(آليات أمي في دق العرب) و الرد (آلية خالتي فوزية في الرد على الجنوبية) : استيلا قايتانو من هي؟!

Quote: حبوكانة استيلا قايتانو الحب هو كلمة سحرية من حرفين ولكنه يعمل عمايل ومن عمايلو الكتيرة استحق ان يقيم له الناس عيدا . في احيان كثيرة احس كأنه انسان خفيا تلاشى ذات يوم ليسهل لنفسه مهمة الدخول في قلوب وعقول الناس ويثير تلك البلبلة والكبكبة ، صفة التخفي هي الصفة الوحيدة التي تميزه عن الانسان اما بقية الصفات يتشاركون فيها . فهو معقد كما الانسان في احاين كثيرة يحتاج الى الكثير من التجارب والكبوات لينضج ويكبر ، احيانا او غالبا يكون معاقا فهو اعمى ، واحيانا تتعدد اسمائه مثل البشر والحب واحد ، اقدسها حب الله ورسله ، اسماها هو الحب العذري ، واقصاها حب من طرف واحد ، واسرعها حب من اول لحظة ، وانبلها حب الاصدقاء ، واصدقها حب الابناء ، واكثرها إثارة للجدل حب الاقارب ، ابيخ ميزة في الحب انه يفضح صاحبه ويعريه رغم محاولاته المستميتة في النكران والذوقان وحالته تبقى بس ذي العريان ولابس سديري. ايضا هناك الحب الذي يقع في العبودية والتهميش والقتل عديل كدا هو الحب المكبل بأطر اجتماعية واقتصادية وعرقية ودينية دا بقى حب بودي التونج ، إذ على المصابين به اذا اختارو الاستمرار عليهم ان يخمو ويصرو اذ لا توجد منطقة وسطى ما بين الجنة والنار ، مرات الحب كضاب وبتاع حركات يعني حب ودوران وممكن يغشك ولكن في اول مواجه يخليك واقف ويقوم صوف او يذوب ذي حلاوة قطن لمن تحتار وما تعرف هل الكنت فيه دا حالة حب ولا اعجاب ولا انا مالي يا الله ؟ . الحب ايضا ذي الطاقة بتحول من شكل لي شكل ومرات ما بدينا فرصة عشان نستوعب مراحل تحولاتو يعني حب البنشات وفترات الخطوبة يمكن يكون في شكل ضوء مشع كدا ومفهرد ووااااااااااااضح ، بعد يخش البيوت يمكن يتحول الى صوت ويتمثل في النقة الكتيرة والكلام البايخ والواجبات والالتزامات لغاية تشك في روحك ومرات تصارح نفسك وتقول فلان دا والله بقيت اكجنو كجين رغم دا تكون ما قادر تخلي بيتك وترمي بكل الاشياء الجميلة والغير جميلة بعرض الحائط عارف المقعدك شنو هو الحب ، يا ابن الكااااااااااالب . مرات الحب بتعرض لامراض نفسية ممكن يجن عديل كدا ويحجز صينية جنب التجاني الماحي وممكن تجيهو حالة انفصام يعني تكجن الزول الصباح وتحبو بليل تصحا الصباح تاني تكجنو وهكذا ، اطرف انواع الحب الحب السكران لط ، تلقاه واقف لمبة يخلي سيدو يشحن اسكراتش ويدور المسجل ويضرب للمحبوب ويسمعو غنية تعبر عنه مثلا يشغل ليها " سال من شعرها الذهب وتدلى وما انسكب" وهو عارف انو شعرها قرقودييييي ما محصل الاضان لكن بحبها ، لان الحب شفاف وما بهتم في كتير من الاحوال بالفريم الخارجي للناس . اليوميين ديل ظهر الحب العندو كرامة وممكن يحرد ومهما يحصل اصلوا ما يقبل ورا ولو سيدو دا يتمردق في الواطة مرديق على شاكلة لو قلبي اتقطع وراك اصلي ما بنذلا ليك ( بس عنيد عنادة ) . في الايام دي ظهر الحب الشفت وغير اسمو لحبوكانة وطايح في خلق الله شواكيش وممكن يخلي القلب استاد يحب فريق في كل كابتن يحب حاجة في دي العيون وفي دي الطول ودي الخضرة الخضرة الكملت كسرتنا وفي ديك الطيبة وفي ديك الحنية وتطول اللستة لان بكل بساطة داير ليهو زول كامل ومافي طريقة الا يعملو في جزارة الغراميات ، رغم كل دا الحب ضروري لكل كائن لانه هو الوقود البخلي الكائنات ديل تستمر في الحياة والعطاء اتخيل انو مافي زول بحبك اصلو ما تقدر تقول على كيفهم وانا ذاتي ما حاحبهم ، حتتحول لي وحش . ونقول لكل البحبو في عيد الحب وعصر الحبوكانة هابي فلنتاين داي وخلو الحب حقيقي بيناتكم وهو ذاتو داير يحبو ومحتاج للرعاية والسقاية ومحتاج لزول يفهمو لمن يتحول من صورة لصورة وزهجان جدا من الشفوت والشفتات البحاولو يبتزلو معانيه السمحة في جزارة الغراميات . حوار خاتمي مابين شفت وبتاع الهداية ، قال: لو سمحت عندك بطاقات معايدة . بتاع المكتبة : ايوة انت ديرو لياتو مناسبة . قال : عيد الحب . ياحبذا لو مكتوب عليها الى حبيبي الوحيد . بتاع المكتبة : ايوه موجود مش المكتوب عليها الى حبيبي الوحيد ؟ قال وهو يتلفت : ينصر دينك اديني منهم خمستاشر . .