|
Re: رسالة لم تصل من الشاعر عالم عباس إلى الراحل / المناضل خالد الحاج وهو يخطو نحو الفردوس !! (Re: عبدالغني كرم الله)
|
خطاب آخر.. (في ذات الموضوع)، وكان عنوان الخطابات (السلام عليكم)..
******
عزيزي، وأخي استاذ خالد الحاج..
صباحك طيب، ونادر (بطريقته)، كما يقول كاتبنا الكبير، خالق (الزين، وعرسه، ومصطفى سعيد ومعاناته)، سادي مش كدة، وفي النهاية قتله ام شرده الله اعلم (الله هنا الطيب صالح)، فختام المأسأة (النجدة النجدة).... وهو لو لم يرى شئ، كي يستنجد به، لما قال (النجدة النجدة)، هناك ملائكة، بلاشك، يمكن ان تراهم في حالات الخوف الشدييييييييييييييييييييد، وفي حالات العشق الشديد برضو، والله اعلم (الله هنا الذات العصية، على ال كل)،....
انت عارف، كانت عندي فكرة لكتابة نص (عن عودة مصطفى سعيد)، ففوجئت بأن الاخت المبدعة، تماضر شيخ الدين كتبت عن عودة (حسنة بت محمود)، فخليت الموضوع، وتخلصت من منظر مصطفى سعيد وهو واثف في قبر حسنه، وقربها قبر ود الريس، وهو يدعو لهما، لأننه تسبب بموتهما الاثنين.... وفي نفس اليوم كنت في حاور ماسنجري مع الاخ عبدالله ابراهيم، وقال انو حضر فليم عن (عودة فان جوخ)، لإكمال بعض لوحاته، فاستغربت ده شنو، تشابه خواطر، تناص، الدنيا دي مليانة استحالة، ومع هذا لا نرى سوى (جانب العادية)، فيها، حتى المايكروسكوب، يسخر من عيوننا... ومحدوديتها...
... طبعا اسمك، يضع على عتبة الذكرى، لتشابهه باستاذ خالد الحاج (الجمهوري )، الكثير، الكثير، أول مرة اشوف استاذ خالد الحاج كان في رفاعة، ودار حديث جميل في رمضان، في بيته المعمور، واذكر من ذلك الحديث كلامه عن الثورة المهدية، وعن شخصية المهدي بالذات (كقائد سياسي، وكقائد روحي)، وبأنو الكتابه عنه (كتجلي جمالي)، يحتاج لرجل من قوة الفكر (بحيث يغرق الدانة، ويطفح المسحانة)، على ما اذكر، وقرأت خطاب بخط الاستاذ محمود، مرسل له، وفيه، على ما اذكر ( نحن تكلمنا عن النبي في مقام النبؤة، ولو تكلمنا عنه في مقام الولاية ما في زول بصدقنا)، هكذا يقول النص، والمعنى....
وبرضو، عارف (السلام عليكم ردوا السلام)،دي اغنية لفرقة الوان الطيف، واخوك كان عضو في الفرقة، بقيادة الاستاذ عبدالحميد الشبلي وبمعية امين صديق، وقصي السماني، ولوي حامد، وكانت البروفات في مدرسة امتداد ناصر النموذية للبنات، ومنظر الشبيلي، وهو يقود البروفات، وخاصة اللحن : السلام عليكم، ردوا السلام،)، : ياريان، وهيام، وسحر، وطيبة، قولوا( السلام عليكم من جوه، من جوة شديد، عشان تتذوقي اللحن.. وكنا نمضي للدار، ونحن نغني، حتى مستوى الخواطر، السلام عليكم، ردوا السلام.. وطبعا اول مرة اشوف كيف بتخلق الالحان، من اصوات نائمة، داخل القلب، ويظل اللحن يتردد، بلا وعي، (ويتحرك الجسم راقصا، قصبا عنه)، فالقلب هو العود، والجسم الظل المسكين، المطيع، الراضي، المستسلم، (لو كانت النفوس، ....تعبت بمرادها الاجسام)......
والله اخي خالد سعيد، بكم، وبالمعرفة، وطبعا قطنا فيك (انا واخوي المعتصم)، قلت ليهو ياخي خالد دي منو، كدي وصفوا، (والاوصفوك)، بتاعت خضر بشير، تراءت في العين.. كان ده في عرس اخو معتصم،.... شفت كيف، وحدة الوجود دي، تلقى عينك يومها (رفت)، وانت ما عارف السبب.. الانسان لا ينسى، هناك من يذكرنا هنا، او هناك، او في الملأ الأعلى، زي (الليل)، هو موجود الآن في دولة، وبعد ساعة في دولة تانية، وأصلو ما بغيب عن الوجود، وكذلك الشروق، (شكل الكورة ده عجيب)..
اخي خالد، فرحي، وشوقي، ومحبتي، والسلام عليكم..
اخوك عبدالغني كرم الله 2007م
...
...
|
|
|
|
|
|
|
|
|