|
|
 عفيف إسماعيل : وداعا زوربا السوداني.
|
*مسامرة من وراء المحيط
المكان:الحصاحيصا.. ستديو الحصاحيصا للتصوير الفوتوغرافي..
لصاحبه علي محمد الطيب
الزمان:النصف الثاني من العام1991
في ذاك النهار الغائظ من مايو 1991 كنا نجلس بدر الدين عبد الباقي وادريس حسين مع عم علي،الشهير بعلي الفك ، أو ابو حميد أو زوربا السوداني، نحتمي من حمي الظهيرة داخل صالة الاستديو نتفيأ نداوة جهاز التكييف كي نتقي حرارة ذاك النهار الملتهب، ونتبادل شجون الوطن الممكون بعصبة من مصاصي الدماء البشرية وهواة الرقص علي نزيف الحرب ويسمون المآسي أعراساً للشهداء ومحاولات تجيش الجيل الشاب نواة الحلم التغيير في السودان، دخل علينا متصببا عرقا ومرحا رسام الكاركتير الشهير بدرالدين مصطفي صالح بحضوره البهيج الذي يشعل المكان صخبا، قبل أن يكمل تحية لكل الحاضرين وشكواه من ارتفاع درجة حرارة النهار بادره عم علي قائلا:
_ جيت في وقتك يا بدر ، جيب ورق وقلم عندي ليك فكرة كاركاتير مجنونة حاره زي نار النهار دا.
يضحك بدرالدين كعادته أولا علي نكتته التي لم يقلها بعد ويقول له:
- كدي خليني أقعد معاكم في الجنة دي شويه يا عم علي ، وبعد داك الرسم ملحوق
يجلس بدر الدين وهو يخرج من حافظة أوراقه التي تلازمه دائما ورقة ويبسطها أمامه، يقول له عم علي:
- ارسم لي طوه كبيره زي البطبخو عليها في المناسبات وعيد الضحيه،وتحتا نار ملهلبه، وجوه الطوه الكبيره دي الشعب السوداني كلو واقف صفوف عرضية منتظمة.
سريعا من أصابع بدر الدين الدربة علي الجمال وفتنة الخلق تستقيم الخطوط في بياض الورقة، ونحنا نتابع بانفاس مكتومة لنر الطوة العظمي داخلها الشعب السوداني بكل سحناته المتعددة يتلظي بتلك النار الحارقة.
- أرسم لي الترابي واقف قدام الناس دي كلها زي إمام الصلاه بس ملتفت للشعب السوداني.
بمهاهرة إحترافية ياخذ الأمر أقل من دقيقة لنتبين ملامح عراب المشروع الحضاري الاسلاموي ورأس الحية في حلة الواعظ الثعلبي الملامح مبتسما يهم أن يقول شئيا
- يا الله التعليق ح يكون طالع من خشم الترابي يقول: استوووووا يرحمكم الله!
يتزلزل جسم بدر الدين بالضحك بينما يتلوي نور الدين عبد الباقي ويسقط علي الأرض ويغالب إدريس دموعه الضاحكة، ويقهقه عم علي بضحكته ذات الشهيقات المتقطعة، أمد يدي ببطء كي آخذ تلك اللوحة البديعة من بين أصابع بدر الدين ، ينتبه سريعا ويمزقها إلي قطع صغيرة ويعلق قائلا:
- كدا..كدا يا الترلا..العب غيرا عايز تودينى التونج ولا شنو.
وقُبر ذاك الكاركتير المعبر عن حال الشعب السوداني في سلة مهملات عم علي، وهو يحكي عن حال صحافة عصابة الانقاذ الدموية وقوانينها القمعية في سنواتها الاولي، تُري هل تحركت عجلة الدوران إلي الخلف وإلي أسفل سافلين بالشعب السوداني من مربع الانقاذ الاسلاموي القمعي للحريات الاول كثيراً؟
عم علي بحسه الفكه والطريف، ومخيلته الساخرة كان أحد منابع الالهام لفنان الكاركتير الراحل بدرالدين مصطفي صالح في فترة الديمقراطية الثالثة،1985-1989 حيث كانت الصحافة حرة، وليس هناك رقيب قبلي أو بعدي، كانت مخيلة عم علي بقدراتها الساخرة تنال أغلب الزعماء السياسيين خاصة الترابي والصادق المهدي، وكان بدرالدين يترجمها علي الملأ بلا خوف أو وجل، وتنشر يوميا علي صفات الصحف اليومية علي إمتداد السودان بلا رقيب أو ترهيب.
عم علي السوداني البسيط المهموم ببلده علي مدار الثانية ،لم ينضم يوما كعضو عامل في الحزب الشوعي السوداني، لكن لا أحد يصدق أنه ليس من المؤسسيين له، بحفظه لأدق تفاصيل تاريخ الحزب منذ التأسيس وكل منعرجاته ، ودفاعه المستميت عنه، والتبشير بأفكاره في كل لحظة، لا يجتهد كثيرا ويقول هذا شرف لم يطاله بعد ا لكنه لا ينفيه، ويقول أنه ماركسي علي سيرة ماركس الأولي، وذلك كان جدل دائم بينه وبين صديقه اللدود، أحد كوادر الجبهة القومية الاسلاموية وعباءتها الواسعة التي ضمت من ظنوا أنهم حراس حقيقيون للقيم الاسلامية المتوارثة في السودان، وهو المرحوم علي الترس تاجر الادوات المنزلية،الذي يقع دكانه علي مقربة من ستديو عم علي للتصوير الفوتوغرافي بسوق الحصاحيصا، ودائما يطيب لعلي الترس الجلوس والاستماع والاستمتاع بحكايات عم علي التي لا تنتهي، ودائما ما ياتي بجبنة الدويم البيضاء عند مواعيد وجبة الافطار وفول محي الدين الشهير، ويناكف عم علي كثيرا لمزيد من المسامرة وجلب الضحكات ، وذات إفطار محضور بعدد من أصدقاء عم علي، تعالي صوت علي الترس كأنه يخاطب نفسه بصوت مسموع:
- هسع الاكل مع الشيوعيين دا حلال ولا حرام، حرام ولا حلال، ولا هو أكلهم زاتو من أصلو حلال ول احرام؟
- يا علي الترس، أمسك واحد عندك ، نحنا ما قاعدين ننهب ولا بنخزن قوت الشعب، ولا بنط علي الحيط بالليل، ولا بنقطع ايدين الناس البتسرق عشان تاكل، ولا بنقطع أرزاق الناس عشان بس اختلفوا معانا في الرأي،وما عندنا مرابحات من البنوك الطفيلية الاسلامية، ولا عصابات منظمة بتمص في دم الشعب السوداني وتهدر في كرامتو، انت شايفني قدامك كل يوم بشتغل من الساعة تمانية صباحا لحد تمانيه مساء، ولا اقول يا اخي كان كايس فتوى حرام وحلال، أُكل اكلك ساكت مطمئن، والله كان فتشت الدنيا كلها ما تلقي أكل حلال اكتر من أكل الشيوعيين دا.
يضحك علي الترس ويستمري المناكفه:
- لكن الشوعيين ديل كفار، وحطب النار، هسع يا عم علي الله! وعليك الله، ولا انت حليفة الله ما بتسير معاك، طيب عليك ولدك عبد الخالق! شيوعيتكم وكفركم دا مجاني ساكت كدا! ما فيهو حبة قروش، كدا شقاوه لله في الله؟
_ يا اخينا في الدنيا! هو شيوعيتنا دي كان فيها قروش كونتو انت وجماعك الطيبين ديل خليتوها لينا بالساهل كدا، يمين كان فيها قروش كان انتو بقيتو عديل كدا الكفار والشيوعيين ونحنا بقينا الاخوان المسلمين.
ويرحل عم علي إلي ضفته البعيدة وتبقي سيرة كحكاء عظيم، ومناهض لكافة أشكال القمع وداعيا للحرية والديمقراطية وإحترام الآخر، ويبقي تعدد أسماءه الكثيرة التي تدل عليه , منها
أبو حميد، علي الفك، زوربا السوداني.
|
|
 
|
|
|
|
|
| العنوان |
الكاتب |
Date |
| عفيف إسماعيل : وداعا زوربا السوداني. | عاطف مكاوى | 08-04-11, 06:06 AM |
| Re: عفيف إسماعيل : وداعا زوربا السوداني. | عاطف مكاوى | 08-04-11, 06:21 AM |
| Re: عفيف إسماعيل : وداعا زوربا السوداني. | عاطف مكاوى | 08-04-11, 02:17 PM |
| Re: عفيف إسماعيل : وداعا زوربا السوداني. | عاطف مكاوى | 08-04-11, 07:40 PM |
 كوابيس : عفيف اسماعيل | ضياء الدين ميرغني | 08-04-11, 08:26 PM |
| Re: كوابيس : عفيف اسماعيل | عاطف مكاوى | 08-04-11, 08:44 PM |
| Re: كوابيس : عفيف اسماعيل | ضياء الدين ميرغني | 08-04-11, 09:08 PM |
| Re: كوابيس : عفيف اسماعيل | عاطف مكاوى | 08-05-11, 03:49 AM |
| Re: كوابيس : عفيف اسماعيل | عاطف مكاوى | 08-05-11, 05:21 PM |
| Re: كوابيس : عفيف اسماعيل | عاطف مكاوى | 08-05-11, 07:16 PM |
 Re: كوابيس : عفيف اسماعيل | ضياء الدين ميرغني | 08-05-11, 10:25 PM |
| Re: كوابيس : عفيف اسماعيل | عاطف مكاوى | 08-06-11, 02:17 PM |
| Re: كوابيس : عفيف اسماعيل | Sabri Elshareef | 08-08-11, 11:44 PM |
| Re: عفيف إسماعيل : وداعا زوربا السوداني. | عاطف مكاوى | 08-07-11, 01:04 AM |
| Re: عفيف إسماعيل : وداعا زوربا السوداني. | عاطف مكاوى | 08-08-11, 09:07 PM |
| Re: عفيف إسماعيل : وداعا زوربا السوداني. | Sabri Elshareef | 08-09-11, 08:59 PM |
| Re: عفيف إسماعيل : وداعا زوربا السوداني. | عاطف مكاوى | 08-10-11, 00:23 AM |
| Re: عفيف إسماعيل : وداعا زوربا السوداني. | Sabri Elshareef | 08-10-11, 04:04 PM |
| Re: عفيف إسماعيل : وداعا زوربا السوداني. | عاطف مكاوى | 08-10-11, 04:26 PM |
| Re: عفيف إسماعيل : وداعا زوربا السوداني. | محمد عوض السيد | 08-10-11, 04:37 PM |
| Re: عفيف إسماعيل : وداعا زوربا السوداني. | عاطف مكاوى | 08-10-11, 05:26 PM |
| Re: عفيف إسماعيل : وداعا زوربا السوداني. | حبيب نورة | 08-10-11, 06:22 PM |
| Re: عفيف إسماعيل : وداعا زوربا السوداني. | عاطف مكاوى | 08-10-11, 09:13 PM |
| Re: عفيف إسماعيل : وداعا زوربا السوداني. | عاطف مكاوى | 08-11-11, 02:52 AM |
| Re: عفيف إسماعيل : وداعا زوربا السوداني. | عاطف مكاوى | 08-11-11, 02:12 PM |
| Re: عفيف إسماعيل : وداعا زوربا السوداني. | محمد عوض السيد | 08-11-11, 08:49 PM |
| Re: عفيف إسماعيل : وداعا زوربا السوداني. | عاطف مكاوى | 08-11-11, 11:01 PM |
| Re: عفيف إسماعيل : وداعا زوربا السوداني. | عاطف مكاوى | 08-12-11, 04:53 PM |
| Re: عفيف إسماعيل : وداعا زوربا السوداني. | فتحي البحيري | 08-20-11, 09:00 PM |
| Re: عفيف إسماعيل : وداعا زوربا السوداني. | عاطف مكاوى | 08-20-11, 09:47 PM |
|
| |
عاطف مكاوى
فيس بوك
تويتر
انستقرام
يوتيوب
بنتيريست