|
|
 الكيزان طلعو دقوسة (( حكاية المليارات وايقاف الصحف))
|
02:15 PM Feb, 19 2015
سودانيز أون لاين
عباس الدسيس - Saudia
مكتبتي في سودانيزاونلاين
تمهيد:
صاحبنا شغال زينا في السوق بعد الدوام بشتغل مع مكاتب الواسطه المالية حسب الخبرة العندو في البنوك في مجال التمويل ((وما ادراك ما التمويل دا عالم غريب وعجيب...)) قامت ضربت معاهو كم مرة فتح للوظيفة واتفرغ للسوق بواسطة احد الاصدقاء العاملين في السوق اتعرف ليهو علي جماعة سودانيين مختصين في التمويل والناس العندها قروش ما عارفه تستثمرها بدبي شد الرحال ومشي اقابلهم بعد كم يوم اتصل علي .....هاك يا فرده سلم علي دكتور فلان ودكتور علان مافي واحد سلمت عليهو لا يسبق اسمه حرف الدال ناس دكتوراه أون لاين.
رجع لي بالجوال ومشي بعيد منهم وقعد اوصف فيهم يازول الجماعه ديل خطرين عديل بجيبو تمويل من اوربا وعندهم مستثمرين هربو قروشهم من ليبيا والعراق زمن صدام والقذافي ما عارفين قروشهم اعملو بيها شنو ...والله أنا مشيت معاهم الفندق بتكلمو اتقول القروش دي تحت المقاعد بتاعتهم ناس ثقة اقل واحد فيهم لابس بدلة من Christian Dior ....
وعندو ما لايقل عن عشرين كرت مستشار شركة ايه في بريطانيا ومستشار مالي شركة ايه في سيوسرا....الخ.
أها في خليجي صاحبي مطلع وعايز تمويل ختف الكلام بعد المكالمة انتهت ...اقول يا عباس ليش ما بتريد الخير لصديقك مين البكلمك هذا؟؟؟
والله صاحبنا فلان الفلاني !!!!
أبي رقمو الحين تكفي يا رجال....
الراجل كلم صاحبي في دبي وخت السماعه من اضانو اتصل حجز تذكرة سفر لي دبي بعد اربعة ساعات من قعدتنا قدر ما حاولت اخليهو اتريس رفض وابت نفسه الا أن يسافر مسرعا للحاق بالتمويل وحيث المال.
نزل في مطار دبي وتوجه لصديقنا بالفندق لمقابلة الممولين اصحاب البدل الراقيه تواعدو في احدي الفنادق نظام عشاء عمل وهاك يا الطاولة الما خمج والرقاصة العارية الكاسية والخمر في اكواب وكؤس واباريق والمزة اشكال مشكله وانا الصاحي اري في النور اشباح الظلام وبدت كأسى على راحى بقايا من حطام
صاحبي الخليجي حلف بالطلاق غذاء العمل عليهو مافي زول ادفع كب الشرتيت زي الرز لما الجماعه أمنو ... اتواعدو تاني يوم اتقابلو لتكملة الصفقة واخونا فات خلاهم ومعاهم صاحبي لبعض الاعمال.
تاني يوم دارة الدائرة في عشاء العمل صورة بالكربون...... اثناء ما الناس طاشمة واحد قام انفرد بي الخليجي في موضوع خاص يخص صاحبي السوداني قال ليهو والله انا محرج اتكلم معاك في موضوع زي دا بس للظروف احكام حقيقة ((حقيقة طبعا بتاعت الكيزان)) فلان صاحبكم دا احرجنا نزل في الفندق وحسي ما سكين الجواز بتاعو في 30 الف درهم والله أنا لو ما شايل معاي فيزا والليمتد محدد كان دفعتها ليهو ومحرج جدا اكلمك في موضوع زي دا.
الخليجي ... هع أنا اخوك يا فطنه طوالي دفع القروش كاش داون عشان اكون شهم مع الزول الجابو ليهم وبعدين كلو يتم حسابه في الكوميشن...
والناس من طبقت القروش زاغت ....
عليك امان الله صحباني الاثنين قعدو في دبي يومين اتصلو علي الجوالات والرقم لا يمكن الوصول اليه.
أها رجعو السعودية وفي اول جلسة علي كركعت الشيشه ما تسمع غير .... والله يا عباس فشلتنا
نواصل...........
|
|
 
|
|
|
|
|
| |
عباس الدسيس
فيس بوك
تويتر
انستقرام
يوتيوب
بنتيريست