الشعبية نجمة تزين سماء مدينة الخرطوم بحري

Quote: الجمعة الجامعة ورب الكلمة السامعة:- جمعتنا الجمعة في وليمة كبيرة بمناسبة مولود جديد للاستاذ صديق عثمان شقيق الارباب صلاح عثمان ونقول الف مبروك للاسرة ويتربى في عزهم وبعد زمنا طويل التقي بالرجل الانيق الفخيم وصاحب الابتسامة الساحرة الحاج حمد وسوف اقول لكم سر ابتسامته بس بعد ان نهتف ونقول خلف الزعيم (عادل ود الدكتور )( لا للقطع . لا للبتر . لا للدكتاتورية ونعم حرية النشر ) وفيها نتذكر اخونا المناضل (عادل علي صالح ) مقولته المشهوره في تلغرافاته المكرره (البديك الفارغة اديهو المقدوده ) ويعتبر عادل علي صالح جاغريو الشعبية ونطلع من جو السياسة عشان البمبان ما يجينا . في تلك الليله اتحفنا الاستاذ صلاح كراكة بمواضيعة الجميلة ونكاته الخفيفة وذكريات الشعبية البهية واكرمنا الاخ صلاح كراكة واحضر لنا (الخروف ) فشكى الخروف وقال كده اول قولوا بسم الله .وبعد كده عاينكم ما تشوف الا النور . نهش تقيل . عضة جامده .وتشافتنا على الخروف زي دكتورة ستنا في الصغر ولم تبقى أي اثار للجريمة وانا اعترف بأن الحاج حمد بري كل البراءه من تلك الجريمة البشعة لانه كان متكي وواضع طقم اسنانه بالقرب منه واكتفي بسلطة الروب وانا اقترحت عليه ان نخلط له الخروف او نرسل رسالة سريعة الى دكتورة ستنا لكي تجد لنا حل .ومن ذلك نطلع بمعلومة ابتسامة صورة البروفايل لاخونا ود حمد صناعية وبختك ياعزام . سعادة المستشارعبد الكريم :- اخونا وحبيبنا الرجل الذي حمل اسمه وضرب لنا اجمل سماة الكرم وفتح لنا شبابيكة رغم مشغولياته وسمناراته الذي نعلمها لكي نكون في اتصال مع بحري طراوه وحفظك الله وحفظ فؤادك الطيب يا ابو محمد فؤاد . (والكلام ده ليك ياعزام يالمطير عينيك ) قال شنو من محن وليد عبد اللطيف . المهندس مجدي عبد الحليم : قبل كل ما ذكر هاتفني المهندس ووضح لي معنى اسم سعد قشرة ( قشرة ) فقال كما تعلم ياوليد ان تحديد الشعبية من جهة الشمال بيوت المزاد المقفول وهي عبارة مباني من القشرة وكان في السابق كل ما حول سوق سعد قشره بيوت من طين وهو ودكان سعد اول من بنى بالقشرة ولذلك كان دكانة واضح لتوضيح موقع السوق ويعتبر نفس ما ذكره استاذنا صلاح شوكو وتأخرت معلومة مهندس مجدي وانتم تعرفون الحاصل ( العين بصيره واليد قصيرة )وفي تلك اللحظات كان حاج حمد في ثباتٍ عميق لذلك تأخرة المعلومه ومعليش يا باشمهندس مجدي . كما ذكر معلومة خطيرة وقال معظم المساجد في الشعبية اتجاهات القبلة منحرفه . وهنا دور اخونا حاج حمد انزال الايميل مره اخري لكي يوضح لنا المهندس مجدي عبد الحليم اكثر في هذا الموضوع لانه قام بأبلاغ بعض ناس المساحة في ذلك . ويا لها من جمعة وعندما وصلت البيت فوجدت درر وروائع استمتعت بها . واستمتعت بعودة الاقلام الرشيقة ونضيف لها اخونا الفاضل يسين وعلى رأسها شكوكو . وياريت ياشكوكو تشيل صورتك وتوضع محلها صورة سابقه لشخصك مرسومة بيدك وتسلم الايادي وخلينا نتأمل ابداعاتك الفنية لكي ننعش بها عقولنا ونحن من هواة فن الرسم والخطوط . وكمية من التحايا لي اخوانا الثنائي المرح عابدون وشمس الدين ساتي الشرير والمشهور بعكازة المجلد بجلد البقر ( المريخاب والارهاب ) ودمتم ................ وليد عبد اللطيف