عاصم البنّا..بلا وإنجلا..

Quote: وضح بما لا يدع مجالاً للشك من خلال الحلقة الأولى من برنامج أغاني وأغاني إنو عاصم البنا كان السوسة التي تنخر في جسم البرنامج حتى كاد أن يسقط وينهار بنيات سنوات طويلة .. بعيداً عن أصوات وأداء الفنانين لفت نظري الجو العام المريييح في عدم وجود عاصم البنا ..كل الفنانين تقريباً تشعر بيهم بلا رقيب ولا حسيب وكل زول بيغني مرتاح بدون ضغوطات عن نفسي كنت أشعر إنو عاصم البنا كان سبب رئيسي فيها.. عاصم البنا كتيير المقاطعات وكتيير التداخل وفي كتييير من الأحيات بيدخل على الفنانين يبووظ ليهم غناهم ويشاركهم في أعمالهم .. انا متأكد الحاجة اللي خلت البت فاطمة دي الناس تشوفا أدت بي صورة ممتازة إنها بدت الأغنية من طقطق للسلام عليكم بدون ما زول يقاطعا..وأكاد أجزم بل أحلف ليكم لو كان عاصم موجود كان تداخل معاها بي أي صورة .. عاصم واضح جداً إنو يمتلك نفسية متعجرفة وفي نفس الوقت نفسية غيورة ما بتحب إلا نفسها وما بتساعد الاخرين .. ما عارف وما ملم بي أسباب إبعاد عاصم البنا لكن اتوقع إنها كانت ضربة معلم لعودة البرنامج بي روح جديدة مفعمة بالحب والتجاوب بين الفنانين الشباب ديل.. وأتمنى إنو الروح دي تستمر لحدي نهاية الحلقلات وإن كان ح يشوهها بعض الشئ إستضافة فنانين كبار يجبرونا على سمع اغانيهم مشتركة .. عاصم البنا كان بيفرد عضلاتو على أساس إنو أكتر زول ملم بي تاريخ الاغنية السودانية والحقيبة ..كثيرا ما يتداخل مع السر قدور وكثيرا ما يتقاطع مع الفنانين .. عن نفسي وما عايز أبالغ ليكم لكن إنقطعت تماااماً عن برنامج اغاني واغاني في السنوات الاخيرة والسبب الرئيسي كان وجود عاصم وإحتكاره وإختياره للأغاني اللي بيشوف إنها هي الأجمل والأكتر رواجاً وبيستلما.. فقط في الفترة الاخيرة كنت بتابع الحلقات الفيها الكائن الخرافي محمود عبد العزيز رحمة الله تغشاه في الشهر الكريم ده.. في عدم وجود عاصم وبدون ما أشعر لقيت روحي بحضر في البرنامج بدون ملل وبدون رتابة وفي تشويق كاامل للاغنية الجاية ممكن يغنيها منو وكيف.. قد يكون ده شعور شخصي البوصف ليكم فيهو ده وقد يتفق معاي عدد من الناس لكن شعوري العام بيقول إنو عاصم كان خميرة العكننة في هذا البرنامج.. عاصم البنا ..بلا وإنجلا..