دكتور نافع ينهزر الناس على الهواء مباشرة .. كما كان يفعل و نحن طلبة!

Quote: زولكم كان خاتي كالعادة! تعود كل مرة هو شرذمة من ناسكم يهاجموا المرحوم حسن عطية و نحن مافيشين (دايما ايام الخميس بالليل), اها المرة دي عملها بالصباح. المرحوم حسن عطية واقف يشتري قلم عشان يلحق المحاضرة, جاء صاحبكم و ضربه في كتفه و لما حسن التفت عليه ضرب حسن بنية في وشه, و كان هناك مع عبدالله عدلان مجموعة الكيزان فوقفوا بين حسن و عبدالله عدلان و تدخل بقية الطلبة. انا كنت في معمل النبات الزراعي (معمل ناس نافع) و شغالين نتفرج في المادة الوراثية بتاعت البصل (شفت الذاكرة دي كيف?) كلموني ان الكيزان ضربوا حسن عطية, في اقل من خمسة دقائق اتصلت بزملاء تانين و اتفقنا انه بعد الفترة بتاعت الصباح نمشي نفتش عبدالله عدلان وين ما كان, و نضربه. فعلا جينا الكافتيريا لقيناهو واقف تحت النيمة و معاهو مجموعة من الكيزان (الناس السمان سمان ديك كانوا بسموهم دبابات و اظنه دا هو اصل كلمة دبابين) و قعنا فيهم لبع! انا كان نصيبي عبدالله عدلان عملت فيه عملية الثعلب في البجعة, ما عرف يغطي راسو و لا كرعينو و لا بطنو (محسوبك بعرف حبة كراتية و كدة يعني هههههههه) قعد في واطات الرحمن دي يهزئ و يكبر كأنه وقعت عليه صاعقة. المهم ناسكم اتدقوا دقة ما كانوا متخيلين انها تحصل ليهم قدام الطلبة و البنات كمان و في الكافتيريا, الكوزات قعدن يكبرن كأنهن في بيت بكا! عمك نافع جاء جاري من المعمل, و طوالي دخل في الشكلة (مش بالغ بالله)? مشينا القسم ناس البوليس قبضوا علينا كلنا بما فينا الكيزان و دخلونا الحراسة. العصرية جاء ضابط شايقي و قال لي ابن عوف (دا اكثر زول مهذب-شايقي- ما عارفو بقى كوز كيف, جابوهو عشان يحمي عبدالله عدلان لان ابن عوف كان سمين و جهامة) و كان اكثر زول انضرب اليوم داك-وقع مع حسن عطية- و قال ليهو تعال صلي بينا العصر يا مولانا! بقية الكيزان قالوا هم برضو عايزين يصلوا. اتخيل كان قميص ابن عوف ملان دم لغاية نص ضهره ومع دا طلعوهو من الحراسة عشان يصلي بالبوليس (طبعا بعد داك ما رجع لا هو و لا الكيزان) كلهم طلعوا ليهم اورنيك تمانية و ودوهم المستشفى! اتنين مننا اكتشفوا اللعبة و طلبوا يمشوا المستشفى و ما رجعوا ههههههههه انا و صحبي حسن عطية تاني يوم اخدونا لسجن امدرمان, و قضينا اياما هناك و لما خرجنا كانت قدامنا الامتحانات! انا اجتزت الامتحانات, اما حسن* فلم يستطع و اظنه سقط في مواد الاساتذة الكيزان فنال ناسكم ما يريدون و تم فصله من الجامعة.