|
|
 إلى عيال ال (فيِ سي بوك): أديك سر؟!...خليك بعيد
|
اليوما داك جاتنا مرة سودانية في محل الهندي بتاع التياب, النوع البيونسك ساعتين عااادي, دي ما كانت مشكلتي, المشكلة إنها النوع البتكون لهجتو مصرية, بقوم أواجه مشكلة في ربط الصوت مع الخلقة القدامي, المهم, قعدت تونس فيني و تستجوب فيني فوق للبيعة,
المرة: إنتي يا آمنة أريتي قامعة
شخصي السمين: أي قريت جامعة الخرطوم كلية العلوم الرياضية
المرة: إيه إيه إيه, قامِعة الخرطوم؟!!.. طب ليه شغالة هنا , ما أدمتيش في محله تانيه ليه؟
رديت ليها بي وش جادي: لا انا دخلت ورقي القصر و اليومين ديل عندهم وظيفة (جراح طيار عضو مجلس الشيوخ) حسع الملكة بتكون بتشوف في السي في بتاعتي و شهاداتي!!
قامت نطتت عيونا و طوالي ردمتها ليك: يا بت جامعة الخرطوم شنو و وهم شنو, هم الإنجليز الامهم بت عم أبوهم و متخرجين من جامعة أوكسفورد و كيمبرج لاقين شغل؟!! عليك الله فكينا
سكتت كدااا, قامت قالت لي : إنتي متقوزه؟
قلت ليها: أأأأي, الحمدلله
رفعت لي حاجبها اليمين و ضيقت عينها الشمال: بتحبيه؟! ظريف يعني؟
رخيت ليها عويناتي و عملت ليها بي حاجبي اليمين كدا كدا : كيف ما ظريف ياخي دا (دا الاخدر الليموني,دا الكحل الملا عيوني,انا عشان خاطر حماضة إن شاء الله يرصصوني)*
دلت حاجبها اليمين و رفعت الشمال: إنتي من فين في السودان؟
مطيت شلاليفي و في سري قلت المرة دي مالا ياخ دايرة تطلع لي (الرقم الوطني) ولا شنو: ابوي من الدويم و امي من سنجة.
إستعدلت حواجبها و طرحتها: و قوزك من فين؟
زهجت زهج قلت المرة دي ما فاضل ليها إلا تجيب لي ال###### البوليصي
قلت ليها: زوجي من نيالا.
رجعت تاني لي رفيع الحواجبين:إيه قوزك من (ضار فور)؟ و لأيتيه فين دا؟!
قلت ليها: أي من دااار فور
غزت لي أوصبعا في خدها: أوعا يكون من عيال ال(فيِ سي بوك)؟!!
فيِ سي إيه؟!!! فيِ سي بوك؟!!! موبالغة لكين
حسع دا ما موضوعنا نهاااائي
الموضوع اللساسي يا عيال الفيِ سي بوك إنكم يا عملات جبريل بلال (عظبتوني عظاب)*
معقولة يا عيال الفيسبوك ما تلقو غير قصيدتي الوحيدة القاشره بيها من دون القصايد و تسرقوها؟!
أي هي النصيحة لي الله قصيدة ظريفة و تستحق السرقة لكين كمان ما بالطريقة دي ياخ!!
و على فكرة إنتو ما اول زول يسرقها, أتذكر زماااان قبل ما نبقى ناس قدام و محترفين في النت دا,طبعاً بديت الإحتراف دا يا عملات طلال فاروق بي كرة الشراب* في منتدى (عكس الريح)
قمت نزلت القصيدة اول مرة هناك,قامت جاتني (إسراء بابكر) الله يطراها بالخير بعد سنتين تقريباً سالتني:إنتي يا حجوج(الجيم عطشانة) قصيدة(أديك سر) دي حقتك ولا قاشرة لينا بيها ساكت؟!لاني شفت واحدة منزلاها في منتدى سوداني و ما خاته إسمك!!!
والله يا اخوانا ريقي نشف و كرعيني رجفن
الليل دا انا كلو شلتو سهر, قمت كلمت (وجدان عوض) صحبتي و دفعتي في الجامعة و بعتبرها الخبير الاجنبي في كل ما يخص البحث في النت, قالت لي هيييي انا قايلاك عارفة, اساساَ الزول السرقا انا دخلت و رديت ليو!!
طلع إنو غير البت القالت إسراء في راجل برضو شايل القصيدة!!
انا بالجد إتكيفت, معناتو القصيدة بتستاهل!!
المهم
بقيت كل فترة و التانية أخش النت أقوقل القصايد حقتي و أشوف سرقوهن وين,أكتر قصيدة كانت بتتعرض للسرقة و التحرش كانت(أديك سر خليك بعيد), بخش المنتدى و أسجل و أرسل للعضو رسالة خاصة مهذبة, بنتظرو تلاته يوم و بعد داك برسل للمشرفين, لحد الان انا عملت الحركة دي في أربعة منتديات و النصيحة لي الله ردود المشرفين و أعضاء المنتدى لمن يرحبو بي بتكون غاية في الادب و الترحيب.
يلا ربكم رب الخير قبل كمممم يوم كدا جاني إحساس إني أخش أشوف, يا عملات أمي* (النية زاملة سيدها)
بديت أقوقل في القصايد,القى ليكم قريب للطورشومية رابط للقصيدة في الفيس بوك!!
في واحدين محترمين و كاتبين إسمي و في واحدين قدر ما الله أداهم كمان ماضين أساميهم تحت!!
ياخي كلو بتلقو في الروابط التحت دي, بس في رابط لصفحة إسمها(أرفع راسك إنت دنقلاوي) و واحدة تانية إسمها شندي بالانجليزي
ديل ما قدرت اجيبم, و حكمة الله ديل اهم واحدات ولانو البنات حريفات السرقن القصيدة واحدة بدل (بيتنا الكبير الفي الدويم) كاتبه دنقلا و التانية كاتبه شندي!!!
انا البيحيرني الواحد يجيك من هناك تراااااخ بي كل براءة يخت ليك القصيدة كوبي بيزد, و بي كل جراءة يخت ليك إسمو تحت!!
والله يا عيال الفيس بوك كرهتونا(لعب البلي في الرملة)*
اها موضوع السرقة دا زي ما قلت ليكم يا عيال الفيسبوك ما قاعد يزعلني.. انا البيزعلني يا عملات حافظ حسين (الإستعفان)*, مالي ما بتكتبو إسمي تحت القصيدة؟ ريحتي عفنة؟ يعني الواحد إتفالح لمن نقل القصيدة كلهااا بقت على إسم الزول القعد نحت يا عملات (شليل)* صنقورو دا,إنتو يا عيال الفيسبوك قايلين الشعر دا ساااهي كدا؟ تنوم و تصحى تلقى القصيدة تحت المخدة؟
اللذيذة البنات السرقن القصيدة الجماعة يجو يقولو ليها:أيتها الرايعة العجيبة
تجي تقول ليهم: ههههههه شكرن يا معجبين انا اصلن رهيبة و كتابة بس إنتو ما مكتشفني!!!
ليه يااااخ
معناتو تاني عااادي ممكن الواحد يكون قاعد في النت تقوم جنبتو توجعو, يكشف كدا يلقى كلوتو ماف, يقوقلها يلقاها قااااعده في الفيس بوك بي إسم زول تاني!!!
بالجد يا عملات سارة الضارة (اللهم لا تمحنا لا تبلينا)* بي مناسبة سارة الضارة حقو الواحد يكلما تتوسط لينا عند عمو أمين محمد سليمان بي إعتبار إنو الخبير الأجنبي بتاعنا في كشف السرقات الإسفيرية و الخبير في البل, ياخي بلا يخمكم بحق جاه النبي
و بالمناسبة يا عيال الفيس بوك, دي النسخة الأسرية من الموضوع, تاني لو بالغلط الحركة دي إتكررت ما بيحصل خير.
طبعاً في ناس حتتسال إنو ليه ما دخلت انا براي بليتم في الفيس؟..
بلا يخمهم بالجملة ياخي
النكلمكم انا حسابي في الفيس قفلتو قبل اكتر من اربعة سنين, ويااخوانا الوصية في الظمة تخشو و ما تقصرو
ومن هذا المنبر لا يفوتني انا أشكر الاخ الصديق الشاعر محمد أبو القاسم لانو الوحيد الدخل و حفظ لي حقي الادبي في أحد الروابط.
يلا نجيكم للنجوم يا عيال الفيسبوك عشان تعرفو أدب الإقتباس
* دا الاخدر الليموني,دا الكحل الملا عيوني,انا عشان خاطر حماضة إن شاء الله يرصصوني)*
*النص أعلاه أغنية لنجمة الغناء الهاتف الاستاذة نجاة غرزة.*دا إسمو النقل بي تصرف لانها في الغنية بتقول محمد.
*(عظبتوني عظاب)*
عن (جبريل بلال) حين قال في أحد الإذاعات لمن سالوهو عن الجماعة البيصرحو كل زول تصريحو قاطعو من شبطو: فرد قائلاً: ياخي ديل عظبونا عظاااااب!!!
* بديت الإحتراف في النت بي كرة الشراب*
عن الاستاذين أيمن أحمد إبراهيم و طلال فاروق عضوا منتديات (سودانيز اوف لاين).
أمي* : الوالدة , كان ممكن أقول ليكم بخيتة لكين شايفاها اليومين ديل بقت ناكراني من يوم نزلت بوست(رسائل إلى أمي أرجو أن لا تقراها)
اها يا خالتي بخيتة قولي نكرتيني هنا, يوم القيامة ناوية تسجلي غياب ولا شنو؟!
(لعب البلي في الرملة)* : قصيدة حقتي انا دي يا عيال الفيس بوك , برضو سمحة, أمشو أسرقوها برضو بلاهي.
*(الإستعفان)*: عن حافظ حسين عضو منتديات سودانيات, هي القصة طويلة لكين بي إختصار كدا البت السمحة جاتم في الشغل و قالت ليو لو سمحتا دايرة استاذ حافظ حسين(الكلام دا كلو بالجيم العطشانة) قال ليها: اناااا حافظ حسين , قامت إستعفنتو و ما صدقت.
*( صنقورو): عن شليل عضو منتديات سودانيات.
* (اللهم لا تمحنا لا تبلينا)*: عن سارة عضو منتديات سودانيات .
بعض روابط للسرقات في المنتديات
http://www.sudanione.com/vb/showthread.php?t=9882
http://www.anasudani.net/fourm/showthread.php?t=8603
بعض روابط السرقات بالفيس بوك
http://www.facebook.com/re7t.albon/p...86486598043416
http://www.facebook.com/photo.php?fb...1544771andtype=1
https://www.facebook.com/hearts88/posts/403230879758062
https://ar-ar.facebook.com/RyhAlbnT/...22822361121318
https://www.facebook.com/AlrwwwwhSfh...86587061483086
يتبع على فكرة
(عدل بواسطة حجة امنة on 01-22-2013, 00:31 AM)
|
|
 
|
|
|
|
|
| العنوان |
الكاتب |
Date |
| إلى عيال ال (فيِ سي بوك): أديك سر؟!...خليك بعيد | حجة امنة | 01-21-13, 11:49 PM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-21-13, 11:55 PM |
| Re: إلى عيال ال (فيِ سي بوك): أديك سر؟!...خليك بعيد | صديق الموج | 01-22-13, 00:23 AM |
| Re: إلى عيال ال (فيِ سي بوك): أديك سر؟!...خليك بعيد | محمد سنى دفع الله | 01-22-13, 05:17 AM |
| Re: إلى عيال ال (فيِ سي بوك): أديك سر؟!...خليك بعيد | بدرالدين الطائف | 01-22-13, 07:14 AM |
 Re: إلى عيال ال (فيِ سي بوك): أديك سر؟!...خليك بعيد | حجة امنة | 01-22-13, 10:43 PM |
| Re: إلى عيال ال (فيِ سي بوك): أديك سر؟!...خليك بعيد | Musab Osman Alhassan | 01-22-13, 07:26 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-22-13, 10:57 PM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-22-13, 10:31 PM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-22-13, 10:14 PM |
| Re: إلى عيال ال (فيِ سي بوك): أديك سر؟!...خليك بعيد | محمد كابيلا | 01-24-13, 01:36 PM |
 Re: إلى عيال ال (فيِ سي بوك): أديك سر؟!...خليك بعيد | حجة امنة | 01-26-13, 11:30 AM |
| Re: إلى عيال ال (فيِ سي بوك): أديك سر؟!...خليك بعيد | Mohamed Mekki | 01-22-13, 07:20 AM |
| Re: إلى عيال ال (فيِ سي بوك): أديك سر؟!...خليك بعيد | Amin Tayson | 01-22-13, 08:16 AM |
| Re: إلى عيال ال (فيِ سي بوك): أديك سر؟!...خليك بعيد | محمد أبوالعزائم أبوالريش | 01-22-13, 11:09 AM |
| Re: إلى عيال ال (فيِ سي بوك): أديك سر؟!...خليك بعيد | وليد محمد المبارك | 01-22-13, 11:27 AM |
| Re: إلى عيال ال (فيِ سي بوك): أديك سر؟!...خليك بعيد | مجاهد محمد الهادي | 01-22-13, 01:18 PM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 10:10 AM |
 Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 10:08 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 10:04 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 09:53 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 11:46 PM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-23-13, 05:14 PM |
| Re: إلى عيال ال (فيِ سي بوك): أديك سر؟!...خليك بعيد | رانيه محمد الشيخ | 01-22-13, 01:00 PM |
| Re: إلى عيال ال (فيِ سي بوك): أديك سر؟!...خليك بعيد | محمد عوض السيد | 01-23-13, 00:30 AM |
| Re: إلى عيال ال (فيِ سي بوك): أديك سر؟!...خليك بعيد | عبدالكريم الامين احمد | 01-23-13, 08:08 PM |
| Re: إلى عيال ال (فيِ سي بوك): أديك سر؟!...خليك بعيد | showgi idriss | 01-23-13, 11:22 PM |
 Re: إلى عيال ال (فيِ سي بوك): أديك سر؟!...خليك بعيد | munswor almophtah | 01-23-13, 11:55 PM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 05:29 PM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 01:05 PM |
| Re: إلى عيال ال (فيِ سي بوك): أديك سر؟!...خليك بعيد | سناء الصباغ | 01-23-13, 11:27 PM |
| Re: إلى عيال ال (فيِ سي بوك): أديك سر؟!...خليك بعيد | محمد أبوالعزائم أبوالريش | 01-24-13, 10:30 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-26-13, 11:08 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 10:48 PM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 11:31 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 11:11 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-24-13, 10:28 AM |
| Re: إلى عيال ال (فيِ سي بوك): أديك سر؟!...خليك بعيد | رانيه محمد الشيخ | 01-24-13, 11:05 AM |
| Re: إلى عيال ال (فيِ سي بوك): أديك سر؟!...خليك بعيد | على عبدالله بشير | 01-24-13, 05:51 PM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-26-13, 11:17 AM |
| Re: إلى عيال ال (فيِ سي بوك): أديك سر؟!...خليك بعيد | أمير عثمان | 01-24-13, 05:52 PM |
| Re: إلى عيال ال (فيِ سي بوك): أديك سر؟!...خليك بعيد | أحمد قلوب | 01-25-13, 00:20 AM |
| Re: إلى عيال ال (فيِ سي بوك): أديك سر؟!...خليك بعيد | محمد عوض السيد | 01-25-13, 01:11 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-29-13, 11:39 AM |
| Re: إلى عيال ال (فيِ سي بوك): أديك سر؟!...خليك بعيد | حجة امنة | 01-26-13, 11:23 AM |
|
| |
فيس بوك
تويتر
انستقرام
يوتيوب
بنتيريست