|
|
 Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر (Re: محمد مصطفي مجذوب)
|
عموما نرجع لخطاب الجامعة. واحب اقول هو اولا واخيرا بيعتبر خطاب رسمي من الجامعة اكان مضتو والا ما مضتو السكرتيره واللا اكان من ميلا هي واللا من ميل المدير . وانا بثبت انو الخطاب ده فعلا اترسل لي ناس حقائق الحقائق ديل وعشان كدي داير اعلق عليهو شويه.
النقطه الاولي في خطاب الجامعة لجماعة الحقائق جات في شكل (أرجو أن تدلنا على من عُيِّن منهم في وظائف عليا كهيئة التدريس) ودي بتنقل للناس المستوي المتردي في إدارة شئون الجامعة الاداريه والماليه. ومادايرا ليها حليفة انها بتفسر بدرجة كبيره الفساد البننبح فيهو ودايرين الجماعة يودونا فيه التوج .
1. وعشان نشرح زياده نقول جامعة البخت دي ما نكرت تعيين ناس في الوظائف العليا ...العالي الله. بس دخلت مع ناس الحقائق في مجارره زي حنة الاصبع الواحد (بتاع اكان راجل تمها) الطالعا موضه في الخرطوم. وقالوا لي ناس الحقائق ديل (كدي اكان انتو عارفين صحي ورونا منو العيناهو ) يعني بالدارجي كدي ختوا ريشة فوق راس الزول البتتكلمو عليهو وادونا فرصه نرتب ردنا ونجيكم ).
I. مدير الجامعة كان ممكن يقول لي ناس الحقائق والله (موضوع تعيين هيئة التدريس ده بتم خصما علي الفصل الاول. فالوظيفه وشاغل الوظيفة لازم ناس وزارة التعليم العالي يصدقو عليهم . فكان في وظئفه مليناها في هيئة التدريس الحكايه ما بين (اهل المدير واهل الوكيل). وزارة التعليم العالي ذاتها لازم تكون ورطانه معانا لي شوشتا.
II. لكن في الحقيقه الحالات الجامعة بتقدر تلعب فيها هي حالات التعيين بالمشاهره البتكون خصما علي الفصل الثاني واللا من موارد الجامعة الذاتيه. وفي الحالات دي بتم تسكين الزول البدورو باعد ما يساوموه. وبساوموه بعد ما يخدروهو بي كلام معسول نوع ( احنا خاطبنك ورينا داير كام واحنا جاهزين). تقوم الحكاية تطلع في راسك وتقول ليهم (ها ناس نحن ما اهل انتو سو الدايرنو) وتبقي زي الغرابي العمدتو قال ليهو يا شيخ فلان ما تنورنا وادينا رايك . الراجل اتنحنح وعدل عمتو وقال ( ياعمدة انا كان قتو كي معاكو..واكان قتو كي معاكو).
III. كمان الجامعة برضو بتاخد راحتا في حالات الانتداب. وفي الحاله دي الجامعة بتلقط البتدورو من الجامعات التانية . وهاك يا كرم بتضيف ليهو بدل شنو وبدل شنو . مرات البدلات دي تحصل مره ونص و اللا مرتين قدر مرتب الزولتو
2. والشاهد انو جامعة السودان المفتوحه دي والمفروض انها حكومية و مؤسسه عامة. لكن كشف مرتباتها وبدلاتا وحوافزا البدوها للعاملين كلها اسرارما بعرفا الا الوكيل وبتاع الحسابات والمدير احيانا. والجامعة ما بتسمح حتي لمديرين الادارات اكان نطو من الطابق الرابع يشوفو كشف المرتبات واللا الحوافز ) زي التكنها كلها اسرار عسكريه و اللا من اسرار الامن القومي. و السريه دي هي سبب الانفلات الحصل والنحن كتبناهو في كشف الاساتذه وكشف العاملين.
3. من التجاوزات البتحصل بسكنو ناس في درجات لا خبراتهم ولا شهاداتهم بتديهم ليها. وكمان يا زول واقعين ليك ترقيات نقديه (والكاش انت عارفو بكمل النقاش). كمان من التجاوزات ترقيات ناس وناسات ويفططوهم ليك القاعدين معاهم والقاعدين قبالهم . وطبعا (الرزق بجب الخفيه) فما زول بعرف الحاصل شنو والبعرف ما بفتح خشمو يقول تلت التلاته كام. يا زول مرات يقومو يرقو ليك ناس وبي أثر رجعي حتي مدير الزول لا بكون عارف ولا بكون موافق.
4. اما نقل العاملين من إداره لاخري اكان بي سبب والا بمزاج الوكيل يتم باوامر زي الاوامر الجمهوريه لا تقبل النقض و لا المراجعة. بس د. ؟؟؟؟؟؟؟؟؟؟؟؟؟؟؟؟؟؟؟ عندو خاترقدر الليله وبكره عند الحاكم بامره وكيل الجامعة . فالداير يحل مشكلتو اكان راجل واللا مره يجري علي دكتور فلان ده ويقول ليهو قدر ظروفي. وخليني كدي من حكاية شهادات وخبرات وتحصصات وتدريب . تدريبانت قايلا خدمة الزاميه ؟؟؟و
المصيبه انو د. ؟؟؟؟؟؟؟؟؟؟؟؟؟؟؟؟؟ قصتو جاطت مع جوطة شهادات ناس الجزيرة . قامو نقلوهو ليك هو ذاتو لي تحت. بس حرد وقام مشي قعد في بيتهم. اتلموا ليك مدير الجامعة الاصلي ومديرها الملكلف وناس حمبره وغنامه وراحو في رمضان للراجل في بيتهم في ...........في اخر امدرمان. وهاك يا حناس وهاك يا زول خلينا نتخارج من قصة المجذوب. وبعدين قامو طعموا الحكايه بي نقل منسق القانون والذي يحمل درجة في القانون عشان يديرالبرامج الاكاديمية بالتكليف بعدين رفعوهو ليك عشان يسد خدمة في إداره المراكز لامن الجوطة الحاصله دي تهدا شوية . ولمو ليك في باقي الناس شمال يمين ارض ارض وجو جو كلو عشان قالو في ناس بودو القواله لي دكتور مجذوب .
المصيبه انو دكتور المجذوب ما داير ليهو سواطه وقواله .... العارفو عارفو بالتفصيل الممل... وكتير ... والعندو كلو مصور ومدور ومحفوظ في ورق واسطوانات في اركان الدنيا الاربعه .
والغريبة انو المجذوب قال لي المدير الاصلي زولك ده عامل ليه مراكز قوي داخل الجامعة المدير الاصلي قال للمجذوب لامن الفاس وقع في الراس دي شلشليه ما مراكز قوي ...
والاغرب انو الناس ديل نسو انو المجذوب قال ليهم مرتين.. ثلاثه... اربعه خمسة ... مرات ....يا ناس انا قاعد اكتب لي في كتابين واحد عن التعليم المفتوح وواحد عن الطريقة البتديرو بيها جامعتكم دي. الغريبه زول صدقو مافي
والاكتر غرابه انو الناس ديل قايلين القانون البعرفو المجذوب يا هو نوع القانون البطلعو بيهو دبلومات تحكيم لا ليها راس ولا قعر دي
النقطه الثانية في خطاب الجامعة بتقول (أمّا من تم تعيينهم في وظائف موظفين وعمال فلقد تم تعيينهم عندما كانت هذه الجامعة لا تجد من يرغب في التعيين لها حيث كان هنالك شك حول استمرارها فعُيِّنوا بها في ذلك الوقت، بل أن العاملين منهم حرسوا هذه الجامعة ومنشآتها الأخرى وهم يسكنون في العراء تقديراً فقط لمن أتى بهم).
وبرضو ده اسمو كلام. انو الجامعة تقول عديل كده نحن عينا اولادنا عشان ما كان في زول داير يشتغل معانا . وانو اولادنا عيناهم خفراء ومراسلات وسكناهم في الصقيعه ؟ وهم وافقوا علي كدي تقدير للناس الجابوهم؟
بالذمه ده اسمو كلام
طيب احنا اصلنا زمان شن قلنا............ما قلنا الطير بياكلنا.
ما ياهو ده كلامنا زاتو القلناها وعدناهو وكررناهو انو والله الناس جابو الناس. والناس عينوا ولاد اهلهم وبلدياتهم خفراء ومراسلات وعمال وبعدين طوروهم عشان يملوا الوظائف الخلوها مقفوله لامن ديل بلغوا. ما ياهو كلامنا زاتو القالوا فيهو اشانه سمعة ؟
دحين انا بدور اعرف ياتو يوم اكان الجامعة دي والا اي مؤسسة في المليون ميل مربع ده قالت دايره ناس تعيينهم والناس حردوها وقالوا حكايه مادايمة ؟
وبعدين شنو موضوع حكاية حراسة الجامعة دي... وحكاية مبيتهم في العراء؟
وينو العراء ده السكنو فيهو اولادهم وبلدياتهم وصبنوهم لغاية ما اتطوروا وبقوهم موظفين ؟
والجامعة دي دحين ما ياها الكانت مستأجره بيت حدادي مدادي بي خمستاشر مليون شهريا في شارع عبيد ختم لفة جوبا ؟
والا يا ربي بدوها في رام الله؟
رام الله بتاعت بحري مش بتاعة فلسطين البروف قال قلعا قلع من اهلو الكواهله عشان يقسموها قطع قطع وسكنوا فيها عشوائي ؟ وهسع بقي البيت فيها بعشرين وتلاتين مليون
وبالذمة في زول عاقل بكتب (كما نفيدكم بأن التعيين في هذه الجامعة اعتمد على السيرة الذاتية والتذكية ولهذا اشترك في التعيين كل العاملين بهذه الجامعة من هيئة تدريس وخلافه فلماذا يُحرم على المدير ووكيل الجامعة؟)
انا كبرت علي حكاية (ولهذا اشترك في التعيين كل العاملين بهذه الجامعة من هيئة تدريس وخلافه).
يا ربي المقصود انو كل واحد من العاملين وهيئة التدريس وخلافه جاب زوله ...وعشان كدي الموضوع موضوع سيره ذاتيه
ويا ربي السؤال (فلماذا يُحرم على المدير ووكيل الجامعة؟) بعني آي ... يا زول عينا ناسا واشمعني احنا ومافي حد احسن من حد؟
سمح طيب مادام ناسكم كلهم من الله وولاد عبدالله .....باقي خلق الله ناس زعيط ومعيط الفي الشرق والفي الغرب والفي الجنوب اكان الباب ما فتحوهو ليهم ينطو الحيط؟
يعني بالدارجي كدي .... الجامعة بتقول والله كل زول فينا اكان مدير والا وكيل حتي لو كان غفير بعوس عواستهم في حكاية الوظايف والتعيينات دي
من كلام ناس حقائق الحقائق وكلام البنية السكرتيره في معلومتين ما صحيحات وهم:.
بالاول بنت اخت المدير دي هي ومعاها اتنين تانين كانو متعاونين . قاموا ناس الماليه قالوابعد ده اي محاسب لازم يودوهو الكشف الحسابي العام. ومرتبات المحاسبين تطلع في الفصل الاول من ميزانية الماليه . ناس الجامعة عشان ما يخسرو الرواتب الجاتهم هديه من ناس الماليه قاموا قوام قوام عينو ليك التلاته محاسبين المتعاونين معاهم . ما كان في وقت عشان يعلنوا ويمتحنو . انا علي الرغم من اني ما مواق علي طريقة التعيين لكن بتفهم الظروف الحصلت فيها . وما بقدر اقول حصلت فيها محاباة واللا عبث. لانه اصلا ما كان في زول رابع عشان يعينوهو غير التلاته ديل
الحاجه التانيه بنت اخت المدير دي والشهاده لله انا شخصيا لو لقيت اعينها الليله دي عندي هنا في لندن علي الرغم من اني خاتيهو قرض مع ناس الجامعة وبلوم خالا علي الحصل من القمري والسمبر لكن قسما عظما ما بتردد. فهي بت متميزه بحق وحقيق. اخلاق كيف ....ادب كيف ......فهم كيف.... وشغل نضيف ميه الميه وعفارم عليها.
هي والشهاده لله اول من يدخل مكتب الحسابات الصباح البدري واخر من يخرج لبيتهم ...
ويستحيل زول يجي المكتب يكوس ليها ما يلقاها واللا يلقاها زي الجماعة بتتونس في تلفون واللا بتلعب ليها في قيم Game.
وانا قضيت في الجامعة سته و اللا سبعه شهور حتي عرفت بالصدفه ومن زول تاني ما منها انها بنت اخت المدير
يتبع................................
|
|
 
|
|
|
|
|
| العنوان |
الكاتب |
Date |
| جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الرضاع | محمد مصطفي مجذوب | 10-01-10, 10:44 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-01-10, 11:01 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-01-10, 12:10 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-04-10, 08:35 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-04-10, 08:37 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-04-10, 08:38 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-04-10, 10:22 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | حيدر حسن ميرغني | 10-04-10, 10:29 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | د.نجاة محمود | 10-05-10, 00:24 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-05-10, 07:40 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | د.نجاة محمود | 10-05-10, 11:42 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-05-10, 03:58 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-05-10, 07:33 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | Osama Siddig | 10-05-10, 07:57 AM |
 Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | AnwarKing | 10-05-10, 08:11 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد البشرى الخضر | 10-05-10, 08:07 AM |
 Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | مُحَمَّدٍ عِوَضٌ احْمَدُ | 10-05-10, 09:02 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | AnwarKing | 10-05-10, 11:50 AM |
|
| |
محمد مصطفي مجذوب
فيس بوك
تويتر
انستقرام
يوتيوب
بنتيريست