الرئيس : السلام عليكم المعارضة : وعليك السلام الرئيس : ندخل في الموضوع طوالي :: انتو عايزين شنو؟ الخطيب : هو انتو خليتو شي عشان ندورو.. سعادتك ما عايزين شي كيف ما عايزين شي : يعي راقدين ليكم فوق راي الترابي راي شنو يا عمر ما انتو سايقنها اهو الرئيس: يا شيخ حسن ما انت طماع كنت عايزها براك الترابي : هسة انت ما براك معاك زول؟ الرئيس : اي معاي علي ونافع وعبد الرحيم الصادق ياجماعة خليكم موضوعيين ما بين المحبين عتاب الميرغني: بصراحة انا عايز اعرف حتدونا كم وزارة الرئيس: يعني هسة القول شنو؟ البلد دي كوك وقفت ودايرة دفرة الخطيب. انزل لينا نحاول نسوقها ولو عصلجت انت ادينا دفرة الرئيس : انا داير انزل زهجت من السواقة 25 سنة غير اللكلكلة ما في اي شي وكمان مكرهني بتاع خط هيثرو .. كل يوم من الصباح اها الحصل شنو في خط هيثرو .. ياخ باعو واكلوا قروشو .. تاني في شنو؟ الميرغني : يا ريس اهدا ما تنفعل الترابي : والمانعك شنو ما تنزل الرئيس : انزل امشي وين؟ الترابي : امشي بيتكم الرئيس : واقعد سااااااااااااي الخطيب: والمشكلة شنو ما كل السودان قاعد ساي الميرغني : انا بشغلك في البنك الصادق: استهدو بالله .. ما تنزل يا ريس خليك راكب جمب السواق الترابي ( بضحكة) : هههه يعني مساعد حلة؟ الصادق : لا ياشيخ حسن ما مساعد حلة ، سواق تاني الرئيس: وناس علي ونافع ما برضو الخطيب : نلحسهم الكوع الرئيس: وعبد الرحيم؟ الميرغني: نرجعو الجامعة الاهلية تعليم مستمر الخطيب: يا جماعة هس الرئيس ده قال ليكم ادو حل العربية البسوقها منو الصادق: ياجماعة كلنا كبرنا نخلي ولدي عبدالرحمن يسوقها اصلو اتعلم شوية الميرغني : وجعفر زاتو اتعلم السواقة الترابي : ياخ ولدك السنة كلها برة السودان .. قال داير يتم قرايته الميرغني: عشان عبد الرحمن ود اختك؟ الخطيب: انا من راي نخليها تمشي اوتوماتيك كلهم : كيف يعني الخطيب : بالبركة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
د.محمد حسن
فيس بوك
تويتر
انستقرام
يوتيوب
بنتيريست