حمور يقول الروب فى الفيس بووك

Quote: الاخوة في جمهورية السودان الشقيقة .. الله يرضى عليكم ويزوكم قبر النبي .. انا زاهد كل الزهد في نقاش الشأن المصري معكم وارجو ان تزهدوا في ذلك مثلي .. الله ينولكم الفي مرادكم ! يا جماعة الحكاية دي متعبة جداً بشكل لا تتخيلوه .. في فرق بينا في المعلومات و المعايشة و تكوين الرأي من الصعب اختصاره وتوصيله في كومنتات وانبوكسات خاصة لما تكون انت جاي برأي جاهز من الخرطوم و عاوز تقنعني بيو ! حاديك مثل : جماعة الاخوان تطلع خريطة مسيرات لتحركاتا بكرة .. الخريطة بتطلع و تنشر من اليوم .. الواحد فينا بيقراها و يكون عارف الاخوان نازلين وين .. و عارف الاماكن و جغرافيتا غالبا واحيانا تاريخ الاماكن في صدامات سابقة مع الاخوان الواحد فينا يقرأ تعليقات وكتابات الاخوان في صفحاتهم وبروفايلاتهم الشخصية عن الاستعدادات لمسيرات الغد والحشد و العدائية تنطلق المسيرات غداً و تبدأ اخبار اشتباكات .. الواحد يتابع شهادات الاصدقاء من شهود العيان في المنطقة وانو منو بيضرب منو و بيحصل شنو وشهادات الحقوقيين البيجمعو الانتهاكات و يقرا كتابات الاخوان واخبارهم لحظة بلحظة .. اللي هو غالبا اخبار الاخوان بتكون زي نشرات الجزيرة كلها اكاذيب .. تلاقي الواحد كاتب الان يتم قصفنا بالطائرات لا اله الا الله .. او كاتب عدد القتلى تجاوز 8000 الف انها مذبحة لم تحدث منذ العصر الطباشيري .. و بعد شوية هو زاتو يبدا يتكلم عن انو لا حول ولا قوة الا بالله استشهد منا 30 شهيد ! في النهاية بتجي انت تدخل النت او تفتح التلفزيون تلقى خبر : مقتل 20 و اصابة 100 من مؤيدي الرئيس مرسي في مظاهرات في المكان الفلاني تجيني شايل الخبر و عاوز تقنعني انهم مظلومين و هاك شوف يعني خبر انا بكون قاعد ليو ساعات واتابعو لحظة بلحظة لامن انتهى بكل تفاصيلو و كونت انطباعي ورأيي عنو .. من المستحيل انقل ليك كل التفاصيل دي و من البجاحة انك تحاول تغير رأيي لأنك قريتو في سطر في قناة الجزيرة ! فابوس يدكم نفر نفر .. ارحموني انا سفاح ومؤيد للانقلاب و غير متسق .. في السودان اطالب بحقوق الانسان وارفض حكم البشير وفي مصر اؤيد الانقلاب و لا اهتم بحقوق الانسان .. مش ده البتعتقدوهو ؟ جميل .. شري لنفسي وللمصريين .. خيري لكم .. انا عاوز لبلدي حقوق الانسان و الحكم الديموقراطي .. خلو المصريين هم اليزعلو من عدم اتساقي ! ممكن ؟ اتمنى ده يكون اعلان .. عشان اي سوداني حيجي يناقشني وهو شايل ليو قناعة مكونا من نص ساعة قدام قناة الجزيرة او صفحة حزب الحرية و العدالة في الفيس بوك سواء في كومنتات او انبوكسات انا حارد عليو بشكل يفسد ما بيننا وشكراً