المريخ العالمي......وهلال الملايين وقمة فوق العادة

Quote: يا هارون يا أخوي كلامك ده كلام خوف ساكت وفيهو رجفة في عجلات الثقة عشان كده يا ريت ترصصها قبل المباراة وخليك هلاريخي لغاية ما تعرف النتيجة ، ونصيحتي لك ولأمثالي أن تحضر المباراة براك ، وما يكون عندك لا جك مويه ولا كباية شاي ولا ترمسه مليانه قهوة وإياك والشيشة والولاعة والطفاية دي كلها أدوات غير مسموح بها في مثل هذه الحالات الإستثنائية. ويفضل أن تودي الريموت كونترول بي غادي وتحضر بدون ريموت ، وكتر من التسالي والترمس وأى حاجه ممكن تعضيها بحيث إنها لا تؤثر على أسنانك يعني دوم ولالوب ما معانا وخليك مع التبش. الهلال شكلو كده يعني تقدر تقول بي قدرة قادر وكده يمكن يعملها ويكون التوالي السادس أنا بقول يمكن. ولو شفت البلد يا هارون تقول نهائي كأس مزاجها زنجبيلا العالم غير الكورة ما عندها نضم وجيرانا عزابه من بحر أبيض والله جايبين ليهم أظن ترليون يارة قماش أحمر وأصفر ويقصقصوا ويظبطوا في الأعلام من قبل ثلاثة أيام حسوما والليلة من الصباح شوف عيني شايلين راياتهم للبيع في بوكس ، والراية أو العلم جزء أساسي من العربية زيها وزي الترخيص. الساعة 8 باقي ليها أقل من 11 ساعه وهسي من دربي ده قايم أجيب الجرايد والتسالي وبقية المكيفات وأظبط ليك موقعي في شارع بيتنا تحت النيمة الوارفة الظلال رغم إنها بدأت تحت أوراقها لدخول فصل الشتاء مجازا