|
|
 Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر (Re: محمد مصطفي مجذوب)
|
6. الغريب في الامر انه لما ارتفعت اصوات الاحتجاجات علي حجم والكيفية التي تملك بها بعض المقربين هذه الاثاثات والاجهزة وكثرت شكوي ممن حرم من بقية الزملاء من الذين سمعوا بتوزيع تلك الاثاثات والاجهزة بعد أن ملك اصحاب الحظوة منها ما ملكوا، أصدر ؟؟؟؟؟؟؟؟؟؟؟؟؟؟؟ توجيهاته وهو خارج البلاد بإستقطاع القيمة بالكامل من مرتب ذلك الشهر الذي وزعت فيه الاثاثات والاجهزة. خصم 100% ادي الي عدم قبض بعض العاملين لمرتب الشهر بمجملة. فانتهي الامر ببعضهم للسعي وراء سلفيات من هنا وهناك.
7. وبما انني (ميسور الحال) وعايش مرتاح باروبا في يوم طلب مني زول لاب توب Laptop وإعتذرت عن الاستجابه لطلبه لاني كنت عارف انو داير يملحني . ومن يومها صارت استحقاقاتي وطلباتي المصدقة ( يوم تكون في بنية اصيله تختها في الجرح تبراهو شغاله ورقي يظهر في دقيقه زي ضو الشمس ولمن البنيه تكون في اجازة ورقي يختفي ...وأكان ظهر الورق وللا اختفي من يوم اللاب توب حقوقي بقيت اشمها قدحة. ويوم شالتني هوشة اهلي الجعليين وقفت جامدا مطالبا ببعض حقوقي قال لي سيد اللاب توب بالفم الميلان ( انت القروش داير بيها شنو؟) .
8. بي فهم القروش داير بيها شنو ظل عدد من العاملين يطلبون مني العون او السلف او الاثنين معا خصوصا عندما قام ناس اللاب توب ما صدقوا انو جاتهم تعليمات ؟؟؟؟؟؟؟؟؟؟؟؟؟؟؟؟؟؟ ووقعوا خصومات. تقيله في المرتبات عموما في المناخ ده وبالفهم ده ورد الي مع المراسله يد بيد الخطاب ادناه .
ارجو ان انبه مرة اخري الي انني قد حجبت عامدا اسم مرسلة الخطاب وتلفونها وإسم الدكتور المشار اليه في الخطاب .
هناك امران تسببا في ازعاجي في هذا الخطاب وهما:
1. قول صاحبة الخطاب انه لو كان دكتور ؟؟؟؟؟؟؟؟؟؟؟؟؟؟؟؟ في البلد لما احتاجت هي ان تطلب سلفية مني. وبالبلدي كدة انا خفت إن صاحبة الرساله تطلع قريبة الدكتور وبعدين الدكتور وجماعتو يقوموا يصروها لي ويتهموني بتسسليف بناتهم عشان ازل فلان وعلان و اصلو انا قصتي مع بعض (دكاترة) ومدعين (الدكترة) الجامعة جاطت اهو من قولة بسم الله الرحمن الرحيم.
2. شلت هم انو دكتور؟؟؟؟؟؟؟؟؟؟؟؟؟ وقانونجية الجامعة الجارين ورا الحوافز والقفز بالزانه ومافيش حد احسن من حد ووكلاء النيابة وناس البوليس السالين سكاكينهم بفهم او عدم فهم لمعني دوائر الإختصاص لمعالجة الكتابات المكتوبة ومنشورة خارج السودان او التكييف القانوني بين الشكوي المرفوعة لرئيس الجمهوريه وما يتناقله الناس من احاديث واشاعات في مجالسهم الخاصه والعامه وما اراده المشرع السوداني في تعريفه او استثنائاته المنصوص عليه في الماده 159 إشانه السمعة من قانون الجنائي لعام 1991 المسلط علي رؤوس الناس ويستغل لتكميم الافواه خصوصا اقلام الصحفيين
3. يا زول خفت عديل انو الجماعة ديل بدل حاجات خفيفة كدة زي إشانة السمعه بتاعة السته اشهر والغرامة او حاجات تقيله زي خيانة امانه الفيها سجن سبعة سنوات وغرامة كمان تقوم تتفتح عبقرياتهم علي تفسير تسليف هذه السيدة بانه تحرش جنسي Sexual Harassment وينكتوا لي حد من الحدود ونبقي في رجم وقطع وعلي الرغم من اني ساكن لندن (عمارة فوق) يقوموا يصروا يغربوني في الحي السوداني في ماليزيا مثلا وطبعا هم عارفين كويس نحن بتاعين اروبا ديل لا بنعرف (وضح نهار) ولا عندنا (عرفي) ولا بنعترف في حاجة اسمها (بزواج المسيار) ولا عندنا شغله بعقود (المتعة).
كلامنا في اروبا يا قسيمة عديل وياGirlfriend علي عينك يا تاجر. علي الرغم من انو ال Sexual Harassment ده في اروبا بتخرب بيت الزول عشان نسوانا السودانيات بعرفوا يدخلوا النت وينكتو الفيها كلو وبخرب بيت الجامعة او المؤسسه الشغال فيها الزول بي غرامات وتعويضات جامدة عشان الخواجيات زرق وبيض عارفين القانون احسن من اي واحد متدكتر زي ناس ؟؟؟؟؟؟؟؟؟؟؟؟؟؟ كده.
4. انا كمان زول عامل بتاع قانون وما داير بي حسد واللا غيره اقوم اسئ الظن واقعد انطط في الكبيره والصغيرة زي الزول البلم في القزاز بالكارو اصيح واكورك فساد ....فساد ....فساد . بس النصيحة ما قادر ابلع حكاية انو ست الخطاب عندها مش قدرة وبس لكن كمان منتهي الثقه في انها ممكن تطلب مبلغ اكبر من مرتبها من الدكتور الكبير؟؟؟؟؟؟؟؟؟؟؟؟؟ الكبير الله . ودكتور فلان ده معروف انو يدو طويله ولاحقة وكرمه مع ست الخطاب ما داير شرح ودي لا فيها شتيمة ولا إشانة سمعه ولا دايره ليها حليفة. واهي ست الخطاب طايره علي عينك يا تاجر طيران زي الاواكس من الدرجة 17 الي الدرجة 13 في خلال سنتين بس. علي الرغم من انو زمان الزول ما بدخلوهو الخدمة المستديمة الا بعد سنتين وما كنا بنمرق من Q لي DS ( اكان جا الجيش زي ما بتي قاعدة تقول ) إلا بعد اربعة سنوات .
5. وبمناسبة زمان دي (والله يطراك بالخير يا شوقي بدري) كان قبال نهاجرلاروبا من سنة حفروا البحر بقولو لينا البيوت اسرار. يا مؤمن يا مصدق انا قعدت انحت في راسي وافكر براي كدي واقول
يمكن يا ربي ست الجواب تطلع زوجة الدكتور الصغيرة وداسيها عشان خايف الكبيرة تمسكتها الغيرة . وبعدين اهل الكبيره...... تطلع في راسهم يلموا عليهم قروشم الكتيرة ......وما يخلوا لي ناس الله ....لا فطيرة لا خميرة.
تاني قلت يا ربي يمكن اخت الدكتور في الرضاع واللا هي (الرضاعة) والله العربي بتاعنا زاتو اتمسخ ....عموما اكان رضاعة والا رضاع وده ما فيها شهادة بس ممكن تثبت بي تحليل ال DNA
تاني قلت يا زول يمكن حماتو...... والحماه اكيد بتدخل في الحرمات اكان الشريعة ياها البنعرفها من زمان وما طورها الجماعة لي موديل 2010 زي ناس مسيار وبتاع.......والا كيف يا ناس الشريعة ؟
واللا يمكن بت جيرانهم والنبي عليه افضل الصلاة والسلام اوصي علي سابع جار وهي طبعا ساكنه في (............) والراجل ساكن في قصور (.................) مع اهل الحسب والنسب والفرق بين ناس (.................) اصحاب البلايين ومتوسطين الحال الفيهم اصحاب الملايين وناس (..................) ناس الملالين الفي الرماد متمللين كلها كام مربع وشوية طبقات وحد ما حوش
المصيبة هي ست الجواب نفسها قطعت لي الشك عندما سألتها عديل كدي وقالت لي هيي ده (حوا وادم ما بلمونا ) وبالحرف الواحد وعلي اليمين قالت لي (هو لا قريبي و لا في صلة نسب ولا جيرة و لاكان بعرف خشم بيتنا بي وين) الا بعد ما اشتغلت معاه بي زمن واضطريت مرات اقعد لمن وقت الشغل يكون كتير { مساكين ربنا يعظم اجرهم } هو د. ؟؟؟؟؟؟؟؟؟؟؟؟؟؟ ما برضي يخلي زول تاني يوصلني بيتنا بس شارعنا كلو حفر هو بنزلني في راس الشارع )
طبعا انا بصدق وبسال الله اني اكون مؤمن وعشان اكون مؤمن طبعا لازم اكون صديق. وعلي الرغم من انى عرفت انو ود الصديق السمو العوض زاتو ناس الجامعة اشتكوه هو وناس جريدتو علي حمد وخوجلي والا يا ربي اشتكوه لي سيد الجريده حسين خوجلي. في ظني ويخيل لي اني سمعت طشاش طشاش زاتو حسين خوجلي شاكينوا معانا .......... والله كبرنا وبقينا نوزع غلط . حسين خوجلي ده ما توب جريدتو دي يقفلوا ويفتحوا فيها طالع نازل زي السسته البايظة
6. عموما انا براي قلت برضو ياولد ما دام كل شئ في السودان أتطور طيب التطور ما يا هو دا برضو جا علي المكاتب وبقي الزول الداير يتعين اكان ما عندو هو امكانياتو ما كاربه بقولوا ليه انت المذكيك منو؟
البنية دي الما ذكاها زول للتعيين لازم يكون في واحد تاني اقوي يعني واسطة مدنكلة من العيار التقيل لقط امكانيتها وزكاها زك عشان كدي طارت طيران من السبعتاشر للاربعتاشر في سنتين . المصيبه انها هي ذاتا اتحلفت واتجزمت بالتقطعا حته حته قالت لي هي الحكاية اصلها قسمة ونصيب في يوم حبوروسرور .... جات من بيتم تزور.......... واحدة شغاله مع صاحب الدكتور. ووقالت بالحرف الواحد انو الدكتور وكت؟؟؟؟؟؟؟؟؟؟؟ شافا (براهو نطه وقال لي انتي باين عندك امكانيات كويسه ما تجي نشغلك ومن يومداك هو ما مقصر معاي)
قلت طالما امكانياتها كويسة والراجل ده هو الاكتشف مواهبها .....دي كدي بتفسر لي حكاية 13-17 الكانت واقفه لي في زوري دي. وطبعا اذا عرف السبب بطل العجب والما عاجبو ينفقع والا يمشي الجريف يكوي البحر في صرتو
قلت برضو طيب مادام الموضوع موضوع امكانيات ومواهب مرات ما بتشاف بالعين المجردة وما بعرفا الا الزول الخبير (زي ضواقة ال Wine ) مين عارف كمان يمكن هي وهو داخلين في (خته) .......والا يمكن هي مستثمره عندو خصوصا الراجل بتاع استثمارات وتجاره وكنوز من حديد وذهب وفضه ......واللا (احتمال يكون شايل ليها قروش يعني زي موفره عندو) وعموما ما بين الخيرين حساب .
7. بس ده كلو كوم والكتبتو لي في اخر الجواب كان كوم تاني . زي افلام جيمس بوند راحت خاتما لي الجواب وبي لهجة كدي ما بتاعة زول داير سلفيه كتبت تقول لي ( ارجو ابادة الورقة بعد الاطلاع ) . المصيبة لمن اعتذرت من حكاية السلفيه دي جات تسألني زي الكانت مكيسا ليها واحد وفرتقت ودايره تلم صورتا منو وقالت لي (الجواب قطعتو)
الجزء الثاني رد سكرتيرة مدير الجامعة علي حقائق الحقائق والتعليق يتبع/..............................
|
|
 
|
|
|
|
|
| العنوان |
الكاتب |
Date |
| جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الرضاع | محمد مصطفي مجذوب | 10-01-10, 10:44 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-01-10, 11:01 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-01-10, 12:10 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-04-10, 08:35 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-04-10, 08:37 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-04-10, 08:38 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-04-10, 10:22 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | حيدر حسن ميرغني | 10-04-10, 10:29 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | د.نجاة محمود | 10-05-10, 00:24 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-05-10, 07:40 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | د.نجاة محمود | 10-05-10, 11:42 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-05-10, 03:58 PM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد مصطفي مجذوب | 10-05-10, 07:33 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | Osama Siddig | 10-05-10, 07:57 AM |
 Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | AnwarKing | 10-05-10, 08:11 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | محمد البشرى الخضر | 10-05-10, 08:07 AM |
 Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | مُحَمَّدٍ عِوَضٌ احْمَدُ | 10-05-10, 09:02 AM |
| Re: جامعة السودان المفتوحة: ده فساد ! إشانة سمعة! وإللا امكانيات ؟ يمكن مرته ..يمكن اخته في الر | AnwarKing | 10-05-10, 11:50 AM |
|
| |
محمد مصطفي مجذوب
فيس بوك
تويتر
انستقرام
يوتيوب
بنتيريست