تجربتى فى تربية الابقار الحلوب - الجزء الثانى (توجد صور)

Quote: بسم الله الرحمن الرحيم الاخ الفاضل صلاح لك وافر التحايا انت واعضاء البوست والمتابعين...واسأل الله العلي القدير ا ن يبارك لك في مشروعك وان ينعم عليك ويزيدك من فضله...من يحب الخير للناس يحبه الله..لقد قدمت خدمه طيبه وكبيره للجميع ..وانا شخصيا استفدت فائده كبيره من البوست ومن مداخلات الاخوه ...احييك علي الجهد العظيم وتابع في مشوارك وكلنا متابعين معاك ان شاء الله عندي تجربه طيبه في تربيه الضان واخري قصيره مع البقر وعده سنوات في انتاج البرسيم ...الاخوان تكلموا عن البرسيم ..وحبيت اضيف عليهم لانو شايف مربيي الابقار تركيزهم كله علي علف ابو سبعين البرسيم يعتبر غذاء كامل للبقر لانو مصدر هام جدا للبورتين والاحماض وعناصر الكالسيوم والفسوفور وكميه فيتامينات اهمها فيتامين أ ..واهم مركب للعليقه لزياده الادرار زي ما اتفق كل الناس هو البورتين..و نسبته في البرسيم حوالي 18 في المئه كمان البروتين مصدر مهم للطاقه..يعني لو عندك نقص في تركيب العليقه من مواد الطاقه البرسيم برضو بيسد ليك جزء كبير منها..يعني ياصلاح التكرييبه العملتها انت زدت فيها نسبه البروتين.بس لانو انت ماعندك قياس كامل لمكونات العليقه..يعني لو حصل زياده البروتين علي حساب مكونات الطاقه..البرسيم بكون عوض ليك جزء كبير وكمان البرسم فيه نسبه منالالياف..جوده البرسيم بحددها عمره..يعني وقت حش البرسيم..يعني كلما قطعنا البرسيم في عمر صغير بتكون الجوده اعلي والبروتين اعلي وكلما قطعنا في عمر متاخر وبتدي نسبه محدده في كل قطعه rhizome بتكون الجوده اقل..لانو نبته البرسيم بتكون في شكل رايزوم تحت الارض بشكل عام..الماده الغذاءئيه بتكون عاليه في كل النباتات لمن تكون في عمر مبكر واوراق غضه..يعني حتي الناس البفضلوا ابوسبعين علي البرسيم احسن ليهم يقطعوا في وقت مبكر بدل ياخروا القطع لحدي النباتات تبدا تنشف..لانو كده بكون فقد جزء كبير من الفائده الغذائيه بالنسبه للمربي البنتج برسيم بنفسه احسن عمر لمن يصل الازهار مرحله25% في الحقل..ده عن دراسات قام بيها اخرين وعن تجربه شخصيه .المشكله انك لمن تقول لمزارع البرسم او التاجر ما بيقبل الكلام ده لانو بقول كده انتاجه بطلع قليل..يعني هو داير البرسيم يملاء زياده عشان يكون انتاجه اكتر وبالتالي ربحه يزيد..لكن البنتج بنفسه بقدر بيتحكم اكتر في جوده العلف اذا برسيم او ابو سبعين.البرسيم الناشف افضل من الاخضر..ويكون احسن لو جففت في مخزن او بعيد من الشمس..وبعد تنقل البرسيم من مخزنه او مكانه حاول تحركه بحساب عشان اوراق البرسيم ما تحت منك ..لانو هي ناشفه..وكل الماده الغذائيه هي في الاوراق..السيقان فيها لكن بسيطه..اما الناس البصروا يدوا برسيم هو اخضر..ما يقدموه هو رطب شديد...كده بعمل عسر هضم للبقره او نفاخ... لازم نعرف ياجماعه انو البرسيم هو العلف الرئيسي في كل العالم..حتي بعده بتجي بقيه الاعلاف اتمني تكون الفكره وضحت ....وبتمني الناس البفضلوا القصب يداخلوا معانا ويشرحوا لينا ليه هو افضل..بعض من الناس بقولوا ليك جربناه وما نفع معانا..مشكلتنا دايما بنتسرع في حكمنا..لانو ماف تجربه ناجحه بتجي بسرعه..دايما دايره صبر ووقت ..وفي النهايه الهدف واحد..لو لقينا القصب احسن واقتنعنا بيه بنسعمل القصب. اتمني اكون افدت في شي.. والله من وراء القصد اخونا صلاح..بالنسبه لشركه المعدات..حقيقه انا ما متاكد هم مستوردين ام وكلاء..ده موقعهم في النت ..ياريت لو لقيت فرصه ومشيت اخدت معلومه كامله www.prosperity-sudan.com خالص شكري لك وللجميع اخوكم عوض