للعضو عزيز بخصوص طه سليمان مع الود

Quote: الجميل انه النقاش مستمر كدي خلونا اولا نتفق انه الكليب ما جزء من الاغنية ، لكن ممكن يكون عامل فاعل وجاذب من عوامل تقديما الاغنية الجيدة ما محتاجة لي صورة عشان تترسخ اذهان الناس . ودونكم كل الاعمال الجميلة المحفوظة عن ظهر قلب عند الناس السمعوها في زمنها وبعد كده. نرجع لي موضوع طة سليمان ، احب اقول للاخ هايل مافي زول قال انه طه ما قدم ولا عمل جيد او معقول واحد . لكن الاسئلة بالبتطرح نفسها ، وبوجها ليك انت بالمناسبة دي لانك الاتفضلت واتطوعت للحديث عن تجربة طة: ليه طة قدم في بداية تجربته اغنيه زي عايز اعيش ( برغم انها في رايي متوسطة ولحنها متواضع ) ، او اغنيات تانية انت بتري انها جميلة ، ويقدم في اثناء او بعد تطور واكتمال تجربته زي ما قال استاذ عبدالعزيز ، اعمال زي حرامي القلوب ، وطاعني و ما شابهها؟. وبرغم انكم طلبتوا غض الطرف عن اعمال دي باعتبارا ( غنا اعراس ومناسبات ) ، وهي المجموعة الاكبر عددا. وعللتوا بانه الجمهور هو بطلبها من طه ، في إيحاء (وكأنما الجمهور دا بتحمل المسئولية وجود الغنا دا مع طه أوغيره). سؤالي :هل الجمهور او في مقولة اخري المستمع دا ، بسمع وبتلقي ما يقدم الفنان من فن ، والفنان في الحالة دي هو صاحب الكلمة وصاحب العرض. ام الفنان البقدم حفله علي حسب ما مزاج وطلبات المتلقي ؟ لانه للاسف طريقة التفكير دي بيتحول الفنان لي جهة لتقديم خدمات ترفيهية للمن يدفع ، او من ينظم ، وليس شخص صاحب رسالة او علي اقل تقدير عنده رؤية لي مسيرته. اذا اتفقنا بانه طه عنده غناه الجيد والتاني الدون المستوي . ليه ما استخدم الذكاء الفطري والموهبة دي في انه يرجح كفه الغنا الجيد في غناه. ويخليه مطلوب وموجود في المناسبات و الاجهزة بنفس كثافة الاعمال التانية؟. ( الجمهور عايز كدا) قطع شك ما اجابة علي اي سؤال ، الجمهور دا بختار من الاعمال القدما الفنان في المقام الاول . والكلام هنا ما عن اعمال موجودة اصلا ، ورددها طه تحت الحاح الجمهور ، لكن عن الاعمال الهو صاغا وقدما وخلقا من عدم. طة بقدم الاعمال دي بكامل رضاه وطوعا واختيارا لعلمه انه دي متطلبات السوق واثارة الجدل. وليس طلبات الجمهور فقط. ودا في حد ذاته ما جريمة ولا حرام ولا عيب. لكن محاولات تضخيمه وتسويقه كفنان ملتزم وصاحب تجربة فريدة ومتقدمه وانه لسان حال جيله ووو ...الخ . فدا البسموه لي الاعناق الجد جد . ولولاه ما كنا في حاجة للاسترسال وللصراحة فرفقا بنا وبطه نفسه كامل تقديري الي حين عودة