نـــــودار وحكـــــايـــــات من هنا وهناك وبهناك :)))

يا ترى كان نيتهم شنو بالضبط




كنت طالعه الصباح ماشيه الشغل كالعاده
كان يوم من ايام رمضان المبارك
وفى الشارع الفاصل بين المهندسين وامبده
وفى حته معينه كانت مزدحمه باتوبيس وهايس وعربات اخرى
شوفت رجلين بيشوحوا لى شووووووووووويح غريب ( تشويح يعنى تأشير )
فى الوهله الاولى عاينت ساى وقولت ما قاصدينى اكيد
لكن وانا بتمعن لقيت ان الاشارات متمركزه لى انا بالذات
استغربت هم مصررين يشاوروا لى انا تحديدا من وسط كل العربات القاطعه ليه
ومن المرايا الخلفيه كانوا ليسه بيشوحوا برغم مشيت مسافه بعيدة
ومنها قولت يكونوا ناس بعرفهم وما قادره اتذكرهم
قومت كنتكت ووقفت على الجنب
قاموا جو جاريين المسافه طوووووووووووووويله ديك
قولت اكيد الناس دى بتعرفنى ما ممكن يجكوا من الصباح وصايمين كده ساى المسافه دى
ولمن وصلونى فتحت الشباك وعاينت ليهم لقيت انى ما بعرفهم
واحد فيهم قال لى شبهنا عليكى اسفين
التانى نط قال لى خدينا معاكى لقدام
قولت له قدام وين
قال لى مقابر حمد النيل
قلبى فى الحته دى بدا ياكلنى
قولت له انا ما واصله لهناك للاسف
قال لى خدينا معاكى لحته الواصل ليها
هنا بقى قلبى عديل كده بدا يرجف لصراحه
لكن قولت الرجفى شى وانى ادخل نفسى فى مصيبه شى وقررت اتماسك فى ثوانى
ولاول مره فى حياتى اتخذ خطوه جريئه وارفض بكل عزيمه
انا اسفه ما بقدر
لانى داخله الشارع الجاى بالحله ما ماشيه اصلا حته بقدام بتفيدكم
قام التانى قال لى بعد الجكه دى كلها ما حتاخدينا
قولت له ما حينفع اسفه
ومنها دورت العربيه ومشيت وهم ليسه بيبرطموا
حسى مش كان افضل ليهم يملحوا مع رجال زيهم
والعربات كانت فيها رجال المعديه معاى
اشمعنى انا الاصروا يوقفونى
وياترى فعلا كان نيتهم حسنه فى طلب التوصيله ولا الموضوع كان له دروب اخرى
؟؟؟؟؟؟؟؟؟؟؟؟؟

(عدل بواسطة رانيه محمد الشيخ on 01-16-2012, 11:00 AM)
(عدل بواسطة رانيه محمد الشيخ on 01-16-2012, 05:41 PM)