|
|
 Re: عمار محمد ادم يرثي محجوب شريف بكلمات كما العبرات (يوجد نص) (Re: mekki)
|
هو اماني ماهو ولد ..حزنك يكفي بلد
الناس تعزي بعض ..طلقوا الكواريك جد
يبكوك يابا كتير ..اتنخجو فاتو الحد
يبكوك دموع الدم ..يالصرحو ماتهدم
وليها البلد قدم ..باكت ربيكا حرم
كيفن دموعنا تقيف ..مركبنا كايسي القيف
مااحلى زولا حي ..انساني ثوري شريف
زولا كريم ونضيف ..رمزا بسيط وعفيف
محجوبنا ياإنسان فقد الحضر والريف
الزول دا دمو خفيف ..واماني ماهو ظريف
روحا تملي لطيف ..ظلانا ظلو وريف
محجوبنا زي نسمة ..ريحة دعاش وخريف
يلقاك بالبسمة .. تهدي السلام ايدو
بنريدو بنريدو ..حميدنا حميدو
اشعارو للاوطان ..هي قلادة في جيدو
مااعظم البشرى ..محجوبنا زول بكرة
الرؤية والفكرة ..ولواعج الذكرى
تبكيك بنات ام در ..ولدا شيوعي وحر
ولدا مكرب وضو ..فارسا عيونو حمر
ماهاب بيوت اشباح ..حارا قليبو جمر
ماباع مع البايعين ..ماخاوى يوم الضر
اواه اه اه ..احزان قلوبنا كتر
احزانو في ام درمان ..حاديها اشجانا
الناس تلف وتدور ..الامة محنانه
الفقر في كدباس ..وديوم وسجانه
الكل مقطوع راس ..عربان ورطانه
حتى الشدر يبس ..ابنوسة او بانه
لا دومن خدر شال ..لا نخلة رويانه
شوفي العذارى بكن ..ست شاي وحنانه
والنوبا في ام درمان ..ما اعذب الحانها
غنو المناحة بكوا ..فنان وفنانة
ووضعنا فوق قبرو ..زهرية ما دانة
زهرية من شمبات ..مااروع الوانها
وبكينا كيف محجوب ..وين حزنو ودانا
مريم تقالد مي ..رحل الجميل ونبيل ..صاحب الضمير الحي
ماهادن الطغيان ..ماقال كلاما ني
تبكيك بنات الحي ..تبكيك ووب واحي
والحزن في بلدي يكوي الملايين كي
محجوب غنى التربال ..صوت النضال جلجال
اجيال وراء اجيال ..الطلبة والعمال
لابد يبزغ فجر ..ومحال دوام الحال
بقصيدة ولا مقال ..بشرانا حسن الفال
ماهز عصف الريح في الدنيا مره جبال
البدر والانسام ..والنيل ده مويتو زلال
ترقصلو كم نخلة وتدي البحر شبال
محجوب ضمير الناس ..طبشيرتو والكراس
وطني وعميق احساس ..سيد الجلد والراس
محجوبنا حادي الركب ..ومسيرتو تضوي الدرب
تتجلى كلماتو تدي الامل للشعب
تحي السلام فينا توقف نزيف الحرب
محجوبنا يا وطني ..فقد الشرق والغرب
وشمالنا يبكيهو ..يبكي الصدق فيهو
وجنوبنا ينعيهو ..يهدي السلام ليهو
لابد نلقاهو نتلاقى في البرزخ
لابارا راسمالي ..لايوم وقع في الفخ
ضد اللي باع بلدو مسلول وسيفو سنين
ونضالو ما أمبارح ..من بدري ليهو سنين
ما طاطا يوم راسو ..ماهان كرامتو يمين
محجوب غنى الكادحين ..محجوب مع المسكين
محجوبنا وينك وين ..متخفي ولاسجين
لا باع باسم الدين
احبابو ناس طيبين ..يااهلنا كيف حلوين
محزون وكلي انين ..محجوب رقيق وحنين
لاباع وبيعو رخيص ..لا خاوى اي إنسان رخيص
ده اماني ما دسيس ..ويدخل كلامنا الميس
ماحام مع العملاء ..في لندن او باريس
لا حاول السلطة ..الزول براهو رئيس
محجوبنا في الجنة محجوب حلالي عريس
محجوبنا مع الفقراء أبوذر معاهو جليس
محجوبنا سوداني ..محجوبنا إنساني
لا قال وحاتو الروب ..لاجر وراني
لا خاف وقلنا العار ..لا ادوه بالدولار
محجوبنا ثوري عديل ..ابنوس تبلدي نخيل
والله وطني اصيل ..ساقياهو موية النيل
محجوب رسالة ريد ..ثورة وهتاف نشيد
الليلة ليلية ..والقعدة نيلية
وجدان وحنية ..همس المراكبية
انصار وختمية وافكار شيوعية
البحر حوليه ..واللحظة صوفية
الارض ديالكتيك ..ونظرية جدلية
خلوها بالنية ..الثورة مهدية
ما اجمل الدمعة ..في عين نوبية
تهتف مع الزملاء حرية حرية
هاتفتو ما رد ..قالولي في امبدة
قالولي قاعد في ..ماقده لي جده
محجوبنا في كفه ..وامجادنا في كفه
من نمولي لي حلفا ..وكلاكلة اللفة
ما انهد يوم مالان ..ابكيهو للسودان
ما اعظم الاحزان ..ياخيبة الاوطان
العندو للاخوان ..ما انت زول انسان
ابكيك ياراقي ..من اعمق اعماقي
من كل داء جاء ..قد كنت ترياقي
بلغ سلامي نقد ..اخوان وبينا الود
ادي الشفيع طله ..فاروق حمدنا الله
ودينا لي قدام ..دكتور كدودة سلام
سلم على حميد ..كرر سلامي وزيد
وسلامي ليها سعاد ..فوق الملايين زاد
ما اعظم الرفقاء ..لابد لينا لقاء
عمار محمد آدم
|
|
  
|
|
|
|
|
| العنوان |
الكاتب |
Date |
| عمار محمد ادم يرثي محجوب شريف بكلمات كما العبرات (يوجد نص) | مازن عادل عبدالغني | 04-27-14, 00:33 AM |
 Re: عمار محمد ادم يرثي محجوب شريف بكلمات كما العبرات (يوجد نص) | مازن عادل عبدالغني | 04-27-14, 00:50 AM |
| Re: عمار محمد ادم يرثي محجوب شريف بكلمات كما العبرات (يوجد نص) | مازن عادل عبدالغني | 04-27-14, 01:04 AM |
| Re: عمار محمد ادم يرثي محجوب شريف بكلمات كما العبرات (يوجد نص) | مازن عادل عبدالغني | 04-27-14, 01:27 AM |
| Re: عمار محمد ادم يرثي محجوب شريف بكلمات كما العبرات (يوجد نص) | مازن عادل عبدالغني | 04-27-14, 01:35 AM |
| Re: عمار محمد ادم يرثي محجوب شريف بكلمات كما العبرات (يوجد نص) | wadalzain | 04-27-14, 07:22 AM |
| Re: عمار محمد ادم يرثي محجوب شريف بكلمات كما العبرات (يوجد نص) | عمار محمد ادم | 04-27-14, 04:58 PM |
| Re: عمار محمد ادم يرثي محجوب شريف بكلمات كما العبرات (يوجد نص) | مازن عادل عبدالغني | 04-28-14, 08:47 AM |
| Re: عمار محمد ادم يرثي محجوب شريف بكلمات كما العبرات (يوجد نص) | مازن عادل عبدالغني | 04-28-14, 08:53 AM |
| Re: عمار محمد ادم يرثي محجوب شريف بكلمات كما العبرات (يوجد نص) | Hassan Senada | 04-28-14, 09:30 AM |
| Re: عمار محمد ادم يرثي محجوب شريف بكلمات كما العبرات (يوجد نص) | عمار محمد ادم | 04-28-14, 12:29 PM |
| Re: عمار محمد ادم يرثي محجوب شريف بكلمات كما العبرات (يوجد نص) | عمار محمد ادم | 04-28-14, 12:35 PM |
| Re: عمار محمد ادم يرثي محجوب شريف بكلمات كما العبرات (يوجد نص) | عمار محمد ادم | 04-28-14, 12:48 PM |
| Re: عمار محمد ادم يرثي محجوب شريف بكلمات كما العبرات (يوجد نص) | عمار محمد ادم | 04-28-14, 12:55 PM |
| Re: عمار محمد ادم يرثي محجوب شريف بكلمات كما العبرات (يوجد نص) | محمد حمدان | 04-28-14, 03:10 PM |
| Re: عمار محمد ادم يرثي محجوب شريف بكلمات كما العبرات (يوجد نص) | محمد حمدان | 04-28-14, 03:30 PM |
| Re: عمار محمد ادم يرثي محجوب شريف بكلمات كما العبرات (يوجد نص) | mekki | 04-28-14, 06:49 PM |
| Re: عمار محمد ادم يرثي محجوب شريف بكلمات كما العبرات (يوجد نص) | munswor almophtah | 04-28-14, 08:31 PM |
|
| |
munswor almophtah
فيس بوك
تويتر
انستقرام
يوتيوب
بنتيريست