والعُـــمرُ

Quote: باكر هبوبك تستجيب تنهض تعافر في الدروب وتمرق علي مهل الحروف تمرق عشم يمرق وطن إنسان وسوداناً جديد نمرق سوا في ها الدروب (-) نمرق وفي ايدنا السلاح الجرتق الكوتشينة أشجار التبلدي الفيتريتة المنقة والهبباي نسيم القنقليز الواطة لالوب الولاد بركاوي في وطن البراح شمس المغيب يتكل قصادك بي تعب وهو بيندهك يا يابا يا (سمح الحروف أوعا السماسرة يضللوك قد ضيعوك علي عجل شرعوا لك الدين مرتجل) وانت بتعافر في السنين وسنين طوال يا (محمدأحمد) استرح صفا انتباه صفا انتباه صفا استرح أو إنتباه أو إسترح كل الأوامر زي بعض صفا انتباه صفا استرح يا دي البلاد الإنتباه يا محمد أحمد إنتبه ما يضيعوك صفا إنتباه صفا استرح آن الأوان لتحترس آن الأوان لتقول لا في وجه من خانوا الوطن آن الأوان لتنتبه ما بين (جهادهم) والنفاق وما بين يقينك بالوطن و بين نضالك أو ثباتك خطوتين خطوة بتهز الزمن وخطوة بتعدل مشيك ويا ها الخطاوي المن زمان نفس الخطاوي الـ سرتها يا (محمدأحمد) إنتبه ! تمشيبو درباً ياما سر وأنا بالي في أيام زمان نفس العساكر نفسهم نفس المشير نفس البطانة الأرزقية االعصبجية نفس الجرايد والمسيرات الكضب نفس أي شئ وليل الطواغيت مهما طال لا بد من صبحاً يجي هي حكمة الأرض الحلال جدلية الموت والحياة وما بين بنادقك والعصي ها هم شعوب الأرض جوك وأنا بالي في أيام زمان و(الدخري) يحلم بي وطن حق الولاد المدرسة ؟ حق الفطور يالدخري آه راح الدرب (الدخري) يحلم بي رغيف الجوع ومسغبة العلاج أي والله مستشفي وعلاج الدوخري كان عشمو الدواء شرقت شمس غابت نجوم مرقت شمس كمين بلاد وشمش الله شرقت في البطون الجوع مصلاية ووطن الجوع مصلاية الغلابة الكادحين شعباً اذا قال قد كفي يمشيهو درباً لو جحيم يمرقبو في وطن البراح وطناً مسالم ومكتمل وطناً معلم وعندوا رأي مافيهو عسكر مستبد لا عندو آمر لا أمير (--) وطناً نقالدبو السما وطناً نحاحيبو الطيور وأنا بالي ما زال منتعش وأنا بالي في حق الفطور حق العلاج أيوه الدواء وأنا بالي ماذال متقد أنا بالي في الثورة السلاح (---) ولما البيوت تمرق تمرق علي مهلك مهلك تسوق دربك دربك تجيه دوغري دوغري الشوارع جات جات الشوارع من طرف (أمبــدة ) تنده جارتا والجارة تنده تانيتا الأولي جات والتانية جات الرابعة والخامسة الأربعين الحارة ودنوباوي والأنصاري جاك سيدي الأزهري الختميه والناس التمام جوك الرفاقا الطيبيين والثورة جات والشهداء يا موت يا حياة

(عدل بواسطة حسبو عكاشة on 04-09-2011, 02:09 PM)