زمان سنة واحد وتسعين كتبت قصيدة الهبرو ملو ... وانا كنت ساكن فى شارع البطراويشى بطنطا تحتنا كان فى نزار فلامنكو والصافى وهلم جرا المهم القصيده شالا نزار ولف بيها كل منتديات طلاب حزب الأمه فى جمهورية مصر العربيه .. وكان ماسك بيها الجو وماكان بيقول انو انا صاحيبها ولمن الانصار عملوا ليهم لمه فى طنطا مشيت عشان أحضرها لقيت ليك نزار ده فت قام وألقى القصيده بى صوره وجعتنى شديد خلاص شوهها ياخى ... القصيده طويله وكانت بتقول وده جزء منها
ببسم الوطن هبرو بسم التماسيح التمسح فى الدقون هبرو وقالوا ماماشين شعب يموت ماقضيه وشعب يهاجر يفوت مامهم وهم زى مابقولوا قاعدين قاعدين بحبال المشانق برصاص البنادق بى تعذيب السجون قاعدين قاعدين ياشعب يامسكين وياشعب يامسكين الهبرو ملو وهبرو الهبره والهبره بتطعن فى القلب سكين قالوا القمح مليون قنا سمح قالوا اللبس مضمون قلنا عديل بس ياناس لاشفنا لبس لاشفنا قمح لاشفنا صفايح الزيت المخزونه الجوه الجوه بتصدى طلعوها وباعوها للمن العدم لافين ياشعب يامسكين وياشعب يامسكين يحفظكم رب العزه من ردة كل الدجالين ديل حيبيعوا ويشتروا فيكم والمر حتشوفوهو والله تشوفوهو شوف العين ياشعب يامسكين ياشعب يامسكين ماحتشوفوا معاهم يوم فيهو الرحمه بتتنزل من بين ايديهم ديل ناس كعبين ....... بدوها بتمثيليه وقالوا الإنقاذ ولمن تقسى دروبا فى الحين ينهوها بتمثيليه من فصلين مافيهم زول الوش الواحد وياريت فيهم زول وشين ديل ناس بتلونو زى الحربويه وبكره تشوفو كاتل الروحين حتشوفو الكاتل فى جنازة بلدو ماشى ولايهمو وعامل فيها انو صحابى وذو النورين حيطلعو كل سماحة دينكم من جواكم تكبير تهليل ويتاجرو بيهو زى مابعملوا هسى وين يمشو من رب العزه الكضابين بس لازم يعرفو ان الدايمه مابتدوم لغير الله والماشه بتمشى فى طريقاً المكتوب ليها مهما اتراكمت عليها أسوأ سنين وزى ماقال عمك ياسين طريق القطر درداق وشارع الظلط دقداق والعربات بتطوى المسافات والتاريخ لابد يجيب آخرين ...!!!
فى مقاطع ناسيها زى ماقلتا ... ولسه الهبر حاصل والمشانق معلقه والرصاص بيحصد فى الشرفاء
ماتتراجع ماتتردد ولو حبيت تتراجع يبقى الدم السايل سايب دين فى رقبتك
احترامى
(عدل بواسطة ملهم كردفان on 10-08-2013, 10:11 AM) (عدل بواسطة ملهم كردفان on 10-09-2013, 01:21 AM) (عدل بواسطة ملهم كردفان on 10-09-2013, 01:37 AM)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة