ديّفز في نيويورك عام 309 | معاوية المدير | 08-19-15, 11:36 PM |
| Re: زيارتي لمِستر جوّن ديّفز في نيويورك عام 309 | محمد الكامل عبد الحليم | 08-20-15, 09:10 AM |
| Re: زيارتي لمِستر جوّن ديّفز في نيويورك عام 309 | معاوية المدير | 08-23-15, 11:36 PM |
| Re: زيارتي لمِستر جوّن ديّفز في نيويورك عام 309 | معاوية المدير | 08-25-15, 05:18 AM |
|
| |
معاوية المدير
فيس بوك
تويتر
انستقرام
يوتيوب
بنتيريست