الانقاذ خيارات التغيير من الداخل (الفرص المتاحة )

Quote: لحقيقة عجبني جدا اسلوب الحوار، ورقي اللغة المستخدمة فيه، وبالخصوص ما افاء به اخونا وصديقنا الذواقة / محمد على طه الملك : الحقيقة ( يا ابو حميد) عبارتك الفوق دي لخصت الوضع السياسي الراهن بصورة مركزة، ودي نتيجة حتمية للتراجيديا السياسية المستمر عرضها علي مسرح السودان السياسي منذ فجر الاستقلال وحتي تاريخه، والتي بلغت ذروتها بوصول الاسلام السياسي الاصولي الي الحكم، وبه يكون اكتمل تجريب الاطر المطروحة لأدارة الدولة من قبل الفعاليات السياسية السودانية ،( ديمقراطية ، عسكرية، علمانية و ثيوقراطية) ،الحيرة دي لازم نقيف عندها وقفة طويلة، نتأملها، ندرسها كويس ، نستخلص منها الحكمة، التي تساعدنا علي تجاوزها. من المستقر عندنا ان (اي تجربة لاتورث حكمة تكرر نفسها) متبوعه بتابعها الامين (العاقل لا يلدغ من الجحر مرتين) يعني لازم نعترف ونقر انو نحن عبر مسيرة 55 عام منذ الاستقلال وحتي الان لم نكن من الحكماء ولا العاقلين، لأننا كررنا التجربة 3 مرات متتالية (ديمقر اطية- عسكرية) وعشان نعالج الخلل (عدم العقل) ده و للوصول الي علاج ناجع وناجح يجب علينا ان نعترف بيه، وبالتالي نعترف بوجود ازمة حقيقية (سياسية واجتماعية واقتصادية واخلاقية) ادت لأول مرة في تاريخ السودان الحديث اليتهديد وجود الدولة السودانية نفسها. الازمة اسبابها معروفة ويمكن تلخيصها دون اخلال بالتفاصيل في المركزية الكثيفة للثروة والسلطة، وعدم وجود رؤية واضحة لادارة الدولة السودانية عند كل الذين مارسوا السلطة منذ الاستقلال وحتي تاريخه. وسبب حيرة غالبية الشعب الان،(تقابلها عبارة غلب حمارو) انو لأول مرة يجد المجتمع نفسو بواجه خيارين، تمت تجربتهم الاتنين، والثابت لديه هو فشلهم الاثنين (اسلامي"تقليدي"، وعلماني) عندو الرغبة في تخطيهم الاتنين لكن ما عارف كيف؟ يعني زي ما تقول كده انو لأول مرة يواجه نفسه، او ممكن نقول لأول مرة يواجه خيار الخروج والثورة علي القديم الموروث (هذا ما وجدنا عليه اباؤنا) وصعوبة هذا الخيار محورها انو ماتم فيه من شغل وتربية موجهه من السلطان منذ ماقبل الاسلام مرورا بعهد بني امية والعباسيين، والي سلالات الاسلام السياسي الحاضرة، اصبح جزء من حركته اليومية بكل تفاصيلها، وعلمانية مرفوضة لديه (جزئيا علي الاقل) في بعض مناطقها التي تصادم معتقداته، وموروثاته، ولكنها توفر له بعض كرامة انسانية وحرية فكرية يفتقدها في الموروث ، والحيرة البي يعاني منها دي معناها انو بيبحث عن طريق ثالث، لم يتبينه حتي الان، طريق يجمع بين الدين ونظام الادارة الحديثة، والنظام ده بصراحة ما ح يلاقيه الا في اطروحات الاستاذ / محمود محمد طه، ودي نفسها تمثل بالنسبة ليه مصدر رئيسي للخوف بحكم التشويه الكثيف الاتعرضت ليهو، وكل ما طالت فترة الخوف كل ماذ زادت شدة المعاناة ومرارة التجربة ..