عن معاوية بن ابي سفيان .. و الصحابة .. و مرويات التاريخ الاسلامي

Quote: ظني ان بغض معاوية لم يكن ابدا ديدنا مستترا في مناهجنا ، علي العكس انا شايف انو مناهجنا اتبنت موقف الخطاب السني في المسألة دي باعتمادا مقولة : تلك فتنة عصم الله منها سيوفنا فلنعصم عنها السنتنا ، ودا طبعا موقف غريب امام التفسير الطبيعي للتاريخ ، أدي ذلك ضمن ما ادي الي تصوير الدولة الاولي في صدر الاسلام كدولة يوتوبيا يسكنها اناس اقرب الي الملائكة ، ادي ذلك ضمن ما ادي الي الالتباس الحاصل هسه عند عوام المسلمين وجمهورهم ، تلقي الواحد منهم بيعمل في الحاجة وحاسي بالذنب لأنو المثال الموضوع ليهو والمكرر علي مسامعو في الرادي وفي التلفزيون وفي صلاة الجمعة هو مثال مستحيل التحقق ، واحدة من الالتباسات دي في وقتنا الحالي وفي السودان حقنا دا انو الناس بقت تنظر للزول البسكر نظرة أسوأ من الزول البيسرق ودي طبعا مسألة غذتها اليات كتيرة ليس مجال نقاشا هنا ، دا حصل بسبب انو زي معاوية بن ابي سفيان لم يشار الي فساده في الحكم مثلا ودكتاتوريتو ، لا ، يشار الي اعماله الطيبة وبالتالي يا مسلمين الحاكم بتاعكم دا كان عمل اي حاجة فهو بيحاول يتشبه بمعاوية مثلا ، وتصوير الزمن الاول كيوتوبيا دا في اعتقادي واحد من مصادر تغذية التطرف الحالي : تشبعت افكار هؤلاء الناس بمثاليات حار بهم الدليل في الوصول اليها . النقطة بتاعت تفنيد المصادر الاعتمد عليها صاحب البوست المعني الاخ بدرالدين الامير دي بتودينا لحتتين : - اما انو المصادر دي لا يؤبه بها : وفي دا الغاء لجزء كبير من التاريخ الاسلامي بصورتو المعلنة حاليا أو - انو المصادر دي فيها الصاح وفيها الغلط : ودا الأقرب للصواب عندي ، أها يا حمور هنا بنصل لنقطة مفصلية : فلا نص مقدس أو منزه بالنسبة لينا كمسلمين الا كتاب الله القران الكريم . - نقطة أخيرة يا حمور : القصة بتاعت انك تشير لأخطاء كاتب البوست في السين والثاء وأشباهها دي ما أظنها بتدخل في صلب الموضوع ، بل بتوحي بطريقة عرضك ليها انو غرضك ليس التنبيه والاصلاح علي كل حال ! مودتي .