فدياس..حبابك يا صديقي كتر خيرك على المرور.. فعلا (قطار الشوق ) دي اول مرة سمعتها عند حسين شندي..و معاها (يا ساير..يا ماشي..النظرة ماشة وراك) و الأخيرة اعتقد سيدها (عبيد الطيب بتاع ..سلام روحي..يوصل اليك).. غنية شقى الأيام.. عندي مسجلة بصوت مصطفى..و كان بيستخدم فيها ايقاع ريقي..و حمد الريح شالها فيما بعد.. يتخيل لي واحدة من سبب جهل الأجيال الجديدة..انتشار الكاسيت..و الحفلات..و انفصلت الأجيال.. لأنو بعض الشباب بيكون سمع الغنية عند فنان جديد..و بيفتكرها بتاعة الفنان الجديد.. في بعض الفنان سجلوا في الإذاعة اغنيات كتيرة للغاية..و قضوا عمر طويل في الساحة الفنية السودانية..و احتمال الواحد فيهم ما يكون عمل حفلات عامة.. أو يكون عمل لكن بصورة نادرة..
كبر
12-10-2011, 11:02 AM
Kabar
Kabar
تاريخ التسجيل: 11-26-2002
مجموع المشاركات: 18537
بلدي يا حبوب..حبابك كتر خيرك على المرور.. نعم يا قريبي..و ناس كتيرة ممكن تغني (بلدي يا حبوب..اب جلابية و توب)..و ممكن تكون ما عندها فكرة عن سيد احمد الحردلو.. الأجيال الجديدة..مستمعة بتساهيل الحياة..يعني قاموا و لقوا الأشرطة..و الفيديو كليب..و فرص سماع متنوعة..ياخي نحن زمنا (خصوصا في السبعينات و الثمانينات) كان في احتكار سوداني جميل..يعني الست و محمد عبد الوهاب..و عبد الحليم حافظ.. ديل الإ كن تسمع بيهم في المجلات..و الإذاعة كانت بتجيب ليهم اعمال في فترات متباعدة.. اها القصة دي حفظت لينا الغنا حقنا و خلتو يصل الفرقان و الحلال.. اها حالنا يا قريبي..الجوابات كانت بتدا بي صيغة واحدة محفوظة..لكنها كانت اختراع سوداني.. زمان كانت في هواية بين الشباب من الجنسين..كل زول/ة يعمل ليه كراس اغاني..و يكتب فيهو الأغاني بصورة انيقة.. البعض طور الحكاية و جاب فكرة (زهرة الأغاني) و غيرها من الكراسات المطبوعة التي كانت تباع في المكتبات..و اتحفظت الحاجات بعض الشي..
كبر
12-10-2011, 11:05 AM
Kabar
Kabar
تاريخ التسجيل: 11-26-2002
مجموع المشاركات: 18537
عمر الفاروق..حبابك يا صديقي كتر خيرك على المثابرة.. ابدا ما في خلاف يا عمر..و و محمود عبد العزيز ما كان عندو ادعاء ان الأغاني التي يؤديها هي ملك له..و فعلا واحدة من افكاره النابهة انتباهه لأغنيات الفن الشعبي (كما يقولون) و نفض الغبار عنها و تقديمها للناس بصورة لطيفة و بهية..! المشكلة الوحيدة.. هي مشكلة شركات التسجيل..و هي التي كانت تاخذ الأغنية و تذهب الى الشاعر مباشرة..و تتفاهم معاهو..ثم تقوم تقول لمحمود غنيها..و في الشريط يكتب اسم الملحن و اسم الشاعر..و يختفى اسم الزول الذي قدمها للناس في البدء..و القصة دي بدت مع ناس شركة البدوي..و غيرها من الشركات..ولا تنطبق على محمود فقط..ناس كتيرة مثل عبد الكريم ابو طالب..فكلهم انتشرت اشرطتهم و هم يغنون اغاني التانيين..و الشباب بيفتكر انو الفنان ديل اصحاب الغنا المقدم..
كبر
12-10-2011, 11:11 AM
Kabar
Kabar
تاريخ التسجيل: 11-26-2002
مجموع المشاركات: 18537
ايمن..حبابك كتر خيرك على المرور.. فعلا الرمية بيكون غناها محمد سلام (بالرغم من تأكيد صديقنا اسماعيل كردلي لحكاية الرشيد كسلا)....و هو زول نادر للغاية.. من الطرائف يا ايمن..معاي واحد صاحبي هنا في كالقري..و كنا بنتونس..و قام التلفزيون السوداني جاب محمد سلام بيغني..اها صاحبي قال لي ما عارف التلفزيون ده بجيب الفنانين ديل منو وين (طبعا الراجل دفعتنا و عارف كتير في الفن السوداني).. اها قمت قلت ليهو ادي وشك على الحيطة بسرعة قبال الأغنية تنتهي..اها قريبي قبل على الحيطة و رخى اضانو..و لدهشتي قال لي: ياخي الزول صوتو الخالق الناطق لصوت الزول الكان بيغني (قام اتعزز الليمون..عشان بالغنا في ريدو)..!! قلت ليهو ياهو ذاتو..! المفارقة.. انو الناس ديل معظمهم سمعناهم في الإذاعة..و لمن تشوف الشكل.. معظم الناس بتكون بتركز في الشكل و بتتجاهل حكاية الصوت دي.. و نشوفك طوالي يا ايمن..البريكات دي مرات بتجيب الوش التاني (احدى الصديقات رسلت لي رسالة في الهوت ميل و مستغربة..و قالت لي و الله الزمن ده كلو قايلاك بتاع شكل و غلاط..و غرابة..و عييك و عاك..!!).. كبر
12-10-2011, 11:17 AM
Kabar
Kabar
تاريخ التسجيل: 11-26-2002
مجموع المشاركات: 18537
حمد..حبابك يا صديقي ياخي كده خوفتني عديل..يعني قالوا قطعة سكر دي كانت من عندك؟.. اوعى تكون انتا حمد البابلي؟.. غايتو لو كنت البابلي او شبه اسامي ساكت.. اثبت موقفي من غنية يا حمام..و قلتو سنة 1987.. انها غنية عادية..و فيها شوية اناقة.. و اليوم اقول كما قالت الزولة (عجبني للمرقوت)..لأنو في بالي نقة ناس الصحافة و سخريتهم..في واحد كتب,.(يا جداد كر كر..و يا حمار عر عر).. اها الزول ده اتمنى يكون شجاع و يجي يفتي لينا في ناس (راجل المرا ) و (حركتك ########ة..عمليتك ما ظريفة)..و (اضربني بمسدسك)..و (كلام يا عوض دكام)..!!! و نشوفك طوالي يا حمد.. كبر
12-10-2011, 11:26 AM
Kabar
Kabar
تاريخ التسجيل: 11-26-2002
مجموع المشاركات: 18537
صديقي الصاوي..حبابك كتر خيرك على المرور من هنا..و لينا طولة ياخي.. لقيت تسجيلات نادرة لمحمد حسنين (متذكر تسجيل نادر لجيلاني الواثق غنا فيهو يا سهارى)..و حايم في النت..بس الصفحة بقت تقيلة شوية وح انزلها لو لقيت فرقة.. الطيب عبد الله من الناس الشكلت وجداننا..وو اكتر فنان سوداني نسجت حولو اساطير كتيرة خلاص..لأنو بتاع غنا حزايني.. من المفارقات.. كنت سكرتير ثقافي لجمعية القانون.. اها قمت حظيت بترتيب جلسة استماع مع الفنان هاشم ميرغني (و هو برضك عندو غنا حزايني خلاص)..و الجلسة كانت في قاعة الشارقة..طبعا الجكسي (خصوصا ناس الأقاليم) كلو بصمة خشمو زحم ليك القاعة..و العالم دايرة تشوف هاشم ميرغني للدنيا و الزمان..اطرف تعليق من صديقة (من ناس سنار..و بتسمع هاشم ميرغني كتير)..و قالت لي: ياخي الراجل ده يعذب فينا و نسهر الليالي الطوالي..و كمان عندو نفس يتبسم..(طبعا شافت هاشم مبسوط و بيتبسم)..!! دي واقعة بتأكد أنو الإذاعة كانت بتقدم الصوت..و الناس بتخلق تصور معين..للفنان..و بتستغرب لمن يكون شكلو مختلف عن التصور ده..! محمد مسكين متذكر ليهو (ربي ما تحرم بيت من الأطفال)..و اعتبرها اغنية خالدة لأنها تناولت ثيمة اجتماعية ما سمعت فنان في الدنيا غنا ليها..! كتر خيرك و نشوفك طوالي.. كبر
12-10-2011, 11:35 AM
Kabar
Kabar
تاريخ التسجيل: 11-26-2002
مجموع المشاركات: 18537
صديقي الصادق..حبابك كتر خيرك على المرور.. ابراهيم خوجلي من المحطات الجميلة و النادرة ايضا..و تعجبني في تجربته انو الزول التاني (بعد خضر بشير) كان بيستخدم المندلين.. لإبراهيم خوجلي.. تسجيلات عديدة (كتر خير الفكي يوتوب على حسب اجتراحات صديقنا الجميل محسن طه)..و لكن اهديك و الجميع هنا هذه المادة.. و الأغنية هي افكاري تايهة..لكن المفارقة أن الفنانة التي تؤديها هي ابنة الأستاذ ابراهيم خوجلي ..
النور الجيلاني عندو (كدراوية)..و ح اشوفها و انزلا.. و نشوفك طوالي يا الصادق,,
كبر
12-10-2011, 11:42 AM
Kabar
Kabar
تاريخ التسجيل: 11-26-2002
مجموع المشاركات: 18537
صديقي نيازي..حبابك كتر خيرك على المرور من هنا.. فعلا حاجات كتيرة سمحة..و ما بنحس بسماحتها الإ لمن تمضى عليها سنين..! اخوانا المؤتمرجية (ناس مؤتمر الطلاب المستقلين) عندهم نظرية لذيذة خلاص.. بتقول انو ما صدفة غريبة كل اولاد و بنات السودان يبدو الجوابات بعبارة واحدة و هي ( اذا دار محور سؤالكم عنا في هذه المدة الطويلة لم نفقد شي سوي عدم مشاهدتكم الغالية)..و برضك عندهم ملاحظة عن فكرة ليه كل فنان سوداني بيبدأ بترديد اغاني الحقيبة..! طبعا الكلام ده في الثمانينات و بداية التسعينات..و يمكن يكون منطبق حتى اليوم..لكن زاد عليهو انو الناس بقت تنفض الغبار عن اغاني السبعينات و بداية الثمانينات..اما الجديد من الغنا.. اخير ياخي ردد غنا زمان و نقرض على كده..! ابوعبيدة حسن من الناس السمعت ليهم كتير..و رجع عمل تسجيلات تاني في التلفزيون..و ح انزل بعض منها.. و نشوفك يا نيازي.. كبر
12-10-2011, 11:56 AM
Kabar
Kabar
تاريخ التسجيل: 11-26-2002
مجموع المشاركات: 18537
صديقتي امينة..حبابك كتر خيرك على هذه الوقفة الصامدة (ياخي جكس البورد كلو اتغبى فينا العرفة..just kidding..غايتو عالم خوتها اسكتي ساكت خليها ).. المهم.. نهديك حاجة نادرة..و هي لأستاذنا محمد ميرغني (غايتو خمس و عشرين سنة ما شفتا الزول ده بيغني بالعود)..!
اها الغنية دي ناس اليومين ديل اتلحوها تلحة السنين..لكنها بصوت ميرغني عندها وقع خاص للغاية.. سمعت لميرغني اشتقت ليك تسجيل جديد (ما انبعلت لي)..و سمعت ليهو (عشان خاطرنا..)بصوت اخونا مجاهد (قاعد اسمعها في اليوم تلاتة مرات.. لأنو مجاهد زول مو ساهل تب).. اتمنى ان تعجبك الهدية.. و نشوفك طوالي..يا امينة ياخي.. كبر
12-10-2011, 12:06 PM
Kabar
Kabar
تاريخ التسجيل: 11-26-2002
مجموع المشاركات: 18537
يا جماعة الفنان أحمد فرح دا زول جميل و صوتو جميل بس أنا و الله ما عارف ليهو حاجة غير دي و زمااان سمعتها في الاذاعه بس ما كنت عارف الزول دا اسمو منو و مرة فى المنبر دا رفعه و احد من الأخوان و جاتنا هدية من حبيبنا صابر عبد الهادي :-
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة