رسالة علنية إلى الأعضاء المؤسسين لسودانيزاونلاين

Quote: تعرف يا ود قاسم البوست حقك ده قلبتو فوق تحت يمين شمال عدلا قلبا ما فهمت الرسالة العايز توصلا فيو .. من النظرة الأولى الزول بيحس الفكرة واضحة وإنك عايز تقول شنو ..لكن لمن الزول يرجع البصر كرّتين بيلقا في تناقضات أو حاجات ما منطقية أو خليني أقول تقاطعات بين المستوى النظري والعملي.. أوول شي وببساطة شديدة جداً لاحظ ودون أن تشعر وبطيبة السودانيين والمجاملات ديك أييي زول جاك في البوست حقك هنا ده و ردّ ليك طلّعتو ممن يثرون المنبر ومن الكتّاب الرائعين وممن تقرأ لهم وانا متأكد لو وصل عدد المتداخلين ألف متداخل فالألف متداخل عندك حيكونو كويسين ..طييب الكعبين وينهم ؟؟؟ غايتو انا بدّيك فرصة تبدا بي انا ده وتغيير وتيرة الردود وتاخدني سامبل للعينة التي تعني عشان نقدر فعلاً نناقش موضوعك بشئ من الجدّية .. العايز أقولو تاني فيما يتعلق بالتناقضات وعشان أكون معاك صريح معظم العضوية القديمة فيها ناس ما متعلمين ولمن أقول ما متعلمين بقصد ما قارين جامعات وفيهم القرو جامعات أي كلام وفيهم الناس الساااي ..ولو عايزنا نكون عمليين تعال أكتب لي لستة الحرس القديم الإنت قاصدو ده وتعال نشوف قرو وين ومؤهلاتهم العلمية شنو .. أما الكلمة المطاطية بتاعت (مثقف) دي فوالله انا ومعليش للكلمة (كرهتها) في سودانيز ده ..الواحد يكون قرا ليهو كتاب ذات طنقعة أو بوبار ويجي يحشر ليك روحو مع المثقفين ..صاح هنا في عدد مقدر من الناس (الممكن) تقول عليهم مثقفين لكن صدقني ما بالعددالإنت راسمه عن ما يسمى بالحرس القديم ..بالمناسبة أكتب وانا مصنف روحي من الحرس القديم(صاح ما القديم شديد) لكن حضرت الناس الإنت قاصدهم ديل .. سودانيز أون لاين موقع عادي زيو زي باقي المواقع الإسفيرية تم تحميله أكبر من حجمه ومن طاقته ..يحسب للموقع حق الريادة ودي ما فيها كلام ولا نقاش ..ويحسب ليهو المواصلة ودي ما فيها كلام ويحسب ليهم الثبات على الشكل (الألوان طريقة العرض الخ الخ ) لكن في النهاية هو موقع إسفيري مفروض يكون لامي .. ياخ مش عايز المثقفين ؟؟ قالوا في منبر إسمو سودان فو أول فيو النخبة ..انا ما شوفتو لكن من البقراهو عنو هنا فهمت إنو فكرة النخبة والمثقفين فاشلة ومطرشقة .. يا ود قاسم واحد من أقدم المؤسسين في المنبر ده هو أساسي ..أساسي ده هنا محسوب من أفضل تلاتة كتّاب في المنبر وبتنطبق عليهو كل المواصفات الإنت بتتباكى عليها فوق دي ..ورغماً عن ذلك ونسبة لمواقفك الشخصية ضده إنت مطلعو زول ساي .. ليي ضرت ليك المثل ده ؟ ضربتو عشان أوريك إنو إنت في نوعية البوستات دي بتحكمك مزاجيتك الشخصية وكأنك ماسك صكوك الغرفران وبتوزع فيها ده مثقف ..لأ ده ما مثقف..ده يكتب ..لأ داك ما يكتب..ده كويس..لأ داك ما تجيبوهو لينا .. بعدين يا ود قاسم خلينا نكون واضحين ونبطل مجاملة ..لبنا إسفيرية بتاعت الساعة كم البنتكلم عنها ..اللهم إلا اللبنات الإسفيرية بتاعت تصفية الحسابات والألفاظ البذيئة والفجور في الخصومة .. ياخ الشوفناهو في سودانيز ده (بالقديم والجديد) والله ما شوفناهو في منتديات تانية..والألفاظ الكانت مبذولة هنا وللجميع والله انا عن نفسي أول مرة أقراها واسمعا هنا..وحكمة الله قريتا وسمعتها من ناسك الإنت مصنفهم قدامى ومثقفين ومتعلمين .. صدقني يا ود قاسم الموضوع أبسط مما تتصور وألخصو ليك في جملة واااحدة إسمها الحنين إلى الماضي... ياهو حالنا كسودانيين ..نتباكى على الماضي ونشتاقه ونحنّ إليه .. ياها ثقافة يااا حليل سينما برمبل وقهوة جورج مشرقي.. ياها ثقافة يااا حليل جامعة الخرطوم أيام الداخليات والأكل فيو كستر مجااان .. ياها ثقافة ياااا حليل أيام كنا بنركب المواصلات بي الأبوني .. ياها ثقافة يااا حليل غنا الحقيبة .. ياها ثقافة يااا حليل أيام جكسا وكمال عبدالوهاب.. ياها ثقافة يااا حليل الإستعمار..ثم يا حليل الأزهري..ثم ضيعناك يا عبود..ثم يا سلام على الديموقراطية الأوى ثم الله عليك يا نميري يا أبعاج ثم هييه على أيام الديموقراطية الثانية ..وقريباً حن قول يااا حليلك يا عمر البشير.. ما تصدق لي قصة المنبر بقا طارد ووالله انا خليتو عشان ما بقت فيهو حاجة والبيجي يشبكك والله من وقف فلان عن الكتابة انا بطلت المنبر و و و و.. الناس إنشدهت يا ود قاسم ..الناس إنشغلت ..عجلة الدنيا بقت في تسارع والحاجات بتتغير وأي زول عايز يحصل.. التكنولوجيا زاتا إتغييرت وبقا الواتس أب مكان أجمل لتتجمعات من المنتديات ..وبقا الفيس بوك حتى ألطف للزول العايز يحب ويشاغل ..وبقا تويتر أحسن للزول العايز يتابع اخبار الدنيا .. أقبل الواقع ده وحاول إتعايش معاو يا ود قاسم وما تحاول تغش روحك بي إنو الموضوع حرس قديم وحرس جديد ومثقفين ومتعلمين ضد جهلاء وفاقد تربوي .. صدقني وأتحداااك التسجيلات الجديدة دي انا متأكد بيكونو علمياً مؤهلين أكتر من حرسك القديم ده ..وثقافياً ما تستبعد يكونو مثقفين أكتر .. .. ----------- القومه ليك ياود الفاروق وصح لسانك ود قاسم سلام عليكم