|
الزينة ... الزيتونة .... المقابر
|
الزينة بت أحمد كانت دريفونه تلعب كما الشفع كانت صغيرونه تتجارا تتضارا وتندسّا لى جوه اذا اتاهم زول او ضيف من الحلة كانت كما كانت طيبه وحليوونه كبرت وجاها عريس اماتا زفّوها كل البلد فرحت فرحت كما الزينه كل البلد رقصت غنت مع الزينة الزينة انسانة رضعت من السودان كُلْ خيــــر وحنـــــية وشربت من النيلين رِوْيَتْ بياض نيه مدّت قُداحاتا للفقرى و الشبعان كرمــاً و جــــوديـــــــه ما مدت ايدا بتات تطلب فتات الزاد بل كانت ايدا هى يوت ممدوده علوية تكرم من الموجود ماجاكى زول محتاج يالزينة فاتك يوم ما جاكى زول ضهبان منك رجع مهموم ما جاكى زول حيران يا الزينة فات مأزوم الزينة بت احمد كانت هى بلّاله شمس الله ان شرقت تبقالنا ضُلّاله نار الله ان شبكت تطفيها بى حاله *** ***** ******* الزينة فى ذات يوم جاتت تسالمنا كانت تملى دوام تضحك تمازحنا تفرح تقالد الناس بى حب تصابحنا فجئاً تكت مالت ضاحكة وتعاينّا كانت تنادينا اصبحنا مشغولين قفّلنا اضنينا يا الزينه ما قاصدين فَضَلَتْ تنادينا يالزينة ما سامعين جاها الحكيم بالليل ك ل ب ن سنونو صفر طرّق مراويدو ختّالو فيها جمر قطّع مصارينا والدم صبح ينتر اب سن بعاين وفات مافيش زمن يصبر خلّاها بين البين لا ميته لا حيه خلاها زى دلقان او قطعة مرميه **** ***** ***** خاين وما مأمون ضيّع حياة الناس كيفن يجيك النوم كيف تفقد الاحساس زيّك بشر عايشين ما كنا يوم أنجاس ما خفت ربك ليه وعايز تقولنا ايه نتصرّف احنا وكيف ياهو القدرت عليه يا الزينة مابروح حق لازال نطالب بيه يابلدى حزنان ليك كل يوم بفكر فيك غدرك تعيش مجروح جرحك يدفق نى ألَمَكْ يكب جواى يضرب فؤادى الحى حزنك يسيح فى النيل يطلع يبارى الصى شمسك تغيب جواك تشرق ماّسيك فى ليلك يهوِّد بيك نجمك يعاندو الضى مطرك بينزف دم والعسكرى الارعن كل يوم هو زايد غى قسما بحق الشعب يالزينة مابننساك قسما بهادى الارض يالزينة نحنا فداك قسما نزيح الظلم نكسر قيود الزل العسكرى الاهطل طال الزمن أو قلْ حالفين أنحنا وراك
حاشية : ( فجئاً تكت ) اى فجأءةً انتكت .. الخميس 28 فبراير 2013 . نيويورك
|
|
|
|
|
|
|
العنوان |
الكاتب |
Date |
الزينة ... الزيتونة .... المقابر | الصادق سيكا | 03-02-13, 04:43 PM |
Re: الزينة ... الزيتونة .... المقابر | الصادق سيكا | 03-03-13, 04:55 AM |
Re: الزينة ... الزيتونة .... المقابر | jini | 03-03-13, 10:41 AM |
Re: الزينة ... الزيتونة .... المقابر | الصادق سيكا | 03-03-13, 02:08 PM |
Re: الزينة ... الزيتونة .... المقابر | الصادق سيكا | 03-03-13, 02:14 PM |
Re: الزينة ... الزيتونة .... المقابر | الصادق سيكا | 03-03-13, 02:29 PM |
Re: الزينة ... الزيتونة .... المقابر | الصادق سيكا | 03-03-13, 02:38 PM |
Re: الزينة ... الزيتونة .... المقابر | الصادق سيكا | 03-03-13, 02:51 PM |
Re: الزينة ... الزيتونة .... المقابر | Ebrahim Hijazi | 03-03-13, 06:55 PM |
Re: الزينة ... الزيتونة .... المقابر | الصادق سيكا | 03-04-13, 10:55 AM |
|
|
|