الدوبيت صوت سوداني خالص

Quote: ياسلام يا سلام والله لا اجد ما يجسد هذه اللوحة البديعة الا هذه الرباعية من مسدار النشوق لود الشريقاوى: رحلوا وقالوا يالجيلاني من العاقة قطعوا أبسَعَنة بي جيهة المخادة شفاقا وصلوا أمات قماري وختوا في الدقداقة عشاهم بالعتيم ماكشّنوا الفرطاقة

أخي الصديق
علي أحمد النعيم
السَّلام عليكم ورحمة الله تعالى وبركاته
هذا هو الحِن والولف الكتَّال
وهو الذي يشد القلوب إلى تراب الأجداد ومناط المودة والأذواق
وهو الذي يربط بين أهل السودان
لهذا يقول مثلنا السوداني:
" يربطنا حبل ؤيقطعنا سيف"!!!!!


عبدالله محمد حسب الله الشريقاوي صديق عزيز وأخ كريم
وشاعر من أندر شعراء الشعر الشعبي السوداني الآن، حفظه الله ورعاه!!!
وهو شاعر مبدع وابن شاعر مبدع!!!
وهو الذي يقول في وصف البطانة شعراً
قل أن نجده عند غيره من الشعراء الُقرَّح
يقول:
غِفَارِكْ زَغْزَغُو الضُّهْرِي وطَلَقْ نَسَّامُو
بَـرَّاقِك بِجَمِّـعْ فِي المُـزُونْ قِدَّامُـو
يَا رَبَّايَـة الدَّفَـقْ الحَـرُوۤت جُمَّامُـو
إنْتِ وجِيبَة وأهَلِكْ فِي العَشِيرْ مَا إنْلامُو
***
سِحَابِكْ قَلَّعُو القِبْلِي وتُعُولِكْ هَاطْلَة
قَلسيۤبْ السُّيولْ صَبَّحْ مَرَانْعِكْ كَاتْلَه
يُوۤم ضِيقِكْ تُلُوبِكْ دَرَّجُوۤهَا العَاطْلَه
فُوۤقْ قِيَم الكُبَار هَسِّعْ صُغَارِكْ فَاتْلَه
***
لَحَّاحْ البِرُوقْ قَلَعْ السِّحَـابْ المَاسِي
عَتَّم ؤصَبَّ فُوۤقْ بَلَـدْ أُمْ نَفَايِل رَاسِي
الليۤلْ كُلُّو يِرْزِمْ ؤبُكْـرَه قَـحَّ نْحَاسِي
قَعَدْ سِيۤلْ المَرَانِـعْ والحُدُوبْ مُتْواسِي
***
طَيْبَات الخِصَالْ الفُـوۤقْ قَبِيـحْ مَا تَبَّنْ
جَمَالْ دُوۤرْهِنْ عَلى قَفْـرْ البَطَاينْ خَبَّنْ
إنْسَنَدَنْ ضُعُونْهِنْ فُـوۤقْ عَلاوِي وشَبَّنْ
قِدَّامْهِـنْ خِلُوفَـاً فِي المَواصِـعْ رَبَّـنْ
***
الضَّعَـنْ أبْ شِرُوفَاً غَادِي خَتَّ مَسَايِلْ
ؤقَـرْقَرْ فُوۤقِنْ الضُّهْرِي السِّحَابُو قَلايلْ
ضِيۤفْ الهَجْعَة جَابُوۤلُو العَشَا المُو مَايلْ
عَتِيـمْ نُوۤقَاً مَرَاتْعُو نَقيۤبْ ؤجَـوّاً خَايِلْ
***
يَا المَرْدَا الدَّفَـرْ فِيكِي الإدِيـۤغِمْ ؤنَايلْ
بُرُوقِـكْ بِلْمَعَنْ قِبْلِي وسِحَابَنْ خَايـلْ
المَكْفَى المِحَنْتِتْ ؤمِتْلْ أمِسْ كَانْ سَايلْ
نَزَلُوۤهُـو العَشَاهُنْ دَاوَرُوۤلُو شَوايِـلْ
***
الليۤلَة البُرُوقْ أمْسَنْ بِرِفَّنْ سَافِـلْ
ؤنَفَيَانِنْ كِتِرْ جَابْ الشَلَتَّتْ جَافِـلْ
اتْدَاعَكْ سِحَابَـاً يِرْزِمْ اللّيـۤلْ قَافِلْ
غِفَارَاتْ البَطَايْنْ صَبَّ فُوۤقَه نَوافِلْ
***
يَا بْطَانْة الضَّرَاهُنْ لِىۤ عَشِيرْهُـنْ كَافِلْ
رَعَاكِ البَاسِطْ المِـنَّ الخُلُوقْ مُو غَافلْ
بِالهَارِي أبْ جَقِيـۤقْ والمِيرَفَابِي الحَافِلْ
كَانْ بِتْضَلِّي شَاكْرِيبْ فِيكِ طَاحْنَه جَحَافِلْ
***
فِرْسَانْ أُمْ لَبُوسْ بَدِّيكْ صَرِيحْ أخْبَارْهُنْ
نَقَاقِيـرْ عِـزْ ؤقَلّامْ للفِقَـرْ بَتَّـارْهُنْ
لِىۤ ضِيـۤفْ الهُجُوعْ دَايَمَاً بِتُوۤقِدْ نَارْهُنْ
أهَلْ السَّمْتَـة والطَّبِعْ البِوَلِّفْ جَـارْهُنْ
***
خَمَجِيۤبْ الدِّمُومْ والجُّودْ ؤنَظْـم أشْعَارْهُنْ
مَثْبُوتْ فِي التَّوارِيخْ خَلَّفُـوۤهَا كُبَارْهُـنْ
الدَّايِـرْ العَشَـمْ مَا كَتََّرُولُـو أعْذَارْهُـنْ
شِيۤنِينْ فِي الصَّدَفْ كَضَبْ البِلِفْ فِي مَدَارْهُنْ
***
فِرْسَانْ الُّلقَا التّابْع الخِيولْ صَقَّارْهُنْ
قَبْلْ الليۤلَة كُلَّ النَّاسْ بِدُورُو حَدَارْهُنْ
وكِتْ يِتَلاحَمْ الفِرْسَانْ ؤيعَلا غُبَارْهُنْ
أُسْد الغَابَة مَا بْتَقْدَر تَفِرْزُو خِيَارْهُـنْ
***
نَفَلْ أوْلادْ شَكِيرْ كُلَّ الخلُوقْ عَارْفِنُّـو
دِرُوعْ ؤسِيوفْ ؤقَارْحَاً للكُمَاجْ كَالْفِنُّو
فِعَالْ نَاسْ حَاتِمْ اللِّسْنَاتْ بِتَعْجَزْ مِنُّو
لكنْ فِي الكَـرَمْ عُنْج الرُّقَابْ فَايْتِنُّـو
***
الوَلَدْ المَنَفَّـلْ والأسُودْ هَايْبِنُّـو
بِالهَارِي المِجَدِّر لا السَّرِجْ شَاقِنُّو
نِحَاسُنْ كُلَّ يَوۤمْ فُوۤقْ الحَدَبْ دَاقِنُّو
والفَارْسْ المَدَجَّجْ بِالحَدِيدْ جَادْعِنُّو
***
عُفَافَـاً للرَّزَايَا حَاشَـا مَا بِتْدَنُّـو
للجَّار والعَشِيرْ دَايْمْاً عَلِيۤهُو بْحِنُّو
غَرَّافْ الصِّقُورْ مِن الكُبَادْ شَابْعِنُّو
يِشْرَبُو صَافِي والغِيۤرْ بِالكَدَرْ سَاقِنُّو
***
طَيْبِينْ الخِصَالْ الفِي الجِوارْ بِتْمَنُّو
وا كَدَرْ الأبْـاهُم ؤبَخْتَـة الدَّايْرِنُّو
المَجْد الرَّفِيعْ مِـنْ الكُبَار وَارْثِنُّو
إيْوانْ كِسْرَى أسْلافُنْ قِبِيۤلْ هَادْمِنُّو
***
كَانْ دَارَتْ رَحَى الحَرْبْ والنِّحَاسْ جَابْ جِنُّو
يَا مْخَاصِـمْ شَكِيـرْ دَرْب الخَلاصْ كِيۤفِنُّـو
زَمَنْ الكِيـكْ بِتَصْهِـلْ والصِّقُـورْ بِبْرَنُـو
يَاتُـو الخِيۤلُـو غَارَتْ ؤخِيۤلْنَـا مَا صَدَّنُـو
***
يَا المَـرْدَا الغِفَـارِك واغَلَنُّـو مطُـورْ
نَاظْرِكْ فُوۤقْ حِدُودِكْ سَوَّى زَي مَا يْدُورْ
خَيْرَاتِـكْ مُقُـدْ مِي مَزْرَعَـة عَجُّـورْ
نِحَاسِك دَقَّ ضَحَوي ؤدَاقَنَنُّـو صِقُـورْ
***
بَرَّاقِكْ شَلَـعْ جَابْ المِزَرْقِـنْ طَالِـعْ
أسْهَرْ عِيۤنا بِى شَخَرِي السِّيولْ الدَّالِعْ
زَمَن خِيۤلِكْ مَغَاتِي وفِي اللِّجِـمْ بِتْقَالِعْ
حَابْسِنِّـكْ دُقَارْتَاً لِلكُمَــاجْ بِتْهَالِـعْ
***
جَافِيۤتِي السَّحَايِبْ والبُـرُوقْ السُّطَّعْ
فَـارَقْتِ العَرَابِينْ والنَّعَايْـمْ الرُّتَّـعْ
أكَانْ شَيَّاً بِصُدَّنُو السِّيوفْ القُطَّــعْ
تَعَرْفِيهِنْ عَلى العُوۤقْ المِدَرِّسْ بُتَّـعْ
***ٍ
اتْنَابَطْ سِحَابِك ؤخَرْخَـرَنْ تَعَّـالِكْ
واتْزَيَّنْـتِ بِالسُّنْـدُسْ لِبِسْ جُلْبَابِكْ
يَا المَرْدَا المِدَبِّتَه بِىۤ الحُدُوبْ أمْوالِكْ
صَقَّارِكْ بِتِلْ ويـۤنْ مَا صَهَلْ صَقَّارِكْ
***
لا تْقُولِي الزَّمَانْ خَانِكْ فَقَدْتِ رِجَـالِكْ
فِكِّي الحِدْ ؤجُودِي عَلِيۤنَا بِىۤ شَبَّـالِكْ
تِلُوبِكْ قَاعْدَه يَارِيۤتْ كَانْ لِقِيتِ مَجَالِك
كَبِيـرْ ؤصَغِيرْ بِعَرْفُو مُعَالَجَة دُوۤبَالِكْ
***
الصِّيۤفْ رَاحْ ؤنَسَّامْ البِرُوقْ هَبَّـالِكْ
رَفَّ القِبْلي بى عاتم المزون رشّالكْ
مَكَايِيلْ كَيَّلِكْ وأصْبَـحْ نَبَاتِكْ شَابِكْ
عَلى قَفـْرْ الهِويـۤمِلْ شَرْبَتَتْ رُحَّالِكْ
***
اتْحَابَـنْ سِحَابِـك ؤمَطَّرَنْ دَالِيۤـبْ
ؤمَوَلاكْ لَبَّسِكْ تُوۤبَاً جَمَالُـو عَجِيبْ
تَبَرِكْ فِي المَدَالِـقْ قَلَّبُـو القَلَسيۤب
عَقِيـدْ دُوۤرِكْ مِعَيِّنْ لِىۤ ضَعَايْنِكْ نِيۤبْ
***
مَطَـرِكْ صَبْ ؤنيَّلْ فِي مَهَاوِيكْ لُوۤبِكْ
ضَعَايْنِكْ سُوۤلَلَنْ مِنْ الوَحَلْ بىۤ حْدُوبِكْ
يَا أمْ نَفَسَاً طَرِي وطِبَّ المِلارْيَا هَبُوبِكْ
كُبَارْنَا رْجُوۤنا لا مِنْ فَاتُـو يِتْلَهُّوبِـكْ
***
لَهَايْبِكْ بَرَّدَتْ قَعَـدْ النِّهَـارْ يِتْغَمَّـرْ
صَحَّتْ فُوۤقِكْ العِيَـنْ أُمْ سَمَايَاً حَمَّـرْ
قَرْقَرْ ؤهِيۤطَلْ الضُّهْرِي السِّحَابُو اتْعَمَّرْ
شقّاق صيفك الفاتح خشومـو اتْدَّمَّـرْ
***