|
|
 Re: إبراهيم بقال ... دجال يتمسخر على وزير بقاري!!! (Re: Mohammed Haroun)
|
اك بقال والله يا وليد بقيتى لى زى زمبلك بتاع ساعة رومر
هاى يا وليد إنتى مالك كدى أبتبزغ بزاغك وتقبل تلحسا كلو
وليدى حسابك لفكرك رتبى وللتناقد الفى راسك دا كدى شيلى
هاى يا وليد شغلك التسوى دا شين والله فضيحة كدى مسكانى
أمس القريب دا ولا فوتى معاه لرهيد البردى وكمان للحصان ركبتى
والله يا خوى بقيتى لى زى ( دلدوم ) وسودانيزاونلاين دى مثل الكربون
بتاع دبلكيت بتاع المحاسبة داك والله بحفظا وبسحبا لكتابة دا جنس سحبان!!
لكن عهدالله ودين الله وميساقه كلام القلنى دا كان منك شين وكان موصيك بيهو
الوالى الجماعة ديل كلهم عارفين إنوعندو حساسية مع على محمود لكن كل شئ
(بثمنه) اليس كذلك !!
** حوار صحفي مع الاستاذ علي محمود محمد والي جنوب دارفور
ابراهيم بقال سراج + علي محمود محمد والي جنوب دارفور
مدينة نيالا حاضرة ولاية جنوب دارفور تقع في غربا السودان وتعتبر ملتقى للطرق التي تمر من شرق السودان إلى غربه ومن جنوب دار فور إلى شمالها وتنتهي عندها سكك حديد السودان غربا وهي مدينة تجارية.ويشكل النسيج الاجتماعي من كل القبائل الدار فوريه زرتها في الاسبوع الماضي بدعوة كريمة من الاخ الاستاذ علي محمود محمد والي جنوب دارفور ورافقت السيد الوالي لعدد من محليات الولاية من ضمنها رهيد البردي لوحة مسقط راس الوالي واجريت معه الحوار التالي .
**اجري الحوار / ابراهيم بقال سراج
[email protected]
في حديث ل ( العاصمة ) من غير تحفظ الاستاذ علي محمود يضع النقاط فوق الحروف
الوضع امن ومستقر بجميع محليات الولاية والدولة
قادرة علي حسم اي انفلات
القبائل العربية لم تتمرد ومن يطالبون بمنصبي
لا يملكون برامج ولا تفاوض مع احد الا عبر منبر الدوحة
لن افاوض اي قاطع طريق لمجرد انه تربص في غابة
ونهب عربة او عربتين والجيش سيحسم اللصوص بالقوة
*السيد الوالي نبدء سؤالنا الاول بالاوضاع الامنية بالولاية هل الولاية مستقرة امنياً ؟؟
نطمئنك ونطئن الراي العام والمواطنين بأن الوضع امن جداً ومستقر بولاية جنوب دارفور بجميع محلياتها عدا القليل منها فقط يوجد فيها بعض جيوب التمرد والخارجين عن القانون والذين يقومون بالسرقات ونهب ممتلكات المواطنين ولكن الدولة قادرة لحسم هؤلاء وحسم اي انفلات امني في ولاية جنوب دارفور . والمحليات كلها امنة والطرق مفتوحة من نيالا الي كاس , نيالا الملم , نيالا الضعين , نيالا تلس , نيالا عد الفرسان , الضعين عديلة , من عسلاية وحتي الضعين ولغاية ام مطارق ورهيد البردي وام دافوق , كل هذه المحليات امنة تماماً ومستقرة ولا يوجد ما يعكر صفو المواطنين , معظم الاشكاليات التي تحدث في جنوب دارفور اما نهب مسلح اما قطاع طرق او مشاجرات فردية , الحمد لله قبل اسبوع واحد فقط قضينا علي مجموعتين من مجموعات النهب المسلح التي اعتادت علي سرقة عربات المواطنين بمحلية بحر العرب فتم القضاء عليهم وتم الاستيلاء علي كل العربات المسروقة وتم اعادتها لاصحابها ونحن الان نتعقب الاخرين للقبض والقضاء عليهم
*هل مدينة نيالا عاصمة الولاية امنة ؟؟
نعم كما ذكرت الولاية كلها امنة ومستقرة ولكن يحدث احياناً حوادث سرقات ونهب ممتلكات المواطنين وهذا شي طبيعي في ظل عدم استقرار الاوضاع الامنية في دارفور ونحن عندنا طوف بيمر يومياً داخل المدينة بعدد من القوات المشتركة والقوات النظامية تجوب جميع ارجاء المدينة بعد غروب الشمس الي طلوعه للمحافظة علي الامن والاستقرار صحيح هناك بعض الاختراقات من بعض المجرمين الذين يراقبون حركة الطوف ويعملون في اتجاه معاكس ولكن غالباً يتم حسمهم والقبض عليهم , هناك اكثر من 37 عربة تجوب ارجاء المدينة فضلاً عن الارتكازات وعربات النجدة والعمليات والقوات الامنية عندنا اثنين وعشرين عربة نجدة وعمليات وخمسة عشر عربة للطوف المشترك ودا كل لسلامة الموطن وحفظ الامن والاستقرار
*هل يوجد صراعات قبلية الان بجنوب دارفور ؟؟
الصراع القبلي بولاية جنوب دارفور توقف منذ ابريل الماضي ولم يحدث اي صراع قبلي بين مجموعتين قبليتين ونحن نفكر الان بالاعداد للاحتفال بالسلم والمصالحة بالولاية انشاء الله سيتم بعد مؤتمر الصلح بين الرزيقات والمسيرية الذي سينعقد يوم 5 اكتوبر بالخرطوم وبعدها ستكون ولاية جنوب دارفور خالية تماماً من اي صراعات قبلية بين القبائل معظم المصالحات القبيلة تمت داخل مدينة نيالا وبأشراف حكومة الولاية وعقدت مؤتمرات الصلح واقرينا فيها الديات وبناءاً عليها صارت الولاية الان امنة وخالية من اي صراع قبلي
*ولكن هناك مشاكل قبلية بين الصعداء والابالة ؟؟
مافي اي مشكلة بين الصعداء والابالة , المشكلة اصلاً في ظابط شرطة قادم من سوق من اسواق في منطقة البردا ونصبوا ليهو كمين من مجموعة خارجة عن القانون ايضاً ولم نتهم اي قبيلة حتي الان فقتلوا الظابط وقامت قوة مسلحة من القوات المسلحة لمكان الحادث وقبضت علي الجموعة التي نفذت الحادث , وهم الان رهن الاعتقال واعترفوا بجريمتهم النكراء وسنقدمهم لمحاكمة عادلة ليأخذوا جزءهم العادل والقانون يجري مجراءه فقط هذه هي المشكلة ولان المشكلة وقعت في بادية الابالة والصعداء الناس صوروه انه في صراع قبلي وهذا بالطبع ليس صحيحاً ولا توجد اي اشكاليات بين الصعداء والابالة ولا بين اي قبيلة واخري في جنوب دارفور .
*حادثة مقل الشرطي بمدينة نيالا يقال انه قتل عمداً من قبيل زملاءه دهساً بالسيارة هل هذا صحيح ؟؟
لا يمكن اصلاً ان يكون هذا صحيحاً وهذه الاشاعة بثت عبر الانترنت من شخص في الخليج وليس في نيالا فالواقع يختلف تماماً عما ورد في الانترنت ونحن كونا لجنة للتحقيق وهي تباشر عملها الان ولا نريد التعليق قبل التقرير النهائي للجنة وسنعلنها لكل الناس لمعرفة الحقيقة بعد انتهاء التحقيق ورفع التقرير النهائي حول هذه الحادثة والشخص الذي كتب في الانترنت من اين حصل علي المعلومة ؟ اذا كان الامر بيد لجنة الامن بالولاية والشرطة والنيابة ولسع الموضوع في مرحلة التحقيق ؟ الانترنت ينشر فيه المعلومات الخاطئة والمضللة لاثارة الناس وتأليبهم ضد الحكومة , الشرطي هو جندي عادي سقط من العربة والحادث نتج عن غير قصد وهذا الامر لا علاقة له باي مسألة سياسية كما صوره الكاتب الذي كتب من الخليج نسأل الله ان يتقبل الشرطي قبولاً حسناً . ونحن في انتظار نتائج التحقيق وان صح ما يقال سنقدمهم للقضاء مهما يكن موقعه سواي كان ضابط ام شرطي ام جندي
*هل يوجد مناطق تحت سيطرة الحركات المسلحة في جنوب دارفور ؟؟
الحركات المتمردة داخل الولاية تحتل مناطق لا وجود لها والحركات نفسها انقسمت علي نفسها واصبحت حركات صغيرة تمتلك عربة او عربتين وتمارس اللصوصية والنهب غير هذا لا يوجد حركات في جنوب دارفور والذي يحصل الان اما نهب اما مشاجرات فردية او اختلافات شخصية او احتكاكات بين الرعاة والمزارعين وهذه محدودة ونحن الان في سجلات الشرطة تكاد تخلو من اي صراعات قبلية او اي وجود فعلي للتمرد ولذلك المواطنون تمكنوا من زراعة ستة مليون فدان من المحصولات المختلفة علي رأسها الدخن والذرة والفول السوداني وغيرها من المحاصيل وهذا بفضل الامن والاستقرار حتي مكافحة الطير نحن الحمد لله تمكنا من توفير وتجهييز طائرات الرش والمبيدات وتم القضاء علي اسراب الطيور في معظم المحليات ونحن انشاء الله بنهاية هذا الموسم بأذن الله تعالي ما حنكون في حوجة لاي دعومات او مواد غذائية تأتي الينا من الخارج .
* هناك بوادرد تمرد من ابناء المنطقة وبالتحديد القبائل العربية ؟؟
لا لا لا قلها هكذا بعد ان هز راسه واشار بأصبعه ثم قال لا يوجد تمرد بل هناك مجموعات خارجة عن القانون في محليتي بحر العرب والضعين وهي مجموعات صغيرة وقطاع طرق وليس لديهم اي برنامج سياسي ولا اي اهداف او افكار او رؤي واضحة بل هم مجموعة من قطاع الطرق واللصوص ليس الا .
*سعادة الوالي ولكن لديهم مطالب من ضمنها مطالبتهم بمنصب الوالي نفسه ؟؟
دا كلام ساكت وكلام فارغ من ناس ما عندهم برنامج وعشان هم يعملوا غطاء للاجرام الذي يمارسونه طالبوا بمطالب سياسية من ضمنها منصب الوالي كما ذكرت وهم حرامية وقطاع طرق حاولوا ان ينسبوا انفسهم للتمرد لتحقيق مكاسب سياسية ليفرضوا انفسهم علي ارض الواقع بحثاً عن منبر للتفاوض معهم ونحن لا نفاوضهم بل نضربهم بيد من حديد عبر القوات المسلحة حفاظاً علي المجتمع وامن المواطنين وفرض سيادة الدولة والعايز يفاوضوه يمشي الدوحة هناك لان منبر التفاوض هناك وليس هنا في جنوب دارفور يعني ايه الواحد يقعد لينا هنا في غابة الفردوس وينهبوا ليهم عربتين من العربات الجاي من الابيض يقولوا عايزين تفاوض ؟؟ هل من اهداف الثورة سرقة ممتلكات المواطنين ؟؟ديل ناس مستهبلين ساكت وفوضجية وليس حركات تدافع عن حقوق مواطن دارفوري بل تسرق ممتلكات المواطنين .ونحن ما نفاوضهم ولا نجلس معهم والدولة تفرض سيادتها بالقضاء علي هؤلاء الخارجين عن القانون .
*وماذا في مجال العودة الطوعية هل يوجد عودة طوعية حقيقية للنازحين ؟؟
في مجال العودة الطوعية نحن نفتكر انه في الاونة الاخيرة هناك عمليات كبيرة للعودة الطوعية والان المعسكرات انخفضت الي الربع والبقية جميعهم عادوا الي قراهم ويمكن العدد الموجود في المعسكرات الان يساوي العدد الموجود سنة 2005م في معسكر كلما لوحده ولذلك حصل انحصار شديد وهذا بفضل الاستقرار الامني الواسع جداً الذي شهدته المنطقة ومعظم الناس رجعوا الي قراهم والي مزارعهم القديمة وبدءوا في الزراعة لممارسة حياتهم العادية بعض الناس صحيح انهم موجودين في المعسكرات الان ومشوا يزرعوا ودايرين يتأكدوا انوا الاوضاع امنة ثم يعودا لقراهم لممارسة حياتهم الطبيعية والعادية , الان الاتجاه العام النازحين خارجين من المعسكرات ومافي نازحين جدد قادمين .
*هل الحكومة وفرت لهم الامن ومعينات العودة ؟
نعم وفرنا خدمات في قري العودة الطوعية خاصة في مجال المياه والصحة وفي مجال التعليم وهذا ما شجع الناس للعودة لقراهم بعد توفر الامن ومياه شرب نقية وبعض المدارس والشفخانات ونقاط للشرطة واستيعاب لابناء النازحين في الشرطة ونحن جندنا اكثر من مائتين من ابناء النازحين في الشرطة المجتمعية التي تؤمن القري التي عاد اليها الناس وحقيقة هي التي شجعت الناس للعودة لان المواطن السوداني الدارفوري الموجود في المعسكرات لما يرجع القرية سيكون منتج انتاج كبير جداً وبالتالي لا يكون في حوجة للاغاثة لانه بيكون لديه فائض من الانتاج ويستطيع ان يوظف الفائض لاشياءه واغراضه الاخري ويكون حياته من جديد بدل يقعد في المعسكر ويستلم الاغاثة وتنتهي الاغاثة في اسبوع فالافضل انه يعود لقريته وينتج بنفسه ويزرع زراعته ويعيش حياته مع اسرته . بهذا الفهم عاد الكثير من النازحين لقراهم
*سمعنا انه في تنصير في المعسكرات هل هذا صحيح ؟؟
نعم صحيح في محاولات من بعض المنظمات المشبوهة ومعظم هذه المنظمات طردت من دارفور بعض هذه المنظمات حاولت استغلال الظروف البائسة السيئة للنازحين لتنفيذ عمليات التنصير وسط النازحين بالمعسكرات وذلك عبر توزيع الصليب والكتب الانجيلية ولكن اثرها محدود والنازحين لم يستجيبوا لها كمسلمين .
الحكومة دورها انها قامت بتوعية المواطنين والنازحين ووجهنا المنظمات لتنضبط بواجبها الانساني التي جاءت من اجلها ومافي منظمة جاءت ببرنامج ديني وهي جاءت لتقديم خدمات انسانية ولذلك اي منظمة تجاوزت حدودها في خدمات انسانية ودخلت في مسائل تبشيرية او عمل سياسي سيتم طردها , والمنظات التي طردت من قبل حاولوا ان يخلقوا بلبلة وسط المواطنين وهي منظمات مشبوهة واستخباراتية تعمل لصالح جهات نحن نعلمها جيداً واتخذت من العمل الانساني غطاء لعمل اخر سياسي فيها استهداف للدولة وسيادتها وكرامتها ولعقيدة الموطنيين والنازحين وتحويلهم من دين الي دين اخر وهذه مسألة غير مقبولة ومرفوضة تماماً وتلك المنظمات تجاوزت البرنامج التي اتت من اجلها لتفيذها في دارفور بعد ان اخذوا دعومات من دولهم او من جهات اخري ونشاط هدام مثل هذا يجب ان يوقف عن حده وقد كان . والحمد لله النازحين لم يستجيبوا لهم ولم يتركوا دينهم الاسلامي ومعروف دارفور بالقراءان واللوح والدواية والتقابة فلذا النازحين ما استجابوا للمنظمات التبشيرية .
*فترة العيد مرت عندكم كيف في نيالا ؟؟
الحمد لله فترة العيد مرت بسلام وما حصل ولا حادثة واحدة وسجلات الشرطة خالية تماماً من اي بلاغات جنائية كانت ام مشاجرات او سرقات او غيرها يعني ما زي زمان في الاعياد السابقة الكان بيحصل فيها مشاكل وكدا الان نحن بسلام وامان واستقرار تام والمحليات كلها نحن علي اتصال بيها وتنعم بأمن واستقرار تامين ولا يوجد ما يعكر صفو الناس والاوضاع هادئة تماماً والحرب في دارفور انتهت تماماً ومافي حرب الان في دارفور وهذا بشهادة قائد قوات اليونميد الجنرال ردوال ادادا والمظهر الموجود الان هي مظاهر بتاع قطاع طرق ولصوص وهذه المظاهر افرازات طبيعية في ظل الوضع الذي مر به دارفور وخصوصاً نحن مجاورين لدول فيها مشاكل ومافيها استقرار زي تشاد وافريقيا الوسطي وكذلك مجاورين لجنوب السودان ودي كلها افرازات طبيعية لانشار السلاح ولكن سوي ذلك مافي اي حاجة .
*حركة التجارة عندكم كيف في جنوب دارفور ؟؟
حركة التجارة مستقرة جداً ونحن في الشهر الواحد بتجينا اكثر من الفين شاحنة محملة بالبضائع من الخرطوم جزء منها تصل لغرب دارفور ولو البلد ما امنة ما ممكن تكون جنوب دارفور الولاية الثانية علي مستوي السودان من حيث التعداد السكاني , عدينا الولاية كلها بمحلياتها وفارقانها وبواديها وقراها واحدة تلو الاخري .
*في احاديث تقال ان بعض الناس جابوهم من برة ووطنوهم في جنوب دارفور ؟؟
ديل قاعدين وين بالضبط وفي اي حتة او في اي منطقة من المناطق ؟ نحن اصلاً كنا الولاية الثالثة في السودان بعد ولايتي الخرطوم والجزيرة من حيث التعداد في تعداد سنة 1993م وتحولنا الان في تعداد 2009م من الثالثة الي الثانية ودي حاجة طبيعية جداً في زيادة السكان يعني في فترة ال 15 سنة تم هذه الزيادة في عدد السكان ولاية جنوب دارفور زادت علي حساب ولايتي شمال وغرب دارفور وهذا بعوامل الجفاف التصحر الذي ضرب شمال وغرب دارفور في السبيعنيات والثمانينيات خلت الناس نزحوا يجو لجنوب دارفور لاسباب طبيعية لانه جنوب دارفور فيها بنيات تحتية واراضي زراعية خصبة فيها مياه وفيرة فيها حركة تجارية ضخمة فعشان كدا مدينة نيالا تضخمت وانت الان لو مريت من اقصي شمالها الي جنوبها وطوفت جميع ارجاء المدينة ستجد حركة غير عادية من الناس ومدينة نيالا دخلت فيها السكة حديد منذ وقت مبكر جداً وفيها بنوك والشركات والمسائل دي حقيقة ادت الي الطفرة الكبيرة في مدينة نيالا . زيادة السكان واضحة جداً في مدينة نيالا والسكان البيدعوا اننا جبناهم من برة الجابهم منو وعشان نعمل بيهم شنو ؟؟ يعني انا هسع امشي اجيب لي ناس من غرب افريقيا عشان اعمل بيهم شنو يعني ؟؟ هل الناس ديل علماء ؟ ام تجار ؟ ام اولياء شنو يعني ؟؟ مافي قيمة لزول يمشي يجيب ليهو ناس عشان يوطنهم نسوي بيهم شنو ؟؟ نحن ما محتاجين لناس نجيبهم من برة الفينا مكفينا . ديل سكان السودان وامشي شوف بنفسك وانت من دارفور وتعرف سحنات واشكال ناس دارفور ولو لقيت زول ما من دارفور تعال قول لي , انا مشيت زيارة لرهيد البردي وهي مسقط راسي وانت كنت معانا في الزيارة لاحظت انه انا ما بعرف عدد ضخم جداً من الناس وخاصة الشباب العمرهم من 25 سنة فما دون وديل تركتهم في الفترة الانا جيت سكنت فيها في نيالا والخرطوم لاني ما حضرتهم وما عاصرتهم ولا حتي قعدت معاهم وهسع هم بقوا رجال وعندهم اسر وديل هم زيادة في السكان , نحن كما ذكرت كنا الولاية الثالثة في السودان والان قفزنا وبقينا الولاية الثانية ودا تطور عادي وطبيعي جداً معليش لو كنا الولاية العاشرة ولا العشرين وطوالي بقينا في الثانية كان ممكن يكون شي غير طبيعي ولكن الزيادة في السكان في جنوب دارفور نتيجة طبيعية وما جبنا ولا زول واحد عشان نوطنوا في اراضي الاخرين ودي كلها مسائل سياسية ومتاجرة رخصية بالقضية واخوانا المعارضين هم الذين يثيرون مثل هذه الاشاعات التي تضر بالبلد .
*نطلع من المسائل دي وندخل في محور اخر وهي محور التنمية ؟؟ عملت شنو لجنوب دارفور بعد مجيئكم حاكماً اليها ؟؟
نحمد الله سبحانه وتعالي ان وفقنا لانجاز الكثير من الخدمات التنموية بولاية جنوب دارفور وليس في مدينة نيالا فحسب بل في جميع محليات الولاية , في نيالا لوحدها نحن بنينا عدد من المدارس الثانوية , مدرسة النهضة الثانوية بنات وبنين , مدرسة الجير الثانوية بنات وبنين , مدرسة الجبل الثانوية بنين وبنات وعدد مقدر من مدارس الاساس ورياض الاطفال وفي مجال الصحة شيدنا مستشفيات عديدة منها علي سبيل المثال لا الحصر مستشفي النهضة التعليمي , مستشفي الوحدة وعدد من المراكز الصحية وكذلك الطرق والمنشأت طريق بليل وطريق موقف الجنينة اعدنا تأهيها ولدينا اكبر خط ناقل للمياه بخط 89 كلم من حوض البقارة وكذلك اكبر مستودع للبترول في مدينة نيالا لتخزين الوقود بجميع انواعها بسعة مليون جالون للمستوع الواحد , وهناك اربع مستوعات للبنزين , الجاز , المياه , الغاز . والكهرباء شغالة بصورة مستمرة دون انقطاع وعملنا انارة لكل شوارع مدينة نيالا وسفلتة الطرق الداخلية ومياه الشرب متوفرة اما بقية المحليات ايضاً فيها عمل كبير في التنمية منها مستشفيات في كل من الملم , رهيد البردي , الضعين , ابو جابرة , شطايا وعدد من المدارس في كاس ودار السلام وبحر العرب , وقري نموزجية في مراي جنقي بها جميع الخدمات الصحية والتعليمية ونوادي المشاهدة ودور العبادة ومنازل للمواطنين العائدين لقراهم مجهزة بكامل الخدمات . وعندنا عمل كبير شغالين فيهو الان لربط مدينة نيالا عاصمة الولاية بالمحليات وانشأنا اكبر سد في ام دافوق بتكلفة اربع مليات جنيه ولو جيتنا المرة الجاي نوديك تشوف السد .
** السيد الوالي شكراً جزيلاً لك علي هذه الافادات القيمة وعلي امل ان نلتقي في لقاءات قادمة بأذن الله اذا امد الله في الاجال ؟
اشكرك انت ايضاً لمجهوداتك المقدرة تجاه اهلك في دارفور وتواصلت الدئم وتفقدك لبلدك من حين الي اخر ونتمني انك تزورنا في المرة القادمة وتمشي معانا لمحليات الولاية الاخري وتقف علي حقيقة الاوضاع بنفسك . وتجينا المرة الجاي والبلد في سلام وامن واستقرار . بارك الله فيك
تخريمة:
واحد قال لى شغل بقال دا شغل أمنى ومدفوع به؟!
قلت ليهو ككيف الكلام دا يا ولضمى قال ما شايف التنبؤات
الجابهاإنو يوم كدا شهر كدا حيشيلوا على محمود وحيجيبوا
بدلوا فلان؟! بلا جهد وبدون تفكير وببساطة هذا يعنى إماهو مستشار
الرئيس البشير مباشرة وليس فقط مستشارا لوالى شمال دارفور ويعلم كل شئ !!
أو كمان هو بتونس مع ( القوى الخفية) فى الصالات المغلقة وبسمع كل شئ ؟!
..
(عدل بواسطة ادم الهلباوى on 03-28-2011, 11:29 AM)
(عدل بواسطة ادم الهلباوى on 03-29-2011, 06:00 AM)
|
|
 
|
|
|
|
|
| العنوان |
الكاتب |
Date |
| إبراهيم بقال ... دجال يتمسخر على وزير بقاري!!! | Mohammed Haroun | 03-24-11, 01:16 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-24-11, 02:16 PM |
| Re: إبراهيم بقال ... دجال يتمسخر على وزير بقاري!!! | محمد ادم الحسن | 03-24-11, 04:15 PM |
| Re: إبراهيم بقال ... دجال يتمسخر على وزير بقاري!!! | الامين موسى البشاري | 03-24-11, 04:23 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-24-11, 04:20 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-24-11, 05:49 PM |
| Re: إبراهيم بقال ... دجال يتمسخر على وزير بقاري!!! | خالد عبد الله محمود | 03-24-11, 05:55 PM |
| Re: إبراهيم بقال ... دجال يتمسخر على وزير بقاري!!! | محمد ادم الحسن | 03-24-11, 06:22 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-24-11, 06:27 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-24-11, 06:40 PM |
| Re: إبراهيم بقال ... دجال يتمسخر على وزير بقاري!!! | ذواليد سليمان مصطفى | 03-24-11, 09:28 PM |
| Re: إبراهيم بقال ... دجال يتمسخر على وزير بقاري!!! | محمد المختار الزيادى | 03-24-11, 06:31 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-24-11, 07:05 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-24-11, 07:46 PM |
| Re: إبراهيم بقال ... دجال يتمسخر على وزير بقاري!!! | ذواليد سليمان مصطفى | 03-24-11, 10:33 PM |
| Re: إبراهيم بقال ... دجال يتمسخر على وزير بقاري!!! | سيف عبد العزيز | 03-25-11, 07:41 AM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-25-11, 11:36 AM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-25-11, 01:56 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-25-11, 07:07 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-28-11, 09:56 AM |
| Re: إبراهيم بقال ... دجال يتمسخر على وزير بقاري!!! | ادم الهلباوى | 03-28-11, 11:05 AM |
| Re: إبراهيم بقال ... دجال يتمسخر على وزير بقاري!!! | ادم الهلباوى | 03-28-11, 11:05 AM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-28-11, 01:10 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-28-11, 01:13 PM |
| Re: إبراهيم بقال ... دجال يتمسخر على وزير بقاري!!! | جعفر التيجاني علي دينار | 03-28-11, 04:12 PM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-28-11, 07:27 PM |
| Re: إبراهيم بقال ... دجال يتمسخر على وزير بقاري!!! | ادم الهلباوى | 03-29-11, 06:19 AM |
| Re: إبراهيم بقال ... دجال يتمسخر على وزير بقاري!!! | Mohammed Haroun | 03-29-11, 10:56 AM |
|
| |
ادم الهلباوى
فيس بوك
تويتر
انستقرام
يوتيوب
بنتيريست