ود شيقوق وودالبوش وود المنسي هام

Quote: تحيَّات نواضر لي بت الشيخ عبدالرحيم ولي بت السيد أخوكي أبو بنات وبريدهِن شديد .... عشان شفت البنات في والدي ووالدتي نحن أولادهم إتفرقنا ....منا من هاجر ومنا من شايلاهاو في عُقلتها يعني مرة مع البهايم نشوقا ومرة معاهن سافلا "الجزو" بس أخواتنا هنّ الصبرن معاهن..........! إبنة خالتي كثيرا ما تمازحني ب "أبو البنوت"، وأحيانا تستشهد بشعر الحكامة بت الشيخ سالم ، عندما طالت مدّة إبن عمها مع الإبل في رحلة الجنوب طالت بيك المدّ’ وعالت بيك أُم قجَّة فكانت تمازحني وهي تردَّد شعر بت سالم ومن غنا الجراري الحُدْب الروسهن زاعِن بارن ليك ما انباعِن أبو البنوت الضَّاعِن شرفن ليكا وراعِن بعدين يا بت الشيخ بناتي من شدة مابريدهن مسميهن "الحُم" حتي إحداهُن عندما أهاتفها وأسألها من أخوتها.. تجيبني وهي ضاحكة : الحُم يا أبوي طيبات خلاس.....! والحُم يطلقها أهل البادية علي البنات الجميلات والوهيطات المعرضات وأمَّات نفل..... شوفي هني ود السراج قال شنو عندما طال مكوثه برحلة الجزو "رحلة الشمال" بدبكن ليكا فوق جمل الهداد ما بحودن بخلنلك قفاهن بالمصاع متسودن الحُم اللى مخالات الحديث بتقودن يا الحُدب السِّمان ليهن بتين بتعودن عندنا أخونا علي إبراهيم قبل سنين جابو ليهو ولد بعد ثلاث بنات ، ونحن في المستشفي ، عندما أخبروه بالولد كورك تلات مراااات بصوت عااالي قلت ليهو ياعمَّك علي هوِّن......أزعجت الناس... فقال: ياعبيد ..علي أخوك جايبين فيهو تلاتة أقوان جبت لي قون واحد ما أكورك... ! البنات ماهِن ساهلات تب.... بس يا بت الشيخ كان لقن ليهن أخو ..... أولا بضوِّي ليهن نار أبوهن...........! وببقالهن دُخري لي الزمان الشين .............! Quote: قال ليهو: أول الزول بعيف خشم ود عمو ؟؟؟ صدق وحاتك.............. الله يجازي محنك يا بدر البوادي..........!