|
|
 كيف تتحدث مع طبيبك ؟ هل يمثل عليك دور الاله؟ هل يهوّن من مخاوفك؟
|
لمن تتعطل عربيتك او تلفزيونك او اي جهاز تبعك وتجيب الفني عشان يصلحو اكيد حتسالو عن التشخيص الكامل للمشكلة, ماهو الجزء المتعطل بالضبط؟ كم سيأخذ الاصلاح من وقت؟ وكم يكلف من مال؟....الخ
لكن لمن يتعط جزء من جسمك وتحتاج للطبيب فالفرص للاستفسار والاسئلة عن طبيعة المرض وما الى ذلك تقل وتصبح حياتك على المحك.
لمن يجينا مرض شايع ونمشي للدكتور فيحتمل انو نواجه هذه المواقف:
* لو الدكتور استخدم مصطلحات طبية بالانجليزية زي "فايبرويد " او "ايديما" وانت سالتو بيقصد شنو بالحاجات دي فربما يظن انك غبي
* لو سالت الدكتور كيف اتوصلت للتشخيص دا فحيظن انك معترض على حكمو
* لو اشتكيت من الاعراض الجانبية لدواء وصفوليك في المرة السابقة فحيظن انك غير راضي
كل العبارات دي خاطئة ومن السهل انك تتعرض للترهيب. وتقول انو الدكتور بيعرف اكتر مننا وزمنو ضيق والصالة بره مليانه بالمنتظرين من المرضى والممكن تكون حالتهم اسوا من حالتك ولاننا دايما لمن نمشي للدكتور بنكون تعبانين من المرض ومهدودين فلذلك بنشوف انو الدكتور دا طوق النجاة وهو الحيزيل عننا كل الالم.
حان الوقت ليتوقف الدكاترة عن تمثيل دور الالهة وحان الوقت ليتوقف المرضى عن التذلل لهم.
رغم انو من المهم انك تثق في البعالجك لكن برضو لازم نشيل احساس انو "الطبيب بيعرف احسن مننا" دا من راسنا والا حنعرض حياتنا للخطر.
بالطبع المريض المثقف كويس بيكون اقل تعرضا للمعاناة من وصف دواء خاطيء او اجراء جرحة غير ضرورية.
لذلك لمن تتعلم كيف تتكلم مع طبيبك وتقول شنو ومتين تقولو..كدا بتكون ساعدت في تحسين جودة الخدمات الطبية الحتتقدم ليك.
قبل تمشي للدكتور احسن تعمل الحاجات دي:
1- قيس حرارة جسمك
2- اكتب الاعراض البتعاني منها بنفس الترتيب البتحصليك بيهو
3- اعرف الادوية الاخدتها وجرعتها وكم مرة كانت في اليوم ولمدة كم
4- حدد هل تحتاج لزيارة الطبيب عشان تشرحليهو حالتك وتعمل فحوصات كاملة ولا بتكفيك استشارة بالتلفون
ولمن تقابل الطبيب خلي الحاجات دي في اعتباراتك:
* احكي للدكتور كل التفاصيل عن التاريخ المرضي ليك ولاسرتك, بما في ذلك الامراض البتظن انها مخجلة, او ان كنت بتتعاطى مخدرات او كحول او شراب سجاير.
* احكي ليهو لو كنت بتعاني من اضرابات في النوم او الالام في الظهر او لو بتمر بمشكلات زوجية ,فنصف الامراض البتجي للدكاترة عندها خلفيات عاطفية.
* دايما اتاكد انك فهمت كلام الدكتور تماما وعيدو ليهو نفس كلامو بعبارات من عندك عشان تكون عرفت اصل المشكلة والواجبات المفروض تعملها. وكمان لو كتبت كل الكلام في ورقة وانت معاهو في المكتب يكون كويس.
* لو كتبليك انواع دواء معينة اسالو عن الاعراض الجانبية بتاعتها وبعد كم ممكن تتاقلم معاها. كتير من المرضى بيوقفو بعض الادويه بعد ياخد منها جزء بسيط بحجة انو المرض كان اخف من الدوا دا وبدون ما يكلمو الدكتور.
الاعراض الجنابية بتاعة الدوا مفروض تكلم بيها الدكتور او ما ظهرت ليك,عشان هو يا اما يغير ليك الدوا او يقلل الجرعة او يعدل التعديل المناسب.
|
|
 
|
|
|
|
احمد سيد احمد
فيس بوك
تويتر
انستقرام
يوتيوب
بنتيريست