|
|
 Re: عذاب الريد......... (Re: Safa Fagiri)
|
-ليه غبتي يا القمرة؟!-
مشتاقة ليك....
كل النواحي الكنتي فيها
وإنتي فيها مليانة
بالشدن السديم
الله عليك يا ربة البِشر
المقيم
يا نفحة الحب القويم
كيف غبتي خليتي الديار؟!
ورحلتي من بعد السنين؟!
مشتاقة ليك
مشتاقة للبسمة المليحة
وهمسك البطرب
الروح الحميمة
يصحي نيران الحنين
وأنا بين سراجك والأفق
نسمة أمل طرباااااانة
بي لهف الأنين
ساعة يهل شرف الدعاش
وأنا بين نميرك والمطر
خاطر حزن من
غيمة تعبت من متاهات
الضنين
صارت تباري أواصر
الوجع الممدد في
براري الروح ترف
تظل جبين المرهقين
صَلَّيْتَ فجر حبك حضور
ورويت مسام الريد ِوِردْ
كالم حنانك يا حبيبة
أسى الضنين
يحتاج غرامك كم شعاع؟!
من مشرق الشمس
الرزين؟!
شان يرتحل بيناتنا
كمين من صبآيا الأمنيات
باللقيا عند النيل هناك
ممزوجة بي الحب المتين؟!
آه ..
من هواك يا صاحية
بي أطياف مناي
جواي
في سهد الرنين
ضاع الكلام
إتحكر
آلام بتكتب في الوريد
زمن الرحيل
بي جرعة ظنيت قد
تكون شفا لي تباريح
من أسى الظلم الحزين
القاكي وين؟!
كلمة براح ؟!
لاذت تواري حديثا
لي همس الصراح
مكلومة بالريد الدفين
يا ريت زمانك يا حبيبة
من تاني يرجع
وأقوى بيك
لمن صراع الريح
يهد حيل الزوارق
الما رست في الضفة
ماجت بين مجال الموج
وبين حيرة الشواطي
المدت الاحساس
تسابيح تحكي ليك
عن شوقا في عز الفجر
كان زامل المدح البديع
ترويضة يانعة ونوح حزين
أديني يا حبي المجّرد
من سلاف الإحتمال
ِوردا يزيل من قلبي
أحزان الفراق
نسيني آلام المحال
أمليني منك بي وصال
آه..
قولي بس القاكي وين؟!
إنشاء الله في جنة عدن
يا غالية في وضح النهار
أبرار تحفك يا حبيبة
بكل أوراد النمارق
والبيادر يا آية عالية
وحن بنادي بدور
ملايك الريد
من أعلى المنار
بتجيكي مني النجوى
إستبراق بريق
يملاك يقين
يا غالية يا درة بدين
وانا بيني لا بينك
فيافي بتلتهب..
طالع ضراما من جوة
أغوار الدوار
ماجت تباريح
القلوب الناصعة
تكتب على سطر الودار
كلمة مياسر مدهشة
نابع بريقا يصحي
في الليل القماري
الفارهة تديني المحنة
الإنبهار!....
|
|
  
|
|
|
|
|
| |
Safa Fagiri
فيس بوك
تويتر
انستقرام
يوتيوب
بنتيريست