|
الكوكي والملاريا بقلم محمد عبد الماجد
|
العملية دي عملها قبل كدا محمود سعد والبدري وكروجر وبدوي عبدالفتاح • مدرب المريخ السابق المصري الدكتور محمود سعد ...كان قبل اي مباراة للمريخ في بورتسودان بمرض..وبقول عنده (ملاريا). • اعلام المريخ (السالب)...يشيل ويقطع في الملاريا. • الملاريا دي على رأي مامون ابوشيبة ..يمكن يكون جابتها للمدرب لجنة الحكام المركزية. • محمود سعد مدرب كبير ..وعنده دكتوراه ( ما قلنا اي حاجة والله) ...وهو في مصر اشتهر بالانتظام والانضباط (اها قصرنا معاه)..والشيء الاكيد ان مرض محمود سعد قبل مباريات المريخ في بورتسودان لم يكن ادعاء. • نحن مقدرين مرضو. • والموضوع دا ممكن يحصل لي (مورينهو) ذاتو. • عمري بالغلط كدا ما سمعت (مورينهو) دا عنده ملاريا. • الملاريا في اوروبا للمشجع ما بتجي ...خلوا المدرب الفاهم اي حاجة. • لكن برضو في نفس الوقت ..ما سمعت يوم قالوا مورينهو عندو (نزلة) وإلا (صداع) ساكت. • السنة كلها مدخل ايديه في جيوبو ...متل (كماسرة) الكلاكلة شرق. • او متل الموبايل في الشاحن. • السنة كلها يشحن. • محمود سعد ...عندما تعاقد مع المريخ بي جاي ..اليوم التاني الملاريا اتعاقدت معاه. • فريقكم يمرض. • بلة جابر قالوا ماشي فرنسا!!!. • وانتوا عارفين الملاريا وقت تتلح الزول ..(عويرة) وما عندها ذوق او فهم. • في ناس الملاريا بتجيهم في الشهر مرتين. • زي الصرفة. • ملاريا المدرب محمود سعد يقال فيه قولان. • اولا وبالمنطق كدا ..او بالسيخة ما ممكن تقنعوني ان الملاريا دي بتجي (صدفة) كدا. • صدفة زي (الكديسة). • تشم ليك ريحة السمك ..وتعمل ليك فيها جاءت عشان الواجب. • تعمل رايحة. • او انها جاءت صدفة. • ملاريا محمود سعد كانت فقط ..عندما يكون المريخ عنده مباراة في بورتسودان. • اشمعنا بورتسودان. • بلة جابر قالوا ماشي فرنسا!!!. • الاتحاد العام لكورة القدم ..وقت كان بيعمل القرعة زمان .. قالوا ببرمج ليك (ملاريا) محمود سعد دا مع جدول المباريات. • مباراة المريخ مع هلال الساحل في الاسبوع الثالث ..يقابله طوالي في الجانب التاني ملاريا لمحمود سعد في الاسبوع الثالث. • مريخ حي العرب في الاسبوع العاشر في بورتسودان. • محمود سعد الاسبوع العاشر عنده (ملاريا). • نحن اي حاجة عندنا بي نظام. • مريخ ام درمان مع مريخ بورتسودان في الاسبوع الـ (17). • ملاريا محمود سعد في الاسبوع الـ (17). • دي حاجة ثابتة. • ونحن كنا عارفين كدا. • وكنا مقدرين الحتة دي. • قد تكون ملاريا محمود سعد (رجفة)...والرجفة بتجيب (الدوشة)..والدوشة بتجيب الملاريا. • برضو (منطق). • وفلسفة كمان. • زمان في واحد ..قال لي صاحبو ..انت تعال هنا (الفلسفة) دي يعني شنو؟. • صاحبو قال ليه ..حضرت مباراة الهلال الاخيرة. • زولكم قال ليه ايوة. • قال ليه شفت البعمل فيه (ترواري) دا؟. • قال ليه شفت. • قال ليه بس ...دي (الفلسفة) ذاتها. • التاني قال ليه ...طيب (المنطق) دا شنو؟. • عامل لي فيها شاطر ...وعارف اي حاجة. • الاول قال ليه ..حضرت كورة الهلال والاتحاد الاخيرة (2/2). • التاني قال ليه ايوة. • الاول قال ليه ...شفت كورة تراوري التى لم تلج المرمي. • التاني قال ليه ايوة. • قال ليه دا عدم المنطق كان في الكورة دي ...الكورة دي لو عندها (حبة) منطق شوية كدا كان جاءت هدف. • عاوز تعرف (المنطق) اعكس الحكاية. • لكن الكورة ما عندها منطق. • والله الكورة دي فقدت (المنطق) من كمال شداد فات. • مع ناس متصم جعفر واسامة عطا المنان ...(المنطق) بقى في الجامعة ما في. • المنطق في حتة ..والكورة في حتة. • البطيخ موش كتير. • بقى ما عندو منطق. • بلة جابر ماشي فرنسا. • هسع لو في منطق الكلام دا بيحصل. • حليل (المنطق). • لقيتو البلد ما فيها (منطق) وقعدتوا تنظروا. • قالوا ليك ..برضو الكلام دا زمان ...(بس يا ريت الكلام دا ما يطلع من العمود دا). • قالوا ليك ...في واحد ..من الجماعة ..مشى السوق جاب ليه (كمونية). • كمونية عديل كدا ..دي فيها حاجة. • الزول جاب (الكمونية)...وقال لي زوجتو ..ظبطي لينا (الكمونية) دي زي الحفلة النهارية. • زوجتو قامت فيه ..قالت ليه الكمونية عرفناها ....(الحفلة النهارية) دي شنو؟. • اكيد شفت ليك فيها بنت ..جيت تهضرب لي هنا بالكمونية. • الزوجة زعلت ..قالت لي زوجها ..عليك الله (الكمونية) دي اظبطها ليك كيف؟. • وينو بصلها ؟..وينو زيتها ؟..وينو تومها ...وينها بهاراتها.. • الزوجة عملت ليه (حاجة امنة اتصبري). • الزوج مسكين ...(الكمونية) دي شغال ليها 15 يوم عشان يجيبها ...ما عندو اي طريقة لي (زيت). • حق (التوم) مافي. • الزوج قال ليها ..اعملي لي (الكمونية) دي بس بالمنطق. • بصلة ما عاوزها في (الكمونية) دي. • اعمليها بس بالمنطق ..انا زول منطق ساكت ...المنطق دا ان لاقني في الشارع بيبسطني. • المرا ..قالت ليه لو عاوزها بالمنطق ..بعملها ليك. • مشت المرا ..غابت ساعة ونص ...وجات راجعة شايلة (الكمونية)..ريحتها تقول يا (منقطي). • ظبطت ليك (الكمونية) دي زي الكبدة. • الراجل ..شاف الكمونية ..اتكيّف..ضرب ليك فيها لمن (جلحاتو) وصلن نص ضهرو. • ودفقن عديل كدا ..في رأس زميلو في الشغل. • الراجل اتكيّف ليك كيف شديد ..من (الكمونية) دي. • في اخر لقمة ..قعد يمص في اصابعينو ..وهو بقول لي زوجتو ...والله انا ما كنت فاكر (المنطق) بظبط الحكاية كدا...اسمعي بالمرة كدا ..اعملي لينا الشاي. • المرا قالت ليه هو وينو الغاز ؟...هو وينو السكر؟...عشان اعمل ليك الشاي. • الراجل قال ليها اعملي لينا الشاي بالمنطق ..انتي عارفة ...ما في حاجة افضل من (المنطق) في الدنيا دي. • الزوجة ..مشت غابت ..وجات راجعة شايلة الشاي. • الشاي بالهبهان ..والقرفة ...والنعناع ..حاجة ما تخلص. • الراجل شرب الشاي ..وقال لي زوجتو ...والله انا ما كنت قايل (الشاي) بالمنطق ظابط كدا. • المنطق دا ما في حاجة احسن منو. • الزوج شوية كدا ...قال لي زوجتو ..بدل ما تقعدي لي كدا ..قومي اعملي لينا (قهوة). • الزوجة قامت فيه ..قالت ليه : الجبنة هي وينها بنها ؟..وينها سكرها ؟..وينها نارها ؟. • الزوج في قعدتو ...ما اتلفت قال ليها اعملي لينا جبنة بالمنطق. • الزوجة ..مشت وجات شايلة الجبنة. • الزوج شرب الجبنة ...اتبسط ليك جنس انبساطة في الدنيا دي..وقال لي زوجتو ...والله انا ما كنت فاكر الجبنة بالمنطق مظبوطة كدا. • شوية كدا ..الباب ضرب. • الراجل مشى فتح الباب ..لقى ليك سيد البيت واقف في الباب زي (مبارك سليمان)...اسد بس. • خير يا زول عاوز شنو ؟..الليلة يا دوب يوم واحد. • الزول قال ليه عاوز اجار البيت. • الراجل دخل البيت ..وكلم زوجتو ...قال ليها سيد البيت ..قال عاوز اجار البيت ...ونحن لسع ما صرفنا. • المرا قالت ليه ..صرف شنو؟..وين (منطقك)؟...اديه منطق بس. • الراجل مشى لي سيد البيت ...حاول يمنطقو ليك ...نحن ما صرفنا ..وانت عارف الاولاد في المدارس ...والحالة بقت صعبة ..وانت اصبر لي شوية. • الراجل رجع (مفلوق). • سيد البيت فلقو. • المرا قالت ليه الظاهر عليه (منطقك) ضعيف..ساكت خليتني اكمل ليك (المنطق) في الكمونية. • شوية كدا ...الكهربا قطعت ...المرا زي الاجل جرت على العداد لقت الكهربا انتهت...قالت للراجل جيب لينا كهربة. • الراجل قال ليها : من وين اجيب ليك كهربة ..نحن لسع ما صرفنا ...وانت عارفة الظروف ..وما في زول بسلفنا في الايامات دي. • المرا قالت ليه وين (المنطق)؟..جيب لينا (الكهربة) بالمنطق. • الراجل طلع في الحيطة يبعبص في السلوك ..طقاهو ليك (سلك). • ما (سلك) المريخ ..(سلك) الكهربة ..جابو ليك تحت...طقت سلك المريخ ما بتعمل حاجة. • الراجل جاء واقع من الحيطة ..المرا مشت عليه ..قالت ليه (منطقك) غير مقنع ..لو كنت عارفة كدا ..ما كنت كبيت ليك (المنطق) كلو في الشاي. • الراجل عاين ليها كدا ..وهو بين الحياة والموت ..وقال ليها ..تاني ما عاوز لي (منطق) في البيت دا. • ولا (منطقاية) واحدة ما عاوزها. • كفاية المنطق العملتي لينا في (الكمونية)...كان عاوز يسممني. • بلة جابر قالوا ماشي فرنسا. • بلة جابر دا لو مشي فرنسا ..انتوا عارفين الفرنسيون ديل اول حاجة ح يعملوها شنو؟. • اول حاجة ح يعملوها ..ح يستعدلوا بلة جابر دا عشان (عكسياتو) تبقى تمام. • بقوموا يقلبوه ..بدل بلة جابر ...يعملوه جابر بلة. • يمكن (عكسياتو) تستعدل بعد القلبة دي. • ما في لاعب كورة في فرنسا اسمو (بلة). • كورة هي وإلا اللجنة الشعبية. • لكن موسى الزومة دا لو عاوزين يستعدلوه ..إلا يشيلوا ليه (اللوز). • ما عندو حل غير كدا. • تسلوا الروح. • خلونا نرجع لي موضوعنا. • الموضوع كان شنو؟. • كدا دقيقة نشوف العنوان. • الملاريا. • ملاريا محمود سعد كانت بتأتي بسبب مباريات بورتسودان .. وقد كان في بورتسودان وقتها (عتاولة) الاندية السودانية هلال الساحل وحي العرب ومريخ بورتسودان ، كما اشرت لكم من قبل. • عاوزين مراجعة في الكلام دا تاني. • يا احمد الحاج ..جيب لي صورة محمود سعد ..في الحتة دي ..ما تنشغل لي بي حوار البرير. • زمان اندية القمة بتسافر بورتسودان عشان تلعب ثلاث مباريات ..عادي جدا الهلال والمريخ يرجع اي واحد فيهم بي (نقطة). • من 9 نقاط ..برجعوا بي (نقطة). • لو بتنقطها عديل كدا..ما بترجع بي اكتر من (نقطة). • ناس المريخ ديل كانوا من يفوتوا (المصفاة) حقت الجيلي ..ما بجيبوا ليهم (نقطة). • حدهم بس (مصفاة) الجيلي. • يمكن عشان علاقتهم كويسة مع البترول. • بالمناسبة دي ...زمان ...زمان بالجد كدا ..قالوا مدرب المريخ المصري كان اسمو بدوي عبدالفتاح. • الكلام دا قبل ناس محمد عمر ومحمود سعد واحمد رفعت ذاتو. • زمن السفر كان بالقطر. • ناس المريخ كان عندهم مباراة في شندي. • المريخ سافر الي شندي بالقطر. • الزمن داك ...(الحافلات) دي ما بتشوفها إلا في السيرة. • المريخ سافر شندي وجهازه الفني بقوده بدوي عبدالفتاح. • يا عبده قابل شوف الكلام دا لو فيه حاجة غلط ..صححني. • بدوي عبدالفتاح ..في شندي مرض. • المدرب من المرضة ديك ...تاني ما مسك المريخ. • ناس شندي صعبين. • قالوا بلة جابر ماشي فرنسا. • كروجر. • كروجر مالو؟. • كروجر قال ما بمشي عطبرة. • ليه يا كروجر؟. • عشان جمهور عطبرة صعب. • كروجر قدر ما يمشي عطبرة ..يتغلب ويرجع مفلوق. • حسام البدري ..قبل مباراة القمة ...رقد في رويال كير. • رجفة ساكت. • حسام البدري دا ما طلع من رويال كير ..إلا بعد ما انسحب المريخ من الهلال في كأس السودان. • الحاجات دي كلها بتفتكروه ساكت كدا. • بتظنوها كدا صدفة. • وإلا (منطق). • الحاجات دي نحن عندنا ما ساكت. • نحن اي حاجة عندنا بي نظام. • شفتوا كيف؟. • هسع يا جماعة ..يا عصام الحاج ..يا مزمل ابوالقاسم ..انت عارف البئر وغطاها. • الحكاية دي ما مرض. • مرض الكوكي دا ما مغص. • الشيء دا (منطق) ساكت. • الكوكي دا عارف ناس شندي صعبين ..عشان كدا قال احسن امرض قبل المباراة ..واختصر الحكاية قبل ما امرض بعد المباراة. • خاصة ان الكوكي عنده مشاكل (وطولة) لسان مع صلاح ادريس. • وصلاح ادريس ما بخلي حقو. • عشان كدا الكوكي قال يمرض هسع. • مباراة الاهلي شندي دي لا بقدر عليها ولا حاجة. • 3 على الاقل. • تلاتة لو جاملوكم. • يا احمد الحاج ..جيب لي صورة (ميشو). • ميشو ذنبو شنو؟. • عشان ميشو دا يمكن يمسك المريخ بعد الكوكي. • ميشو او جمال ابوعنجة. • ملحوظة : انتوا الكلام دا جد ..بلة جابر قالوا ماشي فرنسا. هــوامـــــــــــــــــــش • قناة النيلين ..بتهرج رياضيا. • يا خالد الاعيسر دا شنو البتعملوا فيه دا؟. • انتوا الكاردينال عاوز يكون رئيس لنادي الهلال ...بالعصايا الشايلها دي. • الله شافك ساكت يا التجاني ابوسن. • غدا قد نعود للتعليق عن حوار الامين البرير. • وغدا نتحدث عن زيارتنا للبيت الازرق برفقة الزميل الاستاذ احمد الحاج ..والزميل المصور الفنان مهند كامل. • التأهل مضمون ان شاءالله. • الحال يسر البال. • والعزيمة والاصرار كبيرة. • لكن المامي دا ما يقعد يركز لينا في (الكوتشينة). • بكرة ان شاءالله ح تشوفوا الحاصل بالصور. • بالصورة والقلم ..زي ما بقولوا ناس الدار. • البرير قال البرنس ممكن يرجع تاني للهلال. • البرير دا يكون بفكر يشطب البرنس تاني. • يمكن شطبة واحدة ما كفتو. • اقرأوا الحوار. • والتأهل ان شاءالله سوف يكون من (المقبرة). • اقول ليكم حاجة ...والله نعست عديل كدا. • عاجل : احسن تنومو من هسع دي ..عشان من بكرة ما في نوم ..ماشيين على (المقبرة) طوالي.
|
|
|
|
|
|
|
|
|