انا مرتاحه جدا للوني ونخرتي و سحنتي الافريقيه و برفض تماما أي نوع من أنواع التمييز العنصري

Quote: كتبت الصديقة / سلافة ... والله الموضوع ابي يتبلع لي ف حاتكلم فيه للمره المليون .. قبل شويه في وسط البلد قابلت ست سودانيه كبيره ضايعه من بنتها ....انتظرت معاها و اخدنا و ادينا شويه لحدي م مشكلتها اتحلت .. شكرتني الست و ختام كلامها قالت لي (ما هاين علي امشي اخلي بت طيبه زيك والله كنت حاعرس ليك ولدي لكين يا بتي من كلامك قبيل عرفت ان عروقك ملخبطه شديد خلاص و نحنا عاداتنا ما بتسمح لينا ) الكلام ذكرني أن في حاجه غلط و حتكون زي المتلازمة كده مفروض أعيش و اتصالح معاها .. الفعل بيتكرر بنفس الأسلوب و هم هم نفس الناس ..يعني الست دي بالنسبه لي مثال لام خطيبي الأول و التاني و هم كذلك مثال للغالبيه العظمي من الأمهات السودانيات .. انا اتخطبت مرتين و في المرتين اترفضت بسبب العنصريه و لأني زى م بيقولوا أهل العريس (ململمه) (ملخبطه) (عندها عرق) أو (ما نضيفه) طبعا بعد م يتعرفوا علي اهلي .. للأسف انا سمعت كل العبارات دي و اسوأ ... المواقف دى شوهتني لدرجة اني متاكده أن عقلي الباطن حاليا معدل علي نمط محدد ..كيف؟؟ يعني ممكن عوامل رفضي أو قبولي لأي علاقه في المستقبل تتاثر بالعرق أو شاكلة محدده بصوره غير واعية منعا للتعرض للرفض أو الإهانات. . و طبعا حتكون علاقات غير سليمه ببساطه لاني مؤمنه تماما بالعلاقات البتحمل عاطفة حقيقيه .. أيا كان وضع الآخر .... طبعا كانت أصعب المواقف في حياتي و اسوءها لما أصل نقطة مفروض اكلم أهلي بالحاصل .. طيب انا والدي انسان علي قدر من الثقافه و الوعي و رباني بصوره كويسه جدا و هيأني لمواجهة الصعاب و بالرغم من كده ما بنكر اني أتهزيت في وكت من الاوكات و ثقتي في نفسي اتزعزعت تماما و مرات كتير جدا بحس بأني am not good enough في كل حاجه ..في الدراسه ..البيت ..علاقاتي مع أهلي و أصحابي ..و علي كل الاصعده في حياتي ..فما بال البنات اللي أتربوا بطريقه مختلفه ؟؟كيف بيقدروا يتعاملو مع وضع مشابه ؟؟ انا واثقة اني حاكون أم غير عنصرية ..هل بنات جيلي حيكونوا؟؟ قصتي الفوق دي شكل واحد وممكن يكون من أخف الاشكال اذيه ..حاولوا اتصوروا الباقي غير الشايفنه قدامكم ؟؟ الواقع مذري جدا لان ببساطه في ناس بيدوا نفسهم الاحقيه والافضليه في الحياه نسبة لعرقهم (فقط لأنهم اتخلقوا بهيئات مختلفه ) انا مرتاحه جدا للوني ونخرتي و سحنتي الافريقيه و برفض تماما أي نوع من أنواع التمييز العنصري بكل أشكاله و كل امنياتي اني كل م اكتب بوست عن العنصريه القي و لو زول واحد يقرا المنشور و يحاول يتكلم عن مشكلته الشخصيه مع العنصريه.. العنصريه مرض .. العنصري مريض .. مفروض نوقف مسألة اللوم والتساؤلات و نبدأ نشوف طريقه فعاله للعلاج https://http://http://www.facebook.com/259100914293614/photos/a.259114180958954.1073741829.259100914293614/361392464064458/?type=1www.facebook.com/259100914293614/photos/a.259114180958954.1073741829.259100914293614/361392464064458/?type=1